قصيدة المشاية


القصيدة كُتبت على بعض احاديث مولانا الامام الصادق عليه السلام

كاني به يقول

يا مَنْ وَفَيتُم
وما اتبَعتُم غَيرَنا
يا مَنْ صَبَرتُم
عَلى الأذى فِي جَنبِنا
نحنُ وَعَدنَا
ولَن نُخالِفْ وعدَنا
واللهِ أنْتُم
فِي كَنْفِنا وَحِفظِنا
.
الغيارى اهل الحمية
الطاهرين اهل الشهامة
العلينه يرف گلبهم
رفة اجناح الحمامة
الامنوا درب الله واحد
هو بس درب الامامة
فتيه لا خوفاً عليهم
بامان الله وسلامة
……………………………..

ان اراد الله بعبدٍ خيرا ، قذف في قلبه حب الحسين
وحب زيارة الحسين

.
حُب حسين خليه يحدي گلبك
وخل يملك احلامك هذا حبك
هاي الدنيه بالراحة ترغبك
بس مقصدها تلهيك وتتعبك

.
اذا رايد تجاور فاطمة وحيدر
والله يباهي بيك اهل السمه والبر
اكسر گلبك وطيح دموع العين
ومشية عبد امشي لباب ابو الاكبر

.
خلي تروح
وين تريد الناس تروح .
روح انت لمحبوب الروح .
ولون خطواتك بالنوح
محبوبك ظامي ومذبوح

……………………

يا زائِري قبرَ الحُسينِ ابنِ علي
وبطشُ أعدائِهِ لا يَمنعُكُم
سجدتُ للهِ العليِّ راجيًا
بِدمعَتِي وَحُرقَتِي أدعُو لَكُم
.
استودعُ اللهَ معَ الأبرارِ
أبدانَ تلكَ الثُّلةِ الاخيارِ
يا ربِّ ارحَمْ مَن قَذَت أعيُنُهُم
لِما جَرى لِمُهجةِ المُختَار ِ
وارحمْ قُلُوبًا جَزعَت لِظُلمِنا
وصرخةً مَملوءَةً بالثَّار
………………….
خليّ حزنك لمولاك همك
وضيع باسمه وباسمه يلمك
مثل الحرگ ذاك اللاح الخيام
طاري حسين يحرگ كون دمك
.
البحضن امه فاطمة ينام
استوحدوه اشباه الازلام
ومن المهر بعدته السهام
وطيحة الماي اعلى الارض طاح
.
ومن شافهم غارو للخيام
گام الشهم بس طاح من گام
اتحسس بگلبك هاي الالم
لحد ما تحسهن صارن ارماح
……………………

امشي ولا تفاركها عبرتك
ومن توصل الحائر هل دمعتك
ولامه فاطمة اعلنها كسرتك
واذكر نوحها وكسرة كلبها
.
كرهاً حملته من درت يضمه
من يوم الاجه تبجيله امه
كل ساعه تلوليه وتشمه
بس تالي العطش ضيع تعبها
…………………..

اخلص وجد بخدمتك
وبدمعتك
عيش بكسر خاطر
.
ولصاحب الثار انتظر .
والمُنتَظر
يخليك اله ناصر
.
اليطلع وساعة طلعته
تهب غيرته
وتسر شكو مكابر
.
ولو سوه من الدم نهر
ما تنجبر
يا كسرة العاشر

القصيدة توصيف لسان حال الامام المهدي عجل الله فرجه الشريف
……..

غريب وعايش الوحدي
ولا خوان تبرالي
انه المقتل احبابي
ما فارك ابد بالي
بهاي الدنيه ما مثلي
بسيف وسم كضو اهلي
ما رحمت بني الزهره
الدنيه وغربت حالي
.
بهلي شعمل هذا الوكت
اتغربو واتغربت
مالي اخو يعين الگلب
ولا عالبجي عانتني اخت

~~~~~~~~~~~~~~~
مراقد اهلي متغربه
وقلة التعتني ليها
وغربت كاع سامره
قليل الكلبه حس بيها
الاهله عاشو بغربه
يبقى منكسر كلبه
ومتاني يجي يومي
وارفن رايتي اعليها
.
من يأذن الباري الي
بيها ارف راية علي
واكطع رگبها بيمنتي
الناس المغربه هلي

