tg-me.com/AsTA7891DsattarHAGAMY/1052
Last Update:
قصيدة في قدوم محرّم الحرام ،،،،،،
ــــــــــــــــــــــــــــــــــــــــــــــــــــ
هَل مُحـرّم جَـاب ويـّاه الدموع
وٱنحِنَت بالشيعة يحسين الضلوع
بدَمعة وبوَنّة وهِضـيمة
تِحيِـي ذكـراك الأليمة
وا حسينا
وا حسينا
ــــــــــــــــــــــــــــــــــــــــــــــــــــ
شيعتك لو هَل مُحرّم
كل بلاويهه تهون
مِنهو يِتجَرّأ يِقارِن
شِنهو إحنا ومَن نكون ؟!
بكل أرض تنصب عزاهه
بس دِمَه تسيل العيون
وترتفع فوگ المنازل
بالحزن راية شجون
آه يا مظلوم تلطم عالصدور
هذا ديدنهه على مَرّ العصور
بكل زمن تعقد مآتم
تذكر مصاب الأكارم
وا حسينا
وا حسينا
ـــــــــــــــــــــــــــــــــــــــــــــــــــــ
رَاح أخَبرَك ونته أعرف
شنهــو حـال الرافضية
ضاگت أنواع المصايب
مِن زمن حامي الحمية
دِفعَت بحُبك ضرائب
والقتل أبسط أذية
وبرغم كل هذا ظَلّت
عالعهد يبن الزچية
قدّمـَوا لزيـارتك چَـفّ الوَلاء
هذا عدهم يُعتَبر أرخص عطاء
كل مُحــب أصبـح مـراده
بحضرتك يحضى بشهادة
وا حسينا
وا حسينا
ــــــــــــــــــــــــــــــــــــــــــــــــــــــــــ
بكل زمان الطاغي يظهر
حاول بكِلّ الوسائل
تترك الأحرار دربـك
والكُتُب تِحمِل دلائل
حين أيّس مِن نفعهه
أصبح ايدوّر بدائل
منهج ابليس وجنوده
للبشر مدّ الحبائل
راد بالـدينـار يشـريهـه الذمـَم
ما حِصَد بِسياسِتَه بَس الوَهَم
ونصِدَم بَهل العقيدة
وبمواقـفهه العديـدة
وا حسينا
وا حسينا
ـــــــــــــــــــــــــــــــــــــــــــــــــــــــــ
فزعـت الدنيـا وربـعهـه
ولَنهه بس أحزاب تنظُر
كِلمن ايزيــح لرَغيـفَه
وصاحب الإيثار يِندُر
والرياء أفضل طريقة
حتى للغايات يِعبُر
ويِنتِهز كِل فُرصَة تُعرَض
وهَوّه أذكى الناس يِشعُر
والفقيـر متيّه لكـل الجهـات
والمرائي مچلّب بهاي الحياة
والله يعلم بالـنـوايا
كلهه مدّعية الهداية
وا حسينا
وا حسينا
ــــــــــــــــــــــــــــــــــــــــــــــــــــــــــ
منهه تجّار الضمائر
عنهه نكتبلك سطور
يسرق ٱحگوك وينافق
بالدّجل يمــلِك قصور
واللي يحملهه المباديء
صاحب ٱخلاق وغيور
صار مصدر للمشاكل
بَس يُقـابل بالنفـور
واليحبّك ظل يواجه مغريات
بعقله يِعمل ما يدوّر معجزات
ما ينافق ما يرائي
هذا منهج كربلائي
وا حسينا
وا حسينا
ــــــــــــــــــــــــــــــــــــــــــــــــــــــــ
لو مُحرّمكم هِلالَه
بَيّن تزيد المَواجع
كل مُحب يصبح شعوره
گلـبه مـن ٱضلوعه طالع
كلهه تستحضر خطابك
يوم عاشور الفـواجـع
والنشيد اللي قريته
لا أذلّ ولا أبــايع
بالمدارس لازم يكون النشيد
واحسيناً وا غريباً وا شهيد
ما نسينه الغــاضـرية
لا وحگ ضلع الزچية
وا حسينا
وا حسينا
ــــــــــــــــــــــــــــــــــــــــــــــــــــــــــــــ
بقلم الأستاذ / ستار عذاب الحچامي .https://www.tg-me.com/us/telegram/com.AsTA7891DsattarHAGAMY
BY الشاعر الأستاذ ، ستار عذاب الحچامي
Share with your friend now:
tg-me.com/AsTA7891DsattarHAGAMY/1052