ابو ذيات لميلاد حجة الله الامام المهدي المنتظر روحي وارواح العالمين له الفداء ...

احبك يا سراط الله ... وعدله
يمن سماك بالمصحف ... وعد له
ميلادك احسّب له ........ واعد له
شعر واشموع . ورد . او واهليه .....

انتفّس اسمك احنه ... يا هوانه
ابو صالح يعزنه ........ يا هوانه
انه ابلياك شنهو ؟؟؟ يا هو آنه ؟؟
لا حس . لا نفس . لالي هويه ...

ابنص شعبان اصبح ... هايم آنه
ولا للنوم جفني ....... هايم آنه (( هوّم ))
اگل للطير اخذي ..... هاي امانه
گلبي الحجة الباري هديه ....

يغير اعيونه ابدن ... ما هوينه
ولأن نهواه للذل ....... ماهوينه
عجب للي يگلي ...... ماهو وينه
واهو ابخيره تعيش الرافضيه ...

الف عل خير ميلادك .... مُـبارك
يمثلك بشر ما شفنه .... مُـبارك
كلمن هل مسه الشخصك .. مَ بارك
تكرها السمه واتكرهه الوطيه ...

الشدايد هل مسه انحلن ... وسهلن
الوحش . والطير . واجبالن .. سهلن
كلها نادتك اهلا ................. وسهلا
يبعد العافيه يبن الزچيه ......

انه ابهل ليله يل مهدي ... مراح ابــ
ـقلم . اكتب بل ابدمعي ... مراحب
لون مكتوبلي ابعمري .... مره احب
فقط انت العشگته او هايهيه ....

..................

ابو فاطمة الطائي

هوسات لميلاد سيدي ومولاي الامام المنتظر عحل الله فرجه الشربف

هلا ابحجة إله الكون هلا بل وعد المحتّم
هلا يل شاغل افكاري او يجري بگلبي مجره الدم
هلا يل باچر ايسكتون او سيفك وحده يتكلم
اهلن يل يوفي ابميعاده

يمن حسنك جزه التوصيف لا يوسف ولا غيره
الشعر واهل الشعر مولاي امامك وگفو ابحيره
جمالك سر اله الكون امنين انجيب تفسيره ؟؟
بس الله اليعرف معناته

كلما انوي اهوس ليك يل مهدي اجر ونه
اذا شمس او گمر مولاي نورك تقتبس منه
اوصفك بيش يل لولاك مامش طعم للجنه
هنيال الشيعه ابهل ليله

يمهدينه الهجر چتال منه الگلب يتمرمر
نعم نفرح ابهل ميلاد او نزرعلك ورد احمر
لچن يايوم يل موعود تجي ياعيدنه الاكبر
وانقبل ايدك يا ساعه ؟؟

جدك للرسل خاتم وانت العتره خاتمها
كلمة الله كون اتم . وانت الي تتممها
واشما شيعتك طشار انت الي تلملمها
واثياب السود انبدلها

الف عل خير هل افراح تستاهل يوالينه
تقبل منه يا مولاي حبنه او كل تهانينه
يكحل اعيونه المفگود يا اجمل امانينه
امبارك يا نور اعيوني

يوم اخمسطعش شعبان انولد طاووسها الجنه
من سابع سمه للگاع دربه منترس حنه
ابمهده دارو الاملاك او حور العين ناغنه :
من فدوه انروح الهل شوفه

ابو فاطمة الطائي

ضوه عيني يموعود ضوه عيني
هوه ديني يموعود هوه ديني
________________

يا عشگي الناصح يابو صالح
يا نسمة البارح يابو صالح
دمع العشگ فاضح يابو صالح
سيف الهجر جارح يابو صالح

هليله الك هايم يابو صالح
وجفني فلا نايم يابو صالح
اهتف الك دايم. يابو صالح
مبروك يل قائم يابو صالح

عيد والفرح هل جانه
بيك شيعتك فرحانه
هاك يا امل دنيانه
روح بس الك ولهانه

ضوه عيني يموعود ضوه عيني
هوه ديني يموعود هوه ديني
________________

امبارك امبارك يابو صالح
الباري مختارك يابو صالح
وامصور انوارك يابو صالح
يل محكمه اسرارك يابو صالح

يا فرحة الزهره يابو صالح
يا خاتم العتره يابو صالح
يا آية الكبرى يابو صالح
بالروح الك جمره يابو صالح

نار هل عشگ تچويني
شوف دمعي تارس عيني
موت او فرگتك تاذيني
او دوم محفلك يحييني

ضوه عيني يموعود ضوه عيني
هوه ديني يموعود هوه ديني
________________

هل ليله فرحتنه يابو صالح
واعلگنه شمعتنه يابو صالح
بسمك يكشختنه يابو صالح
يمحلي دنيتنه يابو صالح

شعبان دوهنه يابو صالح
بخمسطعش منه يابو صالح
مولد ضوه الجنه يابو صالح
والورد والحنه يابو صالح

