❇️ قصائد الولادات الشعبانية المباركة



في ولادة الامام صاحب الزمان عجل الله تعالى فرجه الشريف

يوم (15) شعبان ** مولد حجة الرحمن
خل تفرح جميع الناس ** طشّوا الورد طشوا الياس
عمّ الخير عل أكوان ** بمولد حجة الرحمن
-----------------
هذا اليوم مولد خاتم الانوار * البيه الكون يتنوّر
هذا اليوم مولد حجة الجبار * والاكوان تتنطّر
وابوه وعمّته وامّه ابوسط الدار * لاستقباله يتحضّر
انولد سرّ الإله وأعظم الاسرار * اوگلب العسكري استبشر
اومثل ما گال داحي الباب ** وَصْفه ايحيّر الألباب
لصدره العسكري اتلگّاه ** شاف اجبينه شاف ضواه
يِشِع وجهه ابضوه الايمان ** بمولد حجة الرحمن
--------------
اليوم انولدت الرحمه الإلهية * الغدت للناس مذخوره
وهذا اليوم للشيعة الإمامية * يعيد الامل بظهوره
الوريث الأوحد لهالكرة الارضية * يضوّي العالم بنوره
وكْتاب الإرث قرآن باريّه * وبآياته مذكوره
القصص والأنبياء شهود ** ابكتاب الخالق المعبود
والهادي بأحاديثه ** صدّق كل مواريثه
وأصبح واضح البرهان ** ابمولد حجة الرحمن
---------------
الكلام ايصير يوم اظهوره عالمكشوف * بامر الخالق المعبود
والغاصب فدك بعيونه ريت يشوف * يوم اليظهَر الموعود
الحق يرجع لأهله وهالأمر معروف * ما دام الامل موجود
الامل ينهض بسيفه البالعدل موصوف * والحق يرجع النه اردود
بيده صارم الكرار ** ابگلبه لوعة المختار
وياخذ للنبي ابْثارين ** ثار الضلع ثار حسين
اويرفع للعدل بنيان ** ابمولد حجة الرحمن
--------------
ظهوره اشما تأخّر باقيه الآمال * وما يمحيهه حتى الموت
بتأخير الوعد لا تفرح العُذّال * گوم الجبت والطاغوت
شما طال الامد والصبر مهما طال * لابد يسمعون الصوت
الحق يظهر ابيومه والظلم ينزال * ويّه عصبة الطاغوت
اوترجع هيبة الاسلام ** عگب ما غدرته الايام
الباطل لو ربح جوله ** للحگ والعدل دوله
اوْصبح دستورهه القرآن ** ابمولد حجة الرحمن
-------------
گالوا وين غايبكم المهدي راح * گلنه غاب عن العين
گالوا وين ماشي بالارض سوّاح (1) * گلنه إبن مريم وين
گالوا للسمه صاعد ابغير اجناح * ابقدرة خالق التكوين
گلنه الامر ما يحتاج للايضاح * ضنوة سيد الكونين
بارينه لغيابه اختار ** اوْحِجَب شخصه عن الأنظار
لعيسى صعّده لسماه ** وغايبنه الإله اخفاه
انحِجَب عن الإنس والجان ** ابمولد حجة الرحمن
--------------
ويوم (15) كل عام ننتظره * بيه يجمعنه مولوده
اوْندعي يا الهي عجّل بأمره * وگرُّب يوم موعوده
واجمعنه اويه جيشه لو بزغ فجره * اونَوْر الكون بوجوده
اوْ لو متنه الهي احيينه للنصره * واحشرنه مع اجنوده
صدگ نتشرّف ابملگاه ** ونتوفّق نصير اوياه
صدگ بارواحنه نفديه ** ونستشهد ابّين ايديه
هذا الفوز بالرضوان ** ابمولد حجة الرحمن
--------------
(1) كلمة قالها وهابي في مناظرة مع الدكتور التيجاني السماوي
الامارات #عقيل_الكاظمي
من ديوان خواطر الافكار ص / 33

❇️ هوسات الولادات الشعبانية المباركة


للاكبر عليه السلام

بالمهد وعيونه بعيون الحسين
والحسين بشوفته يكحل العين
نوره نور المصطفى ونفس الجبين
ومن حيدر زودة وايمانه

