1446 هـ
#قصيدة_لمحرم_الحرام

هلا راعي النوماس ..كله غيره واحساس
يله حيوا العباس ..والنعم
**
هلا يالشايل الرايه بيمينه .. هلا يالغرك السبعه بجبينه
يعرك مستحه لو شاف الحسين ..ودوم اعلى الخدر فايض حنينه
ابو الرايه .. يدك ثايه ..وابد مادنك الراس
ركب مهره ..وعلي بخزره ..كامت ترجف الناس

هذا حلو الاطباع ..تبده ماي اعلى الكاع
خضر الطف نعناع ..والنعم
*
حكها ام الخدر تتباها بأسمه.. حار وما برد بالحومه دمه
مثله اعلى الارض ماصاروا ثنين ..صار الها الهوه وزينب تشمه
رعب لو هب ..اخو زينب ..يكطع راح الانفاس
ابو الغيره ..تعابيره ..بس بروحه ينقاس

بزوده راعي الكلفات ..مايثني السطرات
هذا راعي الصعبات ..والنعم
***
هيبه اعلى الارض ماكو بصفاته ..راعي الزود ومدلل خواته
عمود البيت وفياي الصواوين ..كمر ياناس بالطف شحلاته
بضوه عيونه ..يسمونه ..صكار الحرايب
رفع سيفه ..واخذ حيفه ..رجفها الكتايب

غيمه صار الوفاي .. تارس الخيمات فياي
للخيم جر راك الماي . ونعم
**
طب للمشرعه وخورس زلمها .. وكام ايطشر بكيفه ويلمها
فروا عالنهر مثل النساوين .. هنا خل الزلم تعرف حجمها
نهر بيده ..ضوه عضيده ..وشد اعلى المتن جود
شهم طبعه ..طوه السبعه ..وخط بجفه الحدود

خطط حدود الخيام ..غيره ماتعبر جدام
تنحني لطوله السهام ..والنعم
****
هلا يالعشكته نجوم الثريه ..اله كام النهر ياخذ تحيه
يامحلى القيافه البيها عباس ..محير اهل السمه واهل البريه
كمر ليله ..عالكحيله ..وبيمينه العلم شال
عله القاده ..ضوه الساده ..طب للحومه زلزال

يغلي دم وريده ..رحه صاروا بايده
يطحن بسيفه البيده .. والنعم
**
هلا يمكحل الغيمه بسماها ..هلا يالوجها شمس الله وضواها
ثلث تنعام كام يصيح الحسين ..من ام البنين ومن ضناها
رفع راسي ..هوى انفاسي..اخوي محزم حزام
ضوى الكمره ..غفه بصدره ..وعين الكمر متنام

حارس عله الصيوان ..يروي جفه العطشان
تهابه كل الفرسان ..ونعم
****
هله بالقائد بكل المراتب..هله يمعجب السبعه العجائب
مو بالجربه جاب لزينب الماي .. بجفوفه النهر للخيمه ساحب
ابو النخوه .. والمروه .. هيبه القائد العام
شمس ضوه .. الف فدوه ..لطوله تلوك الاوسام

براسه حلوه الريشات .. شبع الطف صفنات
بمتنه تغفه النجمات .. ونعم
***
تمت
#احمد #الخفاجي


@HxzEU1

#قناه_نشر_القصائد_المنبريه

1446 هـ
#قصيدة_لمحرم_الحرام

مسلم .. مسلم .. رفت راية مسلم
*
مسلم صبح راسه يفور لسابع سمه بركانه
غص ويبس ريجه يزيد اهتز القصر بأركانه
لو ينهدم قصره اعليه لو تنقلع بيبانه
تمشي وي راگ الحيطان وجه الفجر فرسانه
يرهب.. يرعب .. وبين الشافه ويهزم
*
طب شايل بجفه السيف وابن امه اليمد راسه
واليكرب لباب الدار. رد منكطع بانفاسه
والما تكض رجله الكاع عاش برعب وهواسه
بيده الركب مثل الماي يشمرها شمرة طاسه
يسطر ..يعبر .. وبيده السطرات اتعم
**
طشت خرز فوك الكاع روس الزلم خلاها
يتبخر بصوت الجيش مثل السحب سواها
غار وعليهم كرار نجوم الظهر راوها
للكوفه طب بصدرين ملكه الفحل لاكاها
وحده .. وبيده ..كام يطشر ويلم
**
نازل عليهم طوفان ويغرك السفانه
بقصر الاماره من غار تهتز جميع اركانه
والمنهم يصيح بصوت مسلم يكص لسانه
واحد واخذ كل الدور شحال و يجون اخوانه
بحيدر ..قرر .. من يهاجم يقسم
****
نار واجت لابراهيم. تشبع برد بجفوفه
بضحكة سماره المهيوب وجوه الزلم مخطوفه
من يلتفت صوب الجيش. تختل جميع صفوفه
مو سيفه جنه اسرافيل ينفخ بنص الكوفه
غصوا. فروا .. من اعليهم يهجم
****
كلمة علي بحلكه تلوك شهكت جميع القاده
كباله القصر ما مهيوب لا بجه حت اسياده
الهيبه بس لاهله تلوك حيوا سفير الساده
هوه اصل من داحي الباب ويزيد منهو اجداده
ساده .. وقاده.. كلهم بني هاشم
****
تمت
#احمد #الخفاجي


