على بركة الله وتوفيق مولاي الحسين ع.

قريبــــــاً. ان شــــاء الله

سيتم نشر قصائد العشرة الاولى من محرم الحرام لعام 1446 هــ. اسأل الله لنا ولكم التوفيق بحق محمد وال محمد.

يهدى ثواب هذا العمل الى روح من علمني ابجديات الخدمة والدي خادم الحسين ع الحاج صادق مطشر العقابي.

استقبال محرم الحرام

يارازق. دمعتنه. وخدمتنه. يامولاي
كلمن يشد حيله. عباس يدعيله

……

حيهم يخوتي يالخدم. شدو الحزام لخدمته
عاشور قادم بالحزن. وحسين جايب عيلته

خل نستقبل ضعونه. وكلمن دمعه بعيونه
كلمن خل يحضر كلبه. ويفتح بابه لمحبوبه

هاي الخدمه شفناهه. عالم ثاني عشناهه
احنه النعطش ويروينه. حسين الماي من حبوبه

لاتبرد. وبكلبك. خل حبك. بس لحسين
واللي سهر ليله. عباس يدعيله

…….

الله خلقنه لكربله. الله خلقنه بس الك
الخادم يعيش بكل وكت. والماخدم مات وهلك

بخدامك يبو اليمه. مغزره ملوحة الخدمه
ساعت خدمه تعال دنيا. وكل اليخدم خيعونه

تقبلنه متقبلنه. يحسين بضمايرنه
لا منعوفك تعبك راحه بتابوت من يشيلونه

وعيونك. تدلل. مانقبل. بس وياك
والگلبه يحچيله. عباس يدعيله

……

يحسين الك عده وعدد. مو مثل غربة طف امس

نترسلك الدنيا خيم. باچر نطم عين الشمس

وين النشمي واليفزع. البس يم عتبتك يركع
امحرم جاي وزلمه اليخدم. ثابت ما بدل ثوبه
بدونك كلشي مايسوه. العيشه بخدمتك حلوه
جمر خيامك دوم بكلبه. وچن عياله المسلوبه

هالدنيا. باحساسك. وانفاسك. تسوه نعيش

والانته ترتيله. عباس يدعيله

…….

حكه التجنن بالعشك مثل فلا يولد احد
الخدام چن دلة الحسن.لاتكضي لاتبرد ابد

يحسين العشك حاصل. من واهس ابو فاضل
دوم العينه بعينك يربح. والصد لغيرك خاسر

الحضر كلبه لمصابك. ومد چفوفه يم بابك
انت بكيفك تنطي وتاخذ. وانت بكل موقف حاضر

ياخادم. احچيلك. شد حيلك. جاي حسين
بچفه يتچيله. عباس يدعيله

…….

المحسوب بالدنيا لعلي. وما يخدم حسين شعجب
بالمثل كالو چن فطر. رمضان ويصوم برجب

هاي الدنيا مكضيه. شتسوه بدون ابو رقيه
ديره وشح الماي اعليهه. تالي الناس يهجروهه

بچف حسين اذا لازم. يخضر عافيه الخادم
سيد جاسم وبعاقبنه. كون الناس يذكروهه

الرابح. كل نيته. وتربيته. بحب حسين

الزهره توميله. عباس يدعيله


…….

نسألكم الدعاء
حسين صادق العقابي

استقبال محرم. تجليبة

عاشور الجروح

يعاشور الجروح الخدم منتظره
تحسبلك ايام بسبحة الزهره

.......

مِن العين للخد على الشفه دموع
الحچي المخبوط بالدمعه اله موضوع
تعال وشوفنه محدبين چنه ظلوع
يهلال الحزن ياسفرة الفقرة

.......

يبعد العافيه الماظلت بلياك
يبعد عيونّه التلگاهه عد عيناك
مثل خيط وجرح عشرتنه احنه وياك
مغزره هواي بينه ملوحة العشره

......

يعاشور المصايب من تجي ضعونه
اذا شفت ابو فاضل جوده بمتونه
خل حسين يشبع شوف بعيونه
وخل يلحك يشم عبد الله من نحره

......

نعم عاشور جيب الضعن والآلام
من ليلة العاشر ولجروح الشام
من واهس الاكبر واهس الخدام
خلص صبر العطش بس ماخلص صبره

........

ياعاشور عجّل كثر حچي الناس
تفض السالفه بجيتك يتاج الراس
الكل تسكت اذا رف بيرغ العباس
وتظل كلمن حسينه وكلمن بفكره

……

حسين العبره والعبره بمفاهيمي
وخذت من منبره فكري وتعاليمي
انه اعله حسين نوحي ودمعتي وضيمي
خل ينصب عزاء العالم بأسره

………

نسألكم الدعاء
حسين صادق العقابي

برنامج محرم الحرام 1446 هــ

(1)


رحلة عشك

رحلة عشك صار العمر. من كلبي حد عيونك
مشتاك اشوفك لو حلم. واعرف حبيبي شلونك

حسين. حسين. يا اغلى محبوب

…….

عندي امنيه. كلبي علك. بشباچك انته تشدني
وتفائلت. بالخير أنه. واعرفتك وتعرفني

ضيم الدنيا اعله متونك
وتنكط رحمه عيونك
لون الحب اصبح لونك. حسين. حسين

گلبك فدوه لطاريه
بنبضاته شكد حنيه
بدمك عطر الحريه. حسين. حسين

كالولي طحت اعله الارض. يحسين صحت اسم الله
كلتلهم بسابع سمه. طاح بحضن عرش الله

حسين. حسين. يا اغلى محبوب

………

شفتك ضوه. وظلمه الوكت. لولاك اظلن اعمه
خادم صرت. وانته اقبلت. ممنون يابو اليمه

فدوه امي وابوي لكلبك
ثبتهه اجدامي بدربك
مو بيدي طحت بحبك. حسين. حسين

خليني درع لصدرك
واتلگه سهام بكترك
كل عمري فدوه لعمرك . حسين. حسين

سمره الملامح بالشمس. لو دمك محليهه
مشكوره روحك سيدي. والف انعم الله اعليهه

حسين. حسين. يا اغلى محبوب

……..

اللطمه الك. دگة صدر. تلكاني عد عيونك
وتوفقت. من خدمتك. يابو علي ممنونك

كل الخير بهالخدمه
صادك من احچي الكلمه
نعمه وتنباس النعمه. حسين. حسين

انطيني وهاك تگلي
مدللني يابعد اهلي
محبوبي انته وخلي. حسين. حسين

بالكوه ميصير العشك. عالفطره يامحلاته
فدوه لنوارس شيبتك. ولكلبك ونبضاته

حسين. حسين. يا اغلى محبوب

……

بنحرك جرح. ينزف ضوه. خيوط الشمس شيباتك
بعينك حلم. لون الكمر. مرسوم وي صفناتك

صدرك من داسه الحافر
طش عطره بيوم العاشر
لله تعنيت مسافر. حسين. حسين.

