tg-me.com/youarenotalonehk_mailbox/3328
Create:
Last Update:
Last Update:
「塘福·新身份」
仲記得當日一聲六年量刑起點，再加上一句「泯滅人性也不為過」嘅形容，就好似一盆冷水咁淋熄咗旁聽席上親友嘅熱切關心，好心情瞬間消失。坐係犯人欄入面嘅我反而心情平靜，可能做好晒心理準備，知道無論判幾多都係要坐，只不過真係聽到六年量刑嗰刻，心都難免顫了一下。
好彩有成班好朋友一齊，一班人又返到幾年前嘅相識之地荔枝角，同幾年前帶住愁容入到藍色閘相比，呢次係指模房互相說笑，取笑對方著棕色衫好睇啲，又取笑對方終身號碼好難聽，就好似入咗營地咁；又一齊過咗幾晚無憂嘅日子，因為所有嘢都塵埃落定，最壞嘅結果都唔會再差過宜家了。
就帶住咁嘅好心情，又黎到既熟悉又陌生嘅塘福。望住個熟悉嘅綠色閘，回想起自己有幾多次係閘後面嘅探訪室等；又望到個熟悉嘅嶼南道，又回想起自己有份係山下嘅巴士站接朋友出冊；又望到下長沙沙灘，又回想起一班朋友係沙灘玩耍，講笑話到時泊正去塘福定石壁。不過宜家身份已經唔係嗰個自由出入嘅訪客，係一個要還自己幾年前債嘅人。
到今日差唔多到塘福一段時間了，心情說起其實唔錯，但仲適應緊成為定罪人士嘅唔同。入面時間好似過得好快，但覺得自己同世界脫離咗嘅程度又大咗，一黎資訊只有新聞，二黎友人同家人嘅消息有時差了，漸漸對外界嘅變化有無力感，但正如朋友同我講，專心坐監，係我宜家唯一可以做嘅！
說起塘福節奏好慢，但又好簡單。想學習、想運動、抑或想沉淪，都係靠自己嘅定力，呢度好少人會鼓勵你，又好少人會打沉你，因為大家都做自己嘢。但坐監咪就係咁，所以希望自己可以好似上封信咁講。最後可以帶走好多有用嘅嘢離開監房啦。
K 致上
2024年2月
ksleaving
BY 被捕人士收信部
Warning: Undefined variable $i in /var/www/tg-me/post.php on line 283
Share with your friend now:
tg-me.com/youarenotalonehk_mailbox/3328