tg-me.com/qs3qw/8390
Last Update:
(قصيده لمواكب التطبير )
ماتطيب ارواحنه وتهده النفوس .. الا لجلك ياعلي نطبر الرؤس
حيدر ... حيدر
__
براسي هل القامه انه حديتها
وبيض الهدوم بدمه حنيتها
هامتي نصين الك خليتها
روحي لجلك فدوه انه انطيتها
وجرح فوك الجرح خليته يدوس .. الا لجلك ياعلي نطبر الرؤس
حيدر ... حيدر
_
بوسط محرابك يصيبونك غدر
والضرب هامتك شحضر من عذر
خلي قامة عشكي الهامه تطر
راسي وكلبي بمصابك ينطبر
ومن شعيرتنه نعم ناخذ دروس .. الا لجلك ياعلي نطبر الرؤس
حيدر ... حيدر
___
جرح راسي يجوز يومين ويطيب
لجن ايس من جرحك الطبيب
انصاب راسك وراسي بلقامه اصيب
انته تستاهل طبر ولطم ونحيب
وماسمعنه شكال شيطان الوسوس... الا لجلك ياعلي نطبر الرؤس
حيدر ... حيدر
___
خلها تتغازل القامه بهامتي
انته قبلة عشكي ومصلايتي
من كبل كايل وبعدها احجياتي
لعلي خلي تشك راسي قامتي
على عناد الناصبي وكل المجوس .. الا لجلك ياعلي نطبر الرؤس
حيدر ... حيدر
___
دمي شنهو الدم ياحماي الحمه
وانته تنعاك الملائك بل السمه
الليله شيبة علي مصبوغه بدمه
اشلون مو هامتي مثله مهشمه
واليضدنه هذه اضن وجهه عبوس .. الا لجلك ياعلي نطبر الرؤس
حيدر ... حيدر
____
الألم خلي روحي هسه تضوكه
وخلي تواسيك بخيم محروكه
الك هامة اعلى النهر مفشوكه
والك هامه اعلى الرمح معلوكه
وضلت اعلى الرمله الكم شموس ... الا لجلك ياعلي نطبر الرؤس
حيدر ... حيدر
الخادم : عباس محمد الحميداوي
BY الشاعر عباس محمد الحميداوي
Warning: Undefined variable $i in /var/www/tg-me/post.php on line 280
Share with your friend now:
tg-me.com/qs3qw/8390