ابوذيات نعي في حق ام البنين عليها السلام

ليالي حسين بعد الأم        ويمه
سوده والحزن جاره         ويمه
تكَله ام البنين ابني         ويُمه
يكَللهه وبواجيهم سويه
...........
صدك عن الحسن وحسين       يمهُم
رحتي وهام صار الآه             يمهم
لنهه ام البنين اتكَول             يمهم
تجيهم بعد ماتلفي المنيه
.............
امعرف من نسب طاهر        ولدهه
هاي ام البنين اللي              ولدهه
سوو بالطف الأعظم          ولدهه
لحد مافاظ دمهم عالوطيه
........
ماتت وبكَلب ولهان                 موجِر
يعتهه الحزن عت لحسين         موجَر
عليهه الوكت ياهالناس          مو جار
يظل الكَبر ليش ابلا بِنيه


  الشاعر ياسر العارضي
Media is too big
VIEW IN TELEGRAM
وفاة ام البنين عليها السلام
ملا تكليف الهلالي
كلمات الشاعر ياسر العارضي
موشح نجفي لاحتظار السيدة زينب ع

هاي زينب تحتظر بانفاسهه
ورادت اخوتهه تجي عد راسهه
................
هاي زينب باخر انفاس العمر
جييَت اخوتهه الهواشم تنتظر
روحهه ماتطلع والهُم تفُر
حسين يحضر رادت وعباسهه
................
َهالمنيه المنهه ياوسفه دنت
وزينب ابهاي الحياة اتعذبت
بعد كل ذيج المأسي اتغربت
ويجي تتمنه اعز كل ناسهه
................
ماتريد اتموت مايمهه أحد
لا أخو ايتجيلهه ولاكو ولد
من يجوهه والنفس للرب صعد
عدهه سهلهه وتنتعش باحساسهه
................
هاي زينب وبأخير المرحله
من البدايه وهسه هاي التكمله
تريدهم كلهم شهامه ومرجله
كون يمهه الماكو من مقياسهه
................
هاي اخير انفاس وي ذاك الحزن
اكَبالهم رادت يشوفهه تون
اشكَد حنينه اهواي لخوتهه تحن
والمحنه من اصلهه وساسهه

الشاعر ياسر العارضي
لذكرى وفاة السيدة زينب ع
قصيدة اساسية

لا يمج كفيل وغايب حسين
زينب وحدج الليله تموتين
لا من ذيج الضعون
عبدالله ولا عون
زينب وحدج الليله تموتين
..................
باحتظاره ايريد يمه اي شخص اهله واخوته
وانتِ يازينب هضيمه كلهم اهلج والله موته
ايريد ماي اينكَطوله يَمه يبجون اعله صوته
يالعقيله وانت وحدج والزمن معلن سكوته
كفيلج عالنهر متوسد الماي
تحتظرين وانت ابعازة افياي
وين اللي يوفون
عبدالله ولا عون
زينب وحدج الليله تموتين
..................
جنتي تتمنين اخوتج كلهم ابساعة مصابج
اتغمضين اعيونج انت يمهم ابلحظة غيابج
بعد ما تمشين روحج تسمع النوح اعله بابج
هالاماني تذوب شمعه واصبح ابحلمج عتابج
شكَد لعيون ابو الاكبر الج شوك
وانت ابذكرياتج طبة السوك
وين الما يمرون
عبدالله ولا عون
زينب وحدج الليله تموتين
..................
لا ابن يلزملج ايدج يبجي واهله ايسكتونه
ويصرخ ابوكت احتظارج لا تعوفيني الحنونه
والتحت ذيج الترايب وين يالحره يجونه
حته ساعات المنيه نبجي عاللي فاركَونه
يزينب وانت اهلج كلهه غيياب
غريبه ابساعتج مايمج احباب
لا ولدج يحظرون
عبدالله ولا عون
زينب وحدج الليله تموتين
..................
ساعة الموت ودموعج تنزل ابسكتت بواجي
ردتي كون حسين كَاعد حلوه بالسانه المحاجي
ابكربله من رحتي عنه صحتي للجّمال تاجي
ردتي آخر شمه منه نسله طيب عطره زاجي
ردتي اخر نفس من عطره للموت
تنظرين اعله عينه ويختفي الصوت
راح وما يسيرون
عبدالله ولا عون
زينب وحدج الليله تموتين
..................
رحتي يازينب غريبه مثل ما بالغربه عشتي
يُمه محد صاح بعدج وكت ما يالحره متي
لا ابن ويشيل نعشج لا اخو اللي صاح اختي
عشتي بالونه حياتج وماكو وَن ابيوم رحتي
تمنيتي اشكثر لو يمج اخوان
بس وسفه البقالج بس الاحزان
راحو مايرجعون
عبدالله ولا عون
زينب وحدج الليله تموتين