~~~~~~~~~
كضيت العمر متحسر
وكلبي عاش بالغربه
منهد ما شفته كدامي
ابوي السم اكل كلبه
شفته منخطف لونه
لمن غمض عيونه
ويلي كوه غامضهن
ثاري سمهم متعبه
.
بعيوني ديرة امن الحزن
اخر هلي سد الجفن
وضليت انه الوحدي
والوحدي اكعد واون

~~~~~~~~
البيه من الگمر غيره
ومن الاكبر مروة
وشهامة من گلب عابس
ومن جون ووهب نخوة
لامامه يدعي كل لحضه
وجفنه بدمعته يغمضه
العايش كسرة افراكي
تكظي ايامه بالكوة
.
يقسم على الله بكربله
وبالنام عاري بالفله
يعجل الله بالفرج
وياخذ بثار ودم هله

شهادة مولاتي السيدة سكينة عليها السلام

تكتب اسم حسين وتفييله
وتكعد بدمعاتها تناغيله
………………………………
كضت كل اسنينها مشتاگة
ما تنام الا تون لفراگه
والفراك يطيب بس بملاگة
اتمنت اتلاگي وبس تحجيله
……..
الجانت بزوده وحنانه مدلله
من عگب ما طاح فيّة بكربله
بگت نعايه اتحدي للعايله
وتنكظي بس بالبواجي الليله
.……..
جانت يناوبها اخوها اعلى الونين
واخ من يون ابو كلب الحزين
شلون اذا مفگودهم جان الحسين
ونهم اكلوب الصخر تبجيله
.
سكنة من تحن تجي لمها الرباب
مكابل يكعدن على حر التراب
تگلها لو غمضت يكتلني العذاب
اذكره من يضحك واوميله
.
شكثر يجرحها اذا هب الهوه
تذكر بسفرتها ذيج لنينوى
لمن تمشي وفوكها يرف اللوه
عدها عم همها الثجيل يشيله
.
عمها المخليه ما تعرف عطش
من مشت عنه فجر يوم احدعش
شافته يم النهر دمه نفرش
من سهام الغربه رايح حيله
.
وهسه يم سكنه المنيه اتگربت
كبل لا تكطع نفسها شكد بجت
اتمنت يحضرون يمها اهل البخت
وعمها بجفوفه التراب يهيله
.
اتمنت الياخويه تسمعها شكثر
بصوت الاكبر من ينزلها الكبر
ماتت وباقي كلها المنكسر
تحن لخوها تريد بس تشكيله

اللهم صل على محمد وال محمد وعجل فرجهم يا الله والعن اعدائهم ووفقنا لخدمتهم

قصائد الليالي الفاطمية
⬇️⬇️⬇️⬇️⬇️⬇️⬇️⬇️

ثواب القصائد مهداة الى اروح خدمة الحسين عليه السلام وبالخصوص اخينا خادم الحسين عليه السلام جهاد ابو علي اللامي

من ام البنين المالكة الروح
عزيزة فاطمة الطيبة الوفية
اطلب خدمتي ودمعات العيون
وغيرة اعلى اليالي الفاطمية
.
ليالي الفاطمية تريد وفاي
وانه لام الوفه مديت يمناي
ادكن بابها بحضرة العباس
وارد وحاجتي جايبها وياي
.
على دين ام البنين
لو بعد ما اريد دين
منها رايد المدد
وناخيها بالحسين
…………………………….
ومن رحمة عيون الكمر عباس
البيها اجتمع حب اثنعش معصوم
اطلب صدق واخلاص ومواساة
ومروة تعيش بگلبي للدوم
.
اعرف المن امد اجفوفي الاثنين
والمن امشي من تضيك بالعين
اَستجار بگلب جان بيوم عاشور
إِسِتجار بوكفته مولاي الحسين
.
الجان لضعونه كفيل
للخدم اصبح خليل
الدنيا متبقيله لون
الما دخل عنده دخيل
………………………….
والكاظم المعيشني بالخير
المخليني عالخدام انعد
يم باب المراد امشيله وانخاه
بليالي الزهره ميخليني ابرد
.
انه مرتاح گلبي عندي محبوب
بس اسمه يمر ترتاح الگلوب
دخيله الكاظم يضل بابه مفتوح
اذا بعيوني كلها انسدت البوب
.
دخيل اليحل الشدد
سند للماله سند
لخدمة امك فاطمة
يا ابو الرضا مدد
……………………………
انُس خدام اهله الهاشمي الحيد
امام الفاطميين الغيارى
الرضا ومنه اطلب يخليني مولاي
خادم فاطمي همه انكساره
.
الكلْ ما اضيع بالدنيه نخيته
ويِردني لفطرتي حبه وحميته
شاب وسلميته احلام العيون
وبكل حلم واكفلي لكيته
.
بخدمتي رايد امان
والرضا رب الضمان