بي كل ورد قد ازهر
يوم صد وجنتك كبّر
ذاب امن الخجل صار احمر
گال منه ريت اتعطر

ضوه عيني يموعود ضوه عيني
هوه ديني يموعود هوه ديني
________________

جينه الك بل ود يابو صالح
كلنه سوه انردد يابو صالح
عل خير هل مولد يابو صالح
عالدنيا متسيّد يابو صالح

يا سيد الساده يابو صالح
عيد الله ميلاده يابو صالح
دلالي الك ناده يابو صالح
او غيرك فلا راده يابو صالح

نور جانه باجمل صوره
خير تارس المعموره
جاي دربه كله انذوره
الگاع والسمه مسروره

ضوه عيني يموعود ضوه عيني
هوه ديني يموعود هوه ديني
________________

في مولدك نفرح يابو صالح
او للمحفل انفرفح يابو صالح
بجمل شعر نصدح يابو صالح
بالزينه نتوشح يابو صالح

آنه او يهل فقره يابو صالح
بل قل اعوذ اقره يابو صالح
لا تحسدك نظره يابو صالح
اعيون الحسد كثره يابو صالح

خاف سيدي ايحسدونك
حيث ماكو مثل اعيونك
الليل بي گمر يلگونك
او نور كل صبح من لونك

ضوه عيني يموعود ضوه عيني
هوه ديني يموعود هوه ديني
________________

ويه ضوه الگمره يابو صالح
انهني للعتره. يابو صالح
الكرار والزهره يابو صالح
وانهوس او نقره يابو صالح

والكربلا نمشي يابو صالح
بينه الامل يحدي يابو صالح
حد الفجر نحيي يابو صالح
انهلهل انغني يابو صالح

صوت هل جمع يتعالى
هناك والشمع يتلاله
انصيح ربي انت ابراله
ابجاه كل نبي واعياله

ضوه عيني يموعود ضوه عيني
هوه ديني يموعود هوه ديني
________________

ابو فاطمة الطائي

الليلة نزلت للارض لبشاره
حجة الله اشرقت انواره
________________________

الليله كل هم ومدامع تنجلي
الليله ابو صالح نزل نوره الجلي
والهلاهل بل محافل تعتلي
او بل قصائد هل خدم تتباره
________________________

الليله ميلاد الامل والمرتجه
شمس مصباحي واهو بدر الدجه
لجله شمعات الفرح متوهجه
والوحي نازل يطش نثّاره
________________________

الوحي نازل للارض يهتف هلا
هلا ابحلال الشدد والمعضله
يامن الاكوان كلها فدوه اله
فدوه اروح اليمنته او بتاره
________________________

حجة الله الخصاله ابلا عدد
من جماله بالارض لا منوجد
لجله نقرا قل اعوذ امن الحسد
الساكن ابوسط الگلب واكتاره
________________________

مولده الافراح عمت عل الارض
يله نگصد محفله او نركض ركض
والهلاهل اصبحت واجب فرض
او واجب العاشگ يطش ازهاره
________________________

هلا بالموعود واليشفي العلل
هلا ابسگاي العده چاس المهل
الوادم احجارات بس هو الجبل
او يا جبل هاذه التهزه احجاره
________________________

هل علينه ابن الحسن يا مرحبا
والچفوف ابحنّه لجله امخضبه
انهني الساده او نهنّي اهل العبا
وكلمن المدحه ينظم اشعاره
________________________

الارض لبست أله اثياب سرور
والشمس بهجه او فرح گامت تدور
بدر وايغارن من ارسومه البدور
من السمه المهده تصد محتاره
________________________

ابو فاطمة الطائي

هالليله افراح او سهر هالليله
مولد امامي المنتظر هالليله
صلاوات صلاوات على الامام المنتظر
______________________________

خير العمل ميلاده حل
اهلا وسهلا مرحبا نادينه

حب او فرح گلبي انشرح
هنيالي بيك ابهل مسه مهدينه

مهدي الامم بيه انرسم
لوحة امل والها ابشغف تانينه

كحلة مقل من الازل
سواه ربي من عدن . مو طينه

ميلاده فرحة كل محب ميلاده
اعياده تغفر كل ذنب اعياده
حملناه حملناه اسمه حرز من الخطر
صلاوات صلاوات على الامام المنتظر
______________________________

ابدلالي اله. كاتب هله
ناقشها بضلوعي نقش هل كلمه

يوم انولد. كلشي انسعد
ارض او سمه شمس او گمر والنجمه

حسنه ترف ما ينوصف
حور العيون اتصد اله او مبتسمه

هسه او قبل. ماله مثل
سبحان ربي الصوره ابهل رسمه

مو مثله يوسف بالحسن مو مثله
هو احله من جنة عدن هو احله
عطر فاح. عطر فاح ميلاده والله اجمل خبر
صلاوات صلاوات على الامام المنتظر
______________________________

ابشعبان اجه هل مرتجه
بخمسطعش شعت علينه انواره

يا هيبته. يا طلعته
سبحان ربي البي جعل اسراره

كل الورد. يمه يرد
ويگله اهلا يا اعز ابشاره

اهلا يمن. جنة عدن
نزلت على مهده او غدت خطاره

تتبارك ابهز المهد تتبارك
امبارك تگله يا سند متبارك
تناغيه تناغيه يا محله وياك السهر
صلاوات صلاوات على الامام المنتظر
______________________________