الشاعر
ياسر العارضي
يم ظلام السجن تضوي شمس احروفك
من على اهلك تون دمعتك متشوفك
ليلك ابعز النهار
وتشهك انفاس احتظار
يا إمامي يا إمامي
.....................................................
عاشت اطيوفك غريبه وبأمانيهه الجفن
ماتحس بانفاس بحرك عكس مجراهه للسفن
والهوه اليحتاج دمك خلص عمره من الحزن
لا نوافذ منهه يدخل كله حيطان السجن
مختنك تحت الأرض **** ابلا هواك اتعاني
من الفرض حد الفرض **** ساجد انت امتاني
للفرج تبني انتظار
وتشهك انفاس احتظار
يا إمامي يا إمامي
.....................................................
مركبة عمرك كَصيره والسجن جان الفلك
رغم هذا انت ابوجودك جن تعيش ابمنزلك
دنيه تارسهه ابعبيرك وانت مبعد عن هلك
صوتك احساس المؤذن باب الكَلوب امتلك
وي نسيم الهوه **** باقي صوت اجروفك
عايش ابلا ضوه **** والشمس موصوفك
رغم هذا ابكل وقار
وتشهك انفاس احتظار
يا إمامي يا إمامي
.....................................................
رهبتك بعيون خصمك جن علي وعمر بن ود
تنجلي الاحزاب كلهه ابنظره لو عينك تصد
همه لو ماسَم غدرهم ياهو منهم يستعد
يوكَف اكبالك ويبرز يعرف امكَطع يرد
إي وحك هل أتى **** لا فتى وسط السجن
جاءَ بامراً مُلفِتا **** إلا انت بكل زمن
بلونك وذايب سمار
وتشهك انفاس احتظار
يا إمامي يا إمامي
.....................................................
جم أمر من غيظ كاظم كل حياتك هالأمور
هوه لو دفتر يخلّص عمرك بأول سطور
صابر اكثر من ربيعك يالخريفك ضل يدور
جن ضلع للزهره غصنك مايطيب من الكسور
مره تنشاف الحسن **** مسموم بين الغربه
وجن حسين من المحن **** عطشان واشتد حربه
جبدك ابنار وشرار
وتشهك انفاس احتظار
يا إمامي يا إمامي
.....................................................
كل جسر بغداد نعشك واجه التشييعك نهر
واللي فزعو نهر ثاني من جَمِع شيعه الحظر
حسين وحده وطعنه طعنه اسيوف وارماح ونظر
هذا يضحك ذاك يفرح ذره ماعدهم قهر
وعينه صوب الخيم **** الزينب المشدوهه
مايهم باي سهم **** ابجيشهم حاطوهه
شافهه اتلم الزغار
وتشهك انفاس احتظار
يا إمامي يا إمامي