گلبي بيده وارتجيه
وهو سلطان الحنان
…………………………………..
وللمعصومة مأوى الفاطميين
التشبه الزهراء بكرمها
بلا ما احجي هي ترزق العين
وتنطني رثاء لحزن امها
.
انه امن شتاك للزهره اعتنيها
ولفاطمة تاخذني اباديها
بضريح السيدة المعصومة العيون
دمعة لفاطمة ودمعة عليها
.
يخت الرضا منج اريد
ابدي بالحب من جديد
كون من اكتب رثاء
كون الج مولاتي ايد

.
حب فاطمة
حب لامس گلوب الغيارى
جو عالمه
حيدر الخطاه بنكساره
الشم هواه
يَرهن كل عمره بدمعته
بمجره الدمه
تشب ويه ذكر الضلع ناره
.
والجنحه رف بسمه حب فاطمة
يحضى براعية علي حامي الحمه
حب شايله وين النقي والوفي
مو اي گلب هذا العشك يفهمه
.
بس الشهم والعنده غيره
كلبه حضه بحب الاميره
البيه من علي حيدر شهامه
وبيه غيره من بدر العشيرة
…………………
الكلبه يدك
بحب فاطمة هنيال كلبه
من يختنك
تعيشة باُنس دمعات حبه
والفاطمي
المتعلق بحب الزجية
ام الحسن
برحمتها هي تخطله دربه
.
الحب الوحيد الي يطهر الگلب
الما يشبهه او لا اكو مثله حب
الدرب الوحيد للّه حب فاطمة
ولله محال يكون غيره درب
.
اليرضي الله رايد كل مراده
وبالجنه يحضى والسعادة
لو ما يدك باب الزجيه
متنفعه باجر اي عبادة
…………………………….
العمره كضه
وثار الضلع يمشي اويه دمه
وينخى الرضا
يرزقه دموع الغيرة لامه
هذا الوفي
وباجر الزهره تزور كبره
والمرتضى
باجر يصيحه اهناك باسمة
.
الما ناسي كلبه شلون حيدر علي
متغرب وهو الامير الولي
بيوم الدفنها ونهى عشرة عمر
رد مختلف مو حيدر الاولي
.
الّخادم البيه كلبه نخوة
المغزرة بيه طعم الابوة
يعيش بجرح حيدر امامه
الكضه ليالي الفركة كوة
…………………………….
مو عاطفه
حب رايد ادموع بعقيدة
ابلا معرفه
ما ينمشي ادروبه بعيده
جرح ام حسن
طيبته الا بساعة الثار
بيوم الفرج
من ينصلب التعدت ايده
.
ميطيب هذا الجرح الا بزمن
بيه ينصلب التعده باب ام حسن
وي البواجي كون ندعي الفرج
خاطر يرد ثارات اهله المضن
.
ايطيبن اجروح الهواشم
ويبردن گلوب الفواطم
امن المهدي عالشجره يصلبه
الما خله ضلع الزهره سالم

كوم يا بن فاطمة ورد ثارها
واصلب المتعدي عتبة دارها
العصر فاطم والهضم كرارها
الزوم يجازى ويرد حق فاطم
.
الزوم عالشجره تصلبه ايمينك
وتسعد الزهراء وتگر عينك
ومن جديد تكوم تحييه دينك
وعالشريعة تصير وحدك قائم
.
الماهوْ صديق اولا يملك يقين
الاول الما عنده غيره ولا له دين
الامر يجتف امير المؤمنين
جَتفه عالشجره اويه ذاك الظالم
.
كوم دين اهلك يريدك يا شهم
يبن المركض الرجال ابلا هدم
اشتهى ذو الفقار جف بيه ينلزم
وما لكه غيرك يهيبة هاشم
.
يبن المخلي بگلبهم خوفة
يا شبيهه الورث حيل اجفوفه
انهض ورد الحكم بالكوفة
ما يصح غيرك عليها حاكم
.
وبعد عندك ثار تانيته شكثر
الثار هذا مخلي دمعاتك حمر
حسين ضلته لوحده بذاك الضهر
ودايره جيش العدى متزاحم
.
جم ضَهر لازم بجفك ينكسر
وجم نحر لازم بسيفك ينحر
هذا جرحك ما يطيب وينجبر
الا لون الدم يلون الصارم
.
وبعد عندك ثار ياكل بالگلب
ثار المغربات بديار الغرب
الهاشميات الغفن فوك الترب
مشن وي المن اخوهن غانم
.
كوم رد صولات قتال العرب
وخلي دم الشام يوصل للركب
للخرابة ضعن ابو السجاد طب
وطبته وي هيبته ما متوالم
.
اللهم صل على محمد وال محمد وعجل فرجهم والعن اعدائهم

لام كلثوم رخصو دمع العيون
اخت المجتبى بت الزجية
هم زينب اسمها وهم عقيلة
وهم كسرت گلبها الغاضرية
