tg-me.com/Reda_Allah/204444
Last Update:
سؤال:
أنا بحب واحدة زميلتي ونفسي أرتبط بيها بس مش هاقدر حاليا , وخايف تضيع مني ,,, أعمل إيه ؟
جواب:
ده سؤال جالي من فترة وفكرني بأجمل مرحلة في حياتي
لما كنت معجب بزميلتي في الجامعة وخايف تضيع مني .
من 15 سنة تقريبا كنت في تالتة جامعة وكان معايا زميلة محترمة في نفس الدفعة اعجبت بأخلاقها ودينها فوقع في قلبي منها حب ورغبة في الارتباط بها , بس طبعا كان الأمر شبه مستحيل
لأني أولا طالب لسة وثانيا لأن دخلي من عملي كان قليل نسبيا وماينفعش يفتح بيت
وبالحسابات الواقعية وبالورقة والقلم كان مستحيل أقدر أتقدملها
.
لفترة كبيرة فضلت الفكرة تؤلمني جدا وخوفي من انها تضيع مني كان مشتت تفكيري حرفيا , ولا بقيت عارف أركز في مذاكرة ولا في الشغل , بس بعد الاستعانة بالله وصلاة الاستخارة المتكررة , قررت أتصرف بكل الأشكال علشان أوصل لها
.
من صغري والدي ربنا يحفظه كان معودني على الشغل علشان أطلع راجل أعرف أشيل مسؤولية , بس علشان أقنعه انه يكلم أهل زميلتي كان لازم أقنعه اني قد المسئولية الأول
بعدها ضاعفت شغلي في شركة الكمبيوتر إللي كنت شغال فيها وبدأت أحوش كل دخلي بدل ما كنت باصرفه على نفسي أول بأول , ووالدي مستغرب من الهمة والنشاط إللي بقيت فيهم
.
بعد فترة دخلت على والدي بابتسامة واسعة وفاتحته في الموضوع وإني بحب زميلتي وعايز أتقدم لها
طبعا رفض ;DD
.
لأن فكرة ارتباطي في سن 20 سنة كانت عجيبة خاصة وإن اخوتي تزوجوا في سن الثلاثين , وكانت وجهة نظره اني عيل ومتسرع وهارجع في كلامي ,وممكن أظلم بنات الناس معايا
وبعد محاولات لإقناعه فضل على رفضه
.
لجأت بعدها للعصيان المدني
مابقتش أكل معاهم ,,, على طول قاعد لوحدي ,,, أهملت نفسي جدا وبقت دايما في نظرة حزن في عيناي
بعد فترة والدي وافق إن والدتي تكلم والدة زميلتي تطلب منها "ربط كلمة" والخطوبة بعد الكلية , ووافق أهل زميلتي بشرط إن مافيش اختلاط يحصل بيني وبينها في الكلية ولا كأني أعرفها
وأنا ماكنش عندي مشكلة لأن زميلتي ماكنتش هاتسمح بده أصلا
.
العجيب إن الأمر كان شبه مستحيل لإمكانياتي المتواضعة وقتها بس أنا استبشرت بحديث النبي عليه الصلاة والسلام
"ثلاثة حق على الله عونهم:
والناكح الذي يريد العفاف"
طوال فترة الجامعة كنت شغال وبادرس , ومستبشر جدا
فجأة الشركة إللي كنت شغال فيها قفلت !
خفت جدا وتوترت بس افتكرت حديث النبي فاستبشرت
.
قدمت في شركات كتير وبعد إمتحانات السنة الأخيرة مباشرة وقبل موعد التقدم الرسمي لخطبتها بأيام , شركة من إللي اتقدمت ليها كلمتني انها عايزاني أشتغل معاها وبمرتب جيد وقتها
فإفتكرت حديث النبي وبشارته فشكرت
.
تمت الخطبة بفضل الله ومرينا بصعوبات ومشاكل في توفيرالماديات بس كان دايما حديث النبي قدامب بشارة وحافز , فكملت وأنا أملي في ربنا
حاليا بعد 15 سنة زميلتي هى حاليا زوجتي ورزقنا الله من فضله يوسف وسمية وخالد ربنا يحفظهم , ومالك ابننا ربنا يرحمه
#بتحبها_اتقدملها.
علي عبدالله .
BY رضا الله غايتي.
Warning: Undefined variable $i in /var/www/tg-me/post.php on line 280
Share with your friend now:
tg-me.com/Reda_Allah/204444