ياسر العارضي
يمسموم جينه الحظرتك
يمسموم نبجي المهجتك
مشايه اعتنينه
بالدمعه الحنينه
هاك اسمع بجينه
يمسموم يمسموم
................................................
ويه ما تبدي الاخيره العشره من شهرك رجب
جن مؤذن بينه يهتف صوته عالي ومنحجب
كَومو ياشيعة محمد عوفو كلشي لأي سبب
واعتنو المرقد الكاظم سيدي ونفزع شعب
بالهموم والحسره والآه
بالهموم شخصك اجيناه
وانحس ما وفينه
ياحامي المدينه
هاك اسمع بجينه
يمسموم يمسموم
................................................
اربعينيه ابعزمنه وكَاصدينك يالأبي
بينه جن زينب وصرخت فوك تل الزينبي
مايرد ممشانه طاغي ولا حقود ولا غبي
وجن سكينه هالقضيه مارضينه تنسبي
ولا يوم ننسه الشعائر
ولا يوم نفني الضمائر
يالكاظم واجينه
نرفعلك ادينه
هاك اسمع بجينه
يمسموم يمسموم
................................................
راحه لا مو تعب دربك لجلك ايهون الصعب
اشما مشينه خطوه خطوه نشعر الجنه الدرب
شكَد مواكب للخدامه لجل يومك تنُصُب
هله بالزوار تهتف والمجالسهم نطب
يمظلوم هذا العزائك
يمظلوم ننصر دمائك
ونشعر بالسكينه
يالروحك أمينه
هاك اسمع بجينه
يمسموم يمسموم
................................................
بالسجن خلصو عمرك يالوفاتك بالسجن
سمموك اهل الخيانه باخر انفاسك تون
امصيبتك جداً عظيمه والهه نلطم عالوجن
ونبحر بأحزان يومك والبحر حزنك سفن
يمهضوم يومك فجعنه
يمهضوم أسبل دمعنه
من واحدنه عينه
تبجيلك سنينه
هاك اسمع بجينه
يمسموم يمسموم
................................................
من نصل يم كَبرك احنه انسلم انسمعك ترد
وتكتب اسم اللي يزورك انت واكف مستعد
اشما دمعنه ايطيح يمك سيدي انشم الورد
جا شباب انت ابضريحك نشتم اتراب الحشد
يمن دوم باقي بمهجنه
يمن دوم جيشك حشدنه
لجلك ياولينه
ارواحنه حزينه
هاك اسمع بجينه
يمسموم يمسموم


ياسر العارضي
سيد الأمجاد يا أسد بغداد
بيا سجن مسموم يبن الطاهرين
بيا سجن مسموم يبن الطاهرين
......................................
هاي مو اول مصيبه والسبب نفس السبب
بغضاً ابنهج الرساله حاربوكم لا عجب
ألحسن سممو جبده وجسم الحسين انسلب
ومن علي السجاد بيكم حاربو هذا النسب
كل جبد معصوم هالصبح مسموم
والاماكن تختلف عالسائلين
بيا سجن مسموم يبن الطاهرين
......................................
بالسجن مولاي وجهك سيدي ابنوره اختلف
اظلم ومن نور خدك هذا سجنك وانعرف
تفرش الكَاع ابعباتك بالصلاه والدمعه طف
وحاكم الدوله ابقصوره عايش انواع الترف
وانت يالكاظم فرصه للظالم
ينتقم من نهجك الحق المبين
بيا سجن مسموم يبن الطاهرين
......................................
تجرع اهموم الرزايا وكَلبك اعله اهلك يحن
سكته وناتك عليهم من يسمعك من تون
عايش احزان ومأسي ومن حزن طحت ابحزن
ماشفت راحه ابحياتك لا سعاده ولا أمن
بالسجن عمرك يخلص ابصبرك
بين جور اهل الظلم والحاقدين
بيا سجن مسموم يبن الطاهرين
......................................
بالسجود ابكل صلاتك تدعي ربك بالفرج
بالحجج ترفع جفوفك وانت من نسل الحجج
وبنهج سجن وعباده انت سنيت النهج
نازعت انفاسك انت وكل نفس بيك اختلج
وخلصت انفاسك باعذب احساسك
وانت للأسلام خير العاملين
بيا سجن مسموم يبن الطاهرين
......................................
عالجسر مطروح نعشك هذا أمام الرافظه
صاحو وشيعة محمد ترست ارضين وفضه
كاظم اهل البيت هذا عمره بالسم انكَظه
بس حسافه الفزعه جانت بعد ماصارت قضه
بالسجن سموك بعد ما حرموك
صاحت الناس اعله نعشك يالامين
بيا سجن مسموم يبن الطاهرين

