tg-me.com/HHa19789/572
Last Update:
#تراث
صاحت وديعة فاطمة بعيال الحسين
يالفاطميين
آنه أصبحت متكفله ياللي كفلتوني
ــــــــــــــــــــــــــــــــــــــ
لفت محنية لضلوع وراكضة بوسط المعارة
شابچه على الراس عشره والدمع دم يتجاره
وجمرة الغربه إحرقتها وهيجت للگلب ناره
نار النوايـب والجمر
طفتها بدموع الصبر
وفوضت للباري الأمر
والعهد حفظت اسراره
صاحت يافرسان العهد عالعهد ماشين
يالفاطميين
آنه وحرمكم لليسر ساعه ويمشوني
ــــــــــــــــــــــــــــــــــــــ
شلون وگفت حزن زينب وگفت تحشم باهلها
تشتعل روح العقيله وحرگ المخيم شعلها
گطعت الونه من أهلها وعالصبر صرت املها
وصدت لبو اليمه بنظر
مصيوبه بسهام الگدر
ملتني سطوات الدهر
وانه روحي ما تملها
لاچن عليكم يا هلي ما تنشف العين
يالفاطميين
ماتنطفي نار الگلب من دمعة عيوني
ــــــــــــــــــــــــــــــــــــــ
يا هلي آني العزيزه زينب ربات المعالي
چنت محجوبة بذراكم وما بشر شاهد خيالي
والنسم ينظر البيه چان بعزي ودلالي
راح الدلال بكربلا
شال الخدر شيلة هله
وگلبي بالفراگ ابتلى
وصوبه مصرع الوالي
لو عاتبتكم يا هلي وانتم مطاعين
يالفاطميين
غصبا عليه أعتب عليكم لاتلوموني
ــــــــــــــــــــــــــــــــــــــ
يا هلي والدهر بينه عمله ما صارت عملها
وما على الوليان معتب من يوافيها اجلها
والذي تفگد أهلها غير المعاتب اشئلها
عتبي عليكم يخوتي
من جور دهري وغربتي
يا كسرتي ويا ضيعتي
وگلبي چم شده يحملها
ظنيت يا هلي بكربلا هدم الصواوين
يالفاطميين
بيها إنهدم بيتي عليّه وصدگت ضنوني
ــــــــــــــــــــــــــــــــــــــ
يا هلي وحربة الصابت عين عباس وعمتها
اصوابها اثر بشوفي وشمعة عيوني طفتها
يا هلي وگطعت چفوفه غروس گلبي كطعتها
يـاهلي ومن طاح العلم
كبر صريخ من الخيم
ومن فزعة گلوب الحرم
افزعت روحي وصبرتها
يابالفضل ظهري انكسر من صاح الحسين
يالفاطميين
وانه احسبت حبل اليسر بيه دارو متوني
ــــــــــــــــــــــــــــــــــــــ
يا هلي واعظم مصيبة المرت عليه وشفتها
وحدت هموم افجعتني وخذت روحي ومردتها
جدمت بيدي جواده والأمانه سلمتها
وشفت بعيون تطايرت
من الحرم والضجه علت
نشفت لدموع الـجرت
والفواطم أمنتها
طيحت حسين بمصرعه رجت الكونين
يالفاطميين
وانه احملت هالنايبه بالصبر تدروني
المرحوم الشيخ مهدي السماك الكربلائي
(191)
#اللهم_عجل_لوليك_الفرج
BY تراث القصائد الحسينية
Warning: Undefined variable $i in /var/www/tg-me/post.php on line 280
Share with your friend now:
tg-me.com/HHa19789/572