tg-me.com/Najmiddin_Ermatov/1006
Last Update:
Кузак, йўлимга сув сеп,
Ўнгирим чангга ботган,
Тошларга ранг улашган
Қоним товонда қотган,
Фақат сароб кўрсатиб,
Ўйимни бойлаб ётган
Саҳроли йўлдан ўтдим.
Бархан ортида бир кўшк
Ичида гулгун пари,
Қумлар йиққан хотира
Куйдирар борган сари,
Қанчалар бўзлаб чопсам,
Шунчалар кўздан нари,
Ҳижрон комига отган
Жафоли йўлдан ўтдим.
Нетайки, алп эмасман
Учарга тулпорим йўқ,
Ечарга тушовимни
Қирқталаб чилтоним йўқ,
Шуурга гард юқтирмай
Ўтарга имконим йўқ,
Зулматни тўсиб ётган
Дарёли йўлдан ўтдим.
Нарида бир музофот
Божга умринг сўрайди,
Қавми бир зиндон қурган
Минг йилдирки тўлмайди,
Руҳингни синдирмасдан
Ўтказгани қўймайди,
Урҳо-ур бўлиб ётган
Ғавғоли йўлдан ўтдим.
Кузак, сенга не берай?
Умримни йўққа сотдим,
Қанотини синдириб,
Руҳимни тўрга сотдим,
Узоқ йўлда юк бўлган
Танимни гўрга сотдим,
Идраган кўнгил билан
Савдоли йўлдан ўтдим.
Кузак, йўлимга сув сеп...
https://www.tg-me.com/us/Najmiddin Ermatov/com.Najmiddin_Ermatov
BY Najmiddin Ermatov
Share with your friend now:
tg-me.com/Najmiddin_Ermatov/1006