@HxzEU1

#قناه_نشر_القصائد_المنبريه

1446 هـ
#قصيدة_لمحرم_الحرام

ياحسين ربيني ..بهالعزاء خليني
دم يطيح من عيني ..من عيني ..من عيني
**
بحبك لاموني .. من كثر جنوني
ولو ماتبجيلك ..اعميها عيوني
خل تحجي الوادم ..شمفهم النايم
باليسهر ليله ..وبجنون الخادم

سهر ليلي ..يهد حيلي ..ودمع حزني ..يتجيلي
الرمه بسهمه ..وحجي بذمه ..فده وطايح ..لابو اليمه

بالنباح خليهم ..ذمه راح نبريهم
دم يطيح من عيني..من عيني..من عيني
*
مثل المشايه ..نركض عالرايه
وبصدره الخادم ..دك جفه الثايه
مجلسنه الخيمه ..ندعي الله يديمه
ومن حك مجنونك ..يلطم بالهيمه

العشك فطره .. بده بزغره ..اليحب مثلك ..شله بعمره
شلي بروحي ..الك نوحي..حبيبي انت ..ودوه جروحي

بكلبي نار مشتعله ..بعيني نوم ماخله
دم يطيح من عيني ..من عيني ..من عيني
**
يا أول نظره .. بعيون الفقره
بمهدي وناغولي ..اسم الله ابني الزهره
وامي ليليه ..تلولي بلطميه
عن حرك خيامك ..وعن المسبيه

وانه بمهدي ..جره بخدي ..دمع عيني ..وكبر عودي
نذر امي ..الك دمي ..عبد باسمك .. كتبت اسمي

حگي اصير مجنونك ..فدوه اروح لعيونك
دم يطيح من عيني ..من عيني ..من عيني
**
جرحك يآذيني ..نار ويجويني
ابجي اعلى مصابك ..خلصت سنيني
كل مجلس حاضر ..اليوم وباجر
وما بطل نوحي ..من رض الحافر

صور ترسم ..سهم يلجم ..عبر جبدك ..وخيم تهدم
نزف دمك..وتطش جسمك..بحصيره شلون ..علي يلمك

بالخيال واتعذب ..كلبي صار نار وشب
دم يطيح من عيني ..من عيني ..من عيني
**
حسين وكل لحضه ..بكلبي اسمك نبضه
تعيش بدكاته ..بغيرك مايرضه
بابك دكيته ..وغيرك ماجيته
بس شوفة وجهك ..بطيف تمنيته

حلم عمري ..بدمع يجري ..بهوى اليعشك..يمن تدري
اجي لگبرك ..واشم عطرك ..نذر عمري ..وفده العمرك

روحي ليك ناذرها ..وادري راح تحضرها
دم يطيح من عيني ..من عيني ..من عيني
**
تمت
#احمد #الخفاجي



@HxzEU1

#قناه_نشر_القصائد_المنبريه

1446 هـ
#قصيدة_لمحرم_الحرام

لاتزاودني اعله هاي ايامي
خلني محتار بجروح الضامي
يلماعايش حرگة كلبي
شعندك صاير عثره بدربي
........................................
أخذ من عندي كلشي اتريد بس بدموعي خليني
أبشهر احسين مو بيدي أمن ارگض عاليبجيني
أعيش انسان من أجزع واصير اشكبري أنه بعيني
وليهمك اذا اموتن هوه احسين يحييني

لشهره باقي بس أشد بنذروي
الله يدري شكد احب عاشوري
اعليه شكد متفضل وني
خله احسين هواي ايحبني
لاتزاودني اعله هاي ايامي
............................... ...........
محرم بلسم اجفوفي دخليني أعله گد نيتي
عافية الخدم بلنوح لتخاف أعله عافيتي
وكثر ما حب هوى المجلس ومعود عليه ريتي
كاعد بلحسينيه اكثر حتى من بيتي

ما أريد أنشغل بس بطفوفي
شعندي غيره اللطم رزق اجفوفي
ولا تسألني جي متحضر
بلطم العام اهواي امقصر
لاتزاودني اعله هاي ايامي
....................................................
بس من احترگله أبرد ولليحرگني أضل وفاي
نعاوي احسين ترويني وتنسيني العطش والماي
شما اتأذه آنه ارتاح وچي يبجن أحب عيناي
وازغز من اشوف الشيب يطلعلي بشهر مولاي

شيب ابو سكينه وعلي ايحليني
وهنه بأسمه امسجلات اسنيني
عايش كل ايامي انتظره
مشتاگ اتحزمني الزهره
لاتزاودني اعله هاي ايامي
..........................................
يرف كلبي أعله كل اسود ويرگضله قبل جدمي
بدون الدمعه أعيش بضيج واليفرحني بس لطمي
ياحاجه اغلى من عاشور تستاهل تعب همي
وأذكر وانه بالكاروك تلوليلي بلطم امي