عقيل الكاظمي

❇️ قصائد الولادات الشعبانية


والله * روحي تهواكم
والله * گلبي والاكم
والله * لا مينساكم ** يا آل أحمد
-------------
انتم كياني ومبدأي وكل حياتي
من ساعة المولد لساعة مماتي
انتو السفينة البيهه أضمن نجاتي
يا دنيتي وديني وصيامي وصلاتي
والله * حبكم بروحي
والله * ايطيّب جروحي
والله * گلبي ناداكم ** يا آل أحمد
----------------
جدكم رسول الله ونبيه محمد
روح الرسالة البيهه ربنه توحد
وحيدر أبوكم والإمام المسدد
ليث الإله البسمه كل حق تأيّد
والله * وامكم الزهره
والله * شمعة العتره
والله * ابضيهه سوّاكم ** يا آل أحمد
----------------
ومنكم كريم العتره ثاني الأئمه
ذاك الذي ابصلحه، صلح شأن الامه
وحسين اخوه البل فخر عالي نجمه
لدين الإله وشيّده بفيض دمه
والله * انتو وجداني
والله * انتو إيماني
والله * أفنى لولاكم ** يا آل أحمد
--------------
وزين العباد البل فضل ما مثيلة
والثفنات، اعلى المكارم دليلة
والباقر العلم اللي ما صح بديلة
بس جعفر ابنه اللي ورث كل فضيلة
والله * جعفر الصادق
والله * بل صدق ناطق
والله * جلَّ معناكم ** يا آل أحمد
---------------
والكاظم اللي كل فضيلة بخصالة
وابنه الرضا والباري تمم كماله
وبدر الجواد الساطع بضي جماله
والهادي نوره الباهر ابهل سلاله
والله * خصكم الباري
والله * بكل فضل جاري
والله * بفضله علّاكم ** يا آل أحمد
-------------
والعسكري ابدلالي عسكر غرامه
والخاتِم ابنه البيده ختم الإمامه
غايب واتاني لجيْته تظهر علامه
وادعي لظهوره بل فرج والسلامه
والله * انتو آمالي
والله * أول وتالي
والله * باقي ويّاكم ** يا آل أحمد
-------------
عقيل الكاظمي

❇️ ابوذية ولادة الامام المهدي عجل الله تعالى فرجه الشريف


متى تظهر يغايبنه ولك نار
وعلى العالم يهل بدرك ولك نار
الك فوك النهر راية ولك نار
ابدليلك سرت وي نار الثنية
------------
عقيل الكاظمي

سطع نوره مله الآفاق ناره
العذول ابمولده تلتهب ناره
المهدي للهُدى مصباح ناره
بيه اتنوّرت كل البرية
-------------
عقيل الكاظمي

گصه جوع المفارگ منتضرنه (تضورنا جوعا)
ولا نعرف التنفع من تضرنه (الضرر)
نصيح العجل وانت منتضرنه (الانتظار)
نصير اسباب للطلعه البهية
----------------
عقيل الكاظمي

نوِج كل ساعه يالغايب بلا نار
وبكينه نخبط بظلمة بلا نار
ننظر لعد واقعنه بلا نار
لجن لو نحجي تبرانه المنية
------
عقيل الكاظمي

❇️ ابوذية ولادة الامام الحسن المجتبى عليه السلام


لمهجنه بغير ضي حبك معزنه
كريم وغير ديوانك معزنه
معز المؤمنين انت معزنه
الحسن مفتاح نصر الغاضرية
-------------------
عقيل الكاظمي

❇️ قصيدة ولادة الامام الحسن عليه السلام

(انوار الحسن)
------------
هالليله بانـوار الحسن مزدهره دنيانه
وابتسمت نجوم السمه بأنواره فرحانه
وابتشرت الأرواح هالليـله مولوده
بالبهجه والأفراح هالليـله مولوده
-------------
هالليله طير السعد ردد أناشيده
تطرب دليل المحب أنغام تغريده
يكرر بلحن الفرح هالليله ويعيده
شيعبّر بفرحته وشيگول ترديـده

هالليله بستان الأمـل متفتّحه اوروده
غصن الورد باعذب لحن مال ورگص عوده
نور الهده الوضاح هالليله مولوده
بالبهجه والأفراح هالليله مولوده
-----------
فرحان طير السعد غـرّد بألحانه
يطير ويحط عل شجر ويداعب اغصانه
ويشوف روض الأمل مبتهج بستانه
بثوب الخضار اكتسه والورد ألوانه

چنهه اصبحت جنة عدن تظهر محاسنهه
وإشعاع من نور الحسن جمّل مفاتنهه
عطر الورد فواح هالليله مولوده
بالبهجه والأفــراح هالليله مولوده
-------------
هالـليله غاب البدر وانحجبت انواره
شمس الحسن أشـرقت مـن مشـرق اسراره
جفَّت مياه الأمـل وانگطعت انهاره
وروّاهه جود الحسـن وغمرهه تياره

شوف الانهـار الجاريه تمرح بمجراهه
أصبحت عذبه وصافيه والفــرح حلاهه
نور المكـارم لاح هالليله مولوده
بالبهجه والأفراح هالليله مولوده
---------------
وجه الحياة ابتسم وي بسمة الزهره
بمولود ابنهه الحسن ايهنيهه بالبُشـره
والبدر نوره انخسف خجلان من بـدره
والفجر منه اعتذر لمن بـزغ فجـره

قرص الشمس لمن طلع شاف الضحى اگباله
شاهد قرص وجه الحسن امنور السمه ابـداله
شع للفخر مصباح هالليله مولوده
بالبهجه والافـراح هالليله مولوده
--------------
شافت جماله الشمس بالأصـل ذكّرهه
من حيث هيه الفرع والحسن مصدرهه
هاي الحقيقه النبـي المختار يذكرهه
لا مو مجاز وشعــر و حروف اسطّرهه

اسأل بحار المجلسي بكتابه مذكوره
كل ما حوت هاي الشمس مصدرهه من نوره
من رابع الأشباح هالليله مولوده
بالبهجه والأفـراح هالليله مولوده
--------------