عيد الله هل جاب الامل
او عترة محمد اصبحت مسروره

ابفرحه او هنه الوحي اعتنه
الدار الرساله جايب الها انذوره

املاك اجت بسمه الهجت
افواجا او كلها تريد اتزوره

شي قبّله. شي يحمله
شي شايل ازهاره او يناطر دوره

ايهنون جده المصطفى ايهنونه
بعيونه نور الله صفه بعيونه
تسابيح تسابيح كل ملك يم مهده ذكر
صلاوات صلاوات على الامام المنتظر
______________________________

وجناته دُر بيهن سحر
كل القصائد نوخت يم بابه

كل قافيه. مو كافيه
توصف جماله لا وحگ اكتابه

رب السمه بيده ارسمه
خله الوجود ابكل كيانه ايهابه

الكل شرع هو الدرع
قرآن الله قد لبس جلبابه

بل مهدي دين الله احتمه بالمهدي
بي يبدي بيه الخاتمه بي يبدي

الايات الايات بي لاذت او كلها فخر
صلاوات صلاوات على الامام المنتظر
______________________________

ربي اسالك واتوسلك
فرحتنه بل مهدي يرب كملها

عجل اله او طف كربله
خل تبرد اجروحه او يصح طب الها

ابشوفته خل شيعته
اتعيد او تسهر للصبح اي خلها

تنسه الهظم اوذاك الظلم
واتعيش ويه ابن الحسن قائدها

اتشوفه صبح او بالمسيه اتشوفه
اطوفه يا گبر الزچيه اتطوفه
يمولاي يمولاي عجل بعد ما ضل صبر
صلاوات صلاوات على الامام المنتظر
______________________________

ابو فاطمة الطائي

ابو ذيات لميلاد سيدي ومولاي الامام المجتبى عليه السلام


الحسن گلبي بيان الحب ... تلاله
شعاع النور من وجهه ....   تلاله
الوجود ابسهله واجباله  ... تلاله
وگف هل يوم ياخذله تحيه ....


جمالك حگّه گلبي ..          مِن يهم بيه      (يهيم )
الشعر نظمه ايتخلبص ..    من يهم بيه.
الشمس تاخذ ضواها ..... منه . هم بي
ضوه ايكفي جنان الله الزهيه


فرحتي ابمولدك مولاي .... وسعه
واجيت المحفلك ولهان .... وسعه
يبو الميدان هل ميدان ..... وسعه
نريد انهوس اعله ابن الزچيه ...


بواترنه على اعدائك ....    سَنينه
ابمحبتك عمري يامحله ... سِنينه
الهلاهل والفرح صارن ...... سنينه
ابنص رمضان عند الرافضيه


الفرح هل ليله گلبي ....  ياسه ياسه
او زرعت الدرب لجله  .. ياسه ياسه
العشگ گالو  سياسه ....  يا سياسه !!
وانه المجنون بوليد الزچيه ....


يريت الجفن مره ..      منه اكحله
الكحله العينها اخذت .. منه كحله
امامي الحسن ياهو .... منك احله ؟؟
بيك الحور هامن هل مسيه ....

ابو فاطمة الطائي

هوسات لميلاد سيدي ومولاي الامام الحسن المجتبى عليه السلام ..



يوم اخمسطعش رمضان جا اجمل خبر إلنه
بي ميلاد راعي الزود سيد الارض والجنه
الحسن وجهه نوصفه ابيش او هوه من السما مِنّه
هنيال الشيعه ابميلاده


أول ولد للزهراء اشرق عل الارض نوره
بي فرحت سمه او گيعان اويه الزهراء مسروره
وجهه بي جمال الله سبحان الذي امصوره
اشمحلاته .. يوليد الزهره


تهانينه العلي الكرار  هل ليله انولد نجله
يشبه جنه الفردوس  لا بل اجمل او حله
ابمهده او صار للاملاك او لگلوب البشر قبله
المقدس والكعبه اتطوفه


اول فرحه لهل البيت وجهك يابعد بيتي
الف عل خير ميلادك يل امسلّمك ناصيتي
انت الشوف  والدلال وانت انت عافيتي
امبارك يا شيخ الساده


الحسن حيرني اوصافه يحبه العبد والمعبود
من آدم لحد هل يوم مثله ما ولد مولود
آيه امن الكمال امسه آية امن الكرم والجود
جبريل امعزب بمضيفه


عليك امبارك الميلاد ياشيخ الانس والجن
الك جبنه الورود واشموع الفرح وجن
العگل بيك انشده مولاي يابن فاطمه وانجن
يا اجمل عيد اعله الشيعه



ابو فاطمة الطائي

لميلاد الامام المجتبى عليه السلام



ساكن اخيالي
ابگلبي وابالي
الحسن روحي
او حبه يحلالي

__

يل حسن هيهات غيرك ما اوده
سرمدي حبك يغالي او ماله مُده
ابعيد ميلادك اجيت او بيدي ورده
وگلت للعذال عنك كلمه وحده