بالعزه شمحلاها شمرة أيدي
ياشهر عاشور حزني وعيدي
ألمن رايد جفي وصدري
أتهندم من اكسر ظهري
لاتزاودني اعله هاي ايامي
.............................................
ما كشخني بس نوحي وبدرب الله دلاني
احب عاشور مثل امي وما احب اي شهر ثاني
زغير اخواني بس محسوب عد ناسي أكبر اخواني
احسين اول بشر متعوب أبنص اعيونه خلاني

خلني بأيامه احترك هنيالي
شجم رخيص احسين سواه غالي
ما أتونس بس بنوحي
أدعيلي بمجلس ياخذ روحي
لاتزاودني اعله هاي ايامي


#احمد #ماجد #الكلابي



@HxzEU1

#قناه_نشر_القصائد_المنبريه

1446 هـ
#قصيدة_لمحرم_الحرام

عندما أعلن الحسين صلوات الله عليه ان هنالك طفله لم تذهب الى كربلاء بدأ الخوف والقلق يداهم جميع بنات الحسين ع
فسكينه تقول انا هذه الطفله
وخوله تقول انا هذه الطفله
حتى رقيه قالت انا هذه الطفله
ولم يتوقع أحد بأن السيده فاطمه العليله هيه التي لاتذهب كونها تحتاج الى عنايه ورعايه صحيه من قبل الاهل

فكأني بمولاتي رقيه تذهب خفية الى مولاتي العليله لكي تجعلها وسيط بالذهاب الى كربلاء ولكن مولاتنا رقيه تتفاجئ بذلك الرد المؤلم

//////////////////////////////////////
المستهل

عن لسان حال مولاتي رقيه صلوات الله عليها


گال وحده امن البنات... ماتروح اويانه
يلعليله حاجي ابوي...خاف أطلع آنه
شما اشوفه عايفني
وحسّيته قاصدني......حاجي ابوي
//////////////////////////////////////

ياقريبة گلب ابوي....أدخلّي وحليها
شوفي ياهي امن البنات... القرر ايخليها
وخاف آنه الما اروح....يلعليله أگضيها

رايده أتجيبيلي هالليله الابشاره
ان شاء الله غيري اليضل بهاي داره
وحتى أذا گلج ابيتي اتضل رقيه
لذت بيج وانتي اليغير قراره

ماكو غيرج بالخوات.....انتي التحاجينه
جي مريضه أبساع ابوي...أتوقع اتقنعينه
بعيونه حيّرني
وحسّيته قاصدني...حاجي ابوي

//////////////////////////////////////

لكربله امبارك عليج... وجيتج آنه ادخيله
اهناك گليله دوّاي... اختي أريد اشيله
وحتى عبدالله الرضيع... اثنينه انلوليله

ياعليلتنه الطبيبه انتي الوحيده
روحّتج للطف أحس بيها أكيده
وحگه اول وحده بينه يسجل اسمج
ايسافر بياگلب ويعوفج بعيده

المرض ماخله بيج... ولازم انتي اگباله
ابحالتج وصّه الطبيب... وقدرينه الحاله
وضل گلبي يوجعني
وحسّيته قاصدني... حاجي ابوي
//////////////////////////////////////

أمن امس لميت الاهدوم... أوحگ هاي ارسومج
ماردت واحد يشوف.. خاف تالي ايلومج
وقررت بسكوت أحط... اهدومي بين اهدومج

وعيشت روحي بسفر من واعدتهن
يلعليله جا والاهدوم شأكلهن؟؟
لخاطر آمال الهدم سويلي جاره
غافلت عمي وابوي وحضرتهن

خالطت بيدي الغراض... وفكرّت بهمومي
گلت خافن ما اروح... عاد تمشي اهدومي
من أمس عذنبي
وحسّيته قاصدني... حاجي ابوي
//////////////////////////////////////

من بعد ذاك الدلال.... الشفته من اخواني
ويني اوين الافراگ.... صيّري بلّه امجاني
أتخيلي لو ماخذوج... وبالهوادج اني

يلعليله شما أصبره گلبي يرجف
الله لا خلاج يختي بهيج موقف
ايصير اسمج فجأه بالديره غريبه
وماتعرفين الجروح امنين تنزف

تضعن ابدونج النوگ... هم اجتي ابالج
وتنگطع اخبار ابوج...الگضّه عمره اگبالج
بهالنيه تعبني
وحسّيته قاصدني... حاجي ابوي
/////////////////////////////////////

فاطمه ابكل انكسار.... سوّلفت واتباچن
آنه ادورلي وسيط... حتى امشي اوياچن
أمس كلما اگله اروح... شو ابوي ولا چن

ويارقيه انتي اطمئني احسين قابل
شفته جاب اسمج وحطه اعله المحامل
خلي گلبج بارد آنه الما حسبني
وآنه هاي الراح اضل اكتب رسايل

بيه خو شفتي شيصير...وعشتي كل اجروحي
وقبل لا يطلع ابوي ...ادعيلي تطلع روحي
فوگ المرض هدني
وحسّبته قاصدني...