عقيل الكاظمي

موال لولادة الامام الحسن المجتبى عليه السلام
............
ابتيار جود الحسن سفن الوره جاريه
فاضت مياه الكرم منه وطفح جاريه
اشجم يتيم ارتوه بجوده وجم جاريه
للضيف عاده يحط بالزاد حمص ذهب
تاهت افكاري شوصّف رشدي مني ذهب
من جوده ريح العطر نسّم علينه ذهب
واللي ذنوبه چثيره من الحسن جاريه
..............
لشاعر الكاظمية الخالد المرحوم ملا حسن الكاظمي

❇️ قصائد استشهاد الامام علي عليه السلام

وزن موشح


اليـوم محرابك طفت أنـواره
والوحـي ابگبرك دفـن أسراره
-----------
غاب نورك مثل متغيب الشموس
وامسه وجه الكون بفراگك عبوس
يلي تفدي ترابك الطاهر نفـوس
افديت روحك للعـدل وافكاره
-----------
ابست ليالي الكون ربك كوّنـه
بيك وبطاها جعل سِر معدنه
انت نصف الكون من ترحل مِنَه
اثلث ليالي وتبتعد عن داره
-----------
ما يصح فجأه يوافيك الممات
تضطرب أركان هاي الكائنات
لـو رحت عنها تفارگهـا الحياة
ويفنى هذا العالم وآثـاره
-----------
وشاء ربك مـن تفـارگ دنيتك
ايمهّد لهاي العـوالم فرگـتك
وبثلثتيـام صـارت غـيبتك
اولبس ليك الدين ثوب اكداره
-----------
وَحْشه هل دنيا ابغيابك يل حبيب
شلون عگبك يا علي العيشه تطيب
شلون تطلع شمس وانوارك تغيب
اوغطى دمّك هل أفق واستاره
-----------
ياللي فگدك عل عوالم ما يهون
يا علي ولجلك بچت كل العـيون
يل كفلت ايتام بايتامك شـلون
لِفَت يمّك والدمع يتجاره
-----------
سمعوا الجرّاح يطلبلك لبن
اوعلى الباب اتسارعوا يا بالحسن
هذا شايل بيده دمعاته الجـرن
اوذاك يخلـط باللبن أعـباره
-----------
يا علي فگدت يتاماك الحنان
تحت ظلك چانت تحس بالامان
يا ربيع العمر بيك الموت حان
اوذبّلت چـف القـدر أزهاره
-----------
عقيل الكاظمي / الشارقة

❇️ قصائد استشهاد الامام علي عليه السلام


معركـة خيـبـر في قصيدة


-------------
التاريـخ ينقـل اخبار للعالم ويبديهه
وهذا خبر عن الباب وعن معجزة داحيهه
---------------
من حرب خيبر الك اروي الاخبار
لمّن وصل جيش الرسول المختار
للحصن راد ايحرره امن الـكفار
للامه رادلهه الخير ومن الكفر يهديهه
----------------
فرسان خصص من جموع الايمان
ونصّب الأول قائد اعلى الفرسان
راح لحرب خيبر لچن رد خسران
فرسانه صارت تهجيه وهوه الذي يهجيهه
-----------------
ونصّب الثاني انّوبه بعد الاول
ويدري الرسول بطلعته ويتأمّل
وفكرك لعد هذا الأمر لو حلل
تلگه القياده متلوگ الا لعـد راعيهه
-----------------
وراعيهه حماي الحمه وحامي الجار
ومن شاف سيد الرسل هـذا اللي صار
صاح انطي باچر رايتي للكرار
ما تحلّه الا بيمناه ولغيره ما انطيهه
----------------
الكرار صار الجيش ينشد عنّه
ما يعرفونه وكل فرد يتمنه
هـوّه الذي مكتوبه ليه الجنّه
وحامي الحمه بهذا الحال عينه الرمد ماذيهه
----------------
وصاح الرسول ايريد حمّاي الدين
جاه الوصي الكرار عود الحسنين
وبلمسه من چف النبوه اعلى العين
بلمسه من چف المختار لعين الوصي يشفيهه
-----------------
ورايته اتسلمهه الوصي بچفه وصاح
الله أكبر والنصـر ويّا لاح
وبفتح باب الحصن چفه المفتاح
معجزه لسان التاريخ النه بفخر يرويهه
---------------
اتلگاه مرحب للحصن لمن طب
صاح آنه مرحب بالقتال مجرّب
ليوث الحرايب منّي ما تتگرّب
ومني تهاب الابطال حيث آنه المربيهه
----------------
شتگول يا مرحب شتحچي شتگول
هذا علي سيف الاله المسلول
عن چلمتك يا مرحب انت المسؤول
وهاك اخذ رد الكرار لچلمتك يل حاچيهه
-----------------
عود الحسن من سمع چلمة مرحب
ناده هله بسوح الحرايب مرحب
للحرب عندي صدر واسع مرحب
وبچفي وبسيف الدين نار الكفر اطفيهه
-----------------
نار الكفر اطفيهه لاچن بالدم
واشعلهه الكم لچن ريتك تعلم
هل نار الكم تستعر بجهنّم
واليزرع الشر بإيد نيران يحصد بيهه
-----------------
آنه الذي سمّتني امّي حيدر
وغذتني أمي بلبن طاهر حيدر
دور الي بسوح الحرب لاچن حيدر
حياه سيد الاكوان بإيحاء من باريهه
-----------------
وسل سيفه حيدر لچن لمّن سلّه
بيه چتل مرحب واخذ ثاره بچتله
ونال النصر بيده وبيه اتجله
وحقق نصر هذا الدين بيمينه وبماضيهه
----------------
والمعجزه الاُخره الجرت ويه الباب
خلاهه عل خندق جسر للاصحاب
وبيده سندهه وحيّر اهل الالباب
شلون الجسر چف وباب يعبر الجيش اعليهه
-----------------
وتمّ النصر بل معركه للاسلام
بامر الله وبزود ابو الحمله الضرغام
وتخلّدت معجزه بطول الايّام
مفخره لكل الاجيال ** والدهر ما ناسيهه
----------------
عقيل الكاظمي / بـغــداد/