الحسن جنّه
ما امل منه
والله ماعوفه
اول او تالي
__

گلبي بيدك سلميته يا امامي
كاتب اعليه كل ترانيمي او سلامي
وكل قصايد مدحي ليك او كل غرامي
يامن اباسمك صبح زايد هيامي

عيدك امبارك
شعت انوارك
عل انس والجن
انت متعالي
__

انت ميلادك سرور او خير وافر
الله بيك ايريد يجبر هل خواطر
ارسلك احساس مرهف للمشاعر
انت كلمن ما يحبك حضه عاثر

يا ضوه الگمره
او فرحة الزهره
أول أبشاره
الحيدر الوالي
__

يلي حُسنه اتغار من عنده ألأرآئك
فرحت اوياك المصاحف والملائك
والسمه واهل السما ابعيدك تبارك
إتشارك الفرحه اجت يمك تشارك

واگفه اتنادي
اتهني الهادي
ابمولد اوليده
غالي ابن غالي
__

أول ابشارة فرح للعتره انت
يلي كل وصف النبي طاها ملكته
تشبه ارسومه وسواليفه او ضحكته
اليصدلك شكو هم عنده مسحته

هيبه وامعدل
كامل امكمل
انت اول شيخ
نصبه العالي
__

نصبك الله او صرت شيخ البريه
يا عطية ربي للزهره الزچيه
هل تهاني اقبلها مني ابهل مسيه
يا هديه امن الله شرسلك هديه

تاهت افكاري
او تعبن اشعاري
اگبالك اعتذرن
او تعرف ابحالي
__

ابو فاطمة الطائي

لميلاد الامام المجتبى عليه السلام




نور الحسن شع بالسمه
انهني النبي اوحامي الحمه
وانهني امه فاطمه __ ابميلاده  ابميلاده
__

عل عتره هل اجمل وجه في احله مصباح
ابيت النبي عطر الفرح من كل كتر فاح
اوصوت البشاره امن السمه يا هل خلگ صاح :
سلطان الگلوب انولد سلطان الارواح

نوره تشعشع عل ارض
لجله الفرح واجب فرض
اقروله آيات الحفظ __ ابميلاده  ابميلاده
__

نبعث تهانينه ابشغف للساده والآل
وابهل الولاده الزاهره نقراله موال
يحوي احاسيس او عشگ مامر عله البال
ولرض البقيع الطاهره انوديله مرسال

من هل عيون العاشگه
نبعث مشاعر صادگه
يل گلبي مثلك ما لگه __ ابميلاده  ابميلاده
__

الليله نهني المصطفى وانطش الورود
وانگله يل محمود اجاك اوليد محمود
من زغره الله امنصبه شيخ اعله لوجود
نوره مثل نور الشمس ماحدته احدود

هاذه الحسن راعي الهلا
كله مهابه او مرجله
شيخ السلف من يوصله  __ ابميلاده  ابميلاده
__

وانگل لبو الحمله علي عل خير ياحيد
ابرمضان گبل العيد الك الله وهب عيد
وجه الحَسَن بيه الحُسُن عن يوسف ايزيد
هنيال البشوفه حضه وايقبل الأيد

هليله مامش كل وسن
نهتف علي يابو الحسن
امبارك ابعيد الحسن __ ابميلاده  ابميلاده
__

والفاطمه انهني ابفرح وانطش الازهار
نعلگ شمعنه وبالحفل نقره اجمل اشعار
يم الحسن هذا الحسن من مثله ماصار
غارن الحور ابشوفته او منه الورد غار

اقسم قسم بل قل هو
منه الشمس تاخذ ضوه
وجه الحسن هو الدوه __ ابميلاده  ابميلاده
__

امبارك يشيعه مولده شيخ الدواوين
بهجة اعيون الكل محب فخر الموالين
هاذه كريم الآل اله مدوها ليدين
نادو امبارك يل حسن ياقرة العين

وابصيحه وحده نبتدي
يا مالكي او يا قائدي
عيدك امبارك سيدي __ ابميلاده  ابميلاده
__

ابو فاطمة الطائي

هلا ابمولد امامي سيد الساده
هلا ابمولد امامي سيد الساده
_______


يوم اخمسطعش رمضان شع النه
تجلّي رحمة الرحمن والمِنّه
عطر وجهه يشابه ريحة الجنه
الله انطاه جلال او بالحُسُن زاده

هلا ابمولد امامي سيد الساده
_______

تشبگه فاطمه مستبشره ابشوفه
ابحضنها والعباة اعليه ملفوفه
ساعه اتشم رگبته ساعه بچفوفه
وادموع الفرح عل وجنه تتهاده

هلا ابمولد امامي سيد الساده
_______

حيدر هل مسيه ابتشرن ارسومه
ميلاد الحسن عنّه جله اهمومه
كواكب هل سمه واشموسه وانجومه
فرحانه او تغني يوم ميلاده

هلا ابمولد امامي سيد الساده
_______

علي اتعنه النبي والحسن بيمينه
او شمّه والد الزهراء بجبينه
رفع چفه ابدعاء او ناجه بارينه
يگلي الحيدره سمي انت ويلاده