ياسر العارضي
فرحة شهر للمنتظر
ولبوفاضل الكمر
ولبو فاضل الكمر
وحسين واولاده وحسين واولاده
......
شعبان شهر المعرفه والفرحه تحلاله
صلو يشيعة حيدره عالمصطفى وآله
واليفرح ابهذا الشهر ياشيعه هنياله
والبسمه في هذا الشهر من افضل اعماله
وتحله بشهر شعبان
من ننسه كل احزان
ويحله النظر للمنتظر
.....
بحسين اول فرحه يامحلاهه لمتنه
والكون يهتز لوسمعهه حلوه صفكتنه
وبفرحه نهتف ياحسين انت شفيع النه
ياسيدي بيوم الحشر مولاي تحظرنه
مولاي ونشوفك
تاخذنه يجفوفك
وسط الحشر للمنتظر
......
ثاني فرح للي علي بوسهن اجفوفه
عباس يامحله اسمه والأنوار بحروفه
لحسين مذخور انولد غاياته معروفه
باجر يطب المشرعه وايزلزل الكوفه
وكافل خدر زينب
جا يمهه من يكرب
يرسم صور للمنتظر
......
وبعلي زين العابدين الدنيه مسروره
واكلوبنه لأرض البقيع اشتاكت اتزوره
فرحتنه تحله ابمولده وصفكتنه مأجوره
بكلوبنه انشيدله بيت وكبه معموره
ومن الفرح نسجد
وابكل عزيمه انشد
حبل النصر للمنتظر
........
بجسام والاكبر حلت كلهه امانينه
طير الفرح رفرف جناحه وغرد اعلينه
شبان والهم عالشباب الحق يصحينه
فرحتنه صارت نجمه وتضوي بليالينه
وانطش رحيق الياس
والفرحه احلى احساس
كل الدهر للمنتظر
.........
للمنتظر عجل الفرج ياربي زيح الهم
واجروحنه بخمس طعش شعبان تتكلم
نفرح نريد ابكل زمن ملينه نتألم
والفرحه وي المنتظر لمن يجي نلتم
وانجدد البيعه
وبأمره ونطيعه
وكل العمر للمنتظر
ياسر العارضي
الفرحه محلاهه
ابميلاد الحسن
..........
محلاهه فرحتنه اله ومستبشر الكون
ويانه وايزف بشرته ضحكه اعله العيون
هذا الكريم وللكرم ميلاده مرهون
سُفره اله كل الارض وجفوفه ماعون
شبعانه خلاهه
صارلهه وطن
الفرحه محلاهه
ابميلاد الحسن
..........
مو بالفكر يجري الكرم حته ابدمائه
من انولد لجله الخبز اعلن ولائه
تزهي الارض بيهه اصبحت شعشع ضيائه
منه الشمس تاخذ ضوه تضوي بسمائه
والدنيه ضواهه
للنور انضمن
الفرحه محلاهه
ابميلاد الحسن
..........
واسع مظيفه اشما كَعد برحابه خطار
لا يفرغ ولا ينملي يم ربنه الاقدار
موسبعه جيران الحسن من نحجي نحتار
كل الكواكب والخلك عنده اضن جار
بعيونه حطاهه
وابوسط الجفن
الفرحه محلاهه
ابميلاد الحسن
..........
اول سبط واعظم رجل ماينسه ناسه
وانولد من اجل الشرف مو للسياسه
ماقاسهه اله ابصلح واضح قياسه
عنده الحصيره بكل زمن كرسي الرئاسه
والفتنه طفاهه
وانزاح الوثن
الفرحه محلاهه
ابميلاد الحسن
..........
هذا الحسن مو اي شخص عنده كرامه
اليتنخه باسمه بكل زمن نال اهتمامه
يكَضيهه حاجاته وحك يوم القيامه
منتصف رمضانه صبح عيد السلامه
بهالفرحه نتباهه
احنه بكل زمن
الفرحه محلاهه
ابميلاد الحسن

الشاعر ياسر العارضي
2024/03/28 04:18:57
Back to Top
HTML Embed Code: