رحلة مولاتي العقيلة عليها السلام

طلعت امن المدينة وعندي كافل
كلساع ويجي يعدل المحامل
كبل لا اصيح خويه يا ابو فاضل
يركضلي ويكلي امري يم عون
.
بجية الليل جان يدلي ممشاي
فانوسه بيسرته وكاض يمناي
ولو طر النهار يصيرلي افياي
ما خله خيالي اتلمحة العيون
.
مامنه بَمشيتي ومرتاح كلبي
ربية اعيون كفالي اعلى دربي
امن اتعب شوفته تنسيني تعبي
شحلاته وبيرغه يرف فوك المتون
.
لاجن بالطريق وگلبي كضني
اجه عباس يركضلي ونشدني
ريحة غربة كتله خويه اجتني
وين الليلة راحة هاي الاضعون
.
كَلي لكربلاء خويه وصلنه
وهاي الليلة بيها يحط ضعنه
وجعني گلبي وتراولي اهلنه
ضماية وعالترب راحو يغمضون
.
الليالي مرت واحنه بخيمنه
واجه اليوم الدليلي خاف منه
وغدت عالكاع مطروحة زلمنه
وبگيت الوحدي لا كفال لا عون
.
لن صوب الخيام اتعنت اخيول
واعلى التل صعدت وبالي مذهول
افزعمن واخوي كَبالي مجتول
والعل عالخيل جيتهم يسلبون
.
الما بيهم رحم حركوها الخيام
وعلى نار الخيام اركضت الجدام
اويلي شصار بيها اجدام الايتام
ازغار وكوة لو رادو يركضون
.
تعبنه امن العطش ومراكض الخيل
ويا وحشتنه لمن گرب الليل
فوك الكاع مكعدها المداليل
متخوفين من عين اليحرسون
.
اوي طرت الفجر جهبونه الاغراب
بالنوك الهزيلة والگلب ذاب
مشينه مجتفين وتحدي الاجناب
وكطرة رحم ما بيهم اليحدون
.
(تضمين)

بگيت محيرة واصفج بالايدين
لا عباس يبرالي ولا حسين
يزجروني من ابجي وتدمع العين
غريبة وسكته اون والگلب محزون

@k_rark اللحن

ولادة الامام العباس عليه السلام


اجه لحيدر ركض فرحان قنبر
وصله وبشره وابتسم حيدر
اجه شاله علي وباذنه كبر
.
علي اختار الاسم سماه عباس
اسم يعني الغيور اليرفع الراس
البطولة والكرم والحب والاحساس
.
يعني الاسد والمغوار
وبمعنى ثاني الكرار
ليث الحروب المقدام
وبدر الهواشم الاقمار
………………………………….
الحسن لمن درى وهو بمضيفه
الدراهم كلها حطها بايد ضيفه
وثلثتيام العرب تاكل رغيفه
.
الگمر كل يجي ياشر يريده
وابو محمد گبل يحمل عضيده
وابو فاضل يستحي ويقبل ايده
.
عين الحسن تبراله
ويحسبه راحة باله
يحس بحنان الخوة
گلب الحسن لو شالة
…………………………..

خريف الدنيا بس الزرع خضر
وعلى ورد المدينة الندى سير
اجه الحيد اليناصر ابو الاكبر
.
اجه طير الفرح بالدنيا غرد
فرح گلب الحسين ووجه ورد
سعاده بگلبه ما مرت على احد
.
بمولد كمر آل عدنان
ماكو گلب ما فرحان
بس گلب ابو اليمه حسين
بساعتها اسعد انسان
…………………………………
رفض يغفى بمهد بدر الهواشم
ورفع ايده لاميرة امن الفواطم
بحضنها رايد يشم النسايم
.
بحضن زينب گبل غمضها عينه
حنين وغمض بحضن الحنينه
تناغي بيا علي وتگمط ادينه
.
بهذا الطفل خفة دم
كل ما تناغيه يتبسم
لو ساعة تبعد عنه اتحن
وترجع اله وبيه تشتم
………………………………….
واكو وحده الفرح ماخذ گلبها
بدمعها تشكرت واتناجي ربها
هلا تكله هلا بروحي وفرحها
.
هلا ببني الشهم يا محله عينك
هلا بيك بكثر فرحة حسينك
هلا بيك بكثر ما تحب دينك
.
ام البنين تناغيله
وبكربله تلوليله
وي اللبن تحجيله
وبيا علي تشد حيله

………………………………

اللحن @k_rark

اربعين السيدة العقيلة صلوات الله عليها


يوم غربة جان يوم الاربعين
اربعين ام عون مو مثل الحسين
فرق بين اليسمع امن اهله الونين
امن الاهلها وناسها محرومة
~~~~
باربعين حسين اجه كل الضعن
فاكدات وعالبواجي اتگابلن
اتلث ليالي اعلى الكَبر يتناوبن
ووحده للاخرى تون مهضومة
~
بس حسافة باربعين ام الخدر
ولا علوية اعتنت يم الكبر
ياهو لام عباس يتعنى الفجر
يگلها بتها امن الهجر مالومة
~
عادة الميت يزورونه هله
هذا يغسل كَبره هذا يون اله
اجتاف خوانه اعلى موته مهدله
ودمع واحدهم منگع اهدومة
~~~~
لجن زينب ياهو اجاها وزارها
ياهو رش الماي فوك ترابها
ويم كبرها ياهو من احبابها
انهدم حيلة وما گدر عالگومة
~
هسه لو مدفونه يم خيامها
وابو فاضل مندفن كدامها
شوية جا خفت عليها الامها
وبين الخيام شحلاها النومة
~~~~
لكن بشام الهضم مدفونه
البيه اخوّها شافها بعيونه
مجتفه بالحبل وي اضعونه
عالرمح وتنوح الها ارسومه

ليلة جرح امير المؤمنين


الليلة مختلفة النسايم
مرت على دار الهواشم
زينب جفنها ماهوْ نايم
جنها اعلمت واليها ينصاب
…………………….
كضها گلبها ومن جزة الليل
لنها تسمعه صوت جبريل
والحيل فارك زينب الحيل
من صاح طبرو راس ابو تراب
………………….
لا بيها صوب المسجد تروح
ولا بيها تبقى تموت بالنوح
من عدها رادت تطلع الروح
محتارة ضلت والگلب ذاب
………………….
فكت الباب وشافت ام عون
خوانها من ابعيد يمشون
اعلى اجتافهم زلمة يتجون
بدم هامته متخضب اخضاب
……………………..
تضمين
(ونّـــت ونـــادت يـالـمجبلين
هـالـشــايـليـنـه ويــاكـم مـنـــيـــن
أسـمـع اصياح ونوح صـوبين )
جن غدر لايح داحي الباب
………………………..
تگربو شافت دمه عالعين
حاجت اخوتها وعلة الونين
من يمتى صارت خويه يحسين
والينه فوك اجتاف ينجاب
………………………..
اخوتها منهم شبت النار
وخلو ابوهم وسطة الدار
جابو طبيب يشخص الصار
وجويعدة زينب وره الباب
………………………..
گال الطبيب وسمعته كال
اصواب ابوكم هذا جتال
يا حال زينب بگت يا حال
من درت حيدر جرحه ما طاب
………………………
صاحاها ابوها باخر انفاس
وحط جفها فوك اجفوف عباس
مدد اجدامه ورجع الراس
وروحة اعرجت كدام الاحباب
………………………

علي المظلوم
عاش محروم
ومات مهضوم
امير المؤمنين
………………………

الجفنه الما رف بحرب
ولا عثر مره بدرب
التهابه كل الانس والجان
.
الحاني ضهر الخيل امس
وبجفه رداها الشمس
البكل حروبه مخلي نيشان
.
من كثر ما مكسور ومفارك النوم
يتجى عالحيطان لو رايد يگوم
ما وده تدري الناس دلاله مهضوم
بس بالمشي مفضوح البكلبه ملجوم
.
هذاك الباب
خله صواب
ابد ما طاب
باابو گلب الحنين
…………………….
بالوقت كالو ينجبر
شما بلغ حجم الكسر
كل جرح ولنسيانه ميعاد
.
ومرت اعوام امن انجرح
ومر عالديرة فرح
وحنت لحايها الزلم غاد
.
بس علي خله الشيب يعلى الوجنيتن
جي جاسته دمعات افراك ام الحسين
المحبوب گلبه يموت ويفارك العين
يغير حلاته الشيب من تمضي السنين
.
دمع العيون
يغير اللون
عاش شلون
من هذاك الونين
…………………………..
امن اسنين حيدر ينتظر
جيتة هذا الفجر
البيه تنتهي حسرات الفراگ
.
تعب اعيونه الهجر
وكضه عمره منكسر
كد ما دليلة لفاطمة اشتاك
.
حيدر اويه ام حسين انتهى فركاه
وفاطمة الليله اهناك تتلاكه وياه
بس علة صوت النوح والحسرة والاه
للكلبه ضل عطشان وماله اخوه ينخاه
.
علة الونين
لمصاب حسين
البلايه معين
البقه وحده حزين
………………………..
فاطمة وحيدر حجو
عن كربلة وكعدو بجو
البيها تغرب كل ولدهم
.
گربت ايام الالم
ايام وتوج الخيم
ويغَمض بهيمة ضعنهم
.
ما دامه حيدر راح ما ضلت ايام
ويهل شهر عاشور وتهل الالم
وابن الكره حيدر يحركها الخيام
والنار ذيج تلوح اجفوف واجدام
.
لهيب النار
يركض اكبار
ويلوح ازغار
بضعن ال الحسين
……………….………….
بليلة العاشر سوه
ايتعنون لنينوى
فاطمة اتون وعلي الحامي
.
وزينب تكلهم هلا
يهلي شوفو كربله
بيها ضعنكم امسى ضامي
.
يهلي الجدم تعبان والگلب ذايب
شوفو زلمكم غاد فوك الترايب
وذاك الدلال انشال وصرنه غرايب
يهلي بعد ساعات وندخل خرايب
.
بعد ساعات
بخرابه نبات
وغرب شمات
يحرسون الضعين

ام البنين الطاهره
لترابها حن الگلب
هم يجي يوم وننحني
ونشم عطر ذاك الترب
.
نستبدل اسنين العمر
بسجدة شكر يم الكبر
هيج وهواها الفاطمي
عالعاشو بفيها يمر
.
تمضي اسنينه بكسرة گلبنه
محرومين من الدللتنه
ياهو الجان تعلاله مناير
وبس تراب كبر ام المحنة
.