عكازه بچفك روحي
وخلي جروحك بجروحي
فدواتك يامذبوحي. حسين. حسين

من اول عطش لاخر جرح. ولهسه دمك سايل
نستاهلك انته الابو. وبخدمتك نستاهل

حسين. حسين. يا اغلى محبوب

…….

من عشرتك. يابو علي. تغزر وياي العشره
عشرة عمر. وي منبرك. عمري بثواب الزهره

حبيتك موت وادري
بيك الله يعظم اجري
بلكت نتلاگه بكبري. حسين. حسين

يحسين ونعم الصاحب
يل ماتزعل وتعاتب
حبيتك والله الكاتب. حسين. حسين

بيدك اخذني لخدمتك. تلكاني صار وتامر
تلكاني جمره من الخيم. وبعيني دمع العاشر

حسين. حسين. يا اغلى محبوب

……..

نسألكم الدعاء
حسين صادق العقابي

برنامج محرم الحرام 1446 هــ

قصيدة عن الخدمة (2)


ايامي. احلامي. احلاهن. بالخدمه
ادعيلي. شد حيلي. وفقني. بالخدمة

حزمني وخليني بدربك يامولاي
عطش كلبي لحبك لا ماريد الماي

……

كلبي يهواك. عايش وياك. احلى ايام. انته يحسين
شفتك الماي. وآنه بضماي. وارتوي وياك. بدمعة العين

يحسين لوما خدمتك. چا بيش اخلص عمري
وماخاف من هذا الوكت. دام انته لازم ظهري
ثبتني أريد بهالدرب. وخل دمعي يوصل نحري

حاچيتك. ياريتك. تشملني. بنظراتك
بسنيني. خل عيني. دم تجري. لخيماتك

خايف كلبي من الدنيا والله هواي
عطش كلبي لحبك لا ماريد الماي

……..

اشكي مرات. تمرني لحظات. تغرني دنياي. وتعمه العيون
وتنسه هالروح. عندي مذبوح. مات عطشان. بكلبه مطعون

خادم يسموني الخلك. للخدمه ناذر عمره
وماشلتك بكلبي جرح. شلتك اسم للشهره
وچم مره من ذنبي كلت. يحسين بس هالمره

ابچيلك. احچيلك. بس كلبي. مايقنع
اذاني. شيطاني. كل خوفي. ماتسمع

هوسه الدنيا واصبح منهه كل بلواي
عطش كلبي لحبك لا ماريد الماي

……..

عشت اهات. بالمعاناة. اصحه يايوم. وارجع وياك
رايح بعيد. وناسنه تريد. وخوفي لا يوم. اني انساك

يوميه احچي ويالگلب. يايوم تصبح نادم
وتتعلم الخدمه الصدك. من گلب سيد جاسم
ذاك الوكت من تلتزم. تستحق كلمة خادم

لو قابل. بس حاول. ياگلبي. واتأدب
شد حيلك. ياويلك. لو تزعل. ام زينب

بدرب الفطره جدمي خله رايح جاي
عطش كلبي لحبك لا ماريد الماي

…….

ياگلب ذوب. لاغلى محبوب. كافي هجران. واعرف شبيك
الذنب مستور. وبالك ادور. خاف فد يوم. دنيتك بيك.

فاتحه المجلس والدمع. واجب بكل لطميه
قلل شروطك بالعزه. بمقدار الامكانيه
فاطمه للمأتم تجي. لو تدري بي روحيه

اتوكل. واتحمل. بالخدمه. شماتكدر
تظل حاير. لو باچر. تتحاسب. شتتعذر

سولف ويه حسين وكله مضيع الراي
عطش كلبي لحبك لا ماريد الماي

………

العمر محسوب. ياگلب توب. والعهد كون. لفاطمه اليوم
إستغفر الله. وعيش بالاه. خلي عاشور. شهر الهموم

تموت انته وتظل شهرتك. للناس گلي شتنفع
ملاچك حسين شبعد. رايد وبالك تطمع
حلوه البساطه بالعمر. وهنياله كلمن يقنع

يحسيني. خليني. ياروحي. يم بابك
سامحني. تحملني. سجلني. من احبابك

من شوفة وجهك لاتحرمهن عيناي
عطش كلبي لحبك لا ماريد الماي

………

حسين صادق العقابي

برنامج محرم الحرام 1446 هــ

قصيدة لصاحب الزمان عج (3)




مشتاگه روحي تشوفك كون بعزاء
وتحچيلي ضيمك يمهدي عن كربلاء

حچيي الدمع. يكسر ضلع. ياصاحب الزمان

……..

ياغيرة الله ورايته. يل بالدموع حچايته. غريب
عايش الدنيا بحيره. تتلفت بكل ديره. غريب

بواهس الحر جيتك باحلامي
وغيرت شكلي ذنوب ايامي

اني لو احبك صدك. چان اترك المعاصي
والمذنب ادري بطلعتك. يؤخذُ بالنواصي


بالدنيا عنك حبيبي اني التهيت
ولعطف كلبك يغايب اني ارتجيت

مثلك الم. كون ابچي دم. ياصاحب الزمان

……

من اصفن اني وروحي. شفت السبب لجروحي. ذنوب
كبالك يبويه الغالي. تنعرض كل اعمالي. ذنوب

جيت أغسل كل ذنوبي هنانه
وادري تحضر بالعزه ويانه

رايد اشارك دمعتك. وبكلبي نار الخيمه
وللتعب صدره من السحگ. عطشان وسط الهيمه

اغسلهه عيني بدموعي وميظل حجاب
يكلولي شايب واگلهم لا بعده شاب

تصيح المهج. يمته الفرج. ياصاحب الزمان

……

سير وجيب العافيه. وفزز كلوب الغافيه. تعال
دنيانه هوسه بدونك. يمته نشوف عيونك. تعال

كلهه تسكت لو رفعت آذانك
ونسمع الحان العرش بلسانك

وتصلي جمعه وخطبتك. ولكربلاء النيه
والگلب يعثر بالنبض. من تذكر المسبيه

منهو اليجاوب سؤالك اصعب سؤال
مكيدين چف عمتي زينب ليش بحبال

وشمس الصبح. فوك الرمح. ياصاحب الزمان

…….