ربت وي العقيلة ابيت ابو تراب
واطيب هوه يسير على الرية
ما بين الحسن وحسين وام عون
عاشت احلى فترة الهاشمية
……………………………..
مولاتي عزيزة گلب الحسين
وكل اسنينها غطاها فيّيه
ولان يدري اذا خلاها بالبيت
لام كلثوم تتعنه المنية
اخذهه اويه العقيلة لكربله وياه
وتكفلهن گلب ينبض حمية
مشن ومدللات بزود عباس
ووصلن كربله بذيج المسية
……………….
واجه عاشر محرم والعطش زاد
وعطش گلب الاميرة الفاطمية
واتناست عطشها حسين عطشان
ودمعتها غدت عالخد جرية
ومن حسين راح لصوب السهام
اباب الخيمة نطرت منه جية
ملهوفه وتدير العين صوبين
وتون بسكوت ونتها خفية
ساعه ولن يرد المهر لهفان
وركضت ويه زينب وي رقية
شافن عالمهر اثار الفراك
انتهى وكت الدلال وهاي هيه
……..
هي وزينب اشتركن بالجروح
عطشن ركضن وطاحن سويه
نفس الوجع نفس الحبل عالنوك
سبيه تجري دمعتها لسبيه
هنه اثنينهن عذبهن الشام
ودفنهن صار بديار ال امية

لام كلثوم رخصو دمع العيون
اخت المجتبى بت الزجية

هم زينب اسمها وهم عقيلة
وهم كسرت گلبها الغاضرية

ربت وي العقيلة ابيت ابو تراب
واطيب هوه يسير على الرية

ما بين الحسن وحسين وام عون
عاشت احلى فترة الهاشمية

مولاتي عزيزة گلب الحسين
وكل اسنينها مغطيها فيّيه

ولان يدري اذا خلاها بالبيت
لام كلثوم تتعنه المنية

اخذهه اويه العقيلة لكربله وياه
وتكفلهن گلب ينبض حمية

مشن ومدللات بزود عباس
ووصلن كربله بذيج المسية

واجه عاشر محرم والعطش زاد
وعطش گلب الاميرة الفاطمية

واتناست عطشها حسين عطشان
ودمعتها غدت عالخد جرية

ومن حسين راح لصوب السهام
اباب الخيمة نطرت منه جية

ملهوفه وتدير العين صوبين
وتون بسكوت ونتها خفية

ساعه ولن يرد المهر لهفان
وركضت ويه زينب وي رقية

شافن عالمهر اثار الفراك
انتهى وكت الدلال وهاي هيه

هي وزينب اشتركن بالجروح
عطشن ركضن وطاحن سويه

نفس الوجع نفس الحبل عالنوك
سبيه تجري دمعتها لسبيه

هنه اثنينهن عذبهن الشام
ودفنهن صار بديار ال امية

عظم الله اجوركم بشهادة مولاتي ام كلثوم زينب الصغرى بنت امير المؤمنين عليهم السلام
اللهم عجل لوليك الفرج

بكلِ ايمانٍ واعتقادٍ
صلوات الله على مولاتي
وان كنت كاتب في احد السنين خلاف هذا فا انا ارجوا المسامحة والمغفرة من ساداتي صلوات الله عليهم

متوهم الگال الغربة شالتها
زينب عدها اهل شالو جنازتها
.
بت المن دليلة الغيرة منبعها
الّمآ خله مالك عينه تلمحها
يرضى شلون جف العدو يشيعها
والشام لعلي نعرف عداوتها
.
منو يعقلها التعنه ودفن سلمان
يخلي اجنازة ابنيته على التربان
خدر الله العقيله وموش ياهو الجان
مو ياهو اليجي ويحَضر دفنتها
.
ما يعقلها عاقل عنده غيره ودين
اخت حسين شيعها المعطش حسين
صح ابعاد عنها اخوتها مدفونين
بس اولادهم حضروها موتتها
.
ما فاركها يمشي اوياها ابو الباقر
شاركها الالم من مغرب العاشر
حَضرها الجنازة بكسرة الخاطر
مكسور اعلى عمته لهاي غربتها
.
ياغربة السجاد وكبر صبره
هالكسرة المثلها ما تصح كسره
نزلها بگبرها بهضمه وبحسرة
وخلاها ومشى بالشام وحدها
.
وحدها وغريبة بقت وحدها
ما ضل يمها واحد من گرابتها
والبحذاه گبرها موش مِلتها
يا عظم المصيبه ويا رزيتها
.
اللهم عجل لوليك الفرج

خروج ضعن آل النبي صلوات الله عليهم الى مكة
مقدمة عزاء / ثكيل
ودع ابنيته ورگب ميمونه
وروحه رادت تطلع امن اعيونه
.