#أحمد #ماجد #الكلابي

تمت بعون الله وببركات والطاف مولاي بقية الله صاحب الزمان عج صلوات الله عليه


@HxzEU1

#قناه_نشر_القصائد_المنبريه

1446 هـ
#قصيدة_لمحرم_الحرام

بخوف... من شفت الضعن جاي
رحت وشايله الماي.. بدموع امنياتي
سجدت اعله بابي... وشلت ل الله اديه
ياربي شكراً... رجعت رقيه
///////////////////////////////////

ياهلا بضعن احسين بي مشايخ هاشم
الهوى رد للدار ولازم افرح لازم
شما اشوف الوديان منها راجع عطشان
وحضّرت بيدي الماي خاف لساه صايم

اجهبت الضعن ترابه
ومو مثل امس مهابه
ابذاك المسك يربي
شو جاي اشم خرابه

شصار... وهلي كلهم بلا روح... بيهم ياهو مذبوح... وهيجي اتغير الحال

انجفه ماي أديه... وبديت ابجي سكته
ولا واحد اندار... عليه وعرفته

//////////////////////////////////////

عيشوني ابنص نار وگوه صبّرت العين
وحيره شحجي اويه النوگ هاي مو نوگ احسين
اشبيها العلاوي ابلا لون شو ساكته عمتي ام عون
جا وين ذاك الميمون وراعيه غرب لاوين

مايحجن العلاوي
وكتلني بالنعاوي
امجرحات اديهن
المن اروح اداوي

ليش.. ما جاي ألمح احسين.. ومهد عبدالله جا وين.. ياهو يگلي وينه

مشتاگه اشوفه... عمري وحبيبي
المرض زاد عليه.. وهوه طبيبي
//////////////////////////////////////
أتعلعلت واتجويت بالضعن ماكو ازلام
وياهيه ألزمها اتصيح الشام يابويه الشام
ولطمت فوگ الراس وين عمي العباس
اوين كل ذاك الياس اوين حنة جاسم

وحاجني وينه الأكبر
بيا كربله توذر
معقوله اخوي الهيبه
فوگ الترب تطشر

وين... حبيب وعابس وجون... اصدگ ياهلي اشلون.. بالطف وعذابه

عجب والله دنيه.. ترّخص امامي
امير الشريعه....يذيحونه ضامي
//////////////////////////////////////
ومن لمحت السجاد اشويه عاد اتقويت
ارگضتله ابلا حيل وبالبواجي انهديت
الكيته معلول اهواي حاجيته هاك اخذ ادواي
وكثر ما ون عالسوگ بجّه حيطان البيت

گتله رقيه اشبيها
شو ما جبت طاريها
شفت الطشت بعيونه
وامحرگه رجليها

آه... عزيزة گلب عباس... ماتت شابگه الراس.. وخلتني مريضه

تمنيت منيتي... تعجل عليه
شسوي بحياتي.. وماجت رقيه
///////////////////////////////////
ولن حجت عمتي ام عون عن والدي واحواله
گالتلي صدر العطشان أتوزع على الخياله
وحده ابنص ديره اسهام مو گدره عالگاع اينام
ويافاطمه اتلتيام ابن امي محد شاله

ابعز الظهاري الحمره
فرن بنات الزهره
حرگو اخيمنه اعلينه
وطفيت بيدي الجمره


طاح.. ابوج اعله الرمل غاد.. وثوبه اتوزع امراد.. مابين العساكر

حسافه وهضيمه..سبايه مشينه
بلا حادي خيّر... والاعيون علينه

تمت بعون الله ورعاية مولاي بقية الله

#احمد #ماجد #الكلابي



@HxzEU1

#قناه_نشر_القصائد_المنبريه

1446 هـ
#قصيدة_لمحرم_الحرام

يادواي... طوّل إلحدما يجون.. اعزازي يمي
يادواي... بيك ريحة ايد ابوي.. وايد عمي
والعله خلّها اتزود
انته المهم موجود... يادواي
/////////////////////////////////

انته ادرى بضيم گلبي فدوه طوّل جم شهر.. سليني
أتمرضت بين الهوداج ولحدما يگضي السفر.. قويني

الناس خليها تكرهك ابگد اليكرهوك احبك
وحتى لا خلصان اشوفك قررت أرفض اشربك

ما أريد... كل دوه الدنيا واريد.. بس اشوفك
ما أريد... بالمدينه أي طبيب... ايگلي اعوفك
اتروح العوافي اتعود
انته المهم موجود... يادواي
//////////////////////////////////////
يافرج كل مغربيه من تمر الذكريات.... أبالي
يلمصبّر باب عيني امن اگعد ابجي اعله الخوات...الحالي

عمري ما انسى وگفتك وراح بس بالخير أذكرك
ومن يجي احسين بسلامه اثنينه نگعد نشكرك

ابروحي نار... وشفتك ابعز الونين أتطّفي بيه
ابروحي نار...واسمك اتهدي بقلق رجفات اديه
والحيل صح مهدود
انته المهم موجود.....يادواي
/////////////////////////////////////

تذّكر ايامك الحلوه اشلون جنت امن ايد لايد..اسراري
يادوه اشجم دمعه حمره ان شاء الله ويرجع العيد..ابداري

وكثر ما هزني اشتياقي لوالدي
وذيج المحنه
راح عالحيطان أرسمه
ومن اكمل اللوحه احضنه

وبالضلام... ماي بارد يادواي أگعد اشربه
وبالضلام..گلبي جاي ايكلي جاس العطش گلبه
ورغم الايام السود
انته المهم موجود... يادواي
//////////////////////////////////////