كل الكره الارضيه. كبالك تجي محنيه. سلام
كل الملوك نشاهد. جنودك وانته القائد. سلام

ياجمال الله وزعل بعيونك
نهر يابس صرنه احنه بدونك

يالمهدي لو ضاع العمر. وما لحكت للنصره
رجعني احلفك لو متت. بداعة حسين وصدره

بالچفن اطلع يغالي واركض وراك
وبكلبي نار العشك واتنفس هواك

عندي امل. بعد الاجل. ياصاحب الزمان

……

من هسه اني معاهدك. والگلب كون يساعدك. سنين
امسح بچفك راسي. بدونك يتيم احساسي. سنين

اعلن التوبه بمجلسك هالليله
ادعيلي وادري ناجح التدعيله

كل ابتهالاتي بألم. ياصاحب السماحه
بس ابقه عايش منتظر. ما ضكت طعم الراحه

كل امنياتي اشوفك. لو مره كون
حققلي حلمي حبيبي. وانته الحنون

بيك ابتدي. ياسيدي. ياصاحب الزمان

……

نسألكم الدعاء
حسين صادق العقابي

برنامج محرم الحرام 1446 هــ

قصيدة للزهراء ع. (4)



تسمع كلامي. وترد سلامي فاطمه
تنظر مقامي. عظيمة الله بالسمه

وين. ماكو قرايه انعه
كون. يكضي العمر دمعه

…….

شكراً الى ام الحسن. وشكراً لامي واللبن. رضعتني حبچ
تلوليلي بسمچ بالمهد. خادم الچ هذا الولد. كل خيري منچ

والوالد هواي. علمني آداب
سواني انسان. خادم لبو تراب
واتبره كل يوم. من الدفعو الباب

كالولي عمرك. كضه لطم بچي ونعي
صحت المنابر. فقه علم فكر وعي

صار. كلبي الخدمه طبعه
كون. اكضي العمر دمعه

……

شهديلي يل شفتي الهظم. اني على دين اللطم. بيتي المجالس
ذوله اخوتي وين الكلف. خدامج وچتف بچتف. علمنه عابس

يافرض سادس. فرض العزاءات
سمينه ضلعج. جرح السماوات
لولاج والله. عشنه بمتاهات

قرآني انتي. يبسملة علي الصدك
يا ام ابوهه. نبض كلب يدك عشك

ريت. عمري نذر اوزعه
كون. اكضي العمر دمعه

……..

يالخدم والله اطّمنو. ان الذين امنو. اهل المآتم
چم شاب عايف دنيته. وهاي المجالس ربته. والرتبه خادم

كل هاي الا رواح. تربية الحسين
بالخوه عنوان. چن حاجب وعين
الخدم احياء. والباقي ميتين

هوه و خدمته. دمه ويعاشر الگلب
خادم ولكن. ملك اذا مشه بدرب

ينوح. للمكطوع اصبعه
كون. يكضي العمر دمعه

……..

دعوه الى كل البشر. يخدمون بت سيد البشر. مره بعمرهم
العمر شنهو لذته. بلا فاطمه ياضيعته. منهو اليكلهم

هالعمر خلصان. لتضيع الايام
الماعايش الاه. للزهره وآلام
المو كلبه محروك. من نار الخيام

ياقل هو انتي. واسم صبح الي ورِد
للرحمه انتي. يرحمة الله بالحمد

دوم. بالزهراء رفعه
كون. يكضي العمر دمعه

……

محنيه تحضر فاطمه. بهذا العزاء محزمه. تشارك ولدهه
وتجيب وياهه بفخر. قطرات جود من الكمر. توزعه لخدمهه

عالم عزائج. خيمه وجمعنه
كلبچ حنانه. الليله يلمنه
نظره لعزانه. نحلفچ ي أمنه

بحيدر احلفچ . اريدن اسمي ينكتب
يامملكتنه. العمر الج بس ينحسب

هواي. بيه وياچ فزعه
كون يكضي العمر دمعه

…….

نسألكم الدعاء
حسين صادق العقابي

برنامج محرم الحرام 1446 هــ

قصيدة بحق العليلة ع (5)

لو صحت بويه الصده اسمع يجاوب راح
والدي ناعي الحزن ساعة غيابك صاح

كلبه الحنيّن رحل. مابقه بس الامل.
من غيابك صاح

………

عايش بين جفوني. ومتعودات عيوني
صوره بعيني ومن حبه تحضنه الجفنين

عيوني كبال عيونه. لوني يشبه لونه
وحتى شفافي ولاتطبك لو كلت حسين

متعوب من هذا الوكت. بس شحلاته
ويموت بالدنيا على. طاري بناته

لو طلع ساعه ورجع كتله الغياب هواي
ومن اجيبن ماي اله يتحسر اعله الماي

كباله اموت من الخجل. مابقه بس الامل
من غيابك صاح

………

يسولف لو صاح اسمي. تذكريني بوجه امي
راحت يبنيتي وعافتنه ايتام زغار

عن الطف يحچيلي. يصبرني ويدعيلي
اول مره أحسّن كلبي هواي احتار

صاح استعدو للسفر. وحسره بدليله
من كتله اروح آنه اسمعت. لا يالعليله

اتسائلت ليش وشفت ويه الجواب دموع
انتي اسمچ فاطمه الوادم تكسر ضلوع

حيلي وي دمعي نزل. مابقه بس الامل. من وداعك صاح

…….

كلت اكسر خاطرهم. ويحنون لبتهم
من خذت هدومي ونمت بهودج عباس

من طر فجر الفركه. چا مت من الحرگه
نزلوني ويدرون بكلبي شكد حساس

ودعت ابوي وچا وكف. دلالي نبضه
الشبگه الاخيره لو سنه. تمر چنهه لحظه

من مشه الحادي صحت ها ياهلي تردون
كلهه سكته بس شفت نازل دمع ام عون

كلبي رف جفني ذبل. مابقه بس الامل
من وداعك صاح

…….

بهالوحشه المو سهله. لاميته ولاعدله
يابيت اهلي اسأل وين ايامي الحلوات

راحو عالباب اكتب. احچي ويامن واعتب
وفركاهم يوجع كلبي وحچي الشمات

يامغرب بلايه دمع. ياليل انامه
يايوم اكلهم حمدُ لله عالسلامه

كلشي ظل بلا طعم بس ظل طعم فرگاه
مابقه بس النفس كلشي خذاه وياه

جاوبت كلمن سأل. مابقه بس الامل. من وداع صاح

……..

وين سنيني الحلوه. بيهم جانت تسوه
يادنيا ولو رجعو للملكه انطي عيون

لكن آ يادهري. كاسر كلبي وظهري
انا لله ومدري بروحي انه شلون

ابچي وامل من البچي. وشيفيد نوحي
مكتوب الي بعمري التعب. خلصانه روحي

من يكله بفركته راح العليله تموت
لا يجي خافن يجي يلكاني بالتابوت

قصتي وكل الحصل. مابقه بس الامل.
من غيابك صاح

…….