حسين طول الليل مشغول الفكر
ما مغمض لحد ما حل الفجر
يفكر ابنته العليلة ومنكسر
شلون باجر من تودع اضعونه
.
صلى واخبر زينب تحضر الضعن
وكالها وي العليلة اتوداعن
واعتنن كلهن بنات ام الحسن
ياخذن من خاطر المحزونه
.
حسين صد هي ورقية تگابلن
وجسد واحد صارن امن اتشابگن
ازغار ويكسرن الخاطر لو بجن
حسين من صدهن تغير لونه
.
فجاة مسحت بالعباية عينها
لان لمحت يجري دمع حسينها
اتعمدت كدامه تخفي اونينها
وراحت وشبكته تشم امتونه
.
شمته وباسته وگامت تبتسم
تگله يا احلى ابوّْ بكل الزلم
انه ترباتك يبويه لا تهم
لا تهم وانه الك ممنونه
.
بيدها زتت ابوها للمهر
رگب بس حسين گلبه منكسر
يدري گلب ابنيته متحول جمر
وحتى لا ينجرح صارت عونه
.
نوك الضعون ابتدت ممشاها
ودار وجهه حسين لن شافاها
على الباب وتومي اله ابيمناها
حس هضمها من تضل من دونه
.
حسين حن گلبه ونزل من مهرته
رجع مسرع وهوْ تجري دمعته
كعد عالكاع وحضنها ابنيته
والدمع مدري شصبغها جفونه


27 رجب
تمت بعين مولانا كاظم الغيظ

@k_rark اللحن

رئيسية / ثكيل

غربة عايشلك يبو گلب الغريب
ما يطيب بگلبي جرحك ما يطيب
گلبي من الله نصيبه
جرحك الما صحله طيبه
يا غريب

……………..
الف واتلثميت عام
والجرح نفس الجرح
كل رجب الكاك مضعن
بكل محرم عالرمح
بكلهن الكه اعيون طفله
ساهره لحد الصبح
اتاني مره اتشوف وجهك
تالي تقبل تنذبح
.
جان كل احلامها تشوفك تعود
انت ابوها الماكو مثله بهل الوجود
والابو يكتل مغيبه

………………………………..
ودي مره اكعد واشوفك
ابيتك مغمض الجفن
ليش كل ما اكعد الكه
عيونك لبيتك تحن
غير امام الدنيه انت
وبيك ناسك تطمئن
مضطرب ليش وعُيونك
حمرة لونها الحزن
.
قلق هاجرت المدينة وبنكسار
تمشي خطوة وتلتفت صوب الديار
اهناك عايفلك غريبة

…………………………………
ابتعد ضعنك عالمدينة
وليل اجاك وخيمت
نومت كل الضعينه
وانت كاعد ما نمت
نومت بيدك رقية
واكو طفلة اذكرت
گبل ما يغمض جفنها
الا تحضنها جنت
.
حسبت من تكعد بهذا الظلام
ياهو اليلوليلها خاطر تنام
يا كبر هاي المصيبة

……………………………………………

ردت اعيشك مره تفرح
وابسمتك انشغل
وابتسم من اذكر اسمك
مو دمع عيني يهل
واندرت شفتك تباوع
بجف رقية انشد حبل
طفلة من حضن المحنة
راحت لحضن الهزل
.
والسعادة انذبحت وراحة البال
من ذبح حبل الاسر ذاك الدلال
وراحت ابنيتك سليبه

……………………………….
هذا انت وهذا جرحك
الم مشدود بالم
ابتدا من المدينة
وخضر بحرك الخيم
آوله فركة عليلة
وتالي بيه طيحة علم
وآخرى ضيعة بناتك
ابين ناس ابلا شيم
.
والسنين انرهنن بهذا الجرح
امن المدنية لصعدتك فوك الرمح
والدوه القائم يجيبه


تمت بعين مولانا الكاظم عليه السلام

اللحن @k_rark

رحلة مولاتي العقيلة عليها السلام

طلعت امن المدينة وعندي كافل
كلساع ويجي يعدل المحامل
كبل لا اصيح خويه يا ابو فاضل
يركضلي ويكلي امري يم عون
.
بجية الليل جان يدلي ممشاي
فانوسه بيسرته وكاض يمناي
ولو طر النهار يصيرلي افياي
ما خله خيالي اتلمحة العيون
.
مامنه بَمشيتي ومرتاح كلبي
ربية اعيون كفالي اعلى دربي
امن اتعب شوفته تنسيني تعبي
شحلاته وبيرغه يرف فوك المتون
.
لاجن بالطريق وگلبي كضني
اجه عباس يركضلي ونشدني
ريحة غربة كتله خويه اجتني
وين الليلة راحة هاي الاضعون
.
كَلي لكربلاء خويه وصلنه
وهاي الليلة بيها يحط ضعنه
وجعني گلبي وتراولي اهلنه
ضماية وعالترب راحو يغمضون
.