اليصبر گلوبنه متانين مولاي
ورهن نبقى لقراره
عبيد ومالنه كباله يضل راي
وامرنه بانتضاره
وباجر يطلع وترتاح الگلوب
ويبني الها مناره
ووياه نعتني لحضرة ام عباس
ونحييها الزياره
…………………………..
امن بعيد نقراها ابالم
زيارتها ونقر بالوفه
ونقره السلام اعلى الگلب
المليان حب ومعرفة
.
ونقره السلام اعلى النظر
الياما لبني الزهراء سهر
لخدمة بني الزهراء سهر
ونقره السلام اعلى الادب
التورثه گلب الكمر

.
اشما طلعت شمس واشرق ضواهه
وسواد الليل كحل كل متاهه
سلام الله على گلب ام البنين
وعلى عباس المضوي سماهه
.

سلام الله على باب الحوائج
ام بدر العشيرة
سلام الله على ذيج المحنه
والرحمة الحبيرة
سلام الله لگلبها ولادبها
الما شفته نظيره
سلام الله البَنَها الخله عباس
ينبض گلبه غيره
………………………….
مو قصة اجداد ونسب
والغيب حيدر يعلمه
بس رادنه نقدس كلب
مخلوق يسعد فاطمة
.
حيدر بالحروب انفرد
وبالعرب ما شبهاه احد
ابضهره شايل بس زلم
الاسد البضهره اسد
.
الله اختارها كبل العوالم
تصير ام البنين ام كمر هاشم
شاء الله بقدرته وراد مولاي
تصير ام البنين ام للفواطم

.
شريكه اختارها الله لابو تراب
وطهر كل نسبها
ومن نور الزجية اشتق ضواها
وسماها باسمها
ولان للزهره قرت بالولاية
ورضت تخدم ولدها
معصومه الله سواها ونطاها
الوفه كله بلبنها
………………………….

انولدت بديرة بدو
لكن اسمها العالمه
نالت علمها من علي
ورباها حبها لفاطمة
.
بذيج العوالم امنت
والزهره بيها تكفلت
وردت جميل امن الحسن
بعالم الدنيا من جت
.
لام كلثوم ولبتها العقيلة
صارت خادمة وصارت كفيله
وجابت اخو يسند ضهر الحسين
ما مخلوق بالدنيا مثيلة
.
امن اتكفل ابنها بممشى الضعون
وبديها انطت حسامة
تكله بكربله شوفها الرجال
شنو معنى الشهامه
اول ام لابنها تكله لتعود
يوليدي بسلامه
يبني اجفوفك اطيها والعيون
افديها لخيامه
……………………………

ام كمر هاشم مؤمنة
بصاحب زمنها تعتقد
وتدري الامام اغلى واعز
امن التضحية باربع ولد
.
كل همها جانت خدمته
ومرضات گلبه وطاعته
اتناست ولدها من بشر
ينعى ولدها سمعته
.
تكله اولادي فدوه اخبرني عنه
حركت الكلب يالتنعى باهلنه
خبرني بحبيبي حسين وام عون
ويمتى للمدينة يرد ضعنه
.

كلها حسين ضل بكربله اهناك
مغطيته الترايب
وضعن اهلج يحره جاي متعوب
من نوم الخرايب
تلكيه يم كمر هاشم تلكيه
ضعن ام المصايب
زينب ردت ابلا راية لا اخوان
بگلب متعوب ذايب

شهادة مولانا جعفر الصادق عليه السلام


القصيدة لسان حال الامام الصادق عليه السلام
والكلام موجه لشيعة اهل البيت عليهم السلام المناصرين لساداتهم ولم يتركوهم


يا مَنْ وَفَيتُم
وما اتبَعتُم غَيرَنا
يا مَنْ صَبَرتُم
عَلى الأذى فِي جَنبِنا
نحنُ وَعَدنَا
ولَن نُخالِفْ وعدَنا
واللهِ أنْتُم
فِي كَنْفِنا وَحِفظِنا
.
الغيارى اهل الحمية
الطاهرين اهل الشهامة
العلينه يرف گلبهم
رفة اجناح الحمامة
الامنوا درب الله واحد
هو بس درب الامامة
فتيه لا خوفاً عليهم
بامان الله وسلامة
……………………………..

ان اراد الله بعبدٍ خيرا ، قذف في قلبه حب الحسين
وحب زيارة الحسين

.
حُب حسين خليه يحدي گلبك
وخل يملك احلامك هذا حبك
هاي الدنيه بالراحة ترغبك
بس مقصدها تلهيك وتتعبك

.
اذا رايد تجاور فاطمة وحيدر
والله يباهي بيك اهل السمه والبر
اكسر گلبك وطيح دموع العين
ومشية عبد امشي لباب ابو الاكبر

.
خلي تروح
وين تريد الناس تروح .
روح انت لمحبوب الروح .
ولون خطواتك بالنوح
محبوبك ظامي ومذبوح

……………………

يا زائِري قبرَ الحُسينِ ابنِ علي
وبطشُ أعدائِهِ لا يَمنعُكُم
سجدتُ للهِ العليِّ راجيًا
بِدمعَتِي وَحُرقَتِي أدعُو لَكُم
.
