tg-me.com/asaadshaker/44957
Last Update:
بعيني ادموع وبكل ليله احاجيهن
المحرّم ضامهن والزينب ابجيهن
ــــــــــــــ
بعيني ادموع تشبه للجمر وأكثر
دموعي وياي والعاشور تتنطّر
علخدّي لوجرت صرخات تتفجّر
وهيج بكل سنه للزهره اهديهن
ــــــــــــــ
عيوني والدموع انخلقن امنجله
للكَدام عينه سلّبوا اهله
جرت دمعاته شاف انياكَهن هزله
والاعظم شمر للشام سابيهن
ـــــــــــــ
دموعي ينزلن شما مر ذكر خيمه
شما اسمع يتيمه لازمه ايتيمه
اليعمه امن البجي لتلومه من ضيمه
اعله زينب من دمه دمعاته يجريهن
ـــــــــــ
دمعاتي رزق من فاطمه الزهره
شما يجرن اكَولن بختي اشكبره
ينزلن هيج كلما عالخدر اقره
بيني وبين روحي ابياتي انعيهن
ــــــــــــــ
ادريهه الدموع التنهمل ذخري
شموع يصيرن ويضولّي ابكَبري
وتتجسّد مواكب دمعتي ابحشري
ولم حسين وام عباس انطيهن
ـــــــــــ
شلون ا دموعي توكَف والمحب ضامي
شلون ومنحره فوك الترب دامي
انه البدموعي كاتب حزن الامي
واليالي محرم بالبجي احييهن
ــــــــــ
الشاعر محمد حسن ضيغم
https://www.tg-me.com/us/قناة لاحياة بلاحسين/com.asaadshaker
BY قناة لاحياة بلاحسين
Share with your friend now:
tg-me.com/asaadshaker/44957