tg-me.com/hsaennn/6634
Last Update:
نعي محرم
زينب عليها السلام والفاقدات اولادهن عندما يهل هلال محرم
-------------------------------------
هل اهلال حزني وزاد وني
اعيش بكربله لليـــــــوم چني
خذاك البين خوية بساع مني
عليكم ماكَطع نوحي اونيني
---------------------------------------_
على الزينين ماتبطل دمعتي
شد وياي شنهي يريد وكتي
ترة فراكَ الاهل فتت مهجتي
ليل انهار بس اتسيل عيني
---------------------------------------
نتكَابل على هدومك نــــشمها
ورسومك حسافة تراب طمها
ودارك تنتحب ماهم زلــــــمها
تكَول الراح مني هم يجيــني
---------------------------------------
لسان حال زينب بعد فقد الحسين
---------------------------------------
الجنازة اتريد من يبچي لجلها
وكل غالي على مـــتونة حملها
شـــــلون البالغرب ظـلوا اهلها
احشم ما فـــــزع واحد دفنهم
-------------------------------------------
يــتخير الزيــــــن المـوت مالة
والفاكَد عزيــــــزة شـلون حالة
يجــيم النوح والمـدمع حلالة
وانة ليل ونهار اندب لـجلهم
--------------------------------------------
عادت كل نعش من بيتة يطلع
اوراه اولاد والـخـوان تفـزع
ظل بارض الغرب جسمة تكَطع
حسين واخوتة واولادة كلهم
-------------------------------------------
رملة ام القاسم
**
يبعد رويحتي يابعد شيبي
اشمن بيك چن شمة عذيبي
ييمة اذكر رباي ودر حليبي
خذاك البين ياوسفة من ادية
*
يشمعة بيتي ياضي البالعيون
يبعد امكم فرد روحة تروحون
الفاركَها ضناها تصبر شلون
بطول الليل دمعتها جرية
**
اسهرلك ليالي وانـحب ايام
يبو طول الحلو دلالي محتام
اشوفنك يغالي بس بالاحلام
صارت شوفتك حسرة علية
*
اليروح وليدها يزرف كَلبها
مسيل عيونها ايشيب هدبها
تظل انوب ما تندل دربها
ادور عليك ويكَودون بية
*
ليلى ام علي الاكبر
*
چنت بالبيت يامدلول شمعة
طفت واليوم بس ظليت دمعة
لون كَلبي تشوف شلون وضعة
يكسر خاطرك بالبيت حالي
****
افرشلك فراش ابجية الليل
وهدمك اشمها يالولد حيل
اغطيها بعباتي ودمعتي تسيل
اخاف من الهوه تبرد يغالي
*
الله ايعين من فكَدت ابنها
شباب وبالكَبر وبعيد عنها
يبعد امك نحل امك بدنها
لا هادت نهار ولا ليالي
***
أسالكم الدعاء رائد الاسدي
BY قناة ابو محمد الاسدي
![](https://photo.tg-me.com/u/cdn4.cdn-telegram.org/file/u2r9oaaQqvXXlTi-6_9Qs2eeBqw_jz-s76vyAXy2aw6ePmkRD2ZEnfMImGyxfNZUquEwO65XiqgNdsSt3csYkoKBNAtHKgqlFHrrEDVcOfQ07O92PYfF3Efy5YQRkLtvwU0WMCYg6LGYk89rYy-mLpDPpISkUBiID96GgrisSLxqPbsu3N7fV4dQ3A1vivwwoRYGawvYPliIgJtRpQUqGFF02qVBEFplv7bl3OvxRKBbDv8zm2ykgDvbrsJkqRCzhyerJb-8KDZAluahJleN2SuOtfKm8lvdv5InC7qKbD-2mf816BpVW9-v4vJncOzVGfDIFkw_d80dk-A7euY6nA.jpg)
Share with your friend now:
tg-me.com/hsaennn/6634