الليالي مرت واحنه بخيمنه
واجه اليوم الدليلي خاف منه
وغدت عالكاع مطروحة زلمنه
وبگيت الوحدي لا كفال لا عون
.
لن صوب الخيام اتعنت اخيول
واعلى التل صعدت وبالي مذهول
افزعمن واخوي كَبالي مجتول
والعل عالخيل جيتهم يسلبون
.
الما بيهم رحم حركوها الخيام
وعلى نار الخيام اركضت الجدام
اويلي شصار بيها اجدام الايتام
ازغار وكوة لو رادو يركضون
.
تعبنه امن العطش ومراكض الخيل
ويا وحشتنه لمن گرب الليل
فوك الكاع مكعدها المداليل
متخوفين من عين اليحرسون
.
اوي طرت الفجر جهبونه الاغراب
بالنوك الهزيلة والگلب ذاب
مشينه مجتفين وتحدي الاجناب
وكطرة رحم ما بيهم اليحدون
.
(تضمين)

بگيت محيرة واصفج بالايدين
لا عباس يبرالي ولا حسين
يزجروني من ابجي وتدمع العين
غريبة وسكته اون والگلب محزون

@k_rark اللحن

ولادة الامام العباس عليه السلام


اجه لحيدر ركض فرحان قنبر
وصله وبشره وابتسم حيدر
اجه شاله علي وباذنه كبر
.
علي اختار الاسم سماه عباس
اسم يعني الغيور اليرفع الراس
البطولة والكرم والحب والاحساس
.
يعني الاسد والمغوار
وبمعنى ثاني الكرار
ليث الحروب المقدام
وبدر الهواشم الاقمار
………………………………….
الحسن لمن درى وهو بمضيفه
الدراهم كلها حطها بايد ضيفه
وثلثتيام العرب تاكل رغيفه
.
الگمر كل يجي ياشر يريده
وابو محمد گبل يحمل عضيده
وابو فاضل يستحي ويقبل ايده
.
عين الحسن تبراله
ويحسبه راحة باله
يحس بحنان الخوة
گلب الحسن لو شالة
…………………………..

خريف الدنيا بس الزرع خضر
وعلى ورد المدينة الندى سير
اجه الحيد اليناصر ابو الاكبر
.
اجه طير الفرح بالدنيا غرد
فرح گلب الحسين ووجه ورد
سعاده بگلبه ما مرت على احد
.
بمولد كمر آل عدنان
ماكو گلب ما فرحان
بس گلب ابو اليمه حسين
بساعتها اسعد انسان
…………………………………
رفض يغفى بمهد بدر الهواشم
ورفع ايده لاميرة امن الفواطم
بحضنها رايد يشم النسايم
.
بحضن زينب گبل غمضها عينه
حنين وغمض بحضن الحنينه
تناغي بيا علي وتگمط ادينه
.
بهذا الطفل خفة دم
كل ما تناغيه يتبسم
لو ساعة تبعد عنه اتحن
وترجع اله وبيه تشتم
………………………………….
واكو وحده الفرح ماخذ گلبها
بدمعها تشكرت واتناجي ربها
هلا تكله هلا بروحي وفرحها
.
هلا ببني الشهم يا محله عينك
هلا بيك بكثر فرحة حسينك
هلا بيك بكثر ما تحب دينك
.
ام البنين تناغيله
وبكربله تلوليله
وي اللبن تحجيله
وبيا علي تشد حيله

………………………………

اللحن @k_rark

اربعين السيدة العقيلة صلوات الله عليها


يوم غربة جان يوم الاربعين
اربعين ام عون مو مثل الحسين
فرق بين اليسمع امن اهله الونين
امن الاهلها وناسها محرومة
~~~~
باربعين حسين اجه كل الضعن
فاكدات وعالبواجي اتگابلن
اتلث ليالي اعلى الكَبر يتناوبن
ووحده للاخرى تون مهضومة
~
بس حسافة باربعين ام الخدر
ولا علوية اعتنت يم الكبر
ياهو لام عباس يتعنى الفجر
يگلها بتها امن الهجر مالومة
~
عادة الميت يزورونه هله
هذا يغسل كَبره هذا يون اله
اجتاف خوانه اعلى موته مهدله
ودمع واحدهم منگع اهدومة
~~~~
لجن زينب ياهو اجاها وزارها
ياهو رش الماي فوك ترابها
ويم كبرها ياهو من احبابها
انهدم حيلة وما گدر عالگومة
~
هسه لو مدفونه يم خيامها
وابو فاضل مندفن كدامها
شوية جا خفت عليها الامها
وبين الخيام شحلاها النومة
~~~~
لكن بشام الهضم مدفونه
البيه اخوّها شافها بعيونه
مجتفه بالحبل وي اضعونه
عالرمح وتنوح الها ارسومه

ليلة جرح امير المؤمنين


الليلة مختلفة النسايم
مرت على دار الهواشم
زينب جفنها ماهوْ نايم
جنها اعلمت واليها ينصاب
…………………….
كضها گلبها ومن جزة الليل
لنها تسمعه صوت جبريل
والحيل فارك زينب الحيل
من صاح طبرو راس ابو تراب
………………….
لا بيها صوب المسجد تروح
ولا بيها تبقى تموت بالنوح
من عدها رادت تطلع الروح
محتارة ضلت والگلب ذاب
………………….
فكت الباب وشافت ام عون
خوانها من ابعيد يمشون
اعلى اجتافهم زلمة يتجون
بدم هامته متخضب اخضاب
……………………..
تضمين
(ونّـــت ونـــادت يـالـمجبلين
هـالـشــايـليـنـه ويــاكـم مـنـــيـــن
أسـمـع اصياح ونوح صـوبين )
جن غدر لايح داحي الباب
………………………..
تگربو شافت دمه عالعين
حاجت اخوتها وعلة الونين
من يمتى صارت خويه يحسين
والينه فوك اجتاف ينجاب
………………………..
اخوتها منهم شبت النار
وخلو ابوهم وسطة الدار
جابو طبيب يشخص الصار
وجويعدة زينب وره الباب
………………………..
گال الطبيب وسمعته كال
اصواب ابوكم هذا جتال
يا حال زينب بگت يا حال
من درت حيدر جرحه ما طاب
………………………
صاحاها ابوها باخر انفاس
وحط جفها فوك اجفوف عباس
مدد اجدامه ورجع الراس
وروحة اعرجت كدام الاحباب
………………………

علي المظلوم
عاش محروم
ومات مهضوم
امير المؤمنين
………………………

الجفنه الما رف بحرب
ولا عثر مره بدرب
التهابه كل الانس والجان
.
الحاني ضهر الخيل امس
وبجفه رداها الشمس
البكل حروبه مخلي نيشان
.
من كثر ما مكسور ومفارك النوم
يتجى عالحيطان لو رايد يگوم
ما وده تدري الناس دلاله مهضوم
بس بالمشي مفضوح البكلبه ملجوم
.
هذاك الباب
خله صواب
ابد ما طاب
باابو گلب الحنين
…………………….
بالوقت كالو ينجبر
شما بلغ حجم الكسر
كل جرح ولنسيانه ميعاد
.
ومرت اعوام امن انجرح
ومر عالديرة فرح
وحنت لحايها الزلم غاد
.
بس علي خله الشيب يعلى الوجنيتن
جي جاسته دمعات افراك ام الحسين
المحبوب گلبه يموت ويفارك العين
يغير حلاته الشيب من تمضي السنين
.
دمع العيون
يغير اللون
عاش شلون
من هذاك الونين
…………………………..
امن اسنين حيدر ينتظر
جيتة هذا الفجر
البيه تنتهي حسرات الفراگ
.
تعب اعيونه الهجر
وكضه عمره منكسر
كد ما دليلة لفاطمة اشتاك
.
حيدر اويه ام حسين انتهى فركاه
وفاطمة الليله اهناك تتلاكه وياه
بس علة صوت النوح والحسرة والاه
للكلبه ضل عطشان وماله اخوه ينخاه
.
علة الونين
لمصاب حسين
البلايه معين
البقه وحده حزين
………………………..
فاطمة وحيدر حجو
عن كربلة وكعدو بجو
البيها تغرب كل ولدهم
.
گربت ايام الالم
ايام وتوج الخيم
ويغَمض بهيمة ضعنهم
.
ما دامه حيدر راح ما ضلت ايام
ويهل شهر عاشور وتهل الالم
وابن الكره حيدر يحركها الخيام
والنار ذيج تلوح اجفوف واجدام
.
لهيب النار
يركض اكبار
ويلوح ازغار
بضعن ال الحسين
……………….………….
بليلة العاشر سوه
ايتعنون لنينوى
فاطمة اتون وعلي الحامي
.
وزينب تكلهم هلا
يهلي شوفو كربله
بيها ضعنكم امسى ضامي
.
يهلي الجدم تعبان والگلب ذايب
شوفو زلمكم غاد فوك الترايب
وذاك الدلال انشال وصرنه غرايب
يهلي بعد ساعات وندخل خرايب
.
بعد ساعات
بخرابه نبات
وغرب شمات
يحرسون الضعين

