جماعه حد يوريني النت مقطوع في بورتسودان ولا في شنو؟

بوست طويل بعد طول غياب ❤️
كيف نبني عادات كويسه ونلتزم فيها ؟

■ الخطوه الاولى :
اشتري كتاب العادات الذريه للكاتب جيمس كلير ..
ليه؟
عشان هو حيسهل عليك الطريق فوق ماتتخيل ..

انا اتعلمت حاجه مهمه شديد من الكتاب ده ، انو انت بتقدر تعمل العايزو بطريقتين : طريقه صعبه وطريقه سهله وممتعه ، والكتاب ده حيوريك كيف تصل للعايزو بطريقه سهله وممتعه وماحيخليك تحس اصلا بتغيير كبير في عاداتك الحاليه للدرجه التخليك تخاف وتوقف كل شي ! ، لأنك ببساطه بتبني عاده بمعنى الكلمه ..
خطوه خطوه ، ومع الايام بتشوف النتايج ..

انا حرفيا ممكن انهي البوست على كده ، لانو الكتاب ده بجد كنز فوق ماتتخيلو .
اساسا كل الحقولو ده انا اتعلمتو من الكتاب ، بس للناس الماعايزين يشترو حقول ليكم باقي النصايح ..

■الخطوه التانيه :

ابدأ ..

انا عارفه كويس جدا انو الكلمه دي مستفزه شديد ، كانت مستفزه لي انا كمان ، اللي هو يجي واحد عارف اي شي يقول ليك ابدا وبتاع وانت اصلا حاسي بالضياع وماعارف تبدا كيف ومن وين ..

جيمس كلير قال انو انتظارك للخطه المثاليه واليوم المثالي ده عمرو ماحيخليك تعمل شي ، لأنو ببساطه كيف انت عايز تخلي حاجه مثاليه وانت مابديت فيها اصلا؟
يعني ، كل حاجه جميله في يومنا ده ما بدت كده ، كانت عاديه جدا في البدايه ،وفضلت تطور لحد ما وصلت للمثاليه ..
وبعدين بجد ياجماعه انا اكتشفت انك لما تبدا وخلاص انت نفسيا حتكون احسن وحتلاقي الطريق بيتفتح قدامك وخطواتك بتتصلح مع الوقت اصلا !

مثلا حديكم مثال ..
انا طول عمري نفسي اضعف ، نفسي ابطل سكر ومنتجات البان من زمان بجد وكل مره بقول لما الاقي البديل ، لما الاقي خطة تمارين والكتيير من الاعذار ..

فجأه ياجماعه قريت الجمله القلتها ليكم دي في الكتاب ، انو كيف عايز تحسن شي انت مابديتو اصلا؟ ، وفضل الكلام ده في راسي ولمسني شديد ، بعدين بالصدفه حضرت فيديو لشمس الكويتيه لو تعرفوها ( هي بتغني ،بس الجانب التاني منها رائع حقيقي، عباره عن كتلة علم ماشي في الارض ) ف المهم قالت في الفيديو معلومات صدمتني حرفيا عن السكر ومنتجات الالبان ، ياجماعه انا في لحظتها قررت اوقف الحاجتين ديل ، ولما كتبت كده في دفتري كان جواي خوف كبير اني حفشل وماحعرف ،وانو طيب البديل حيكون شنو؟

لما صحيت الصباح لقيت في اكل قاعد وجاهز منتظرني بس ! ،وحصل كده برضو اليوم التاني ..
ف يمكن بجد لو ما انا لقيت في اليومين ديل البديل جاهز ماكان كملت ! ، بس ده الشي الانا دايما بحسو انو حقيقي اي شي انا كملت فيهو في حياتي دي كان بسبب رحمة ربناا بسس والله العظيم ، لا ارادتي ولا ايي شي ..

عقلي الكان خايف من فكرة الدايت للمره المليون قررت العب معاه واطمنو ، اني ماحعمل دايت ولا شي ، انا بس حقطع السكر واللبن ، وكل ما اشتهي سكر عادي الفواكهه قاعده والحمدلله ..

