tg-me.com/sheia/71145
Last Update:
قصيده رئيسية في رثاء ام البنين عليها السلام
فدوه لحبيب الزهره // مو اربعه لو عشَره
حسين الأعزّ من ولِدي // افديله كل ما عندي
مو اربعه لو عشَره
...............
يهنياله اليعيش بخدمت العتره
شكبُر بَخّته اليسمّوه خادم الزهره
آنه امّ البنين الطاهرة الحرّه
خدمت حسين وفخر طايعه لأمره
آنه وجميع اولادي // نخدم حبيب الهادي
عاهدتّه وذكر عهدي // افديله كل ما عندي
مو اربعه لو عشَره
.............
ربّيت اربع اولادي عله حب حسين
خَدَم تحت امره ولِدي لطاعته ملبّين
لون مو اربعه بگدهم بعد ضعفين
اضحّيهم وگولن ما وفيت الديَن
اولادي ومربيتهم // وهذا الگمر هيبتهم
للعتره اوّل جندي // افديله كل ما عندي
مو اربعه لو عشَره
...............
هذا ابني الگمر عباس ربّيته
سند لحسين وكت الشده خلّيته
عبد لحسين عباس ارتفع صيته
يظل خادم لبو السجاد وصّيته
وارث شجاعة حيدر // وصّيته يفدي المنحر
واعدني بالطف يفدي // افديله كل ما عندي
مو اربعه لو عشَره
.........
عبدالله الشهم وي جعفر وعثمان
انذرتهم للحُسين ابن النبي قربان
عبيد حسين صاروا خيرة الشبان
سيّدهم يحرسوه من بغي العدوان
وفّوا بنيني الطيبين // ضحّوا عمرهم لحسين
ورثوا حناني اوّدّي // افديله كل ما عندي
مو اربعه لو عشَره
..........
طلع منّ المدينه حسين بظعونه
اولادي وگمر هاشم يحرسونه
لچم گلبي برحيله وهيّج شجونه
مو لولادي خوفي عليـــه يغدرونه
ظلّيت أون بغيابه // امّ وحزينه ابّابه
بيّه المصايب تحدي // افديله كل ما عندي
مو اربعه لو عشَره
...........
بقيت بدار ابوالأكبر أون ونحب
بعد منهو اليسلّيني عكب زينب
شعوري يگلّي زينب راح تتغرّب
ابو الأكبر ذبيـح يموت يتسلّب
كافلها راح تشوفه // دامي وگطيعه چفوفه
وعليها ويلي شيسدي // افديله كل ما عندي
مو اربعه لو عشَره
سيد زيد الفحام
_
BY قناة مسلم المطيري
Warning: Undefined variable $i in /var/www/tg-me/post.php on line 280
Share with your friend now:
tg-me.com/sheia/71145