نسألكم الدعاء
حسين صادق العقابي

برنامج محرم الحرام 1446 هـ

قصيدة زيارة الحسين ع (6)



اللهم ارزقني في الدنيا زيارة الحسين
وارزقني في الاخره شفاعة الحسين
ربي اجمع مابيني ومابين الحسين

يارب الحسين. يارب الحسين

……

إبتهالاتي ودعائي و دمعتي
جيتك وشايلهن بچف خدمتي
والله سفره من العمر لمن اجيك
ليلة الجمعه شحلات زيارتي

كل صاحب يكثر جيته يملونه ربعه
بكل جيه تگلي ياهلا البعيونه دمعه
ثمن بيبان الك ويه الكمر مفتوحه تسعه

اللهم اكتبني وارزقني خدامة الحسين
اللهم اجعلني منظوراً بحرمة الحسين
ربي اجمع مابيني ومابين الحسين

يارب الحسين.

…….

وصل لانفاسي عطر من حضرتك
وهيّج بكلبي عشك لزيارتك
اعقد النيه واجي اشتم هواك
راحه نفسيه من اشوفن كبتك

ياصاحب ابد عن صاحبه لا مايجافي
رغم اني اجي مذنب واقدم اعترافي
هنياله اليموت بحضرتك موت العوافي

اللهم اختم لي انفاسي بحضرة الحسين
ياربي ياربي ياربي بمنحر الحسين
ربي اجمع مابيني ومابين الحسين

يارب الحسين.

…………

ماترد سائل واعرفك من اجيك
بحاجتي من اجي واوكف بين اديك
كبل ما احچي البكلبي تكلي هاك
ياسلام الله وملائكته عليك


يل مثل الابو للخادم بأبنه اهتمامه
أديت القسم خادم ولا عوف الخدامه
يا امن يجيب المضطر بيوم القيامه

اللهم الحقني في حشري بصحبة الحسين
واجعلني مسرورا ياربي برؤية الحسين
ربي اجمع مابيني ومابين الحسين

يارب الحسين.
…………..

غابه كلبي ومن دخل حبك اكيد
مملكة حب صار يحسين الشهيد
من اموت بصفنتي واسمع حسين
اصحه بسمك وارد ميت من جديد

ياسادس فرض يابو علي يا احله طاعه
ارزقني خدمتك اربعه وعشرين ساعه
بلساني يمر اسمك واحس طعم الشفاعه

اللهم احفظني من نفسي بغربة الحسين
واهديني في الدنيا وجاهة الحسين
ربي اجمع مابيني ومابين الحسين

يارب الحسين

………


زيارتي عندك امانه يالحبيب
ياحسين ولو صبح موتي قريب
الكبر غربه ولا عرف الكالي غاد
سيدي وحگ الغريب اعله الغريب

اتلفت اظل لامن اهل لا اخوه يمي
بس عندي امل انته تجي وتنادي بسمي
ادخيلك يابو الاكبر لوصحت بأبي وامي

اللهم اوزعني ان اشكر مواقف الحسين
اللهم ارحمني واشملني برحمة الحسين
ربي اجمع مابيني ومابين الحسين

يارب الحسين

……..

حسين صادق العقابي

برنامج محرم الحرام 1446 هـ

قصيدة بحق ام البنين ع (7)


الليله اجي زاير واقره الفاتحه
و كبرچ تبلله ادموعي الطايحه
لعالم اجروحج اسافر

……..

شد حيله بعيوني الدمع .. والروح الچ مشتاكه
والدنيه بيه اتمايلت. .جن هودج اعله الناكه
المهدي أنه ومن غربتي .. وي غربتچ اتلاكه
وسولفنه شلعان الگلب .. بحسينچ وبفراگه

اني وانتي بلا اهل ضلينه
كلمن ينام ودمعته بعينه
بجفني دمعي يبقى حاير

...................

كالولي عالباب انتهه عمرج وضهرج مايل
ومن لاح الحسين العطش صبح احساسج ذابل
تبجين وانتي بلا نفس وعالچفن دمعج سايل
وانه ابچي من دم عالنحر مثل البچه اعله الكافل


اليوم نتلاكه بدموع اثنينّه
ام وابنهه وننحب اعلى احسينّه
عشت عمري .. بكسر خاطر
............

لارض المدينه من اجت زينب وگلبج يسأل
هالضعن ليش ابلا زلم وعالنوگ مامش محمل
عالوجه طحتي من الهضم من سولفَت عالمقتل
ودم الحسين من الذبح والسحك بالطف وشل

الشمر ماكفا الحافر داسه
كبال علوياته شايل راسه
من جرحنه بيوم عاشر
...............

چان انتظارج بي حلم... ترجع ايام العشره
يلمكم حسين بخيمته ... چن سبحة امه الزهره
خلصتي عافيتج نذر ... بس ماكضت هالسفره
تاليهه طشرهه الوكت .. كلمن ورمحه ونحرهه

وانه بالدنيه انتظاري بلوعه
چن گلب مسجون چوه ضلوعه
عالمصايب .. بس اكابر
..............

بالعاده لو مات الولد .. بالدفن تحضر امه
ولو ماتت الام الابن .. يحضر بدمعه وهمه
نعشج طلع وبلا ولد .. عاف بدليلج لجمه
گلبج ياام الاربعه ... هالليله الله يرحمه

في امان الله ييمه ادعيلي
بالفرج هالغربه هدت حيلي
ب اه يومي. .. ودمع باجر
لعالم اجروحج اسافر

………

نسالكم الدعاء
حسين صادق العقابي

برنامج محرم الحرام 1446 هـ

قصيدة للخدمة (8)


خدمتك يحسين تسري بشراييني
بدفترك مولاي سجلني يحسيني

منك ردت نظره .
يا ضنوة الزهره

……..

وياك عشت احله ايامي
وياك باليقظه واحلامي

دكيت بابك سيــــــــدي بثنين اديه
حسيت جن صوتك يرد جاوب عليه
مية هله يالفرحــــــــت كلب الزجيه
تستاهل انته بخدمتـــــك تاخذ هويه

امشي واحنه وياك نتكفل بأمرك
خادم اتسميت ونحضرك بكبرك

سمعني من تقره
ياضنوة الزهره

……..

يحسين بجنوني حبيتك
يحسين بالخدمة واسيتك
بالدنيه كلشي اصبح ملل الا الخدامــه
انظرهه جن حيدر علي بعين اليتامــه
اتامل آنه نظرتـــــــــك يــوم القيامـه
ولرحمة الله بصايتـــك امشي بسلامه

انته الختاريت كل خادم اليقره
مجلسك مهيوب بي تحضر الزهره

يالعِبره والعَبره
ياضنوة الزهره

……..