استودعُ اللهَ معَ الأبرارِ
أبدانَ تلكَ الثُّلةِ الاخيارِ
يا ربِّ ارحَمْ مَن قَذَت أعيُنُهُم
لِما جَرى لِمُهجةِ المُختَار ِ
وارحمْ قُلُوبًا جَزعَت لِظُلمِنا
وصرخةً مَملوءَةً بالثَّار
………………….
خليّ حزنك لمولاك همك
وضيع باسمه وباسمه يلمك
مثل الحرگ ذاك اللاح الخيام
طاري حسين يحرگ كون دمك
.
البحضن امه فاطمة ينام
استوحدوه اشباه الازلام
ومن المهر بعدته السهام
وطيحة الماي اعلى الارض طاح
.
ومن شافهم غارو للخيام
گام الشهم بس طاح من گام
اتحسس بگلبك هاي الالم
لحد ما تحسهن صارن ارماح
……………………

امشي ولا تفاركها عبرتك
ومن توصل الحائر هل دمعتك
ولامه فاطمة اعلنها كسرتك
واذكر نوحها وكسرة كلبها
.
كرهاً حملته من درت يضمه
من يوم الاجه تبجيله امه
كل ساعه تلوليه وتشمه
بس تالي العطش ضيع تعبها
…………………..

اخلص وجد بخدمتك
وبدمعتك
عيش بكسر خاطر
.
ولصاحب الثار انتظر .
والمُنتَظر
يخليك اله ناصر
.
اليطلع وساعة طلعته
تهب غيرته
وتسر شكو مكابر
.
ولو سوه من الدم نهر
ما تنجبر
يا كسرة العاشر

بالمعرفة والهمة
إنخَط طريق الخدمة
ابلا معرفة الحُب خلة
بالمعرفة الحب فهمه
.
ومن صادق آل الزهرة
اتاشر جواز العبرة
ورخصها جفني دموعي
لجرح الحسين وكسره
.
الحسين المنكسر گلبه
انكسر گلبي ونعيته
دمع عيني جريته
متحسر بجيته
.
منّه انسلبت الراحة
وهجر ديرة عمامه
لدرب ما بيه سلامه
بصحاري حط خيامه
.
متهجر المخلوقة الخليقه
لامه ولابوه ولجده وعضيده
ابن الدعي والما يعرف الله
راد الامام يحط ايده بيده
الَمّن تظل بجفني دمعتي
وهذا الجره وي ابن الصميده
.
ليسَ مِن عينٍ أحبْ .. وَ أقرَبَ لله
من عيونٍ قد بَكَتْ .. رزءَ حُسينَاه
…………………………………

سنوها آل الخالق
والما تبعهم زاهق
ولكربلاء من ابجي
تابع امامي الصادق
.
البصري الاجاه بسفره
سولفله حرگة صدره
گله الامام الصادق
هنيالك اعلى الحسرة
.
تذكر ليل عاشوراء
ولم شمل العشيرة
اميرة بصف اميرة
بالخيام الجبيرة
.
بس حسين متحسر
وخفى حزنه بكلامه
يحچي ببتسامة
اويه اطفاله بخيامه
.
اويه اطفاله يتبسم من يسولف
وبگلبه نار اعلى اطفاله باجر
تضحك رقية وتفز دمعته
ويخفيها ويظل گلبه يكابر
وزينب تشوفه وتفهم نظرته
ويهل دمعها مكسوره خاطر
.
وما بَكى أحدٌ لنا ... و لِما لقيناهْ
يرحَمْهُ ربّي قبلَ أنْ.. تَسْكُبَ عيناه
………………………………
جمرة بگلب كل خادم
تابع درب بني هاشم
يباريها مثل اعيونه
ويطلب مدد من فاطم
.
ومن طيرة البوم افهم
حزن العبد واتعلم
سكنت خرابة وناحت
عالماله اخو ولا ابن عم
.
تخلص الليل بس تبجي
على الجرحو سكوته
الغريب الراح صوته
ينعى لفگد اخوته
.
ظل يم الخيم وحده
محتار ابناته
وتصدله مدللاته
الترب لون عباته
.
ما تحلى دنيا بيها ابو الاكبر
متغرب وما يملكله ناصر
اتبع اثر بس ناعي المصيبة
وبس للحسين اظهرها المشاعر
مرهونه روحي بدمعة عيوني
للظل وحيد وبعياله حاير
.
يا أبا بصير أتحُبْ... أن تُسعِدَ الزهراء
ابكِ علىٰ مَن بقىٰ.... خَضِيبَ في البيداء
……………………………
اسمه بحزن ترتيله
بيه يكتفي الينعيله
حسين ودخيل جروحه
حتى الحجر يبچيله
.
يبچي الحجر لعيونه
المغير اظماه لونه
اليروي الفرس بجفوفه
ما قبلوو يروونه
.
جماد ودم جرى دموعه
وصرخ گلبه حسافة
من الماي شافه
رفض يوصل اشفافه
.
واوحوش الفلا ناحت
على روحه الحنينة
ورثت دخان عينه
البين سمه وبينه
.
نهر الفرات يروي العطاشى
لكل البساتين يكفي مايه
ما مره سامع ما روه ظامي
وما سامع بجنبه تهوى راية
ليش نحرم منه ابن الزجيه
ويم جرفه طيح جود السقاية
.
ما مِن عَبدٍ يرتوي... ويَذكرُ العَطشان
يكونُ مَغفورًا لهُ.... في مأمنِ الرحمٰن
.....................
