tg-me.com/leenkallasi1/1232
Last Update:
مجد : رجعان الشتا رجعان ..
كانو الجوّ مسقّع اليوم ؟
مايا : عقبال الشغف اللي كان يرافقني بكل شتوية ..
قولتك بيرجع هالمرة ؟ ولا حدا متلو بس يروح ما بيرجع ؟
مجد : كيفك ؟
مايا :😂😂
مجد : ليه عم تضحكي !
مايا : سؤالك عن الطقس قطعلي حدث كامل كان عم يدور براسي .. حسيتك متل جماعة (اخلق معي حديثاً فربّما أنا لست بخير) ..
مجد : مبدئياً انا و هالجماعة منعرف انك لستِ بخير ..
بس سكري هالشّباك ايديّ متلجين ..
مايا : اذا علاقاتنا كلا متجمدة ..
و الحكي بتحسو شباك زمهرير ونفتح فجأة ..
العاطفة عم تتحول لعاصفة ..
و الحبّ اللي كان يشعل نار ليدفينا نسيان الولاعة ..
و حديثك عن الامل و التفاؤل وهي الشّلة الحاضرة شكلاً والغايبة فعلاً اللي رح تحكيه بعد ما قلك اني بخير كلو برود ..
لحظات طفولتك وكل صدمة خلتك تحس برجفة عابرة .. او يمكن عابرة فيك ذهاباً و إياباً لأنو لهلا بتتذكرا ..
لما تقوم من تختك الصبح وتقرر تترك مشاعرك بتختك وتغطين منيح وتلبس جاكيت برود وتطلع للجامعة كانو ما بهمك شي و الجو ربيع ياوديع ..
بكل مرة قعدت تضحك بعد شي كارثة حلّت عحياتك وبعدين سمعت جملة "اي شو هالثبات الانفعالي اللي عندك ؟" ما حسيت انو هالثبات الانفعالي معناه انو ضحكتك بتدل على انك تلّاجة ؟
ما هو البرد مننا وفينا .. كفاية تلوم الشباك المفتوح ..
دفّي ايديك بكفوف .. او حطهن بجيوبك ..
المهم تدبّر راسك الله يرضى عليك ..
مجد : يا ساتر يارب ..
مو ناقص غير تقوليلي انو انا المي المسقعة اللي بتخلي ايديك زرق من البرد ..
مايا : لا مبدئيا انت متل الهوا اللي بايلول ..
يا محلا برودتو ..
مجد : اشتقتلك !
مايا : كأنك عم تقلي انو معك جاكيت بدفّي .. حتى اجي اقعد جنبك ..
مجد : بتجي ؟
مايا : ما حلوة الاسئلة الصريحة هيك .. التلميحات احلا ..
عكلٍّ بعرف انك اشتقتلي .. وانا كمان اشتقتلك ..
مجد : كان ضروري تطرقيني هالمحاضرة الفوق لحتى تطلع معك هالكلمة ؟
مايا : يمكن ..
مجد : كان كل خوفي اطلع شي عاصفة ثلجية ..
مايا :😂😂😂
مجد : ضحكة اول الحديث دائماً غير الضحكة بآخرو ..
مايا : الله يديمك ..
بتعرف .. جد برد رح سكر الشباك ..
مجد : خليه وتعي خدي جاكيتي بالشنتة ..
مايا : هالمرة عرفت كيف تجيبني لجنبك !
مجد : مش كل المرة بتزبط .. اي بس زبطت هالمرة !❤
الحوار 27
BY You & I
Warning: Undefined variable $i in /var/www/tg-me/post.php on line 280
Share with your friend now:
tg-me.com/leenkallasi1/1232