هلي ما جنهم يجوني وانت سويت العليك.. أواكثر
عايشه بريحتهم اشتم وگضت ذيج الريحه بيك.. اطشر

بيا گلب رايدني أشربك ويادوه يرهم لميته
أمس حسبالي اسافر لهذا كل مرك جرعته

وين ابوي... وياهو اليخليني اشوف.. اعيونه ساعه
وين ابوي... شأخره عن بيته هذا.. وهاي گاعه
وعن شوگي اريد اشهود
انته المهم موجود
///////////////////////////////////

وبعد أن أقبلت لتسكب ذلك الدواء توقفت قليلاً وقالت:

راح اخلي اشويه منك اعله گد آخر نهار... ابعيني
گلبي ما ينطيني اطشرك بلكي يرجع للديار... احسيني

يمتى ما ألمحه أشربك حتى يلگاني قويه
ما أريد ابقى مريضه من تجي اسكينه ورقيه

ابلا قرار... باقيه مابين اعيش.. وبين اطشرك
ابلا قرار... ساعه اگولن مايجون.. وساعه أبشرك
وارجع عليك اردود
انته المهم موجود.... يادواي

#أحمد #ماجد #الكلابي
تمت بعون الله تعالى وبركات والطاف مولاي بقية الله صلوات الله عليه


@HxzEU1

#قناه_نشر_القصائد_المنبريه

1446 هـ
#قصيدة_لمحرم_الحرام

كأني بمولاتي العليله قبل ليله من سفر مولاي الحسين ع تجلس ليلاً وحيده قبل النوم وتكلم نفسها..

مطمئنه ابداخلي... حتى لو ما گادره
وي خواتي اوالدي.... باجر آنه امسافره
شفته حضّر كل دوه بالبيت عندي
باجر اول وحده ابوي ايگلي اصعدي
استراحي ونامي..... استراحي ونامي
.............................................
آنه يا اول عليله... تحب مرضها... وما تريد اطيب منه
باجر ادري جي مريضه.....وگلبه يمي....يحسب احسابي اويه ضعنه
والدوه من گد فرحتي... ما أخذته... ولا نشدت الليله عنه

للصبح ما ضل شي واسافر....للغاضريه
باجر بنفس الناگه نصعد...آنه ورقيه
ومن اتعب ينزلني بيده... ويگود اديه

وبيه لو مابيه... لازم امشي اگباله
حتى أفرحه بحيلي.. وحتى ليضل باله
ودام هوه اوياي خله المرض ضدي
باجر اول وحده ابوي ايگلي اصعدي
باجر آنه امسافره..باجر آنه امسافره
..............................................
حيرة ام عباس حيره... وبيها افكر... من أمس گلبي عليها
باجر اتصبح غريبه... الموغريبه... وبس تضل تفرك بديها
نذرتلها وضاله ادعي... اويانه تمشي....وبلكي ما اسمع بجيها

ام البنين اشلون بيها.. تهضم يربي
شما اشوف ابوي يضيف محمل.. ويگلي گلبي
باجر يغير رايه يمكن....ويگلها اركبي

ما يغرب واحد... ولا اكو هيج بنيته
لو تصير وبيده... حتى ياخذ بيته
ماكو حد اوياه واگولن هذا حدي
باجر اول وحده ابوي ايگلي اصعدي
باجر آنه امسافره... باجر آنه امسافره
..........................................
.
اتخيلت بالدرب نمشي.... وعمي يوگف... ايصيح وگفوها المحامل
خاف عطشانه العليله... انطوها جودي... وخلي ترتاح القوافل
ايخاف من فيي الهوادج.. يجي بنفسه... ايفيي بالرايه ابو فاضل

ايلاطفني.نساني الصحاري... هوه وعضيده
والدوه كلما صار وكته... ايشربني بيده
مابين ابوي وبين عمي... كل الاريده

بالدرب ماعافني... ايخاف اخاف امن البر
ومن يروح لغيري... يودي يمي الأكبر
واغلب اللحظات خلصهن ابسدي
باجر اول وحده ابوي ايگلي اصعدي
باجر آنه امسافره... باجر آنه امسافره
.............................................
ان شاء الله من نوصل الطف... بالسلامه... اسجد ل الله واشكره
وأخيراً راح احضر... عرس جاسم... العمري كله احلم احضره
واگعد اگبال الصواني... وعمتي رمله.... بالخيم قرآن تقره

باجر أعز يوم بحياتي... يمرني بزماني
بس ليش دمعي بطرف عيني... ومدري شجواني
وشبيه ما اگدر اغمض.... ولا اغفه اني

الليله مدري شمالني... ماحلتلي النومه
آنه صح فرحانه... بس احس مهضومه
جاي احس بإحساس ما احسه اعله گدي
باجر اول وحده ابوي ايگلي اصعدي
باجر آنه امسافره... باجر آنه امسافره
.............................................
ولما انتهت تلك الليله وحل الصباح بدأت المصيبه :