هلا ابمولد امامي سيد الساده
_______

نزل وحي السمه او جايب ريحانيه
يگلي احنه _ الحسن _ هل ولد سمينه
نطيناه المهابه او شِيخه منطينه
وقائد الله راده ايصير عل قاده

هلا ابمولد امامي سيد الساده
_______

ابو فاطمة الطائي

ومن الارشيف لميلاد سيدي ومولاي الامام المجتبى عليه السلام :


هله او مية هله    بالمجتبى ونوره
هله او مية هله    بالمجتبى ونوره
_

الليله بهجه  الليله ضجّه   الليله ميلاد الكرم
الليله ربنه   اشگد يحبنه   الطف اعلينه ابِنعم
ودّه النه     اغصون جنّه  تحتوي اجمل شيم
حلو رسمه  حلو اسمه   بالعرش خطه القلم

الارض واهل السمه  خلاها مسروره
هله او مية هله    بالمجتبى ونوره
_

نوره زاهر   بي نفاخر  شيخنه او شيخ المله
عالي شانه    يامكانه     منهو يگدر يوصله
هيبه عنده   يضوي خده  احله من كل الحلا
وصفه آيه     والبرايه    كلها گالتله هلا

مثل وجه الحسن    ماشفنه كل صوره
هله او مية هله      بالمجتبى ونوره
_

للزچيه   هل مسيه    منولد أول ولد
من تشمه   اتگله يمه   هاذه خدك لو شهد
يا فرحتي   يا بهجتي   انت يا نجم السعد
يا عطيه    ياهديه    من عند واحد أحد

يمن وسط الگلب   احروفه محفوره
هله او مية هله    بالمجتبى ونوره
_

يوم عيده   للصميده   نزلت املاك السمه
جت تُبارك   وتُشارك   فرحة امه فاطمه
شي تشمه    شي تضمه   وعله گصته تلثمه
شي يبايع    اجه طايع    والولاء ايقدمه

اتبارك بل مهد      كلمن اخذ دوره
هله او مية هله    بالمجتبى ونوره
_

هل ولاده    والسعاده   للحسن بس للحسن
لجله نفرح  بسمه نصدح   كل الجروح أنّسن
المحافل    والهلاهل    اعيوني بيها اتنومسن
بالاماني    والتهاني     والمشاعر هوسن

الف مبروك الك     ياضوه المعموره
هله او مية هله     بالمجتبى ونوره
_

الله راده   والعباده    شيخ عالي المرتبه
اويا مضيفه  من تضيفه  هله تلگه او مرحبه
خيره شايع   ماكو جايع   والدلال امنصبه
الخير بيده    والتريده   روح من عنده اطلبه

الك ينطي ضعف    اي هاذه دستوره
هله او مية هله    بالمجتبى ونوره
_

ابو فاطمة الطائي

حاير شوصف الحسن تنگط عسل شاف اله
چفينه مستشفى العلل كل اليجي شافه اله
ايگولون يوسف حلو بس والله لو شاف اله
چا گال هاذه مو بشر إن هاذه الا مَلك
خزره ابطرف ناظره عقلي او دليلي مِلك
يل حسن هاك الگلب ابعيدك يغاتي مُلك
ايحبك واجاك ابشغف طِب للعشگ شوف اله

ابو فاطمة الطائي

ابو ذيات لشهادة سيدي ومولاي أمير المؤمنين صلوات ربي عليه

غِسلته ابماي عيني الجرح ... ماطاب
غفه . والعيش بعده ابد ... ماطاب
لون بيدي اعله گبره اگعدت .. ماطب
داري . الموحشه او ظلمه عليه .......

اشكثر گلبي يبويه اعليك ... شال آه
امصابك للبدن يا علي ....... شلّآه
بنت واتصد لبوها ابنعش ... شالوه
بس الله اليعرف اشصار بيه .......

يون او گطّعت لحشاي ... ونتاه
صحت ياربي وين الصبر .. وين تاه
بويه انت نظر عيناي ...... وانت
نبض گلبي او مشيت اشلون بيه ...

تون اعروگي من اسمع .... علي ايون
او حتى الصخر بفراگه ...... عَلَي وَن
اليتامه اعليك تنشدني ..... علي وين
شجاوب وآنه تسعر نار بيه .....

يهلها اعليها لحگو ... ما تبوها ؟
اضن موّتها زينب ... موت ابوها
ابوها الچان خيمه ..... مات ابوها
ومن هسه اصبحت ويلا سبيه ...

مثل اجبال يا صدري ... علي هم
أبوي ابگبره واگليبي .... علي هام
بعد هم ترجع ايامك .... علي هم ؟؟
تگعد يمي وانسولف سويه

اسولفلك عله الحسرات ... لو لآه
انحيت او ظهري صارت بيه .. لوله
علي تسمع ونيني اعليك ...... لو لا
دخيلك گوم بويه او حن عليه

ابو فاطمة الطائي

لشهادة سيدي ومولاي امير المؤمنين علي صلوات الله عليه

دموعي سكته ايسولفن
عـل گـبـر يـابـو الـحسـن
اعاتب .. شعاتب .. يابو المحنّه
____________________________________

بل عيون دمع لاج اوحسرتي خذت عافيتي
چنت وين صرت وين عليّه تهدّم بيتي

دنياي كلها بس علي اويا عشت احلى اسنيني
لو يوم عن عيني ابتعد امن الصبح تذبل عيني

ابويه ما مثله ابو
چفه حنين او بي دفو
اويلاه .. ون الگاه .. يا بو المحنّه
____________________________________

عل تراب الي اعتاب عليمن كسر دلالي
انشدك اشجنيته ؟ افجعتني او خذيت الغالي

ماتدري بعيوني انعمن او ظهري انجسم بفراگه
لا بيك باب او ينفتح حتى اويه ابوي اتلاگه

امروه ما ضلت بعد ؟
مو گلبي يتراب انمرد
الف داي ... صفه اوياي ... يا بو المحنّه
____________________________________

ترجيت اشكثر بيك يل تراب ولا تسمعني
ردت كون گبل ما تغطيه انا التدفني

چا دنيه ما بيها علي تسوه او اضلن بيها !؟
لا والله لو جنه اصبحت چن مگبره انظر ليها

غم الحياة ابلا علي
بس الگلب بيها ايغلي
فقط نوح ... والجروح ... يا بو المحنّه
____________________________________

أمانه يل اتراب أوصيك ابدمعتي الحمره
ابونه جرح بي اخافن تهيّج الطبره

يتراب لا لا تلچمه جرحه غميج او موجر
مفطوره ابونه هامته او يحمل الم ما يگدر

لا تلچم اجروح الولي
أمانه خل عندك علي
تره أيام ... فلا نام ... يا بو المحنّه
____________________________________

لون طاح بديه طبرته درتها ابراسي
وافدّيه بالعيون وفدّي إنفسه ابأنفاسي

ياريت الف موته متت او لا شوف ذاك اصوابه
الوجهه مثل وجه الگمر اصبح دماه اخضابه

ريع اليتامه ياوسف
متوسد اتراب النجف
مشه او راح .. بالجراح ... يا بو المحنّه
____________________________________

الدموع والاونين ابدما تِسكن اجروحي
علي مات خذه اوياه اماني او اخذها الروحي

ضليت عگبه بس جسد او خاوي او ويون يوميه
زينب چنت وياه گبل امن اليوم انا المسبيه

الردته يضل الكربله
او يشگف مرامي حرمله
وسف مات .. حرامات ... يا بو المحنّه
____________________________________

ابو فاطمة الطائي

لشهادة سيدي ومولاي امير المؤمنين علي صلوات الله عليه

العيد اجانه يا علي
وانه دمع عيني ايهلي
عگب بعد شيضل الي ... يا بو احسين يابو احسين
_______________________________________

يبويه مو محل النوم اگعد يا بعد عيني
ابنيتك آنه يابو احسين عليمن ما تحاچيني
اشمالك بس تون واتلوج واضمدك ما تخليني
يريت اليوجعك يندار ابراسي وابشراييني

گلبي تگطع من تون
او لا ساعه تهده او تستچن
اصوابك ترس عمري حزن ... يا بو احسين يابو احسين
_______________________________________

اهنا يل دللت زينب زينب عگبك اشعدها
يوجه العيد اجاها العيد بعد منهو اليعيدها
بعد منهو اليسامرها او يلاطفها اويناشدها
ازيد من نزف دمك دمعها ايهل حفر خدها

نايم وانه اعيوني انعمن
من نومتك گلبي انسحن
عگبك غريبه ابلا وطن ... يا بو احسين يابو احسين
_______________________________________
الحرم ثكله بابنها اتصير واني ابوالدي ثكله
لا بيدي واموت اوياك او لا بيه اضل عدله
يريت انًام فد تابوت وانسه هل حزن كله
اموت ابسد ابوي . الله . من هل موته ماكو احله

ركني تضعضع وانهدم
مامش مثل فگدك الم
ابموتتك زينب عدم ... يا بو احسين يابو احسين
_______________________________________

ابشهر رمضان فجعوني او شيبك بالدمه اتخضب
من شفتك علي مجبل گلبي او راسي الك شيب
صحت والكون صاح اوياي عيد اگشر على زينب
راح الماكو احن منه او ضني ابدينتي اتخيب

الچان الي درع او حمه
تنعاه ملائكة السمه
هل ليله ماشي الفاطمه ... يا بو احسين يابو احسين
_______________________________________

غفل مني خذاك الموت وجهك مشبعت منه
لا زادي هني بجفاك لا بل نوم اتهنه
افك ريجي صرت بدموع وجر ونه على الونه
اليتامه اعليه يتباچون وسابع جار اله حنه

يل ناوي عني تبتعد
ليه ترد لو ما ترد
يابويه حيلي منمرد ... يا بو احسين يابو احسين
_______________________________________

فك عينك الي لحضات اخير اوداع اودعهن
واهمس بذنك احچايات بس لا تبچي من عدهن :
امن اطب ديوان برض الشام واجروحي اون منهن
تحن اعليه من انخاك ؟ تجي واحبالي اتفكهن ؟

لوما اجيت امن الگبر
آنه التمس لجلك عذر
لن راسك ادري منطبر ... يا بو احسين يابو احسين
_______________________________________

ابو فاطمة الطائي

نزله :

علي يا با الحسن
علي يا با الحسن
_________

البطين الانزع
التقي الاورع
بي دليلي اتفجع
ابهل مصاب اتگطع

وسفه يا صاگر زلمهم بل غدر يولونك
والله لوما في صلاتك منشغل يدرونك
لو انس والجن تحالف موگفو گدامك
لنها موت احمر خزرتك يا دخيل اعيونك

علي يا با الحسن
علي يا با الحسن
_________

يا اسد كل غابه
انت للرب بابه
اشكثر بيك اكتابه
قد علن اعجابه

انت لو ما انت ماكو لا صلاة او لا فرض
شيدت دين الله رغمن عله خشم اليعترض
يلي سيفك من ترفعه بل عدو ميضل نبض
ناحت الزرگه ابمصابك ونت اعليك الارض

علي يا با الحسن
علي يا با الحسن
_________

چي لأنك فالح
والصراط الواضح
كله فعلك راجح
يبغضك كل طالح

اتراب جدمك يبو زينب والله اغله امن التبر
راسك ابعلو الثريه او خصمك ابطول الشبر
ولذالك گلبه يغلي او بل حقد ضل يستعر
لحد ما غدرن أصابك لاكن انت المنتصر

علي يا با الحسن
علي يا با الحسن
_________

اسد الله الغالب
مفخرة كل طالب
الله لسمك كاتب

علي للاسلام عزه علي هدام الصنم
علي الاخلاص هو علي نون اويه القلم
علي حلال الشدايد علي شيال العلم
علي گد هاي الوسيعه خله بالكفار الم

علي يا با الحسن
علي يا با الحسن
_________

علي كل احكامي
حجتي واحرامي
سجدتي واصيامي
علي كل ايامي

علي خير العمل حبه واليبغضه ابلا عقل
المحجه البيضه حيدر دربه يا وادم عدل
علي لو عنه اسولف كل حياتي ما أمل
احچايته واحچاية الله اثنينهن قولن فصل

علي يا با الحسن
علي يا با الحسن
_________
يا جبير اجروحي
يا أمير الروحي
و القلم واللوحي
نوحي لجلك نوحي

ريت هل اكوان غارت واصبحت كلها عدم
ولا ابو الحسنين راسه ابشهر رمضان انجسم
او صارت الحره يتيمه والحزن شل الجدم
اصواب ابو الحسنين موجر منه كلشي ما سلم

علي يا با الحسن
علي يا با الحسن
_________

ابو فاطمة الطائي

موشح لشهادة سيدي ومولاي امير المؤمنين علي صلوات الله عليه

اصواب راسك صوب الدين القويم
كيفَ لا وانته الصراط المستقيم
__________________________

آه يصواب البچت منه السماء
او زلزل الگيعان واتعله النداء
طاح يا وسفه علي باب الرجاء
ركن دين الله انهدم واصبح سقيم
__________________________

طايح ابمحرابه واصوابه ثجيل
عله الشيبه الطاهره دمه يسيل
دمع ما ينفع ولا صبرن جميل
كسر ظهر الشرع والآي الحكيم
__________________________

كسر ظهر الشرع من طاح الامام
عگب حيدر اقرو عل دنيا السلام
راح ابو گلب الحنين اعله الانام
والحزن والنوح من عگبه لديم
__________________________

والله اديم النوح والون والدمع
وي گلب زينب وِجب ان ننفجع
امس امها راحت ابكسر الضلع
واليوم صوبها علي اصوابن اليم
__________________________

صوباها اصواب ما صحله دوه
وأَنحلت والعود من عدها التوه
اتگله بويه منهو ليه ابنينوه
من تدور اعليه ازلام الرجيم
__________________________

ريت راسي ابدال راسك منضُرب
بويه لا تمشي او تخليني ابغرب
عله فراگك ياعلي مالي گلب
وانه گلبي امضعضع اوصاير حطيم
__________________________

آخ يصوابك ادوّر طِبّه وين
شاب راسي . والدمع ماخله عين
اگعد او باصرني بويه يل حنين
دلني اعله دواك خليني اهيم
__________________________

بويه ساكت ليش مترد الجواب
بويه گلبي من سكوتك والله ذاب
امنين اجاني هل بلاء او هل مصاب
وآنه ماعندي صبر موسى الكليم
__________________________

انچان ما تگعد بعد واترد الي
للگبر وياك اخذني ياعلي
أنه ابهل دنيه بعد عگبك شلي
ابنار اضل او لا يمر بيه النعيم

__________________________

ابو فاطمة الطائي

يزينب گلبي ما ينطيني اعوفچ
ولا بيّه احـتمل تبچين اشوفـچ
عليچ او عل حرم وصيت عباس
دگ صدره أليه او گال عل راس ... زينب يل عقيله
___________

بويه دمعتچ امضه امن السيوف هلله هلله بيّه
كافي امن البچي ضميها لدموع لارض الغاضريه
باچر الها عازه ابين الخيام او وكت المغربيه
لمن تنظرين احسين عطشان . طايح عل وطيه