اغله واعز ايامي
من صوبه تمشي اجدامي
يفرحني ويرجعني
محققها كل احلامي
.
بعد الفرح دمعي يهل
وجرح السلب حزنه يحل
الهسه تفييه گبة
بالهيمة ما فوگاه ظل
.
بعد ذاك التعب كله
اجه وكت الظهيرة
بلحضاته الاخيرة
طاح الكله غيره
.
الامام السيد العابد
ما راعو حرمته
ولا احد خاف بخته
انسلب وامسى بغربته
.
يالي تزوره اذَكر مصابه
اذكر غربته وسلبة ثيابه
بالحائر اذكر من خيل اجته
وحسرة دليلة وضيمه وعذابه
واذكر رقية بالليل اجتنه
بيديها ماي وتصرخ يبابا
.
من زارَ جديَ الحُسين .. بِحقِّهِ عارفـا
كانَ كمَن زار الإله ...في عرشِهِ واقفا

وارث اصحاب الكساء


مخلوق من نور الاله ووارث اصحاب الكساء
ومثل جدي المصطفى اطيعني ارض وسماء
حجة الله اسمي جعفر وانفرض حبي فرض
الما تبعني ما يفيده لا صيامه ولا صلاء
……………………………….
علوي وكل شي ورثته من امير المؤمنين
الغيرة والحب والشجاعة ولقب شيخ الصادقين
وقوة ايدي خيبريه وغضب كلبي حيدري
وكلبي رحمان ورحمته تكفي كل العالمين
………………………….
فاطمي وبيه المحنة تفوق نسمات الهوه
كلمن يكلي دخيلك مني بالرئفة ارتوه
مثل امي فاطمة عيني على شيعة علي
الينجرح منهم اجيله وانه اصيرله دوه
…………………………
حَسني والكرم گلبي صارله بيت ووطن
بالكرم محد يزاودني مثل جدي الحسن
بني هاشم ماكو واحد ما تكرمنه عليه
والعطية من ادينه ما يعادلها ثمن
………………………..
شامخ وبيه مهابة من مهابة الحسين
مثله حر اوعشت ثائر ضد عروش الظالمين
بصوت يشبه صوته اصيح بكل مهابه وكل فخر
منا هيهات المذله واحنه حبل الله المتين

شهادة الامام الصادق عليه السلام

جعفرية ونمشي بالگالة الامام
نتبع جعفر الصادق والسلام
ابلا نشد نمشي وراه
وما نشم الا هواه
جعفرية
……………………..
تلونينه بلون حبه
وحبه دلانه بدربنه
السالفه الكايلها گلبه
ابلاية شك گايلها ربنه
هاي كل الدنيه غربة
ومنها شفنه بس تعبنه
بس كلامه يا حلاته
اُنس واستوطن گلبنه
.
حجيه خلانه نعيش احلا حياة
علمانه الحب فقط درب النجاة
وضوه ضلمتنه ضواه
……………………
الصادق يبين حقيقة
لكل عبد طاهر حليبه
گال اليحب ينسه روحه
وينشغل بس بحبيبه
ويتخذ من وهب عبره
اللگة حبه وذب صليبه
واعتنق دين العَوابس
وصار اله بالعشك هيبة
.
لذة الحب وهب شافها بخيام
بكل نسايمها اثر من الغرام
وهب محبوبه لكاه
……………………….
علمانه شلون نعشك
وافتهمناه من كلامه
كال خير الدنيه كلها
بحب الحسين وخيامة
واليريد يحبه الله
وينحسب وي النشامى
خل يدك باب الحسين
ويلبس اهدوم الخدامة
.
دين الله اتمثل بحب الحسين
الما يحب حسين ما يعرف الدين
بحبه توصل للاله
……………….
ابلايه ماي الورد يذبل
ابلايه نار العشك يبرد
حسين يهوى الكله غيره
والرسملة بگلبه مرقد
رايد المحروك گلبه
الكضه عمره بثوبه الاسود
الينكسر وي طاري اسمه
ولغربته حيله ينهد
.
ابو الكاظم هيج وضحلي الطريق
كال اليحب حزنه يبراله صديق
العشك كل دربه اه
………………………..
الامام احترك بيته
ومن طفى هلت دمعته
انسئل عن سبب نوحه
وعن سبب حزنه وكسرته
كال الله يعين كلبه
الحترك بيته على بته
وهو نايم عالترايب
وعالترايب كعدة اختة
.
ما يسد هذا الجرح اي انكسار
ولون هاي الدنيه كلها تصير نار
الغيور بدم بجاه

يا علي ابن موسى الرضا

للامام الرضا عليه السلام

انه ادري حجي العبد مسموع
وجاي احجي ليك بگلب موجوع
ارحم حنين الجوه الضلوع
وكعدني بعتابك يمولاي
.
متعوب من الدنيه متعوب
وبوجهي كلها انسدت البوب
كل شي احس من عندي مسلوب
بس اشتياقي لكَبتك وياي .
.
مهضوم يا مولاي مهضوم
جي من هواك الگلب محروم
ما اهود ومتزيل الهموم
الا اعلى بابك احط يمناي
.
الصياد الي يا ابا الحسن جاي
وانت ورحمتك بعد مولاي
ضلت بكيفك وانت ابو الراي
يالصرت للغزلان حماي
.
الحاجه مرويده امن اهلها
ومنك ردت حاجتي تحلها
هاك الحبل واحبالي شدها
بخيمة الجان لضعنه سگاي
.