ومع الايام ، لقيت نفسي ماشه اصلح اكلي براي ، يعني اقلل نشويات ، افطر متأخر ، ابعد عن اكل المطاعم ، والحلو انو حقيقي ياجماعه انا حاسه انو ربنا بسهل لي الموضوع فوق ماتتخيلو ..
اولا مافيها اي شي انك تطلب المساعده من حد ، انا كنت بصعب الموضوع شديد على نفسي انو عايزه اعمل اي حاجه براي وكده حقيقي صعب خصوصا مع الشغل ومسؤوليات البيت وكده ، ف استعنت بأمي انها تعمل لي اكل الصباح بما اني مابقيت اشرب شاي وكنت باكلو الفجر قبل امشي الشغل عادي ..

مع الوقت ، وعشان تشوفو كيف الموضوع بيبدا بالتدريج وبيوصلك لأماكن احسن بكتير ، بقت تظهر لي فيديوهات عن الصيام المتقطع كتير ، وانا سلفا عارفاه لاني جربتو قبل كده بدون وعي مني اصلا وفرق معاي شديد ، ف قررت اني اوكي حعملو ان شاء الله ،وفعلا ممكن اقول ليكم الليله اول يوم لي فيهو والامور تمام التمام 😄
هو الفكره بس انو الواحد لو كان عندو مشكلات تانيه زي اضطراب الاكل او الاكل العاطفي دي حاجات بتصعب عليهو طريقو شويتين ، وكمان لو عندك مقاومة انسولين دي برضو حاجه حتأثر شديد في طريقة اكلك ..

لكن الشي المهم الانا ماشه بيهو في خطتي دي كلها هي اني اكون مرنه مع نفسي ، ما اشد ولا اضغط على نفسي خالص ، وحبه حبه حشوف النتايج ..
ف نطلع من النقطه دي بشنو؟ انك تبدا بشوية المعلومات الانت عارفها دي ،واطمن لانو الطريق فورا حيظهر ليك بمجرد ماتمشي فيه صدقني + اطلب المساعده عادي ، الناس للناس يا عزيزي .

■الخطوه التالته :
حدد الحاجه الانت عايز تعملها بوضوح ،ياريت لو تكتبها ، وياريت لو تحدد ليها وقت ، حتى مثلا لو كنت عايز تخليها اسلوب حياه ، حدد ليها وقت في الاول وبمجرد مايخلص الوقت المحددو ده سلفا انت حتكون اتعودت عليها وحتخليها اسلوب حياه عادي ، بس في الاول مخنا بخاف انك عايز تغيرو ف بقاومك لكن لما تقول ليهو انو التغير ده مؤقت حيطمن وحيتماشى معاك ، وايوه لازم تعامل مخك بالطريقه دي عشان تكمل في العايزو ..

■ الخطوه الرابعه :
انسف اي معتقد في راسك عن انك فاشل وماحتقدر وماف فايده ، تنسفهم كيف؟ بأنك تعمل حاجات بتقدر تعملها وتلتزم بيها عشان تثبت لنفسك انك بتقدر تلتزم بحاجه !

زمان كنت سمعت فيديو لواحد بقول فيهو انو مخك مستحيل يثق فيك طالما انت طول عمرك مابتلتزم بحاجه وبتخلي اي شي من نص الطريق ، ف لما تعمل العكس وتلتزم بأي شي لفترره مخك فعلا حيبدا يقتنع بالحاجه دي وحيبقى اسهل بالنسبه ليك انك تحقق اي شي تاني لانك سلفا عندك خلفيه كويسه في نظر مخك فهمتوني ؟

تابع تقدمك بالورقه والقلم ، اعمل جدول واكتب كل يوم انت عملت شنو وماعملت شنو حتفرق معاك شديدد والله صدقني .

■الخطوه الخامسه:
ده جزء يمكن مايناسب البعض بس انا بحسو مجرد ترويض لعقلك او تغيير للأفكار السلبيه العندك بأفكار ايحابيه ..
خطوتين : الاولى اكتب توكيدات لنفسك شجع فيها نفسك
التانيه كل يوم بليل قبل تنوم اقعد اتخيل نفسك وصلت للأنت عايزو وحس بالشعور كأنك فعلا عايشو .
(الخطوه دي ماماشه تحقق ليك اهدافك ، الخطوه دي بتخليك تصدق انك بتقدر تحقق اهدافك بسعيك ليها ) .

كان في خطوه سادسه والله بس نسيتها 😅،لو اتزكرتها بكتب ليكم ❤️

وبس والله ،اتمنى تكونو استفدتو واتمنى تطبقو فعلا❤️.