الله يالذة الخدمه
الله محليهه ابو اليمه

حسين الحبيب وكل وكت. وي حبه سارح
كد ما احبه لمجلسه يوميه رايح
بي آمنت ثم اهتديت ودربي واضح
ولخدمته شكد سافرت . سموني نازح

والقصايد هاي. صارن جوازاتي
بحبه اقره هواي. اجمل عباراتي


صار العمر سفره
ياضنوة الزهره

…….

اهات يخلص ردت عمري
اهات وتشيع لكبري

مكتوب خادم عالكبر . راح لحبيبه
وعيونه ظل بيهن اثر. دمع المصيبه
وبكلبه نار من الخيم. جمرة لهيبه
وحسين ماينسه الخدم. جيته قريبه

ويحضر العباس. وعابس يجي بكتره
من زلم عاشور. هذا الخلص عمره

وبخدمتي ادره
يا ضنوة الزهره

………

ايام.. حزنك يمذبوحي
ايام.. عاشورك بروحي

شكراً الك يابو علي.. ابجي المصابك
ماعندي بس انته الامل.. واني اعله بابك
ناذر الك من الصبه.. عمري بثوابك
ساترني ونته بكربله.. سلبو ثيابك

ياجرح بالروح.. عايش فلا يبره
اسعه للعزيات.. وبمنبرك اقره

وبگلبي الك جمره
ياضنوة الزهره

……

نسالكم الدعاء
حسين صادق العقابي

برنامج محرم الحرام 1446 هـ

قصيدة بحق الانصار رض.(9)



احنه الخدام وهالليله انطينه حچايه
جيل يموت وجيل الثاني يشيل الرايه

احنه انصار المهدي وكل يوم منتظرينه
كلمن حضر روحه وللموت متانينه

يشيل الرايه.

………

بعصر الظهور اتأملت. ومجلس حسيني تخيلت. سافر خيالي وسولفت. للمهدي وحسين
خدام الحسين التقو. بخدام مهدينه وحچو. دكو صدر وتعاهدو. للمهدي وحسين

كلمن سولف عن احلى ايام الخدمه
وصاحو شكراً يارازقنه بهالنعمه
نموت ومانتنازل عن هاي الكلمه

خدام حسين احنه نداوي جروح الدامي
نفزع غيمه وتمطر فوك خيام الضامي

حيا الله الخلص عمره جروح لجل حسينه
كلمن حضر روحه وللموت امتانينه

يشيل الرايه.

……..

مهدينه يختار الزلم. المتروس بالغيره وشهم. اليحمل اخلاق وعلم. وبروحه عباس

المهدي عظيم المنزله. بالگلب اصبح منزله. صاحب الثار بكربله. وبروحه عباس

الصادق يروي لو ادرك اني القائم
ياشيعه لمهدينه اصبح جندي وخادم
هوسه الدنيا وضاكت يارب عالوادم

يارب عجل فرج المهدي تصيح انصاره
يارب مشتاكين هوايه نزوره لداره

نتمنه احنه ينشف دمعات. عين سكينه
كلمن حضر روحه وللموت امتانينه
يشيل الرايه

………

احنه اليسمونه خدم. بالخدمه نرفعله علم. ماعندنه بس چلمة نعم. لحسين ابونه.

نمشي للحسين بدمع. نحضر مواكب والشمع. والرايه سوده الترتفع. لحسين ابونه

احنه الماعفنه حسين ولامرنه الخوف
انطينه ارواح انطينه ركاب انطينه چفوف
زياره ومليونيه ونتعناله زحوف

اطول نهر بهذا العالم نهر المشايه
من المنبع يرجع للمنبع كلهم وفايه

تتبارك بحسين الاديان. فدوه لعينه
كلمن حضر روحه وللموت امتانينه
يشيل الرايه

……..

يوسف الزهره القل هوه. يسير على الظلمه ضوه. للمختنك نسمة هوه. يضوي الليالي
هنيال كل خادم اله. وبكلبه شايل كربله. يعدل الدنيا المايله. مهدينه تالي

لاظالم يبقه ولاتبقه بجيته جروح
باجر احنه نشوف الرايه بچفه تلوح
و حسين نشوفه يردلنه وما مذبوح

باچر لاشرقيه ولاغربيه بزوده
من يحكم دولتنه المهديه الموعوده

باجر عالحب نتلاگه ويا. ويلاگينه
كلمن حضر روحه وللموت امتانينه
يشيل الرايه

…….

(اللَّهُمَّ أَرِنِي الطَّلْعَةَ الرَّشِيدَةَ وَالْغُرَّةَ الْحَمِيدَةَ، وَاكْحُلْ نَاظِرِي بِنَظْرَةٍ مِنِّي إِلَيْهِ")

الخدمه عظيمه بكل زمن. والوطن للماله وطن. من الثوب الاسود للچفن. حسين بخدمته

كل عام نبقه اعله العهد. حسين اللي ينطينه المدد. خدام والله وللابد. حسين بخدمته

الخادم يتمنه كون ابيته ولا بات
عمره مخلص بالخدمه وبحسينيات
ماينذل والله الصاح بچلمة هيهات

ياربي اشفي صدر حسين بمهدينه
يازهرا وجروح من الطف ترزقينه

واحد واحد كون وخدام. تسجلينه
كلمن حضر روحه وللموت امتانينه
يشيل الرايه

……..

حسين صادق العقابي

برنامج محرم الحرام 1446 هـ

(قصيدة بحق الانصار رض (10)


اليوم شدينه الكلوب اعله الدروع
حسين ديره من العشك جوه الضلوع

روس نصعد عالرماح
من نحب مانستراح.

………

احنه محبس بيدك بيوم المنيه.
خاف يوكع خنصرك نوكع سويه.


حسين اخذنه لوين ماعندك كمر تلكانه رايه
حسين اخذنه لكل جرف شايل عطش ونصير مايه

حسين احنه بخدمتك
سور داير خيمتك
شكراً بكد نعمتك.

الف فدوه لشيبتك كلنه نروح
تنطي روحيه اذا ماعندنه روح

تحله وياك الجراح. من نحب مانستراح

......

باچر احنه دلال يحسين بمضيفك.
شيخ انته واكرم بدمنه اعله كيفك.

الموت ندري مايهز فنجانه لاخر كطره بينه
دوم احنه بسبحتك للموت نطلع خيره زينه

الدنيا هوسه بلا نفع
كل مناحرنه شمع
ضلع نوكع عالضلع

ما كتبنالك رسايل بس تعال
بيك رازقنه الله يالرزق الحلال

الشاف وجهك كلبه صاح. من نحب مانستراح

.....

من سمعنه خايفه زينب بجيبنه.
اهتز حبل صوت الحناجر من درينه.