سمعت ابوي ايصيح گومن... وآنه اتاني... السره يوصلني يمته
الشمس طلعت عليه... وماكو اسمي.... وگمت محترگه لحگته
ارگضتله وگتله بويه... وين اصعد... ماحجه ونزلت دمعته

شفته بجه وعلت اعله گلبي.... ضليت اكابر
ساعدته گتله آنه مريضه... ومابيه اسافر
فدوه اله كل امنياتي... ولا يبقه حاير

هوه اعرف بيه... حسين امامي وروحي
ودعيته ابفرحه... والملح بجروحي
وراح اخلص عمري بس مرسال أودي
باجر اول وحده ابوي ايگلي اصعدي

#أحمد #ماجد #الكلابي


@HxzEU1

#قناه_نشر_القصائد_المنبريه

1446 هـ
#قصيدة_لمحرم_الحرام

بعدما انقضت السبل عند مولاتي العليله توجهت الى ابي الفضل ع فلما رأها قال لها:


لا يصير بخاطرج من هاشم
راح اخلي الفضل يمج خادم
بعيونه اوليدي ايخليج
ماخذته وردته يداريج
يا روحي........يا روحي
........................................
جان اخذتج فوك راسي....وما اتعبج....وأبد ما رايد ألجمج
بيدي دورت المحامل....حتى أبشرج....وماكو محمل فوكه اسمج
ياحبيبة كلب عمها....شعندي غيرج....لاتزعلين أعله عمج
أبني ماخذته اعلمودج....خاف أهضمج....وعفت أعز شيء عندي يمج


راح اعوفن يمج أحلى ايامي
وبأسمج انصب خيمه يم اخيامي
ومااريده يروح ابني وياي
ردته أيضل ينگلج ماي
ياروحي...........ياروحي
........................................
ليش تنخيني اعله روحي...وانتي روحي...واغلى من اعيوني انتي
عمي واعيون العقيله....أتمنى افرحج....وما حلف بعيون أختي
ما طلبت أبنيه عمري...وعندي انتي....ابوجودج شلي إبنتي
ان شاء الله اطيبين وأسمع...بس ضحكتج....واخذج من ادري طبتي

ملزمه الج يومين أنتي ابهايه
عمي فدوه ارتاحي عوفي الرايه
عوفيها وبسج تبجين
ونج راح ايموت احسين
ياروحي.......ياروحي
........................................
أفراكج اصعب من نهرهم...ياعطشنا....يلي جنتي امحليه حضني
أذكر وانتي زغيره...ياما شلتج...وجنتي تغفين أعله متني
من امس محتار شحجي...وبيج أفكر....خافن اتكولين ردني
لخاطرج حتى أمي ضلت.....ماخذتها.... وكلشي لدموعج وجعني

أعليج عبدالله اذا زعلانه
أمنيتي اكلج عمي امشي ويانه
اسمج ماكو اويه اليمشون
جا صعدتج ويه ام عون
ياروحي..........ياروحي
........................................
شفتي بعيونج رقيه....صعودها...وركض طحتي أبين اديه
عمي مقسوملها تمشي....العذر منج... لاتحسبيها عليه
عطش ما لاكي أعله كدج...جان أخذتج....اهناك لأرض الغاضريه
ان شاء الروحه التجي... بجفوفي اصعدج....قبل لا أصعد رقيه

وبالوعد يافاطمه اتعرفيني
ألج روحه اوياي واطلبيني
مهضومه وبأحساسج حاس
طيحيها الروحه لعباس
ياروحي..............ياروحي
..............................................................................

(جواب العليله)

ونعم من أبن عمي...الجنه الأكبر....الدمعته لدموعي طاحت
وجدتي ام عباس احبها....مثل امي....اويانه مثل الزهره جانت
لجن لو تدري الهضمني....شلون اكلك....لجمه وبنص روحي عاشت
أمن أمس واهديماتي بيدي....حضرتها....ومارحت بس كلها راحت

رايحين وبالي يمك صاير
خايفه أعله اجفوفك امن العاشر
فدوه لطولك انه اندار
انتظرك ترجع للدار
يا روحي..........ياروحي

#احمد #ماجد #الكلابي


@HxzEU1

#قناه_نشر_القصائد_المنبريه

1446 هـ
#قصيدة_لمحرم_الحرام

يابويه***وعيونك الجنهن دوه
يابويه***اتعافى من أنضل سوه
يابويه**حارم عليله من الهوى
فدوه اخذني........فدوه اخذني
.......................................................
يابويه يذبحني الهجر وحشه الليالي بدونك
كلي شينسيني اﻻبو الكلساعه اگله اشلونك

ما آخذ بالطف امجان
خذني وياك اعله التربان
ومن هسه اشبع گلبك ماي
كلشي وﻻ اسمع عطشان

يابويه**دمعاتي كدامك تهل
يابويه**عايفني ما اذكر قبل
يابويه**هم تگدر ابلا ابو الفضل!!
فدوه اخذني........فدوه اخذني
..........................................................
خليني اروح وي المهد خافن يسمعوه عافوك
ماخذ عزيزي لكربله المتعوده اهزله الكاروك

اليرضع وينه اوين الصوم
يابويه وخل يشبع نوم
توه يناغي وما ذبلان
رايح وين المامفطوم؟؟

يابويه***ماشاف كلشي من العمر
يابويه***مو للذبح ذاك العطر
يابويه*** عبدالله مو مالت كبر
فدوه اخذني......فدوه اخذني
........................................................
ماخذ شكو بروحي فرح وبس الدمع ضل بالبيت
وماخذ رقيه وعمتي من دونهن شو ضليت
ماخذ كل ضحكه من الدار
وعايفني اتجوه بنص نار
كتلي ازغيره وماترحين
بضعنك شفت هواي ازغار

يابويه//محلفتك بعمي الحسن
يابويه//تحسبني وحده من الضعن
يابويه//حتى اركض اكبال المشن
فدوه اخذني........فدوه اخذني
......................................................
بالطيف شو چني احلمت شامت وگف عالصوبين
من الطف اجه ابمحبس ذهب شايفته بأيدك يحسين

وانشد آنه ابهاي الناس
بلكت بويه الگالك راس
وگتلهم من كالوا طاح
خل نمشي انفزّع العباس

يابويه***عايفني حضنك من وكت
يابويه***حضرت روحي وما رحت
يابويه***بس ايدي ضلت ماكدت

فدوه اخذني.......فدوه اخذني
.................................................

ومو من مرض دمعي يهل ولعمتي هاي الدمعات
ايتعبها تل بكربله واتحير بالعلويات

ومو عمتي اليكتلها الخوف
بس تشبع من راسك شوف
ويم كل شامت من اتنوح
تلكاه شايل بيده اجفوف

يابويه.......ادور وماتلكه السمح
يابويه......عمتي تصيح وتنجرح
يابويه...تنسى انته فوك اعله الرمح

فدوه اخذني .....فدوه اخذني

#احمد #ماجد #الكلابي


@HxzEU1

#قناه_نشر_القصائد_المنبريه

1446 هـ
#قصيدة_لمحرم_الحرام

ياگلبي أتقوّه بالوداع.. أواعدني اتكابر
بس ليله أتحمّل الضياع...لعيون الحاير
خل يمشي بسلامه احسين
وأطفيلك سواد العين... لعيون الحاير
//////////////////////////////////////

انطيني كلمه احسين ناوي ايشيل لأبعد ديره عني
احجايه لاتحجي يگلبي العافني والجان اخذني
ولا تضل بالضعن تحسّب آنه اگلك ما حسبني

لتبين مهضومه ارسومي
فوگ الهم ما احمله اهمومي... يموت

ما أحرجه بعلتي وماألمه
ياگلبي وخل نلزم يمه... السكوت

شيقرر راح اگله صار... من يودعني
وشد حيلك ضم الانكسار... لوما صعدني
ارحمني وأرحم مودعين
وأطفيلك سواد العين... يگلبي

//////////////////////////////////////
فدوه قويني يگلبي من اضل افرك بديه
ولاتضل تعصرني يمه لو نوّه ايسلم عليه
وافرح شما بيك افرح ابروحة اسكينه ورقيه

خل ايروحن ويه الوالد
ياگلبي آنه اوياهن واحد..اصير

جانن ليليه ايدارني
اوحده أكثر من وحده اتحبني...شحير

بارك عالروحه للخوات...وأرحم تعبانه
وأفتر خليني عالبنات...أسگي العطشانه
واسكي اعيوني والماشين
وأطفيلك سواد العين..لعيون الحاير
//////////////////////////////////////
أطمّن وضل بمجانك ليش بين الحِجر تفتر
ساعه يم عماتي رايح وساعه يم المهد تعثر
حسبة اشجم صبح اظلم ويرجع وياخذنه الأكبر

هوّد وصّه اعليه اوليده
للكوفه ايوصلني بأيده... اخوي

وحاشا احسين ايغير رايه
مايخلف من ينطي احجايه.... ابوي

بس هسه لخاطر البتول... جزيني اوداعه
خل يمشي وكلشي لاتگول... كابر جم ساعه
لاتنشدني سافر وين
واطفيلك سواد العين...لعيون الحاير
//////////////////////////////////////

عوّد وصيّتك يگلبي وتالي ما تالي عفتني
وره النوگ اشبيك ترگض والف طيحه طيحتني
ارجع لصدري دخيلك ياگلب مو تعبتني

بس خل يبعد ضعن الوالد
عاد ابراحه ايموت الواحد... عذاب

وبيني وبينك آخ افراگه
شل اجدامي ارگاض الناگه.. مصاب

مجبوره لخاطر الحسين.... للواقع أخضع
يلحابس ضيمي والونين...مرخوص أتگطع
احرگ شكو بيه اسنين
واطفيلك سواد العين ...لعيون الحاير
//////////////////////////////////////

غربّو اهل العوافي والدوه أطشر اگبالي
يله خل ابجي اعله حالك وانته گوم ابجي اعله حالي
وموت يلكلك محنه الدار من احسين خالي


ما ادري انحط بهالموقف
ناخيتك تجوّه وتنزف...غريب

يلتنبض موتني ابيتي
مااريد اهتم بعافيتي.... واطيب

ياگلبي يذبح السكوت...من غير عيونه
أدگ المن يله هسه موت...ماهيه اضعونه
دليني طريق البين
واطفيلك سواد العين ...لعيون الحاير