ام البنين الطاهره
لترابها حن الگلب
هم يجي يوم وننحني
ونشم عطر ذاك الترب
.
نستبدل اسنين العمر
بسجدة شكر يم الكبر
هيج وهواها الفاطمي
عالعاشو بفيها يمر
.
تمضي اسنينه بكسرة گلبنه
محرومين من الدللتنه
ياهو الجان تعلاله مناير
وبس تراب كبر ام المحنة
.
اليصبر گلوبنه متانين مولاي
ورهن نبقى لقراره
عبيد ومالنه كباله يضل راي
وامرنه بانتضاره
وباجر يطلع وترتاح الگلوب
ويبني الها مناره
ووياه نعتني لحضرة ام عباس
ونحييها الزياره
…………………………..
امن بعيد نقراها ابالم
زيارتها ونقر بالوفه
ونقره السلام اعلى الگلب
المليان حب ومعرفة
.
ونقره السلام اعلى النظر
الياما لبني الزهراء سهر
لخدمة بني الزهراء سهر
ونقره السلام اعلى الادب
التورثه گلب الكمر

.
اشما طلعت شمس واشرق ضواهه
وسواد الليل كحل كل متاهه
سلام الله على گلب ام البنين
وعلى عباس المضوي سماهه
.

سلام الله على باب الحوائج
ام بدر العشيرة
سلام الله على ذيج المحنه
والرحمة الحبيرة
سلام الله لگلبها ولادبها
الما شفته نظيره
سلام الله البَنَها الخله عباس
ينبض گلبه غيره
………………………….
مو قصة اجداد ونسب
والغيب حيدر يعلمه
بس رادنه نقدس كلب
مخلوق يسعد فاطمة
.
حيدر بالحروب انفرد
وبالعرب ما شبهاه احد
ابضهره شايل بس زلم
الاسد البضهره اسد
.
الله اختارها كبل العوالم
تصير ام البنين ام كمر هاشم
شاء الله بقدرته وراد مولاي
تصير ام البنين ام للفواطم

.
شريكه اختارها الله لابو تراب
وطهر كل نسبها
ومن نور الزجية اشتق ضواها
وسماها باسمها
ولان للزهره قرت بالولاية
ورضت تخدم ولدها
معصومه الله سواها ونطاها
الوفه كله بلبنها
………………………….

انولدت بديرة بدو
لكن اسمها العالمه
نالت علمها من علي
ورباها حبها لفاطمة
.
بذيج العوالم امنت
والزهره بيها تكفلت
وردت جميل امن الحسن
بعالم الدنيا من جت
.
لام كلثوم ولبتها العقيلة
صارت خادمة وصارت كفيله
وجابت اخو يسند ضهر الحسين
ما مخلوق بالدنيا مثيلة
.
امن اتكفل ابنها بممشى الضعون
وبديها انطت حسامة
تكله بكربله شوفها الرجال
شنو معنى الشهامه
اول ام لابنها تكله لتعود
يوليدي بسلامه
يبني اجفوفك اطيها والعيون
افديها لخيامه
……………………………

ام كمر هاشم مؤمنة
بصاحب زمنها تعتقد
وتدري الامام اغلى واعز
امن التضحية باربع ولد
.
كل همها جانت خدمته
ومرضات گلبه وطاعته
اتناست ولدها من بشر
ينعى ولدها سمعته
.
تكله اولادي فدوه اخبرني عنه
حركت الكلب يالتنعى باهلنه
خبرني بحبيبي حسين وام عون
ويمتى للمدينة يرد ضعنه
.

كلها حسين ضل بكربله اهناك
مغطيته الترايب
وضعن اهلج يحره جاي متعوب
من نوم الخرايب
تلكيه يم كمر هاشم تلكيه
ضعن ام المصايب
زينب ردت ابلا راية لا اخوان
بگلب متعوب ذايب