tg-me.com/ML_mahhde/11428
Last Update:
محرم 🔻
ترافة نحر 💔
لحن يخيمات
الرباب عليها السلام
ـــــــــــــــــ ❁ ❁ ❁ ــــــــــــــــــ
يالسهام عوفن رگبة وليدي يالسهام
ولا نام فز من العطش يبچي ولانام
ريـت بـحضـني ضـمـيتـه بـالخـيـام
ـــــــــــــــــ ❁ ❁ ❁ ــــــــــــــــــ
عبد الله يالنحرك ترف اشلون السهم يصيبك
ترفس مثل طير انذبح وانت بحضن حبيبك
ضيعتك امـن ايدي وبعد يا يـمه مـن يجيبك
كلمـن نصـيبه بدنيـتـه وانـت الذبـح نصبيك
يمذبوح..
ردتك مـاي تتروه يمذبوح
تالـيها تـرد لأمـك بـلا روح
بعدك ينترس گلبي بالجروح
ـــــــــــــــــ ❁ ❁ ❁ ــــــــــــــــــ
كلشي بحـياتي توقعـت بـس تنـذبح ماضنيت
لمن خبر موتك وصل من دم دمع يمه ابچيت
لمـن تصد عينـي المـهد نايـم اشـوفك ياريـت
من طلعتك مـن الخيم ما تدري بـيه شسويت
ولا اشوف ..
بعدك يعمن عيونـي ولااشوف
مذبوح بسهم نحرك بالطفوف
مـا يحتـاج ذباحـك للسـيوف
ـــــــــــــــــ ❁ ❁ ❁ ــــــــــــــــــ
لمن صرت يمه افرحت والفرحه بس ست شهور
كل ظني من تكبر ردت بس عينك اتشوف النور
تصبـح سنـد وكـت الكبـر والأمـك اتصير السور
مستعجل الـمن عالهجر گلب امك يظل مكسور
الگـلوب ..
مـايجـبر كـسر بيها الگـلوب
لـمـن تبتـعد منـها يمـحبوب
تنطر جيتك وتگعد بالدروب
ـــــــــــــــــ ❁ ❁ ❁ ــــــــــــــــــ
الورده تـوگع والغص متن تنگطع هم يطيح
يا ورده يالدمك عطر مـن تنگطع منها يسيح
هـو الورد مـن ينذبح مـو بالسهم كون بريـح
ومن الترافه يشع ضوه من رگبتك من تصيح
يشفاف ..
وجهك بالشمس يضوي يشفاف
من گتد الضوه بوجهك متنشاف
من عـمك گمر هاشم الاوصفاف
ـــــــــــــــــ ❁ ❁ ❁ ــــــــــــــــــ
من السهم جـاس النحـر معقوله ما تندم
الله اليساعد والدك من رگبتك شال الدم
من شافك بحضنـه متت گلبه شكثر تألم
حيرنـي هالموقف تـره منـه الصـبر تعلم
يمولاي ..
صبـرك حــير العـالـم يمـولاي
ظيم المر عله گلبك تره هواي
عبد الله انذبح بيـدك بلا ماي
ـــــــــــــــــ ❁ ❁ ❁ ــــــــــــــــــ
لمـن مشينـه لليـسر رحـله شكثـر بعيـده
مايرهـم الراس برمـح مـن ينگطع وريده
كلش جبيره اعله النحر ماترهم الحديده
خافن يگـع حتى الهـوه لا مـا يهب اريده
تره يطيح..
من راس الرمح راسك تـره يطيح
الـزم گـلـبـي كــل مـره تـهـب ريـح
روحي عليك كل خطوه تره تصيح
ـــــــــــــــــ ❁ ❁ ❁ ــــــــــــــــــ
✍️كلمات
عباس فاضل الشمري
https://www.tg-me.com/us/قصائد والحان الرادود مهدي الزينبي/com.ML_mahhde
BY قصائد والحان الرادود مهدي الزينبي
Share with your friend now:
tg-me.com/ML_mahhde/11428