الله يعين العنده محبوب
ضامي وغريب وثوبه مسلوب
ويم الشريعة امن الضمه يذوب
يم نهر بس ما ضايك الماي
.
ويلي التفارك عينه الاحباب
عيونه يغمضها اعلى التراب
ذاب المدللته ام حسن ذاب
وعنه غلة مولاي الفيياي
.

اللهم عجل لوليك الفرج

بغريب الغرباء
المغسل بالدماء
اللهم عجل
لوليك الفرج
.
بالشفاه الذابلات
بالقرب من الفرات
اللهم عجل
لوليك الفرج
.

…………………..
بركضت المخدرات
عالجمر حافيات
اللهم عجل
لوليك الفرج
.
البالامس مْدللات
وصبحن مسبيات
اللهم عجل
لوليك الفرج
.

……………………………
بالسبي وضيم الهزل
بجرح والام الحبل
اللهم عجل
لوليك الفرج
.
بعنق زين العابدين
وغربته بعد الحسين
اللهم عجل
لوليك الفرج
.

……………………..
بالاميرة ام الخدر
الكسر خاطرها اليسر
اللهم عجل
لوليك الفرج
.
بطبت الكوفة العصر
والشماته والقصر
اللهم عجل
لوليك الفرج




.

لو دارتِ الدُّنيا عَليكَ مرةً
ولم تجد عوناً منَ العبادِ.

اهربْ كَغزلانٍ رأَت صيادَها
لأرض بغدادَ الى الجوادِ

ومثلما ساق النياق تنثني
لما يشد الحبل كف الحادي

اثنِ ضلوعاً للتقي ابن الرضا
فذي سجايا خادمِ الاسيادِ
.
وامدد يديكَ عندما تدنو له
مثلَ غريقٍ راجِيَ استنجادِ

وقل لهُ مولايَ إنّي عبدُكُم
مَن غيرُكُم يرحمُهُ فؤادي

هَب لي ضماناً يابنَ خيرِ ضامنٍ
فيهِ فِراقي (دُنيةَ) الحُسَّاد ِ

لكربلا فيهِ يهيجُ مدمعي
حزناً لكربِ سيدُ الاسيادِ

اجعل بقلبي مجلسًا لا ينتهي
ذا مطلبي وغايةُ المُرادِ

لا طيٍبَ اللهُ الحياةَ إذ مشت
عزيزةُ الزهراءِ بالأصفادِ

يا كمر بغداد
اجيتك
وخطوة خطوة تصيح روحي
ادخيل مولاي الجواد
ووكفة الما عنده غيرك
واكف اباب المراد
جايك بحجايه وامشي
اطيني بس خدمة محرم
واخذ يا مولاي كلشي
كون من ابجي بمحرم
كون صدكيه دمعتي
حتى بيد ام الحسن ينمسح رمشي


.
جايك خلصني منها
دخيلك من الدنيه هاي
ليش بس اتسمى خادم
وانه ما يحترك كلبي لو شفت كدامي ماي
جايك رايد تمشيني اعلى راي
لو تخليني بدربكم وانه مهضوم لعطشكم
لو توديني لدرب ما بيه تعبكم
ما اريد انحسب منكم
وانه ما محروك كلبي على البقى ابلايه فّيياي

دخيلك وانت الجواد
انت اكرم من تضيع عبد متربي اعلى اديك
مادلك ايدي اخذها بداعت الاكبر عليك
هاك كلبي وانت الجمه بكل جرح مزروع بيك
بجرح الاكبر
الما تهنى يعيش ايام الشباب
بجرح فركة ابو فاضل
المنها كلب حسين ذاب
بجرح زينب
الراحت بنوك الغرايب
وغفت مجبورة بخرايب
اخ يا ذاك العذاب
بجرح عبدالله الرضيع
التوه صار وعطشووه
ومات كوة
ومنه حرموها الرباب
بجرح كلبك
واخ منه جرح كلبك
من شفت زينب غريبه
وهي اميرة آل هاشم
غافيه فوك التراب
بجرح مولاتي رقيه
التحن للدللاها
ولمن فزت بالخرابه
راس ابوها انجاب الها
اتوسلت بيه بويه احجي
وابد ما سمعت جواب
دخيل عندك يالجواد
بهاي الجروح ارد اعيش
جايك هايه طلبتي
ووكفة الما عنده غيرك واكف اباب المراد

ويلي على ام المسموم
ويلي على الزهراء
.

الزهراء هاليلة تون
اببغداد راح الها ابن
من المدينة اتعنته
اتعنته مليانه حزن
.
اتعنته محروگة كلب
وادموعها بهضمة تصب
اوليدها بعمر الورد
شافته نايم عالترب
.
ويلي على ام المسموم
ويلي على الزهراء

……..
وصلت لابنها فاطمة
وبجت ملائكة السمة
السم شافته بجبده شعمل
وبشفافه شمسوي الضمه
.
شاب وحله توه العمر
حكها امه لمن تنكسر
الشبان البعمره برخاء
وطِيْبْ الهوه بيهم يمر
.
ويلي على ام المسموم
ويلي على الزهراء
…………….
بس ضل ابنها بغربته
والشمس تجوي بجبهته
واتلث ليالي ابلا دفن
مامش غيارى ودفنته
.