#فقرة_الدروس
#لينا_عوض

الكثير من الصمت

اللهم لك الحمد ولك الشكر ❤️

امتنان كبيير شديد وشكرر ما ليهو حد لرب العالمين على كلل النعم الماليه حياتنا من ابسطها لأكبرها ..
يااارب نحمدك ونشكر فضلك يا عظيم يا كبير يا منان .
اللهم لك الحمد والشكر 💜

استشعرو نِعم ربنا حوليكم ، استشعروها في صحتكم ،في شكلكم ، في بيتكم في اسرتكم ، ماتعاينو للنواقص ، حتى ولو جا عليكم وقت ماشفتو غير النقص اللي عندكم وده طبيعي لأننا في الاخر بشر ، لكن دايما وابدا حاولو شوفو نِعم الله عليكم في تفاصيل يومكم ..

تصدقو؟
زمان كنت بشوف انو لو ربنا بحبني او بالاصح كنت بحدد كرم ربنا علي بإنو يعمل لي حاجه كبيره او واضحه كده وملموسه ، بعدين اكتشفت انو لا !
كرم ربنا علي ممكن يكون بإنو خلاني اعيش يوم جديد عندي فرصه فيهو اني استفيد واصلح من نفسي ، او اني صحيت بنفسيه كويسه ، اني اصلا قادره استشعر النِعم حوليني واكون حامده وشاكره ..
مابتتخيلو الحاجه دي برااها انك قادر تستشعر النِعم في حياتك دي حاجه قادره تغير حياتك تماما حرفيا .. حتقولو كيف؟
حقول ليكم اولا لما تشوف اللي عندك وتركز عليهو حترضى ،ولما ترضى حترتاح وحتكون مبسوط ولما تنبسط حتشكر ربنا اكتر ولما تشكرو ربنا حيديك اكتر ف تنبسط اكتر ، ف ابدا عمركم ماتستصغرو اي نعمه موجوده عندكم ،مهما كان وضعكم اكيد في حاجه تشكرو ربنا عليها ،وبس جربو اكتبو كل يوم ١٠ حاجات ممتنيين لربنا عليها ، وكل يوم اكتبو في موضوع معيين ،يعني مثلا الليله ركزو في صفاتكم بكره في شكلكم الخارجي بعدو في الناس الحوليكم بعدو مواقف حصلت ليكم وبعدو بيتكم شغلكم وهكذا ، امسكو اي شي في حياتكم واقعدو اشكرو ربنا عليهو كل يوم ..
قد يبدو الموضوع غريب انك تقعد تكتب ، يمكن في البدايه اصلا ماتلاقي كلام تقولو ، لكن مع الايام ، لما تلتزم بالكتابه حتلاقي لا فعلا الموضوع بيفرق نفسيا ع الاقل ،حتبقى قادر تشوف رحمة ربنا بيك محيطه بيك في كل شي بمعنى الكلمه ،وقتها جد حياتك حتتغير ..
تفاصيل صغيره شديد قادره تغير حاجات كبيره شديد .

وبس ❤️

#لينا_عوض

أنت بحاجة لأن تستريح قليلًا
تستريح من الخوف، من القلق، من توقع الأسوء، من عناء التفكير، من عشرات المعارك التي تخوضها بالتوازي ..

لن تمنحك الحياة أكثر مِمّا كُتِبَ لَك، ولن يمنع عنك أحد مَا كُتِبَ عليك ... فٱهدأ

تصالَح مع ابتلاءاتك التي لا تستطيع تغييرها
قد يبدو الكلام سهلًا، ولكن الحقيقة أنه لا بديل ..

إمّا التَّصالُح، وإمّا أن يمضي العُمر دون أن تلتقط أنفاسك لتستشعر شيئًا جميلًا ولو للحظات ..

"لِكَيْلَا تَأْسَوْا عَلَىٰ مَا فَاتَكُمْ وَلَا تَفْرَحُوا بِمَا آتَاكُمْ" تعامل مع الحياة على أنّها ليست دار راحة، ليست للسلام النفسي المُطلق، ليست للطمأنينة التي لا يشوبها قلق ..
بل هي مجرد رحلة، لحظاتها تتبدّل، أحوالها تتغيّر، قد تعصف فجأة، وقد تَحلُو فترة، وفي كل أحوالها ستمضي ..

