tg-me.com/mys_313/10181
Last Update:
دارمي بحق الامام الكاظم عليه السلام
مهيمن يوسف الموسوي ١٤٤٥هـ ٢٠٢٤م
يالمهدي يا مولاي إلمن تهل عين
للكاظم المسموم لو للولي احسين
......
يا حُجّة المعبود آخر لأئمّه
گلبك يمهدي شلون وبعالي هَمّه
مِنّ العِده الغدار وبلايه رحمه
لموسى الولي وحسين وهواي ماذين
......
گلب و قهر موجود وليا مصيبه
للي انذبح مغدور من كل كتيبه
لو لنسجن مظلوم وچثته غريبه
فوگ الجسر خلوه كل المعادين
......
إبن النبي المختار وإبن الزچيّه
جيش و عطش و اخطار من آل اميّه
وقدّم دِمَه مذبوح بالغاضريه
لجل النصر و انصاف كل غايته الدين
......
موسى الإمام هواي گلبه تفطّر
من كل بني العباس بسّ الأذه و شر
بظلم و حقد مسجون وبحاله يصبر
رغم الاعادي حيف وبكثره ماذين
......
حزنك إمامي شلون و الحاله صعبه
سابع ولي و حسين بالموته غربه
مو بالمدينه يموت وكل اهله قُربه
بنص الغرب يا حيف وبحسره ميتين
......
سبط النبي و عطشان حالة وفاته
وموسى الولي مسموم هيجي جزاته
كل واحد و معروف كل تضحياته
وكلهم نسل لاطهار وبهايه طيبين
......
حزنك على الأجداد خله الگلب نار
نار الحزن متهيد من العده الجار
جور و ظلم موجود ويضد لاطهار
نوحه فلا كل نوح واثنين نوحين
......
نوح بألم و اشجان موجوده حسره
بگلبك امامي شبيه مقهور كثره
بلوعه تهلّ العين وتسيل عبره
ويّه المحب وتنوح ويّه المُعزّين
......
آه شكثر مولاي حزن و مناحه
لابن الوصي المذبوح تنزف جراحه
لو تذكر المسجون عالي السماحه
لو بالعزه موجود عند الموالين
......
شصبرك امامي شلون نص الگلب هَم
حزن و مناحه بيك قهر والم عَم
وضعك يمهدي شبيه وبفكرك الغم
والشيعه هذا اليوم لجلك منادين
مهيمن يوسف الموسوي
٢٠ رجب ١٤٤٥هـ
٢٠٢٤/٢/١م يوم الخميس ١١:٤٦م
BY الشاعر مهيمن الموسوي
Warning: Undefined variable $i in /var/www/tg-me/post.php on line 280
Share with your friend now:
tg-me.com/mys_313/10181