الناس شيكلفها الدفن
ومحد على ابنها يحن
هواي المساحة الخالية
وهواي موجودة المدن

ويلي على ام المسموم
ويلي على الزهراء
…………………………
هذا الجواد اتعنته
وابثوبة ميت شافته
لجن اويلي بكربله
عدها ابن من وصلته
.
بكثر الطعن ما عرفته
ما عرفته الا شمته
كلشي خذت خيل العدو
بس عطره عنده خلته
.
ويلي على ام المذبوح
ويلي على الزهراء
…………………

يا مسلم ابن عقيل دخيلك




شوط كربلائي


ضيغم آل ابو طالب . تسيد ساحة الكوفة
ابتسم لمن اجته الخيل .وكام وسيفه بجفوفه
.
اليسمع معتنيته الخيل . تضل تتراجف اجدامه
ووجه ينگلب اصفر . وميوچد الگدامه
اولا جنه ابو طاهر . يشد براحته احزامه
ولا جن معتنيته اسيوف
والخياله حوله اطوف
ما مر اعلى گلبه الخوف
ماخذ من علي طبعه . ما يعرف شني الخوفه

………………..

عِدل درعه وطلع مسلم . وسيفه مركزه بيمناه
يصد بعينهم ما شاف . فارس ويتلاگه اوياه
ياهو يملك الجرءة . يبرزله ويگرب احذاه
جيش بكبره ضل حاير
وسهلهه ابو طاهر
ضم سيفه وعلى الخاصر
خله اجفوفه بلكت حيد يجي ويگابله يشوفه
………………….
مشى ملثم ابو طاهر . وضنهم رد عدل حيدر
من يتقدم بخطوة . خطوة يرجع العسكر
تقدم مثل ابو فاضل . وكرة الليث بيهم كر
.
ومثل ما تلتقي النهرين
ضل يردم اثنين اثنين
حي الله بن عم حسين
مهرب ضلت ادور الخيل الجانت اطوفه
……………………
تربيله غدت طوعه . ورفعت ايدها تحشمه
هلا بالما يهاب الموت . هلا بشمرة علي عمه
واهوْ يا فارس اتعناه . طش اعلى الارض دمه
.
هوه تورث الكرار
وشالت يمنته بتار
تشابه ويه ذو الفقار
اليلوحه ميتلاحگله جرحه يركض يروفه
……………………………
مدد طلبو مِنِ بن زياد . كل ضنهم يگدروله
هجم وانهجمت الكوفة . وخله بالزلم لوله
الشمس مالت وابن عدنان . ضل واكف على طوله
.
الغيور الهاشمي القسور
راوهم ضهر الاحمر
الجثث طشها وعليهن مر
راواهم غضب عينه من انكرو معروفه

من الشهامة الخلتك تهوه الحسين
من عدها رايد وانت مولاي الحنين
.
انت الخدمته
وهمت بمحبته
وتعرف بگلبه
.
وبرحمة ايدك
مولاي اريدك
ترزقني حبه
.
انه يا مسلم داخل عندك دخيل
شوية منك رايد حب لاغلى خليل
والقليل امن ايدك مولاي مو قليل
.
يا ابو طاهر شنهو الدنيه ابلا حسين
ابلا ابا عبدالله انطي وجهي وين
بقت يمك يا امامي وبيك استعين
………………………
الحاجة امن اهلها تنطلب يا سيدي
وكلبك اهل حب الحسين السرمدي
.
رافع يميني
واتاني عيني
لرحمتك مولاي
.
من ايدي اخذني
ويم حبه هدني
ارتجيك بهاي
.
حاسن الضن بحميتك عمك علي
اليمد جفه اله ما يرجع خلي
هاك جفي وحب اترسه مولاي الي
.
هي دنية وكاظيه شما طال العمر
ورايد ا اكضيها بغرامة لحد الكَبر
كون اموتن وانه لجروحه منكسر
…………………………….
مرضاة امامك عندك اغلى امن النفس
يا جازي ديرة ما تحملها الفرس
.
عابر صحاري
بحر الضهاري
والعطش كتال
.
جي ابو اليمة
اطاك المهمة
توصل المرسال
.
ارزقني من الغيرة هاي وهذا الخلك
خلكك الخلاك سلطان اهل العشك
هاك كلبي وبس حسيّين خليه يدك
.
ماكو غيرك قدوة شفته بهذا الغرام
قدوتي بحب الحسين انت والسلام
منو مثلك ضحى خاطر يرضي الامام
……………………………..
جي تدري ضامي يبقى محبوب الكلب
ضامي بقيت وما ضكت ماي الشرب
.
يعرف امامك
جوهر غرامك
ويدري انت وفاي
.
والخاطرة انت
اشكد عطشته
وما شربت الماي
.
امن الوفه البكلبك انطي لكلبي وفة
وخلي كلبي يحب صدك حب بمعرفة
اختفى البدون عرفه حب اختفى
.
انت افهم واحد وادرى بهالدرب
تعرف المعصوم حبه ميشبهه حب
فطن رايد وال على السانة امن الگلب
…………………………..

اطهر عبادة الدمعة لحسين الغريب
كلما بجيته امن الله صرت اكثر قريب
.
هاي العبادة
سر السعادة
وسر خلود الناس
.
ومن عندك اطلب
دمعة الة اتصب
الضل بلا عباس
.
