tg-me.com/aljanabe313/4461
Last Update:
خويه من شفت المصيبه // كلبي يتوجر لهيبه
وانه يبن امي غريبه // وانت عني رحت وين
***
خويه جسمك من تكطع // خويه ذاك اشلون مصرع
عليك ذيج الخيل تفزع // عليك كلهم فازعين
******
داست الخيل على صدرك // هشمو يا خويه ضلعك
همه كسرو ضلع امك // همه ليك امعودين
***
خويه من غارو علينه // فرهدو عزنه وحلينه
وليه ياخويه ولونه // علينه همه حاقدين
*****
خويه من رحت وعفتني // وللاعادي سلمتني
عدمن انت امنتني // واحنه عكبك ضائعين
******
ما دريت اشلون بينه // حركو اخيمنه علينه
عالنهر طايح ولينه // والجفوف امكطعين
******
شفت من جسمه تخذرم // والجسد مخضوب بالدم
صوبو سهم المحتم // منه طفه السهم عين
شفته وجفوفه كطيعه // من وكع يم الشريعه
صاحت امه اشها الفجيعه // هلت المدمع حزين
*******
خويه ومصاب الجرالي // من شفت هالمهد خالي
امه تتلوع اكبالي // اتصيح ايبني الحنين
****
خويه لمن شفت الاكبر // خويه صاحت الله واكبر
خويه كل جسمه توذر // بالسيوف امطبرين
******
خويه من انصاب كلبك // والسهم نابت ابجبدك
عالترب من سال دمك // كمنه نصرخ يا حسين
*****
عالترب من سال دمك // سال دم الهادي يمك
من انكسر ياخويه ضلعك // ضلع امك كبل حين
*******
صاح جبريل على ذبحك // والملك ناح على جثتك
ايوب متعجب ابصبرك // ولاسف الصالحين
******
خويه من عفتك سبوني // وعلى النوك ايرجبوني
بالحبال ايجتفوني // والضعن يحدي لوين
خويه فوك النوك نركب // وآنه اابوي الطبر مرحب
انه اخوي الجان كوكب // واحنه جنه امحدلين
*****
خويه والسجاد عندي // ايده مجتوفه لزندي
كوه تتلوه على جبدي // واحنه بيها املوعين
******
ريت لو تحظر اكبالك // بالضعن تنظر اطفالك
ابعد علينه وصالك // يبن امير المؤمنين
******
رحنه ياخويه ابضعنه من وصلنه الشام شفنه
بالاعياد استقبلتنه // بينه همه امعيدين
****
عيدو ياخويه بينه // تنشد الوادم علينه
منين انتم ويا مدينه كالو انتم خارجين
***
واحنه اولاد العداله // احنه اهل البيت واله
لاجن ايزيد ورجاله // كال طبو صاغرين
*****
خويه طبينه المجانه // خويه شفت الخيزرانه
على راسك صحت وانه // شيل ايدك عن حسين
خويه وين اهلي الجفوني // وين راحو فاركوني
للمصايب سلموني وين اغطي الوجه وين
******
وين راحو عني اخوتي // ريت كون ايصير موتي
أنه لما ينسمع صوتي // وهسه احنه اميسرين
*****
وين راح الي كفلني // وللخدر محد يصلني
خل يجي ويشوف متني // بالسياط املوعين
*****
خله يكعد وانه اسمعه // وبمصابي ارد افجعه
ما بكت بالعين دمعه // وعلى افراكه امعذبين
******
بعد شحجيلك مصايب // منها خويه الكلب ذايب
اليوم عدنه بدر غايب // جدك الهادي الامين
****
خويه جدك راح عنه // وانطفت شمعت املنه
فكدك يخويه كتلنه // واحنه بيه امصوبين
****
ابفكدك ياخويه انولينه // والمسافه اطول بينه
هالاحقاد اتحيط بينه // حين غاب النبي حين
حين غاب النبي صحنه // راح نستقبل المحنه
بيد هالظلام طحنه // علينه همه دائرين
***
بالحقد والحقد منكر // والظلام لودام دمر
كوم يا كرار واحظر // يا امام المتقين
***
كوم يا حاظر الشده // لامتك صفيها وحده
نعرف الحك وتسنده // وعلى نهجك سائرين
****
كوم يا عقد الولايه // ثبت حروف الهدايه
انت اول كل بدايه // انت مهدي المهتدين
********
الشاعر المرحوم ابو سجاد الجنابي ِ
BY قناة الشاعر ابو سجاد الجنابي
Warning: Undefined variable $i in /var/www/tg-me/post.php on line 280
Share with your friend now:
tg-me.com/aljanabe313/4461