يأغله امن النفس يا روحي انتي
ارحمي حالي او حالچ يبنتي
من دمعچ متت مو منّ الصواب
هرش گلبي تگطّع منّچ او ذاب  .. زينب يل عقيله
___________

مابين اخوتچ تبچين هل يوم مهيوبه او جليله
دمعچ من يهل كلهم يواسوچ والهمّچ تشيله
بس ابكربلا وحدچ تنوحين بويه يل عقيله
مابين الزلم والخيل ويلاه واسياط الثجيله

من گد البواچي حيلچ ايموت
بس تومين عل جلاد بسكوت

او عليچ اسياطهم تلعب يويلاه
لا بيهم رحم لا تنفع الآه .... زينب يل عقيله
___________

زينب آ يزينب وين منواچ او ياهو اتحشمينه
واخوتچ بل معاره ابين مذبوح بين امگطعينه
الرايح للشريعه ايجيب لچ ماي مگطوعات ادينه
او واحد للحوافر صار ميدان ما رحمو ونينه

على صدره يبويه الخيل تلعب
تنزل عشره منه او عشره تركب
حتى ابموته ما خلنه يرتاح
اهناك ابچي عليه ابنوح واصياح ... زينب يل عقيله
___________

انا ابراسي جرح واحد لمحتيه اوراسچ منه شيّب
اذن باچر دليلچ حالته اشلون زينب آ يزينب
خيل او نار واسياط او مچاتيل وايتام اتّعذب
واثمانين طفل ايصيح عطشان عمه انريد نشرب

تصبح كربلا مثل القيامه
طاسة ماي مامش لليتامه
بين المنچوي وامصوب ابداي
ابروح احسين كلها اتصيح چف ماي .. زينب يل عقيله
___________

عله امصاب الدهاني لا تنوحين يبنيتي الحبيبه
المناحه والبچي لمصابچ اتلوگ لو صرتي غريبه
من عگب الدلال او عز الخدور والطلعه المهيبه
عل نوگ الهزل يسبوچ للشام هاي اعظم مصيبه

يحديچ الذي ما عنده رحمه
واليجر الحبل مو خوش زلمه
اليگع منّ المحامل ما يرد ليه
طاغي او سوطه ليل انهار بيديه ... زينب يل عقيله
___________

وراچ الشام واويلاه يل شام بيه اشگد مراره
تدخلين القصر والوادم اصفوف طولچ بنتظاره
تريد تشوف زينب بنت الحيود دمعتها اتجاره
او يزيد اعليچ يتطاول اويلاه يحچي بانتصاره

يصد للروس وابوجهه ابتسامه
يگول الساده لا تلبس عمامه
لأن نسوانهم عندي سبيات
ابجفنهن ما بعد خليت دمعات  ... زينب يل عقيله
___________

ابو فاطمة الطائي

نزله لمصيبة امير المؤمنين صلوات ربي عليه

الليله املاك السمه حزنانه
نزلت اتودع علي ويانه
__________________________

الليله دين الباري مهدوم الركن
والشريعه اتضعضت گد ما تون
امن السمه للگاع هل ليله الحزن
او كل مراسيل السمه حيرانه
__________________________

الليله مات المرتضى او نجمه هوه
اعليه تبچي الفاتحه والقل هو
اصواب موته بل گلب ماله دوه
عيني لجله بل دمع غرگانه
__________________________

لجله زيدو النوح والون والدمع
يلله ياشيعه ندگ اعله الضلع
علي بل محراب راسه منصدع
ما يكفينا الحزن واشجانه
__________________________

ميت الي چان للشيعه ولي
علي ألّي لا فتى الا علي
راح والدلال من بعده ايغلي
تحرگ اهروش الگلب نيرانه
__________________________

شيعوه او گوطرو صوب النجف
او ناعي الاحزان بل جنّه هتف
راح راعي الموزمه او تاه السلف
ريت عگبه اتلايمت اكوانه
__________________________

ريت من عگب الامام المرتضى
لا تضل اكوان وايموج الفضا
حيدر ابيا ذنب بل طبره گضه
او هوه لو ماهو ما تلگانه
__________________________

والله ضعنه ابموتتك يابو الحسن
لا كو راحه او لا بعد عدنه وطن
طحنه مابين النوايب والمحن
تمشي ويانه عكس دنيانه
__________________________

صوت نوحي اعليك للوادم صدع
علي يا عيد اليتامه الما رجع
اوداعة الله يامن الگلبي فجع
سلم النه اوياك عل ريحانه
__________________________

ابو فاطمة الطائي

دليلي احتار خويه احسين... وجهه
اشو والدي اصفر صار ... وجهه ؟؟؟
ساكت ما يون واحشاي .. وجهه
اويه جيت العيد يگطع ليش بيه ....

لِون گلبي جبل چا خر ... من الهم
من شفت الدمه ينزف .... من الهام
اليتامه من عکب عينك ... من الهم ؟
او منو الزينب يحماي الحميه .....

غدر الدهر كل ليله .... يجي ابلون
الحسن واحسين والدنه ... يجَبلون
الي امدنگين كل ساعه .. يجبلون
يزينب ايسي منه او هايهيه ....

ابو فاطمه الطائي