❇️ قصائد استشهاد الامام علي عليه السلام

رئيسية


صاح العدل بالمحراب فزت ورب الكعبة
وهل صوت خالد لا زال تسمع صداه الاجيال
فزت ورب الكعبة
-----------
من بعد ما سيف الغدر * ابسجدته لحيدر صابه
صوت انتصار الحگ عِله * اعلى الباطل وأذنابه
وهل صوت للناس انبعث * من حيدر ابمحرابه
گاصـد ينبّه أمّته * لهل صوت شنهو اسبابه
مستبشر بوجه الموت إلمن توجَّه گلبه
ما أثر ابراسه اصواب لاچن هتف داحي الباب
فزت ورب الكعبه
----------
هل صوت من حيدر ظِهَر * رايد يوعّي الأمّه
بإسلوب فكري واقعي * لهذا النقاش اتفهمه
حيدر استبشر بالأجل * والأجل چان ابعلمه
رايد يغادر دنيته * اويرحل لعالم أسمى
وهذا الأمر راد ادماه وبِدماه حيدر لبّه
وفاز ابجنان الرحمان وتْعاله صوت الوجدان
فزت ورب الكعبه
-----------
نال النعيم السرمدي * وتنعّم ابجنّاته
ابثوب الشهاده الما حله * وما يحله غير لذاته
ويا ما سِعه وجد واجتهد * بحروبه وبحملاته
لاچنهـــه مذخوره وسعت * تتشرّف ابمرضاته
راد الشهاده ابمسعاه واهيه التفر من حربه
رادته ابمحرابه ايطيح وبيهه ايتنعّم ويصيح
فزت ورب الكعبه
------------
هاي الاسباب الوضّحت * ليش ابو الحمله استبشر
ابيت الله طاح المرتضى * ابّيته انولد وتطبّر
ورغماً على انف الدهر * كلما مؤذّن كبّر
ابذكر الأذان ابكل فَرِض * اسمه ارتفع وتكرّر
ابمحرابه طاح الكرار واعتله ابحكمة ربه
وصوت الأذان اسمعناه وذكره اقترن وي معناه
فزت ورب الكعبه
-------------
إلمَن توجّه حيدره * ابگلبه ولسانه و روحه
واشّاف بعيونه وسِمَع * هوّن عليه اجروحه
اتوجّه دليله الخالقه * وبعيونه المشبوحه
شاف الملايك بيه تحف * ودموعهه مسفوحه
وقائد جمعهم جبريل عينه اعلى حيدر تربه
دمعه اعلى حيدر انهار وينادي حماي الجار
فزت ورب الكعبه
------------
وصارت عقيده ثابته * ابحبّه يقين وإحساس
وبسند عن سيد البشر * حبّه دليل ومقياس
يكشف الطاهر مولده * وابن الزنا ابين الناس
وخلي اليبغضه اعلى النسب * يسأل العرق الدسّاس
ويبقه اليحب حامي الجار يحيه ويموت ابحبه
لجله ايتحمّل أخطار ويصرخ ابحب الكرار
فزت ورب الكعبه
-----------
عقيل الكاظمي/ بغداد

