tg-me.com/radioro_kurdestan/51508
Last Update:
" کـەڵ پـیـر "
وەهارۊ چەویر چەترێ پەریشان
پیرچگ پەڕ کیشاۊ لە وەڵنگە ماران
جیکەێ مەلۊچگ شاقە شاق کەو
تەقەێ دار سمەک زیڕەێ مەل لە شەو
سەمفونی مەلان وە ڕۊ دارەوە
مەس کردۊن مانشت لەێ وەهارەوە
ئەورەیل هەم ساز وارانێ ژەنین
پرچ بەڕەزا لە قەێ تاش کەنین
گرمەێ گرم هەڕ چۊ ڕمەێ بڕنو
بڵاچەێ بەرقێ شکیا لە ناو چەو
چاڵاوەیل سەر ڕێژ لە ناو خوەرەتاو
گەنگیر هەم لەنوو کەفتەو دەس ئاو
واران دەس کیشا لە گڵاێ داران
چکەێ شەونم هات لە ڕۊ مەغاران
وەهار جام مەی هەم گرت وە مشتەو
سەماێ سەرمەسان خس وە مانشتەو
مەلان چۊ مەجنۊن گاجار پەریشان
تەمۊرە ژەنین وێنەێ دەوریشان
شەوبوو وە شەوقەو مەریەم وە مەیلەو
سر کیشان لە ساێ سان تیەتەیلەو
لالە وە شەرمەو سووسەن وە نازەو
مەس لە بوو چەویر وە یەقەێ وازەو
سەموور سا خسۊ لە بەرزی وەنەو
قیژەێ قاژەلان هات لە دەروەنەو
مانشت لە وێنەێ شازاێەێ ئەرمەن
سوخمەێ لە مەخمەڵ کوتایدن لە تەن
وێنەێ نەوعەرووس لە ناو باوانەو
شان داۊ لە شان شار ئەێوانەو
لە ناو یەێ کوناێ دۊر لە دەس ڕەسێ
کەڵ پیرێ سەر ناۊ ئەو بان دەسێ
کەڵ پیر سەر کیشا لە کەڵ وەزانەو
دەنگ شاقەێ کەو هات لە خوەرمەزێانەو
یەێ نەچیروانێ لە موکوڵ وساۊ
یەێ چەوێ وازۊ ئەو چەوێ بەساۊ
یەێ شکار کوشێ یەێ کافر شێوەێ
ێەێ بێ وژدان بێ عەقل و لێوەێ
ێەێ سیاپووش چارەنۊس سیەی
تا کەڵ سەرکیشا لە ئاسوو دیەێ
لە دۊر چەوێ کەفت لە کەڵ هەفت بەن
ڕمەێ بڕنەوێ نیشتەو ناو دەروەن
لە گولەێ بڕنەو کەڵ پیر کەفتەو خوار
خۊنێ قوڵپە دا نیشتەو ڕۊ مەغار
لە تەقەێ تفەنگ مانشت چرچگیا
شیشەێ بێ دەنگی دارسان شکیا
ئەو تەقە نیشتەو بەرزی کەورەگان
مەلەوەر باڵ گرت تا ناو ئەورەگان
خۊن فەغارە دا لە ڕۊ کەڵ وەزان
نالەێ کەڵ نیشتەو ناو سراوبازان
کەڵ پیر لە وێنەێ قەدیم سەردارێ
لەشێ کەفت لە پاێ یەێ تۊلە دارێ
تا گولەێ داخێ سەردەو کرد گیانێ
تام تیەڵ خۋن کەفتە زووانێ
یەێ جغەێ داناێ ئەسرێ داڕشیا
وەختێ وە چەو دی کەڵ پیر چۊ کوشیا
وەت : باێە بچیم لەێ دارسانە
ئێرە وە دەس ئاێەم وێرانە
کەوێ وەت: هەر وەخت یەێ خۊنێ ڕشیاس
لەێ دارسانە بێ گوناێ کوشیاس
هەر شکارچیی شکارێ کوشێ
یەێ ڕووژ خۊن خوەێ هە لەێرە ڕشێ
هەر کەس مەل کوشێ لە لاێ چەرخ کەو
گرفتار بوودن وە تیر خەزەو
بان تا باڵ بگریم لەی دارسانە
ئی بان زەۋە کەێ جاێ وسانە؟
بچیم ڕا ئوورە لە مەرگ خەوەر نەو
نە تەقەێ تفنگ نە دی بەشەر نەو
✍جــەلال کـــووهــــی
دەنگ ڕووشن هۊرەیل کورد
@radioro_kurdestan
BY 📡📟 ندای روشنفکران کورد/دەنگ ڕووشن هۊرەیل کورد
Warning: Undefined variable $i in /var/www/tg-me/post.php on line 280
Share with your friend now:
tg-me.com/radioro_kurdestan/51508