#أحمد #ماجد #الكلابي
تمت بعون وتسديد وتوفيق مولاي بقية الله الحجه بن الحسن صلوات الله عليه


@HxzEU1

#قناه_نشر_القصائد_المنبريه

1446 هـ
#قصيدة_لمحرم_الحرام


وين راحو صناديد الحرب
بلا مناصر واصد اعلى الدرب
من عكب اهل الشيم ..بلا مناصر واصد اعلى الدرب
**
راحو اصحابي ..بالحرب كلهم
ومابقه واحد .. يضل الي منهم
عالارض نومه .. بعيني اشوفنهم
وحدي عفتوني .. كمت اصيح الهم

عليه دارت كتايب كربله
وآنه وحدي واحامي العايله
وينه شيال العلم .. ..بلا مناصر واصد اعلى الدرب
**
ها يربع حسين .. وأهل المروه
والله رفعة راس ..صرتوا للنخوه
الدنيه بلياكم ..والله ماتسوه
بكربله ضامي ..وبيكم اتروه

نار كلبي تشب من الضمه
مني راحوا ليوث الموزمه
بالغرب حيلي انهدم ..بلا مناصر واصد اعلى الدرب
**
ضاكت الوسعه ..وحيرتي حيره
موحشه وظلمه ..صارت الديره
حزني بالحومه .. صعب تفسيره
لا حبيب و جون .. ولا ابو الغيره

راح صوتي وعله وجهي طحت
يجري دمعي وللمخيم رحت
بكلبي حسرات وألم ..بلا مناصر واصد اعلى الدرب
**
بكسرة الخاطر .. صرت اناديكم
بدمعة عيوني .. ابدي اساميكم
ما تحاجوني ..صحابي احاجيكم
والله وفيتوا .. وافتخر بيكم

عني رحتو وتولتني العده
هذا حالي غريب لوحده
عليه المّعسكر هجم ..بلا مناصر واصد عله الدرب
**
ساعت الهجموا.. وليه ولوني
للخيم ضلن .. يربن عيوني
وبدليلي سهام .. هدن متوني
شما ردت اوكف .. برمح يرموني

هذا حالي ولجم كلبي الرمح
جروحي كثره واضمد ياجرح
ونابت بكلبي السهم ..بلا مناصر واصد اعلى الدرب
**
كثرت جروحي .. وصحت يصحابي
خضبت شيبي .. من دمه احبابي
انظر لزينب .. بحركة صوابي
كطعوا الخنصر .. وسلبو ثيابي

خيل كامت تدوس اعلى الضلع
ونوح حزني اعلى زينب ينسمع
بدمي وصلت للخيم ..بلا مناصر واصد اعلى الدرب
**
تمت
#احمد #الخفاجي



@HxzEU1

#قناه_نشر_القصائد_المنبريه

@HxzEU1

قناه نشر القصائد المنبريه

1446 هـ
#قصيدة_لمحرم_الحرام


يلا علكوا الرايه .. هل محرم قادم
للطم وقرايه .. هل محرم قادم
***
هالمجالس بيها دارس عشك شيخ الساده
عشك فطره وعاده عدنه ومانبطل العاده
لابو فاضل كلبي ينبض عشگي امير القاده
واليطلبه بشده طايح منه نال مراده

وللمجالس هايه .. هل محرم قادم
للطم وقرايه .. هل محرم قادم
***
حسين عدنه الخدمة جنه ونفتخر خدامه
بالخدامه نشد حزمنه ونلطم اعلى الهامه
ولمحرم جيته نهتم قربت النه ايامه
واليضدنه وبينه يشكل خل يضل بأوهامه

تضدنه ناس هوايه .. هل محرم قادم
للطم وقرايه .. هل محرم قادم
***
هالشعيره تسري بينه تمشي وي دمانه
كلب واحد كلنه صرنه وخل يرف لوانه
الما يعجبه اللطم گله شجابك انت ويانه
احنه ناس نحب دمعنه ينزل لمولانه

وللدمع شرايه .. هل محرم قادم
للطم وقرايه .. هل محرم قادم
***
بينه حسره وبينه جمره وياهو اليطفيها
يهل محرم والليالي بالدمع نحييها
هاي عيني وعلى حسيني اليوم اريد اعميها
ومايهمني حجي العالم بينه جا شعليها

وبالايام الجايه .. هل محرم قادم
للطم وقرايه .. هل محرم قادم
***
هاي نعمه من ابو اليمه خادمه مخليني
وين الكه العنده اخدم وملك مسويني
ماوكفت ابابه حاير شماردت ينطيني
اله ترخص كل حياتي وما اوفي بديني

والخدم وفايه .. هل محرم قادم
للطم وقرايه .. هل محرم قادم
***
نذر عمري سنيني كلها فدوه لابن الزهره
الماله دمعه بالمٱتم بعد شله بعمره
هذا عشكي وي المجالس وياها صارت عشره
عشك عذري من الولاده وهذا عشك الفطره

حسين نمشي برايه .. هل محرم قادم
للطم وقرايه .. هل محرم قادم
***
تمت
#احمد #الخفاجي


@HxzEU1

#قناه_نشر_القصائد_المنبريه