❇️ قصائد استشهاد الامام علي عليه السلام

رئيسية



صوت الوفه ابوجداني حبك جره ابشرياني
والوالد ايربّيني والوالده اتغذيني
حبك جره ابشرياني
--------------
يا بالحسن چلمة احبك ما ضن
تكفي اوسِهام العشگ بيه ما ضن
چم عاشگ الذاب ابغرامك وانجن
وآنه الذي بهْواك گلبي اتمحّن
تاخذني نسمة حبك وتردني واصحة بدربك
وروحي الذي تدليني والوالده اتغذيني
حبك جره ابشرياني
----------------
عشت ابغرامك يا علي وما اهتم
مهما اقاسي بحبك وأتألم
ولو صابني امن الدهر أحزان وغم
أنخاك وبإسمك يحيدر أسلم
إسمك ابطرف لساني وتعلم صدق ايماني
عاشگ انه وتدريني والوالده اتغذيني
حبك جره ابشرياني
---------------
يا عشگ ما بين الجوانح محسوس
بل شده تحضر عندي هل شي ملموس
ما يوم شفتك بالشدايد مايوس
تحضر وضيّك ساطع ايغطي شموس
هذي عقيده بذاتي ومو واهم ابچلماتي
هذا اللي شفته بعيني والوالده اتغذيني
حبك جره ابشرياني
-----------------
بعيوني شفتك تحضر بأي صوره
اجنود الك كل واحد ينفّذ دوره
جنودك يصيرون لمحبك سوره
ويحموه من هم الزمان وجوره
وهذا الجره ويايه بجور وهظم دنيايه
بكل معضلة تنجيني والوالده اتغذيني
حبك جره ابشرياني
------------------
يا من گلت للي صنع انوارك
يا رب عِبَدتك عارف باسرارك
لا لجل جنتك لا مخافة نارك
وآنه اقسم بانوارك وآثارك
بحبك تراني امتيّم چي لنّه يجري اويه الدم
هذا العشگ يحييني والوالده اتغذيني
حبك جره ابشرياني
-----------------
أي وحگ اسمك يبو حسين وسرك
اي وحگ مكنون العلوم بصدرك
حبيتك آنه وأمري طايع أمرك
اويكفيني بس عني رضاك وعذرك
أحظى برضاك الغالي وعذرك لسوء أعمالي
وهذا الامر يكفيني والوالده اتغذيني
حبك جره ابشرياني
-----------------
عبدك أنه وانت الذي مالكني
امشاركني روحي وبالهوه مشاركني
وأصرخ باسمك يا علي أدركني
ابوحشة ظلام اللحد لا تتركني
وبيك الامل يا حيدر بالبرزخ وبالمحشر
ومن كوثرك ترويني والوالده اتغذيني
حبك جره ابشرياني
-------------------
#عقيل_الكاظمي

❇️ قصائد استشهاد الامام علي عليه السلام

رئيسية



سودتُ صحيفةَ أعمالي ووكَلْتُ الأمرَ إلى حيدرْ
هو كهفي من نُوَبِ الدنيا وشفيعي في يومِ المحشرْ
---------
تمّت لي بولاية حيدر النعمه * وشِفِت بمحبته خير ونِعم جمّـه
سوّدت الصحيفه بذنبي وبجرمه * وفوّضت الامور لصاحب العصمه
كهفي بدنيتي ويوم الفزع رحمه * شفيعي وبالحشر استنجد بإسمه
هل يمنَعُني وهو الساقي أنْ أشربَ من حوضِ الكوثر
أمْ يطرُدُني عن مائـدة وُضِعَتْ للقانِعِ والمعـتَـرْ
--------
حاشا عن الكوثر للمحب يمنع * ما يمنعني وهـو للكرم منبع
بَدِر حبه بحياتي صار اله مطلع * كهفي بدنيتي ويوم الحشر مَفزع
العباده بغير حبه تضر ما تنفع * يا من تنكر آيات الوصي إسمع
إنْ كُنتَ لجَهلِكَ بالآيام جَحَدْتَ مَقام َأبي شُبَّرْ
فاسألْ بدراً وأسالْ أُحُداً وَسَلِ الأحزابَ وسَلْ خيبـرْ
----------
يالناكر فضل حامي الحمه حيدر * مسؤول اعلى حبه بساعة المحشر
سل بـدر وأُحد والخندق وخيبر * تخبرك منهو لابطـال الحرب دمّـر
هتَف گلبي ابوداده وبالفضل كرر * يمن ليك النبي اعلى اهل الشرف أمّر
قاسُوكَ أبا حسنٍ بِسِواك وَهَلْ بالطَّودِ يُقاسُ الذَّرْ
أنّى ساوَوْكَ بِمَنْ ناوَوْكَ وَهَلْ ساوَوا نعلي قنبَـرْ
----------
منو مثلك الهادي تباهه باوصافـه * ومنو غيرك صعد وارتقى اعلى اچتافه
وقدّم سيفك الهادي على اسيافه * وتأيَّد بيك نصره وحـقَّـقْ اهدافـه
ما ينفـع المُرجِفْ بيك إرجافه * من حيث الإله اغـمرك بالطـافـه
أفعالُ الخَير ِاذا انتشرت في الناس ِفأنْتَ لها مَصدَرْ
وَإذا ذُكِـرَ المعروفُ فمـا لِسِواكَ بهِ شيءٌ يُذْكَـْر
----------
وبسيفك لدين المصطفى احييته * وشچـم فـارس البالحرب ارديتـه
وخيبر تشهد وباب الذي ادحيته * ابعزم چفّك حصنهه العالي هدّيته
لون عزمك هو اعلى الكون أفنيته * هضم حقّك عجيبه شلون عانيته
لَو لَمْ تؤمَرْ بالصَّبْرِ وكظْمِ الغَيضِ وَلَيْتَـكَ لَمْ تؤمَـْر
ما نال الأمْرَ أخـو تَيْمٍ وَتَنَاوَلَهُ عنْهُ حَبْتَـرْ
--------
لو ما بالوصيّه اتچتفت يمناك * مـا عنّ الخلافـه شانئك أقصاك
لجل دينك يحيدر طلكت دنياك * الحفظ هالدين ما لحظه غفت عيناك
أوصافك يحيدر لا زِمَتْ ذِكراك * وأفعـالك حُجَجْ ألْزَمِتْ بيهه اعـداك
أفعـالُكَ مـا كانت فيها إلاّ ذكرى لِمَنِ اذَّكَّـر
آياتُ جلالـِكَ لا تُحصى وصِفاتُ كَمالِـكَ لا تُحصَرْ
--------
آياتك عظيمه اوّاضِحَه البرهـان * حُجَج يا بالحسن صارت على الأكوان
شما رادت تنكّـل باسمك العـدوان * ذلَّتْ وانت شامخ يا لـوه الإيمان
ما بين الخلايق شانك اعظم شان * مـا ينحصـر معناك بقلم ولسان
مَنْ طَوَّلَ فيكَ مدائِحَهُ عن أدْنى واجِبها قَصَّـرْ
فاقْبلْ يا كَعْبةَ آمالي مِنْ هَدْي مَديحِيَ ما استَيْسَرْ
--------
الفصيح / السيد رضا الهندي
والشعبي / عقيل الكاظمي

