tg-me.com/jaal345/177
Last Update:
Qondaaltonni Israa’el badiisa Gaazaa ni deeggaru jechuun manni murtii dhaga’e
ONM-ABO Amajjii 11,2024 Karoorri Israa'el Gaazaa "balleessuuf" qabdu "sadarkaa mootummaa ol'aanaa" irraa kan dhufe ta'uu manni murtii olaanaa UN dhaga'eera.
Himannaan kana kan dhiyeessan abbootii seeraa Afrikaa Kibbaa Israa’el duguuggaa sanyii raawwatte jechuun himattee Mana Murtii Haqaa Idil-addunyaatti yeroo dhiheessitudha.
Afriikaan Kibbaas Israa’el hojii waraanaa Gaazaa keessatti akka dhaabdu manni murtii ajaja akka kennu gaafatteetti.
Israa'el - Jimaata borii ittisa ishee kan dhiheessitu yoo ta’u, himannaa kana ''bu'uura kan hin qabne'' jechuun cimsitee kuffifteetti.
Itti dhiyeenyaan hordofamaa jirastus, manni murtichaa himannaa duguuggaa sanyii kana irratti yaada qofa kan kennu ta'a.
Abukaatoon Mana Murtii Olaanaa Afrikaa Kibbaa Tembeka Ngcukaitobi ICJtti akka himanitti, Israa'el ''kaayyoon duguuggaa sanyii'' raawwachaa jiraachuu ''akkaataa haleellaan waraanaa kun itti gaggeeffamaa jiru irraa'' mul'ata.
''Akeekni Gaazaa balleessuuf jiru sadarkaa mootummaa olaanaatti guddifameera,'' jedhan.
“Guyyaa guyyaan uummata Falasxiin lubbuu, qabeenya, ulfina, fi namummaa dhabuun dabalaa dhufe” jechuun Afriikaa Kibbaa bakka bu’uun kan hirmaatan Adilaa Haasim mana murtiitti himaniiru.
"Ajaja mana murtii kana irraa kennamu malee wanti gidiraa dhaabu hin jiru."
Ragaa dhaddacha dura dhiyaate keessatti Afrikaan Kibbaa gochi Israa'el kun ''kutaa guddaa biyyoolessaa, sanyii fi gosa Falasxiin balleessuuf kan yaadame'' jetteetti.
Israa’el Jimaata ittisa ishee ni dhiheessiti, garuu kanaan dura haleellaa Hamaas Onkoloolessa 7 haleellaa lubbuu namaa galaafateef deebii kennaa jiraachuu ibsuun gochi isheen Gaazaa keessatti raawwatte sirrii ta’uu ibsiteetti.
Garuu Kamisa har'aa mana murtiitti haasawa taasisaniin, Ministirri Haqaa Afrikaa Kibbaa Roonaald Laamoolaa haleellaan kamiyyuu ''waliigaltee Duguuggaa Sanyii cabsuuf sababa kennuu ykn ittisuu hin danda'u'' jedhan.
Israa’el Konveenshinii Duguuggaa Sanyii bara 1948 kan duguuggaa sanyii ibsu fi mootummoonni akka ittisan waadaa galchu kan mallatteessitedha.
ICJn mana murtii olaanaa Mootummoota Gamtoomanii yoo ta'u, teessoon isaa Nezerlaand magaalaa The Hague keessatti argama.
Bara 2022 manni murtichaa Raashiyaan Yukireen keessatti ''hojii waraanaa hatattamaan akka dhaabdu'' ajajus, ajajni kun tuffatamee Raashiyaan hanga har'aa Yukireen irratti haleellaa raawwachaa jiraachuu BBC gabaasa bal'aa qabatee ba'een addeesseera.
https://www.tg-me.com/us/telegram/com.jaal345
BY QBO ZOONI BAHAA ( JAAL BARI)
Share with your friend now:
tg-me.com/jaal345/177