أنت بحاجة لوِسَادَة يغفُو عليها عقلك، ينفصل، يستكِين، يمنحك لحظات من الهُدنة لِتُكمِل الطَّريق .. 💛✨

#سماح_ابراهيم

بشارك معاكم عبارات عجبتني في الكتب البقراها ..

-إن الشخص الذي يحمل في داخله الكثير من الحزن المكبوت سيخلق بلا وعي احداث حزينه في حياته ،والشخص الخائف ينتهي الى تجارب مرعبه، والشخص الغاضب يحاط بظروف مثيره للغضب .
#السماح_بالرحيل

من اقوال كنزي❤️

رمضان كريم وكل سنه وانتو طيبيين ❤️
ان شاء الله دايما تكونو بخير وصحه وسعاده ❤️
شهر المعجزات بدا ، استثمرو فيهو كويس قدر ماتقدرو ، كان بي تسبيح او صدقه او دعاء او قرأن وقيام ليل ..
هو شهر بيجي مره في السنه ، ف خلينا نحاول نحسن فيهو اعمالنا ونستفيد من بركة الايام دي ❤️

كلو لخير ..
حتى ولو شكينا في كده .
وبس .
#لينا_عوض

حاجه لازم نختها كلنا حلقه في اضانا ..

الحاجات المابتتحكي ليك، او بالاصح الناس او الشخص المعين ده مابحكيها ليك وبخبيها منك بالعربي كده ، ماتزعل عليهو ، ولا تتحسف على عدم معرفتك بالموضوع ده ، وخت في عقلك انك مامحور الكون ومالازم تكون مواضيع الناس بتأثر فيك لو ماعرفتها ..
ايوه عارفه الموضوع ممكن يوجع لو البخبي عليك ده حد قريب منك لكن في نفس الوقت بالتدريج انت لازم تتعلم انك تهتم بس بموااضيعك انت ، وتصغر وتقلل اهتمامك بالناس ومواضيعهم شنو ما كانت ، ع الاقل مايكون اهتمامك بيهم اكبر من اهتمامك بقصصك وحكاياتك انت ، صدقوني الحاجه دي واجب على اي حد يتعلمها ، حتخفف عليك الم نفسي كتيير ، وبراكم عارفين يعني نحنا في زمن من النوادر تلاقي ناس شفافه وواضحه معاك ولو بحدودها حتى !
ف بس يعني ، كلم عقلك كل مره يحصل فيها موقف زي ده انك ماحتموت لو ماعرفت ،وانو الشخص ده اختار يخبي ف احترم رغبتو اياً كانت اسبابها .
وبس والله❤️.

#لينا_عوض

عيدكم مبارك وعساكم من عواده💜✨

أنا اتصرفت وقتها ع قدر معرفتي .. دلوقتي عندي معرفة وخبرة أكبر والمرة الجاية هتصرف بشكل أصح ."
الجملة دي برددها لنفسي كل م أفكر في غلطة أو موقف أخطأت التصرف فيه، لدرجة تضغطني والحمد لله خففت شوية من جلد الذات اللي عندي

كن رحيماً بنفسك .")

- لكاتبه

صباح الخير ❤️

حكيت ليكم عن الموضوع ده كتير وحعيدو ليكم تاني لأنو بجد مهم وبجد بيفرق شديد ..

الكتابه يا شباب ..

لما تكتب شي انت عايزو ، وحتى لو في الظروف الحاليه ماعندك امكانيه ليهو ، بس انت عايزو من قلبك وفي نفس الوقت مُسلّم امرك لربنا وراضي سواء حصل او لا ، مابتتخيلو الحاجه دي قدر كيف بتفرق وقدر كيف قادره انها تحقق ليك الانت كتبتو ولو بعد حين ..
وفي فيديوهات كتييره بتتكلم عن الموضوع ده ، ومن الفيديوهات اللي بجد لمستني شديد فيديو لستيف هارفي لما قال اكتب اهدافك وكل شي انت عايزو وماتفكر انو مستحيل ، لأنو حيتحقق طالما انت كتبتو ..

طيب البخليهو يتحقق اصلا شنو؟
الشي اللي الناس مابتقتنع بيهو انك لما تفكر في حاجه انت كده بتخلق ليها احتمال في حياتك ، سواء كانت الحاجه دي كعبه او كويسه ، ربنا ادانا عقل حقيقي قادر يغير حياتنا بلمح البصر بس بالافكار او التخيلات ،وطبعا مع السعي اكيد ، بس حقيقي ماف سعي مهما كان كبير قادر انو يحقق ليك شي طالما عقلك وافكارك رافضه الشي ده ، واكيد اي حد فينا عندو تجربه في الموضوع ده ! .