❇️ قصائد استشهاد الامام علي عليه السلام



تعَيد الناس كلها وتلبس جديد
وجمال الفرح تتنطر صباحه
وزينب راح ابوها وفرحة العيد
اخذهه اويا وعافلهه المناحة
اجاهه الموت فجأه بلا مواعيد
وعلى راس الابو خفگ جناحه
اجه سيف الجهاله يريد تجديد
بچف خاين طبر راس الفصاحة
طبر راس الغيور وسيد الصيد
وفتح للحسرة والاهات ساحه
ذبح خُضر الاماني بصُفرة البيد
ولبّس زينب من الهم وشاحه
على خدهه الدمع اصبح اخاديد
وبحشاهه الاجل غرّس رماحه
غزت ايام هيبتها التجاعيد
عليها الحزن من هبت رياحه
دفن حلم اليتامه بغير تعميد
بلحد نسيان واراه بجراحه
حيدر راح بعد الآه شتفيد
اذا وكت الفجر اعلن رواحه
................
عقيل الكاظمي

❇️ ابوذية لاستشهاد الامام امير المؤمنين علي بن ابي طالب عليه السلام


يمن سيفك لجل هالدين محراب
وشبيهك بطل بالميدان محراب
منو مثلك يتيمك صار محراب
وصلاتك يا علي بعدك سبية
..........
#عقيل_الكاظمي

❇️ ابوذية لقبور البقيع
اخيّط مرّه ثوب الهم مراقد
وجِفن عين الجرح لحظة مراقد
عيوني مو دمع تنثر مراقد
واحزاني بقيع تعيش بيه
...........
#عقيل_الكاظمي

❇️ قصائد استشهاد الامام الصادق عليه السلام


متحيّره النجوم * شافت نزيف ادموعك
واختنگت الهموم * لمن مشت بضلوعك
بصدرك خِزَنت اسرار ** وعافت أثرهه النار
لمن مشت بضلوعك
-------------
ابوجهك الضي انولد * توأمك من المهد
والصدق بسمك يصادق عرف نفسه
الكون بِحماك استقر * بنورك توضّه الگمر
وما طلع وجه الصبح، الا انت شمسه
الجنة ابكل عطرهه، نفحه من صيتك
شلون النار تتجرأ على بيتك
يا وارث الخليل * يل خمّدت جذوتهه
من شاهِدَت ضواك * اتوقف نبض جمرتهه
منها اللهيب احتار ** وعافت أثرهه النار
لمن مشت بضلوعك
-------------
للخليل اتسعّرَت * نار وحده اتوجّرَت
لاچن النمرود ما روّع اعياله
وانت نمرودك طغه * واعلى برهانك بغه
روّع ابحقده اهل بيت الرسالة
حرم وأطفال تتراكض غدت بالدار
تنهض من مصيبة توگع باخطار
بوجودك الأمان * ولعيلتك تحميهه
وظلت صور تدور * بافكارك تحاچيهه
بالطف ذكرت اشصار ** وعافت أثرهه النار
لمن مشت بضلوعك
------------
خمّدِت نار الغدر * والحزن ظل بالصدر
والمصيبة سافر ابروحك لهبهه
ودارت ابعينك صور * نار وخيول وخطر
وعايلة چف الحقد بالطف سلبهه
يبن باقر علوم الدين واسراره
يا موقف عليك اصعب غدت ناره؟
دار الذي ابحماك * حلّ الأمان اعليهه
لو خيمه بالطفوف * عنهه انفگد واليهه
شافت محن واخطار ** وعافت أثرهه النار
لمن مشت بضلوعك
-----------
باقر علوم الدهر * ابجدمه من الطف أثر
يعني آثار اللهب وصلت لدارك
شفت بعيونه الغصص * وسمعِت منه القصص
وصار ليل الفاجعة ايحارب نهارك
مو لمصيبتك دمعك جره وما جف
لمصاب الخيام الوجّرَت بالطف
ابصدرك لظه الخيام * يتصاعد بانفاسك
وصرخة دمه ونحور * ظلت تعيش براسك
وبروحك التذكار ** وعافت أثرهه النار
لمن مشت بضلوعك
-------------
عشت آلام شكثر * وانت مدرسة الصبر
اشما عِله ونين الجرح يتعاله صبرك
تواسي الحسين ابگلب * ينبض بجرح الغرب
أشخصك من موطنك سفّاح عصرك
ومن چبد الحسين الجرح يتورّث
ابْسَم چبدك ، وچبده بسهم المثلث
بموادع الحياة * جفنك غفه اعلى ونينه
بس جدّك الحسين * عل رمح سهرت عينه
وشاف الضعن من سار ** وعافت أثرهه النار
لمن مشت بضلوعك
-----------
گطع السم چبدتك * او دفن بيده جنازتك
كاظم الغيض وهمل لجلك دموعه
مو مثل ذاك الجرح * راس مرفوع برمح
والجسد خيل الغدر طحنت ضلوعه
انطبگ جفنك وصورة ابنك گباله
وآخر وجه شافه حسين چتاله
حتى الطفل ذبيح * لا ولده لا انصاره
بس جدك العليل * من اليسر واخطاره
لجرحك لفت اخبار * وعافت اثرهه النار
لمن مشت بضلوعك
--------
عقيل الكاظمي

