tg-me.com/am_jafar/8005
Last Update:
موشح للأمام علي عليه السلام ( گوم صلي )
گوم صلي ... وعوف هاي النومه
اتصيح بويه وتلطم المهضومه
هاك بويه ميزرك واعمامتك
حلوه بالمحراب تعجب وگفتك
خل اتچيلك واشدن هامتك
دولبتني هامتك مهشومه
گوم صلي ... وعوف هاي النومه
هامتك بالسيف بويه امهشمه
من امس لليوم تتناگط دمه
اسمع اونين ومناحه بالسمه
ومنبرك مهضوم ياجيدومه
گوم صلي ... وعوف هاي النومه
منبرك مهضوم ياحامي الدخيل
لاتفك عينك ولاتگدر تميل
ينهدم حيلي امن اشوفنك عليل
روحي مثلك گاضيه ومالومه
گوم صلي ... وعوف هاي النومه
روحي مالومه وگضت وي روحك
جرحي ينزف من اشوف جروحك
سيف ابن ملجم ندامه ايلوحك
وانته محد گابلك بالحومه
گوم صلي ... وعوف هاي النومه
محد ايلاويك لو صارت حرب
ياشجاع وياغيور وياصعب
تالي ماتالي بصلاتك تنضرب
ضربت اليكره صدگ ميشومه
گوم صلي ... وعوف هاي النومه
طاحت الضربه اعله راسك بالجبين
من عمت عين اللعين ابن اللعين
كون اموت ومااودعك يالحنين
اوجهك ايضيعن عليه ارسومه
گوم صلي ... وعوف هاي النومه
اشلون اودعنك واضيعك بالتراب
علمتني اعليك موش اعله الغياب
يامصيبه ايشيل گلبي وياعذاب
امصيبتك وامصيبة المظلومه
گوم صلي ... وعوف هاي النومه
لشاعرة اهل البيت
ام هجران العمارچية
غير مبري الذمه من يمسح اسم الشاعره او ينسب الرثاء لشخص اخر
https://www.tg-me.com/amhejran12345
BY قصائد العلويه ام جعفر
Share with your friend now:
tg-me.com/am_jafar/8005