مالي قيمة ابلا دمعي ومالي ثمن
عيون ابو السجاد بالهيمة غمضن
وعالترايب كعدت وتبجي ام الحسن
.
كعدت بدمعتها غسلت منه الدمه
بس نحر شافت ابنها وكاتله الضمة
شلون تبجي يا هضيمتها فاطمة

قصيدة استقبال شهر محرم الحرام




من محرم هبت نسمة
مليانه بالحب والرحمة
خطت على گلبي اسمه
حبيبي حسين
.
عاشور اجه وهاي ايامه
وتحضرت كل خدامة
والنه فتح باب خيامة
حبيبي حسين
………………………………
ايام ونسمعه الحسين لكربلاء واصل
وريحة ابو الاكبر تخضر كل غصن ذابل
وخيام ال الزهره ينصبها ابو فاضل
.
وحسين يرسل لليحبونه الرسايل
واليخط بيده الرسايل ابو فاضل
اهنا يبين الخادم الوفاي گلبه
من هذاك الگلبه غير حسين شايل
.
القابض على جمرة عشگة
ومن خدم محبوبه بحرگة
يحضى من حسين بملگة
حبيبي حسين
………………………………
تاجر زهير وبالعرب جان شكبر صيته
مرتاح جان وبالذهب مليان امس بيته
ولحسين ضحى بمالة وابيته وبعافيته
.
جانت اجدامه زهير ابين دربين
درب للدنيا ودرب لخيام الحنين
وكال هاي الدنيه كلها تروح فدوه
للتراب التمشي فوگة اجدام الحسين
.
من زهير الضحة بدمه
اتعلمها يا كلبي الخدمة
واتعنه مولاك بهمة
حبيبي حسين

……………………………….
نصراني والمثله بكنائس تنكظي اسنينه
بس وهب من حسين اجاه ولمحته عينه
حُب الحسين اتملكة واتخلى من دينه
.
شوف يا كلبي وتعلم من وهب
شاب وشمحلاته لمن كلبه حب
اِتخلى من دين الوهم كافي بعد
وابجي عالعطشان والثوبه انسلب
.
يا كلبي كافي امن الدنيه
اتوجه وصفي النية
مسلوب محبوبك فييّه
حبيبي حسين
………………………….
بسن الطفولة حب حبيب وشيب بحبه
تسعين عام وهو ذايب بالعشك گلبه
ما لحضه مل من الحسين ولا جفه دربه
.
يا كلبي حب والد رقية خلك رايد
هذا العشك ما يرهم اويه الگلبه بارد
شما كبر عمر اليحب يزداد حبه
وحب حبيب ابنَ مظاهر هذا شاهد
.
اتقربله يا گلبي وخيم
ولغير امامك لتسلم
وطول بخلكك من تخدم
حبيبي حسين
…………………………….
مسلم ابن عوسجة بالطف من هوه دمة
والتمو اصحاب الحسين بكربلاء يمه
كَلهم اوصيكم بالغريب حسين ابو اليمه
.
هي هاي المن صدك تسمى شدة
من بقى حسين الغريب بهيمة وحده
استوحدوه من طاح من المهر ضامي
وضل عزيز امه على التربان خده
.
الماله اخو يسنده بضهره
العدو يطيحه امن المهره
وخيل تتعنه لصدره
حبيبي حسين

كبل لا يبدي محرم
نوكف اباب المراد
ونحجي حجي كلبونه
ونطلب محرم
ونرد مليانين من خير الجواد
وتخلص ايام الجواد
واستراحة حزن ناخذ
من بعدها نسمع بمسلم غريب
ونمشي للكوفه غرايب
اهناك ماي الوفه والحب والمحنه
من الجفن يطلع يسير عالسواد
اهناك نستذكر جرحنه
واخ من الكوفه اخ
ما بقت ايام وبوجه ابو الاكبر
تنغلق كل الابواب
الحر يامرونه ويسد كل الابواب
وداخل الكوفه
عبيدالله يامر
بحبس كل احباب هاشم
وقتل اليوالي الحسين
وينشر دم الموالي اعلى التراب
خاطر اهل الكوفه من تشوفه دمه
ما توالي ابن الزجيه
تخاف من هذا الحساب
الا ميثم ما يخاف
واجهه السلطه وحجه بكلمه ولا همه اليصير
كالهم غير ابو الاكبر ما يصير ولا يصح واحد امير
وجان مولانا حبيب ابن مظاهر
همه يوصل للحسين
لكن الحراس سدو كل درب
بس بقى درب النهر
وهو شايب
عبر من صوب الفرات
ووصل محبوب الكلب
هو هذا المن صدك يتسمى حب
وضلت الايام تمشي
واجت ايامه محرم
وصار كلشي بكربله
وخلصت المعركة وانفض النزاع
بذبح ابن خير البريه
وخذو اهله للسبي
وجانت الكفاله زينب
هي ترعى العايله
ووصلت لكوفة لعلي
الناس شافوها غريبه
الجان اسمها مدلله
اجروحنه ما تنطفي امن الكوفه مثل النار تلهب
دخلت لقصر الامارة اجدام زينب
شما كبرنه يبقى هذا الجرح بينه
الله اكبر على الكوفه
الخلت ام عون الاميره
تعيش باقي اسنينها
متعوبه مهضومه وحزينه
الله لا يرحمهم الخلوها مولاتي حزينة