❇️ قصائد استشهاد الامام الصادق عليه السلام



سأبكي ودمعي كفيضِ النَجيعْ ** بدورًا توارَتْ بأرضِ البقيعْ
سيبقى سُهادي ** ويَنعى فؤادي
بدورًا توارَتْ بأرضِ البقيع
**********
شِهَگت الألم بالحسرة * وفاض الشوگ بالدمعه
أحن لارض البقيع بروح * بالآهات منصدعه
وأخاطبهه ابدموع العين * وأون واتحسّر وانعه
وأگلهه انطوت بترابچ * ضلوع الطاهرة البضعه
فَطوبى لأرضِكِ أرضِ الخلودْ ** وفي كُلِّ قَلبٍ مقامٌ رَفيعْ
لتهدي البرايا ** بِصَوتِ الضحايا
بدورًا توارَتْ بأرضِ البقيعْ
*********
دريتي ترابچ الطاهر * ببدور الهُدى اتطهّر
دريتي غُفَت باحضانچ * عيون المرتضى حيدر
حويتي گلوب مهضومه * گلب العدل بيهه انسر
حويتي للزمان اقمار * رغم خسوفهه تزهر
فيا كعبةَ العِزِ للثائِرين ** تجلّتْ بنورِ البصيرِ السميعْ
منارٌ ثراها ** وتحمي حِماها
بدورًا توارَتْ بأرضِ البقيعْ
*******
دريتي اشكثر للهادي * حويتي چبود مسمومه
اوسكن بترابچ لحيدر * ألم چم هامه مجسومه
دريتي اشكثر للزهرة * حويتي ضلوع مهشومه
هوت للدين بيچ اركان * عگب حيدرهه مهدومه
فمنذُ نَعى الوحيُ صِهرَ الرسولْ ** هَوى للهُدى كُلُّ رُكنٍ مَنيعْ
وبالسُّمِ صُرَّعْ ** أزاهيرُ أرْبَعْ
بدورًا توارَتْ بأرضِ البقيعْ
******
ضمّدت الجروح ابسيل * دمعي المنحدر عالخد
اونشّفت الدمع بالآه * او رد بيّه نزيفه اشتد
وناديت برفيع الصوت * او جمر الگلب يتوگّد
نِزَف دمعي لچبود الدين * بالسم ليش تتمرّد
يَهيجُ بِلَيلِ الأسى والجروحْ ** فؤادي لِذكرى المصابِ المريعْ
فيهتزُّ وَجدي ** وبالروحِ أَفْدي
بدورًا توارَتْ بأرضِ البقيعْ
*****
مصاب الحسن والسجاد * علي والباقر وجعفر
عليهم عاهدت دمعي * يجري وأبد ما يفتر
وعاهدت الجوارح دوم * اعلى خدمتهم تظل تسهر
وعاهدني الگلب للموت * عليهم يظل يتحسّر
أُكابرُ والسيفُ في مُهجَتي ** وقلبِي منَ الحزنِ أمسى صريعْ
سأبقى أعاني ** ويَنعى لِساني
بدورًا توارَتْ بأرضِ البقيعْ
*****
المستهل والاقفال للشاعر زهير الكاظمي والابيات للشاعر عقيل الكاظمي / بغداد
من ديوان خواطر الافكار ج1 ص60

