በተለያዩ የሀገሪቱ ክፍሎች ህዝባዊ ውይይት እየተካሄደ ነው

ሰኔ 2/2016 (አዲስ ዋልታ) “ከተረጂነት ወደ ምርታማነት፤ ለተሟላ ሀገራዊ ሉአላዊነት ክብር” በሚል መሪ ሐሳብ በተለያዩ የሀገሪቱ ክፍሎች ሕዝባዊ የውይይት መድረኮች እየተካሄዱ ነው፡፡

ውይይቱ ላይ የፌደራል፣ የክልልና የከተማ አስተዳደር ከፍተኛ የስራ ኃላፊዎች የተገኙ ሲሆን የተለያዩ ህብረተሰብ ክፍሎች እየተሳተፉበት ይገኛል፡፡

የውይይት መድረኮቹም በሸገር ከተማ፣ በጋምቤላ፣ በድሬዳዋ፣ ቢሾፍቱ፣ ደብረብርሃን እና ቦንጋ እንዲሁም ሌሎች የሀገሪቱ ከተሞች ነው በመካሄድ ላይ የሚገኘው፡፡

በቄለም ወለጋ ዞን 367 ሺሕ ሄክታር መሬት ለማልማት ታቅዷል - የዞኑ ግብርና ጽሕፈት ቤት

ሰኔ 2/2016 (አዲስ ዋልታ) በቄለም ወለጋ ዞን በቀጣይ ክረምት ወራት ብቻ 367 ሺሕ ሄክታር መሬት በተለያዩ ሰብሎች ለማልማት መታቀዱን የዞኑ ግብርና ጽሕፈት ቤት ገለጸ።

የጽሕፈት ቤቱ ኃላፊ ሙልዓታ ዋቅጅራ እንደተናገሩት በዚህ ክረምት ከሚለማው 367 ሺሕ ሄክታር መሬት ውስጥ 288 ሺሕ ሄክታር መሬት በክላስተር ይለማል።

እስከ አሁን በተሰራ ስራም 353 ሺሕ ሄክታር መሬት የታረሰ መሆኑንና 11.8 ሚሊየን ኩንታል ምርት በዞኑ ከሚከወነው አጠቃላይ ልማት የሚጠበቅ መሆኑን አንስተዋል።

በተለይም በስፋት በዞኑ የሚለማው የበቆሎ ምርትም 50.6 ሺሕ ሄክታር መሬት ላይ የሚለማ መሆኑ ገልጸው ከዚህም 2.6 ሚሊየን ኩንታል ምርት ይጠበቃል ብለዋል።

በኦሮሚያ ክልል ግብርና ቢሮ ኃላፊ ጌቱ ገመቹ የተመራ ልዑክ በዞኑ ሰዲ ጫንቃ ወረዳ እየለማ የሚገኘውን የበቆሎ ምርትም ጎብኝቷል።

የወረዳው አስተዳዳሪ ዑመር አደም በወረዳው 31 ሺሕ ሄክታር መሬት በተለያዩ ሰብል የሚለማ መሆኑን አንስተው 19 ሺሕ ሄክታር መሬት የሚሆነው በክላስተር የሚለማ መሆኑን ገልጸዋል።

ከዚህም ውስጥ 4 ሺሕ 500 የሚሆነው ሄክታር መሬት በበቆሎ ምርት የሚለማ መሆኑንም ኃላፊው አንስተዋል።
በወረዳው ከበቆሎ ምርት ባሻገር የስንዴ፣ ሩዝ፣ ሰሊጥና ትኩረት የሚሰጣቸው መሆኑንም ተናግረዋል።

የዞኑ አስተዳዳሪ ገመቹ ጉርሜሳ ከ2008 ዓ.ም ጀምሮ የቄለም ወለጋ ዞን በፀጥታ ችግር ሲፈተን መቆየቱን አንስተው በዚህም በርካታ የዞኑ ወረዳዎች ጉዳት አስተናግደው ቆይተዋል ነው ያሉት።

ይሁንና ባለፉት ሶስት ዓመታት ማህበረሰቡ ከፀጥታ አካላት ጋር ተደራጅተው በመስራታቸው አሁን ላይ ሰላም መስፈኑን ተናግረዋል።

ጠ/ሚ ዐቢይ አሕመድ (ዶ/ር) እና ሌሎች ከፍተኛ የመንግስት የሥራ ኃላፊዎች የተጠናቀቁ የኮሪደር ልማት ስራዎችን ሲጎበኙ - በፎቶ