مثلا انا من كم شهر كنت قاعده اكتب في كذا حاجه نفسي اجيبها ، هي ماكانت صعبه بس ماكانت بتحصل سريع ، المهم ف كتبتها وعادي يعني نسيت اصلا الكتبتو ..

ف بتعدي الايام وبلاقي اني كل شويه قاعده اجيب حاجه من الكنت كاتباها اصلا ، لحد ما اكتشفت الليله اني تقريبا جبت اغلب الحاجات بدون ما احس اصلا !

كيف حصل كده؟
عادي جدا ،ماختيت انو مستحيل وفعلا هو ماكان مستحيل ، وقلت اني حجيبهم وبس ، وفعلا جبتهم .

ودي ما اول مره اكتب شي واقدر احققو ..
عشان كده ، برجع واعيد ليكم تاني ، اكتبو ، اكتبو ،اكتبو وماتستهينو بالكتابه ،حتى لو مامقتنعين ،اكتبو وتعالو بعد كم شهر او سنه حتى وشوفو حيتحقق ليكم كم في الميه من الحاجات الكتبتوها !

وبس والله .

#لينا_عوض

نرجع ونقول ، العافيه زيها مافي ❤️
ف الحمدلله على الصحه ،الحمدلله اننا قادرين نمارس حياتنا عادي ،اننا بنتحرك بنتنفس بنضحك بناكل ونشرب ونعمل كل البنحبو ..
الانسان ضعيف لدرجه انو صداع ساي كفيل يرقدو في السرير فعلياً ..
ف اشكر ربك دايما على صحتك ، عشان تزيد وربنا يبارك فيها ف تعمل من خلالها انجازات وحاجات رهيبه شديد ..

* كسره :
* لما الحمى تنزل وتحس انك قاعد في فرن ،ده احساس مستفز بطريقه ماعاديه ، بس في نفس الوقت انت بتقول الحمدلله انك اتحسنت ولو شويه وفي نفس الوقت برضو بتضرب نفسك بالجزمه عشان حضرتك ما اخدت دوا وافتكرت انو الموضوع بسيط لحد ما عرفت البساطه على اصولها ..

*وبعد الرجفان والحمى الواصله ماعارف كم نقول الحمدلله انها عدت ، والحمدلله اني حقدر انوم بسلام ..
*بستثناء كتمت النفس طبعا !
*بس برضو الحمدلله .


* كل الشكر لبندول اكسترا اللي واقف معاي اكتر من البشر نفسهم 😂
اصلا لينا = بندول اكسترا معروف يعني

احلام سعيده للجميع ،وصحه واصله السماء من قوتها وعظمتها .
وبس والله❤️
في الغالب دي هلاويس الحمى اصلا ياشباب ف الحمدلله يعني😂
#lena

فراشات ايفري وير

ونقول الحمدلله رجعت لينا العافيه بفضل رحمة ربنا طبعا ثم اخوي الفاضل اللي كان السبب اصلا في انو يعاديني 🌚
يمرضني ويشفيني بس استغفر الله😂💔

صحبتي عروس🥺❤️

وسط ما الواحد طاير بالفرح انو صحبتو حتتزوج وانو ربنا عوضها وفرح قلبها بنصيبها الحلو ، بقدر ما زعلان انو ماحيحضر عرسها💔

يخوانا ليه اول ما سافرت صحباتي كلهم قررو يتزوجو وانا ما اقدر احضر عرسهم؟😭
شوفو لينا حل للموضوع ده لانو بجد حزين شديدد 😭💔

شنو المعلومه المهمه اللي لازم الكل يكون عارفها وماشي بيها؟
كترت مساعدتك للناس حتصنع منهم ناس اتكاليين مع الوقت ..
بمعنى ، حيستسهلو يطلبو منك انت بدل مايعملو الحاجه هم بنفسهم ، ف شنو الناس تبطل شغل القلب الحار ده وماتكتر من المساعدات ، لو عايز تساعد علم حد كيف يقدر يعتمد على نفسو مش يجيك او يجي لغيرك كل شويه !

وبس والله .
#lena