tg-me.com/AhbabAhbab/28211
Last Update:
گلبي بغيابج يشتعل. جمر جمر
بلكت اشوفج والحلم يمر يمر
رحتي عني وتشب جمره
يمه وينج. هايه حسره
==========
يمه موت مصابج. هذا حال احبابج
عالدرب مشبوحه عين وعين للباب
شوفي هاي اجروحي. يمه تطلع روحي
يمه جرحي بغيبتج يالزهره ماطاب
اني زينب يالزجيه أو وحدي ظليت
رحتي عني وبألم ياييمه ونيت
كلشي مستاحش عليج استاحش البيت
باب وودمه وأصرخ. علي علي
الرد الشمس ماردهها. الي الي
يمه صوتي. بيه كسره
يمه وينج. هايه حسره
==========
كلها سوده ايامج واني احس بآلامج
واني ياييمه وريثه لهاي الآلام
ابابج اتشب نارج. يمه تحرگ دارج
وهاي نفس النار بأجر تحرگ خيام
يمه يالزهره المصاب اشسوه بيه
باب والنار وخيم والغاضريه
ثنينهن حسره وبقيت اصفگ بديه
دمعي على عيوني. نزل. نزل
ياگلبي المفارگ اهل اهل
بيه شبت. نار كبره
يمه وينج. هايه حسره
==========
گلبي شاب وراسي. وشيبت انفاسي
بلا طعم صار الهوه وشنهو الهوه
يمه عمري الضائع گلبي صار اينازع
بعيني ظلمه وماشفت خيط الضوه
هاي ليلة وحشتج والباقي جم ليل
ليل عاشر واهدعش شيخلي بالحيل
يمه بغيابج دمه هالمدمع ايسيل
محتاره وبعيني. صور. صور
ظلع انكسر كطعوا. نحر. نحر
حسين اخويه. هناك احظره
يمه وينج. هايه حسره
==========
عندي سبحه ودمعه. وروحي اوجن شمعه
عيني تتفايض دمع وأگليبي من نار
خلص عمري بنوحي واشيخلص اجروحي
كبالي بسمار ودمه والباب تذكار
ذكريات گبالي سوده وتنزف دموع
شكد ثكيل الباب يمه ورض الظلوع
لسه اسمع ونتج والمحسن ايلوع
طفلين اشوف بوكعته. طفل طفل
عبدالله وابنحره شفت نبل. نبل
گبالي گطعوا. يمه نحره
يمه وينج. هايه حسره
==========
والله شيب حالي. يمه عشتي أبالي
شنهو اصعب عالبنت واتروح امها
بيش اصبر روحي. شلون اسكت نوحي
زينب ازغيره وكُبَرْ كلش ألمها
خمسه الاسنين وشفت دم الوديعه
يمه بالخمسين أشيب عالشريعه
من اشوف اجفوف ابو فاضل گطيعه
يمكن اموت بشوفته. قهر قهر
حال السمه مضيعه. كمر كمر
إبلا يمينه وماكو يسره
يمه وينج هايه حسره
==========
تمت ولله الحمد المقصر مع الحسين
✍ علي النائلي
BY أحباب الإمام الحجه للقصائد والالحان
Warning: Undefined variable $i in /var/www/tg-me/post.php on line 280
Share with your friend now:
tg-me.com/AhbabAhbab/28211