tg-me.com/mawlavi_kurd/4743
Last Update:
(نەورۆزگوڵ)
نەورۆزگوڵ خێزان نەورۆزگوڵ خێزان
واد٘ەی وەهارەن نەورۆزگوڵ خێزان
بەد٘ەن کافووران خاڵ خوردە ڕێزان
پۆشان مایەی عەتربۆی عەنبەربێزان
نەورۆزگوڵ جاسووس گۆڵانی تازەن
وەهار کیانان مزانی وازەن
بافتەن پەی زینەت ڕەندانی دوڵبەر
چوون جوقەی تاووس بپێکان وەسەر
قاسد نەورۆزان نەپای هەردەوە
یەک یەک بەرئامان نەتۆی پەردەوە
هێمای خۆ زمسان تەشریف نەبەردەن
نەورۆزگوڵ موژدەی وەهار ئاوردەن
مزانی بد٘ەۆ زمستان وەیەرد
تەختی یەخ بەندش هەوا دابەگەرد
ئەرسەد٘ کە هەوای سەردیش بەرۆ تەن
خورشید٘ مەنزڵگاش نە بورجی حووتەن
بەڵێ جاڕچیان نەورۆز جاڕ مەد٘ان
جاڕی پادشای نەو وەهار مەد٘ان
بادی واد٘ەی وەشت نەکۆسارمەیۆ
یاران مزانی نەو وەهارمەیۆ
پادشای وەهار واد٘ەی وەختشەن
بە تەعجیل مەیۆ ئامای جەختشەن
وەختەن شای وەهار بنیشۆ نە دەور
جاڕبکێشۆ ڕەعد تەمەلوول و هەور
وەختەن بکێشۆ ڕووی دەشتی سارا
کەوکەبەی وەهار، وێنەی شای"دارا"
وەختەن بەیۆ بەر ئودووی گۆراڵان
گێران دەرودەشت چوون هەردەجاران
وەختەن برۆسان گوڵان هەزار ڕەنگ
چەرمەو زەردو سوور،چوون دیبای فەرەنگ
وەختەن شای وەهار بکیانۆ خەڵات
سەوزی ئەتڵەس ڕەنگ پەی ڕووی سەربیسات
وەختەن شەقایەق سەر باوەرۆ بەر
هۆردۆ ئاڵای سوور، جەباڵای کەمەر
وەختەن بوڵبوڵان جە شیرین خاودا
بێد٘اربان جە مۆڵک خاسەی زەهاودا
وەختەن ساڕێژ بۆ خاترشان جە داخ
کەت بنیات، بەعەزم گوڵگەشتی لەیلاخ
فەسڵی نەو وەهار وەختی گوڵ گەشتەن
سەر زەمین بەڕەنگ ، سارای بەهەشتەن
وەختی شاد٘ی و عەیش ئەیامی سەیرەن
پەنەش دڵشاد٘ەن،ئەر وەحش،ئەرتەیرەن
ئەگەر خاتریۆ ناچاخەن زویر
وەهاربێ کەیفیش مەبەرۆ جە ویر
چوونکە شای وەهار شاد٘ی مەوازۆ
هیچ کەسێ خەمناک مەلوول نمازۆ
«سەیدی»چوون مەلوول هیجرانی یارەن
فیشتەر خەمناکیش فەسڵی وەهارەن
سەیدی
@mawlavi_kurd | کاناڵ مەولەوی
BY مامۆستا مەولەوی
Warning: Undefined variable $i in /var/www/tg-me/post.php on line 280
Share with your friend now:
tg-me.com/mawlavi_kurd/4743