tg-me.com/Jaffarattea/7274
Last Update:
محرم 1445ه_2023م
قصائد السبي
عمت عيني تأذه حسين كلش
فوگ الرمح ظل الراس يرعش
مو سهله المصيبه ترى زينب غريبه
فوگ الرمح ظل الراس يرعش
★★★★★★★★★★★★★★؛
على راس الرمح راس الولي اتلوع
يشاهد خدر هاشم للسبي يطلع
تبلل رمحه من گد ما جره المدمع
خويه حسين بويه حسين ظل يسمع
متحير بقه شيسوي الحسين
لا رجلين عده ولا كو چفين
والجثه تريبه ترى زينب غريبه
فوگ الرمح ظل الراس يرعش
★★★★★★★★★★★★★★؛
على زينب بقت تتباوع انظاره
ويشيط الراس من تضربها الحجاره
سمع حجي العده وظل دمعه يتجاره
ما ظل عدها والي يشيل بتاره
ذاك حسين صاحو ذاك عباس
اضربوها السبايه حيل يا ناس
الكل واحد كتيبه ترى زينب غريبه
فوگ الرمح ظل الراس يرعش
★★★★★★★★★★★★★★؛
على طول الدرب ظل منشده باله
شيرتاح اليشاهد تنولي عياله
يشوف سياط تتگطع على اطفاله
من الصبح لليل الدمع فاله
شخلت بالسبط گوم آل اميه
وگباله يسحلوها رقيه
ما يفزع عجيبه ترى زينب غريبه
فوگ الرمح ظل الراس يرعش
★★★★★★★★★★★★★★؛
راس حسين ظل من كل جهه يفتر
مره الزينب يصد مره للخدر
بقت مفتوحه عينه يسدها ما يگدر
لأن بت علي تمشي برفگة العسكر
شلون يبات نايم جفن عينه
وطول الليل سهرانه الحنينه
يباري للسليبه ترى زينب غريبه
فوگ الرمح ظل الراس يرعش
★★★★★★★★★★★★★★؛
عزيزه الاخت عد اخوانها يا ناس
خصوصا مثل زينب بيها رفعة راس
چان حسين دوم يسولف العباس
ينجاس الهوى وزينبنه ما تنجاس
لكن من بعد ذبح الحبايب
صارت ماشيه وي الاجانب
مچتوفه الحبيبه ترى زينب غريبه
فوگ الرمح ظل الراس يرعش
★★★★★★★★★★★★★★؛
جعفر عطيه البزوني
رابط القناة @Jaffarattea
للتواصل @jaffarsds
BY جعفر عطيه البزوني
Warning: Undefined variable $i in /var/www/tg-me/post.php on line 280
Share with your friend now:
tg-me.com/Jaffarattea/7274