كبال خيمتهه انجمعنه وصار ميدان وعراضه
وكبل ثورة عاشر الطف يمهه سويته انتفاضه

حسين ياشيخ السلف
صحنه اليزعل الشرف
الهوه من ريته انخطف

فياي اخذنه لوين ماعندك خيام
وخل تأمن زينب اعليهه السلام

ننتظر طرة الصباح. من نحب مانستراح

......

الخوه دوم تريد موقف مو سوالف.
الدنيا نترسهه الك دم ومواقف.

كبل لا رمله تنادي نشفو حنة القاسم
نترس رماح الطفوف من المناحر والجماجم

ننجرح ونحط ملح
كبل مطلاع الصبح
من يحل فرض الذبح

امداهه الدنيا لو ماكو حسين
باچر نهد ويه بخت ام البنين

نصيح حي اعله الفلاح. من محب مانستراح

.........

اشهد أن حُسين مراية الله.
والحسين بعشك مو بالخوف صله.

ساعه بالطف مايعادلهه عمر نوح وصلاته
الحلوه بالطف اليطيح بحضن الحسين شحلاته

الله رايدنه سوه
للسمه نصعد ضوه
دمنه غرك نينوى

مو بماي بدمنه خل يجري الفرات
كون زينب سالمه وكل البنات

نقصر ونرجو السماح. من نحب مانستراح

......

نسألكم الدعاء
حسين صادق العقابي

برنامج محرم الحرام 1446 هـ

قصيدة بحق مسلم بن عقيل. ع



مسلم الله رادك لحسينه.
انته ذو الفقاره البيمينه. انته الوفاي
الكوفه انت بس محليهه
الدنيا لاتسولف خليهه. بكيفك مولاي

……..

حسين ابن عمك كلفك. ويعرفك الزلمه الصعب
يدريك كدهه وماتمل. عباس ثاني بكل حرب
مرساله وانطاك الثقه. جاوبته صار من الگلب
للكوفه من رادك ضوه. لكل اعمه تاه بلا درب

من سفارة الانسانية
عاقد انته لحسين النيه. من عدنه الراي

بنظرتك دريت بتاليهه
الدنيا لاتسولف خليهه. بكيفك مولاي.

……..

صاعد على الشگره چنت. لو صاعد بظهر الدهر
التاريخ لو عنك حچه. يصبح مثل كطره ابحر
ميزان بالكوفه صرت. بينت معدن هالبشر
الخذلوك مو شيعه ابد. الكالو وإن ندري الخبر

هواي ادله عدنه بأخبارك
هاني ويه ميثم انصارك. واخبار هواي

بزودك ابدي من تحاچيهه
الدنيا لاتسولف خليهه. بكيفك مولاي

……….

طوعه مره تعادل الف. من وادم اكثرهم لفو
من شافت بوجهك علي. وصوت الحسين البي دفو
مرات تعرفلك سلف. وماتلگه بالموقف اخو
مرات اخو من الله رزق. كل شده تلكاه الكفو

حيدريه جانت صولاتك
خطه عسكريه بنظراتك. وبزودك جاي

بالقصر خطبتك تبديهه
الدنيا لاتسولف خليهه. بكيفك مولاي

…….

بسوك الضمير انته شفت. بيع الضماير والذمم
مارادو الحريه ابد. للظالم اختارو خدم
طاح القصر وانته عشت. اسمك يرف مثل العلم
لا صاحو حسين وصحت. من كلبك بچلمة نعم.

مطمئنه نفسك يوميه
راضيه بقدرهه ومرضيه. ياطعم الماي

الخطوه عن يقين التخطيهه
الدنيا لاتسولف خليهه. بكيفك مولاي

…….

تعرف يكطعولك نحر. الظلمه تغار من الشمع
ودك حسين ولايجي. من شفت مو هوه الوضع
ولاغزر وياهم علي. صار الغدر الهم طبع
ابعث سلام لكربله. متروس حنيه ودمع

لله يلصرت باب الحاجه
زايرك يرد لابس تاجه. رايح لو جاي

روحك الزچيه تواسيهه
الدنيا لاتسولف خليهه. بكيفك مولاي

………

نسالكم الدعاء
حسين صادق العقابي

برنامج محرم الحرام 1446 هـ

قصيدة بحق مسلم بن عقيل ع


قل جاء الحق اعله الباطل. مسلم نازل. تشهدله الكوفه
للطف اول خطوه ورايه. انطه حچايه. تشهدله الكوفه

موقفه من كلامه. ينتصر للامامه.

…..

من عافت الدنيا الصدك. وصار الظلم ماليهه
مسجون حك الله صبح. وكل خير لا مابيهه
لو نبي لو يشبه نبي. يعلن الثوره اعليهه
غير الحسين ولايصح. هوه الذي يبديهه

اول خطوه لهاي الثوره. جانت فكره. مسلم يختاره
ناده حسين وبي متفائل. اي تستاهل. هاي السفاره.

مسلم و اهتمامه. ينتصر للامامه.

…….

خصك حسين بمنزله. بالدنيا لا ماتنقاس
چي والدك ماخذ علي. ودلّاه بام العباس
سويت خير وما اظن.تترجه خير من الناس
يالنزلت راس القصر. واصبحت مرفوع الراس

سلطان وتمشي بكل هيبه. يبن النيبه. معروفه علومك
شمس الله الماشافك اعمه. وجه الرحمه. واضح برسومك

خالد و للقيامه. ينتصر للامامه

………

نشكك ضروري بكل خبر. وشنهو السبب والدافع
دور الاشاعه بكل زمن. يغير مسار الواقع
مسلم ضحيه اصبح تره. لزيف الاعلام الطامع
لكنّه ثبت موقفه. مثل الاذان بجامع

مرات ابن ادم بالكلمه. ينزف دمه. بظلم الاشاعه
خلصانه الدنيا وماتسوه. الكلمه الحلوه. تصبح شفاعه

والكضاهه بسلامه. ينتصرللامامه.

…….

ياضيف بالكوفه ابد ماكو اعله گدك ديوان
يابو حميده بس گلب طوعه فتحلك بيبان
چلمة هلا تنگل هلا يحچيهه مو ياهو الچان
وعالسيف والهاك الچفوف تمدهه بس الشجعان

مسلم ماخذلوه الشيعه. العدهم بيعه. بس حكم الظالم
تهجير وسجن وذبح ودم. محد يسلم. من جور الحاكم.

موقفك بي علامه. ينتصر للامامه

……..

سفرة عمر هذا الدرب چان اعله كد النبضات
وبشور الحسين المشه عايش يظل ومامات
حسينك سمه وسنينك الحلوات طشهن نجمات
يامسلم انته تربية وادم اتحب الهيهات

ياواحد ومكابل عسكر. موت الاحمر. واضح بچفوفك
ياباب الحاجه الماتنسد. باب المرقد. والكل تطوفك.