لا تنسوا والدتي من خالص دعائكم والفاتحة رحم الله والديكم

الشيخ ميثم التمار في مجلس عزاء مولاتنا الزهراء في ختمة فاتحة المرحومة والدة الشاعر عقيل الكاظمي 8-5-2024

https://youtu.be/9y4PEi4fiA0?si=Dpt5I9AxfFcovRUS

❇️ قصائد استشهاد الامام الجواد عليه السلام



الك يبن الرضا دمعي تفجر ** وهتف ناعي المصاب الله أكبر
-------------
الك يبن الرضا گلبي تصدّع * ابسهم الفاجعة نصاب وتگطّع
وبجمر الحزن ذاب وتلوّع * اويظل للموت مهضوم ايتحسّر
-------------
يحگ للگلب تتمزّگ خلاياه * اويحگ للدمع لو دم سال مجراه
مصابك صبح كل الكون ينعاه * جن وإنس واملاك او هوه او ذر
-------------
مو عِجبه الگلب لو صوّبه الهم * مصابك لو على طود ايتهدّم
گبل ما چبدك يذوب بلظى السم * چبد الدين بالمحنة تفطّر
--------------
الحزن بالروح لجلك يظل سرمد * او يِظَل الجفن بغيابك مسهَّد
وجهك صورة من جدّك محمد * وفگد المصطفى بفگدك تكرّر
-------------
چبد المصطفى بآلامك نصاب * ويومك عاد يوم الضلع والباب
بضلع امك الزهره ماضي الصواب * لچن بمصيبتك أكثر تأثر
-------------
جرحك زاد من لوعة البسمار * اوعلينه جدد مصيبة الكرار
انطبر راس ابو الحملة بسيف غدار * وبسيف المآسي گلبك انطر
-------------
علينه اتجدّدت أحزان وهموم * وسمّ البيه طفت شمعتك هاليوم
گضه سبط النبوه بيه مسموم * الحسن وبمهجته الآلام تسعر
----------------
سهم فگدك وفگد الحسن سهمين * صارن سهم واحد صاب الحسين
المثلث طر دليل حسين نصين * وبسيوف الدهر جسمه توذّر
-----------------
يومك عاد أحزانه او رزاياه * اوذِكَرنه بلوعة ايتامك يتاماه
وألم زين العباد وجمرة احشاه * وسمّ البيه جمُر چبده تسجّر
----------------
مصاب اللي فجعنه بزين العباد * على الباقر وشبله الصادق انعاد
ومصايبكم صفت كل يوم تزداد * وكلهه اجتمعت بسجن ابن جعفر
----------------
گضه راهب العتره بسجن هارون * وخلص عمره بظلام السجن مرهون
وحين اعلى الحكم سيطر المأمون * لچتل عودك بده ايخطّط ويسهر
---------------
وحقّق غايته بأفكار شيطان * وفِجَع گلبك بعودك بدر الايمان
اورِحْت بحزن مهضوم لخراسان * دفنته وجمر آهاتك توجّر
---------------
دفنته ولأرض بغداد رديت * اوّنات اليتامه اعليه ونّيت
اوتقاسي مِن عگب عيناه ظليت * مثل ما قاسَه منّ اعداه واكثر
----------------
بجور المعتصم چم سهم صابك * يخمد نار أحقاده بعذابك
اوطُفَت بآخر سهم شمعة شبابك * اوّجه الكون لمصابك تغيّر
---------------
واغتالك وحيد بغير أنصار * واغتالك غريب بوحشة الدار
ولو بيده رماك بسهم غدار * مثل الصاب مهجة شبل حيدر
----------------
ومشه السم ابوريدك ويّه الاحزان * ومثل حسين جدك متت عطشان
ومثل حسين جرحك عاش أزمان * يتاني المنتظر لدماك يثأر
---------------
عقيل الكاظمي / بغداد

لا تنسوا والدتي من خالص دعائكم والفاتحة رحم الله والديكم

❇️ قصيدة لاستشهاد الامام #محمد_الجواد عليه السلام

سهم الدهر وسط الضماير مضه
بمصيبتك صوبنه يبن الرضه
‏----------- ‏
آ يالجواد وألف آه اوّسف
لسهم الدهر چبدك يصير الهدف
ومن يومك المدمع جره وما نشف
وللحشر ما ينشف حزنّه افرضه
‏----------- ‏
وجّب علينه الحزن نجري الدمع
ينبوع من كل عين ما ينگطع ‏
لمصيبتك يا مهجة ما تنصدع ‏
ويا گلب ما بيه الحمم نابضة
‏------------ ‏
من يومك النوح بدمعنه اتّصل
لمن حجب شمسك سحاب الأجل ‏
يبن الرضا أظلم نهار الأمل
وضاگت علينه واسعات الفضه
‏------------ ‏
ضاگت علينه الواسعه بفرگتك
ما تنسه يوم مصيبتك شيعتك ‏
حقق الظالم غايته ابچتلتك
ابسم الغدر عمرك الطاهر گضه
‏----------- ‏
لزهرة شبابك گطع چف الحتم
يا وسفه عمرك بالألم ينختم
ما بين أم الفضل والمعتصم
أيامك بآلامك مگوّضه
‏---------- ‏
أيامك امن الهم أبد ما صفت
وعينك على الغم والمآسي غفت
بدار الغرب شمعة شبابك طفت
وبگلوبنه أصبحت جمرة غضه
‏-----------‏
دين النبي لفگدك جذب حسرته
امصيبتك أضحت سيدي امصيبته
وسم اللي ذوّب چبدك بجمرته
غيب ضواك وأفجع الرافضة
‏--------- ‏
#عقيل_الكاظمي / #الشارقة
من #ديوان #خواطر_الافكار ج1 ص133‏

لا تنسوا والدتي من خالص دعائكم والفاتحة رحم الله والديكم

مدونتي instagram facebook