يانشيد الكرامه. ينتصر للامامه.

…….

شعند ابو فاضل من زعل. تزعل على الموت هواي
ياسيف مايتعب ابد. عالركب ظل رايح جاي
ياخادم حسين بنحر. ارزقنه من نيتك راي
الموقف على النيه انحسب. من طوعه وبطاسة ماي

خدام اليوم تعادهدنه. بصوتك صحنه. نتبع اثارك
زيد وبارك ربي النعمه. بهاي الخدمه. ونظل انصارك

الخادم البي شهامه. ينتصر للامامه.

………

حسين صادق العقابي

برنامج محرم الحرام 1446 هـ

قصيدة لسيد الماء العباس ع


توكل ياروحي . خليني بنوحي
جم حافر تدري. يحسبن بجروحي


……

صافن اعله الرايه خويه ودامهه تلوح. منتظر رجعتك
بروحتك حسيت نحري چنه مذبوح. ارجع اعله بختك

لن ما شفت الرايه وكلبي ظل موجوع
جيت اركض خويه وچن طاحن مني ضلوع
كبالي يهوسون اسمعهم طاح العباس
ويه جدامي ظل يعثر كلبي المشلوع

ابقه اسأل وينك. كل شوگي لعينك.
ولحظات غيابك. يحسبن بجروحي
………

ابو فاضل هذا انته النازف هواي. كتله ماعرفتك
شما الزمك آخ انته تصيح مولاي. وحيرتي بشبگتك

نمت بطولك حتى اتخضب من دماك
يلي مطشرينك ياخويه هنا وهناك
اخر كلمت خويه احچيهه اشبكني وموت
وطلعت روحك وآنه لزينب راح انعاك

عباس الخوه. بعدك ما تسوه.
وعيون اطفالي. يحسبن بجروحي

………

كمت أتوچه اعله سيفي وكلبي مفطور. مكابل الشماته
وكامو يصيحون هذا الظهره مكسور. ومحد لبناته


خافن ابقه وتكصد وادم للخيمات
ولو ارجع صدرك ينداس من الشمات
بلا طولك ياخويه محدب من رديت
طاحت زينب من كلتلهه الكافل مات

زينب شافتني. محني تلكتني
ودمعات البيهه. يحسبن بجروحي

………

عمامتي مالت ومدري شصار بيه. وكلبي عالمخيم
كلبي وي چفوف زينب شافن المنيه. ردت خدري يسلم

عيالي التمت والاكثر جانو اطفال
كمت ابچي لام عون وباچر اصعب حال
شلعت كلبي وهمست بذني بس بهداي
بلا عباس اسمعهم كالو جبنه حبال

ياهو لهل عيله. وياهو الاشكيله.
وشفت بنياتي. يحسبن بجروحي
……

خويه شفت الدنيا خنگه وانت غايب بعيني ظلمه صارت
وصار توديع العيال من المصايب. والعقيله حارت

صحت بنياتي ونتوادع صار الراي
وحده تشمني او وحده التحضن بيه هواي
ولزمت طرف اذيالي ارقيه وصاحت وين
لاعطشانين ولاردنه تجيب الماي

شوگي لچفينك. تعبان حسينك.
وعيون العسكر. يحسبن بجروحي


……..

نسألكم الدعاء
حسين صادق العقابي

برنامج محرم الحرام 1446 هـ

قصيدة لسيد الماء العباس ع


كالو اخوك اعله النهر مات
عمامتي طاحت بين شمات

خليتك بحضني وصحت. للموت ليش استعجلت


…….

جيتك آنه بشفه بيضه. مفطره من الضمه
والدرب كضيته خويه . وحمره بعيوني السمه
ماردت ياخويه اشوفك سابح بفيض الدمه
شوف هاي الدنيا كلهه. على حسين محزمه

يابس لساني وايدي عالراس
كد ماصحت ياخويه عباس

كل لحظه احس يمك متت. للموت ليش استعجلت

…….

ردت ابچي وتدري دمعي . كبال شماتي صعب
بكلبي ابچي وتدري يكتل.بالبچي المن الگلب
العمامه شما اشدهه. تنحل كبال الغرب
ومن مهرتي اعليك طايح. اني ودموعي التصب

بس لاتعوف حسينك وحيد
ركضت عله خيامك هواديد

كلبي لچمني من رحت. للموت ليش استعجلت


………..

شما اكلبك اخ اسمع. وانه اخوك وانهظم
كلشي سالم ماشفتلك. راس لاعين وعظم
منين اقبلك بعد اخيك. ليش منك انحرم
طشروك وحضني فارغ. منك لحضني شأضم

ماظل وكت حتى آنه الم بيك
ارجع واگل لزينب شبيك

وعالنهر حين تأخرت. للموت ليش استعجلت


……….

الشيب اخذني واني يمك. صدري بي ضاك الهوه
ومن رجعت لزينب اختك. انه والميت سوه
شكد بچيبنه بطيب خاطر. وحشه صارت نينوى
حتى عبد الله بچالك. بالخيم ماظل ضوه

باچر خواتك خويه بحبال
ويشوفن المامر على البال

وتظل بلا كافل اخت. للموت ليش استعجلت

……

وداعة الله يالعفتني. عيون تارسهه الدمع
يالچنت بالدنيه حيلي. چن گلب جوه الضلع
انت تارسني محنه. وعالك العشره شمع
روح خويه الدنيا غربه. وخلي گلبي المنشلع

خلافك يخويه هواي تعبان
يفرهد الحيل فراك الاخوان

بالخوه مثلك ماشفت. للموت ليش استعجلت


……..

نسألكم الدعاء
حسين صادق العقابي

قصيدة للقاسم ع

‏ذبحوا شبابه والعرس وشموعه

ذبحو شبابه والعرس وشموعه
‏وشلعو كلب أمه وغدت مفجوعه

التفكد ابنهه. تموت بحزنهه

…….

‏طواري الطف لهسه مكابله عيوني
‏أنه المهدي وثكل دنياي بمتوني
‏أنه مفارك عشيرة او وحدي خلوني
‏يخدامي بدمع هالليله واسوني

فاكد ابن عم واخو هالليه
والصعبه عمه جابه ويتچيله

امه اعله ونهه. تموت بحزنهه

……

شاب ومن جماله الكل يحسدونه
ولامره اعله حرمه صدت عيونه
هنيال الشباب اللي يقلدونه
القدوته القاسم واخلاقه خيعونه

لو يحچي وي امه يدنك راسه
مدلل خواته بطيبته واحساسه

الفارك حضنهه. تموت بحزنهه

……..

جابه حسين عمه بروح مهمومه
وامه شافته دم صابغ هدومه
كبال حسين ضمت دمعه مهضومه
استحت تبچي وصاحت كلمن ويومه

فدوه الك يحسين هذا وليدي
واعذرني لو دمعي نزل مو بيدي

التفكد وطنهه. تموت بحزنهه

……..

تصيح اكعد ييمه بداعتي فدوه
جبتلك حنتك وهدومك الحلوه
بيت بلايه چلمة يمه مايسوه
من ايدي خذك چف القدر كوه

تموت اليموت الهه ولد تتمنه
تظل ذكرياته والنعي والونه

يوجع شجنهه. تموت بحزنهه

……

آه اعله الحنينه التفكد مدلل
بدمع الفرحه رادت مو دمه مبلل
شماله الموت يتعنه اعله المعدل
وغير البي محنه وطيبه مايندل

وتالي الكلام الكدرت امه تگوله
جسام ياضنوتي مو هلهوله

الظالم زمنهه. تموت بحزنهه

…….

حضنتك وبنواعي الفاكده انعه
ولن النار صارت عالخيم فزعه
شلتك واركضت وتسولف الدمعه
ومن كثر التعب طحنه بفرد وكعه

شكد حشمت بس مافزعلي حيلي
دخيلج يزينب عالولد لحكيلي

متعوبه اظنهه. تموت بحزنهه

……..

نسألكم الدعاء
حسين صادق العقابي

قصيدة للقاسم ع (2)


هلهوله وشمع مذبوح. وانته بحضني وبهيمه
ياشلعان كلبي شلون. وصلت نار للخيمه

ييمه. ييمه

……….

الموت حق وادري طبعه. ياخذ المتروس هيبه
بس سوالف عندي يمه. ويه كل حچايه شيبه
الوادم الشافتك كالت. هلا بالطاهر حليبه
شمالهم خلوهه بالطف. امنية عرسك مصيبه


عمك جابك وتعبان. بدمك خضب هدومه
وكباله استحيت ابچي. كتله كلمن ويومه

ييمه ييمه

……

حسين اشوفه يريد يبچي. ودمعة المعصوم صعبه
كبالنه ما نزل دمعه. وتكتل الدمعته بكلبه
بينك وبين ابنه الاكبر. تاخذه وترده حسبه
انهظم علوياته بعده. بلا خدر مابين غربه



صاح انه ارد اودعنه. واشم ريحة اخو بنحره
وتوچه عله العباس. من كام ولزم ظهره

……

الفاتحه جاي اقره بيهه. الك يمه وجاي انعه
شفت لن النار اجتنه. ومو لهلنه الصوت اسمعه
لازلم ظلت واحشم . لامن العباس فزعه
شلتك وتعبانه تدري. وانه وانته بفرد وكعه

صحت زينب الحكيلي. اجت محنيه وتعنت
جريناك ما شلناك. المصايب حيل ماخلت

ييمه. ييمه.

……..

انته اهون يمه ثاري. الله من طشرو خيره
حسين من كد سحك جسمه. جثّته صارت زغيره
شيبته جوه الحوافر. حفره البصدره چبيره
زينب تلم جسمه رادت.دورت ماكو حصيره

من الاكبر لحد عباس. راسه شيب وگلبه
ما بلو المنحر ماي. جازو بثنعش طبره

ييمه. ييمه

…….

كون حيل وچا اخذتك. وين ماعند الله ثايه
كلت اغسلنك واشيعك. عود اسويلك قرايه
شبيدي بس عيون اباوع. والغريب يضيع رايه
بكلبي صحت وداعة الله. ولو صحت اسمع حچايه

وي زينب كلت امشي. خافن لو يسبّوهه
واكلهه العفو مولاتي. اني اللي يقصدوهه

ييمه. ييمه

…….

الحلوه بالطف اليطيح بحضن الحسين شحلاته
وهاي من العرس احلى من يشيلوك بعباته
احنه ظلينه ومشيتو. والشمر كلبه شكواته
يجيب راس حسين يمنه. يحرك كلوب لبناته

دنيا من العطش والموت. وبغربه تخلينه
ماهمنه السبي والشام. همنه العاين اعلينه

ييمه. ييمه

……….

نسألكم الدعاء
حسين صادق العقابي

قصيدة بحق علي الاكبر. ع

ودع الاكبر شبابه
وگلبي ضل عايش عذابه
هذا عليُ ابن الحسين ابن علي
........................

ربيته حد ماشيبت شمعه ويضوي اسنيني
وكبالي جان امن الخجل مايحط عينه بعيني

يبعد المايشوفن زين اله بوجهه ورسومه
والكاه جف إليه ايصير من أنوي عله الكومه
موبيدي احبه هواي ريحة جدي بهدومه
ومن احجي اعله طاري الموت يكلي كلمن ويومه

فرض عنده ايبوس اديه
انه ابو ويحن عليه
هذا علي ابن الحسين ابن علي

...................... ...

تدعيله امه بكل وكت ماخشن الهه الخاطر
امن تصيح بسمه ياعلي تلكاه صار وحاضر

واسمعهه بصلاة الليل تحجي ويه الله ليليه
شكرا ربي عل اكبر التارس گلبي حنيه
الاهي موفقه للزينات يبوس اجدامي يوميه
ويشم بيهن لأن يدري الجنه جوه رجليه

تارس البيت بحنينه
عيد جن ايطب علينه
هذا علي ابن الحسين ابن علي

..........................

خيمه الخواته بكل وكت مدللهن ابني هوايه
مايوم زعلهن ابد بموقف ولابحجايه

عنهن ساعه من ايغيب اخياته يفكدنه
ولو رد ويطب للدار مثل الابو ايحضننه
متعلقات بيه هواي الحنيين يسمنه
الأخت لمن تداريهه تفتح باب للجنه

وكبل حنيته الخواته
ملتزم ابني بصلاته
هذا علي ابن الحسين ابن علي

..........................

يختار صاحب عن وعي يقدس هواي العشره
البلموقف ايشوفه اخو البلشده يلزم ضهره

الأكبر لمن ايصاحب يوصّل صاحبه الربه
ماعاشر ابو الوجهين ولا خطوه مشه بدربه
متعلم امن العباس يضم اصويحبه بگلبه
وعنده الجار اخوه ايصير وتارس ديرته بحبه

خوش صاحب بالمواقف
بالمواقف مو سوالف
هذا علي ابن الحسين ابن علي

........................

امن المهد والحد كربله مايوم فارك عيني
خلاني وحدي بحسبتي تاخذني وتوديني

عطشان ويريد الماي واني يابس الساني
ومحتار وادير العين للعباس خلاني
راح ولن اسمعه ايصيح يبويه حسين واذاني
رحتله ونمنه طول بطول اكبال عيون عدواني

صرخ گلبي يم جماله
علي أديت الرساله
هذا علي ابن الحسين ابن علي

……….

حسين صادق العقابي