قصيده موشح لسيدة سور علي .
موضوع القصيده . بما أن علي ع هو القران الناطق حيث فاطمه ع هي احد سور هذا القران الناطق.

عنوان القصيده ( سورة علي ).


يا فاطمه -- يا فاطمه-- يم الحسن
------------------------------

بسم الزهره وأسمها إشگـد رحيـم
هــذا تـفـسيـر ايـة الضلـع الهشيـم
مـن هجـم عالسوره شيطانٍ رجيم
بحيله يعصرها وضلوع يطگطگن
-------------------------------
علي القران الحقيقـي إمـن السمـه
واكـو سـوره بعلي اسمهـا فاطمـه
مـاكــو كـل إعـقـول ألهـا فــاهمـه
وعـــن وعـــي آيـاتهــا يـتـرتـلـن
-------------------------------
فـاطـمـه سـوره بـعـلـي من العلي
مرتب إمن الـله مكانها بنص علي
ليش من دون السـور چـا تنـولـي
چـيـف قــران الـله اديه اتـچـتـفــن
--------------------------------
عــدد الآيــات بـيـهـا أثـمـنـطـعـش
عين هاي السوره مصفوعة رـمش
بسملتها الزهـره والتصديـق نعـش
عـيـون حـيـدر إبـدفنهـا يـصـدقــن
--------------------------------
اليقره سوره من كتـاب الـله المبين
روحـه تشعـر بالاطمئنـان وحنـيـن
اليقـره سـوره من علـي يشبع ونين
ضلوع اـيه اثمنطعشهــا أتـهـشـمـن
-------------------------------
گـــال الـله رتـلـوه تـرتـيـل عـــدل
ليــش چـــا قـرانـه رتـلتـوه بـحـبـل
وليـش ـمن سـورتـه طـيحتـو طفـل
وفـوگـه وگعتـوا جـذع گلبه انسحـن
--------------------------------
تـدري تـرتيلـه يشــافـي كـل صــدر
يـاعُمَــر چــا لـيـش بـيـدك تـنـكـسـر
آيـتــه والســوره عاصـرهـا عـصـر
سـوايـتـك ابليـس مـا سـواهـا أضـن
--------------------------------
✍ / محمد الجوراني
رزقهم آل محمد دخيلهم

قصيدة رئيسيه لأستشهاد سيدة النعمه ام ابيها فاطمه (ص)


بسماري ساكن بالضلع… لا يطلع ولا ينشلع
عاجبه المكان وبقه… من اجر انفاسي انوجع
……………………
حسره علَّي شم الهوه…جر النفس والآه سوه…ضلعي امن الزمنه انلچم
وبنفاسي گمت احني ظهر


بحني الظهر هم انوجع واتحمل الآخ
ضلوعي احس اداحچن واحد وي الآخ


بضلوعي بسماري انعجب… وانه ترس حيلي التعب… ميت هواي شلون اشم
مات وي ضلعي الي انكسر


هيچ استمرت حالتي… عله نفسها حنيتي… حد ما اكل ظهري الألم
من اجر انفاسي انوجع
……………………………

بسماري مات بدنيته… وبضلوعي رجعت صحته…أقوه رجع من القبل
بضلعي رجع مثل السهم


عافيته ردت بالضلع يا خلگ من نار
حيلي خذاه والعافيه ولا چنه بسمار


مات وتره بصدري اندفن… ودم ضلعي صاراله چفن… عايش وره موته بضلع
ستر الله ينزف منه دم


نور الله ضلعه ينكسر… خاطر يرد بي العمر… بسماري بس انه اضل
من اجر انفاسي انوجع
…………………………… .

آلآمي تاخذني وترد… صرت اشتهي نوم اللحد… راحتي وي طه ارحلت
وهسه جرح يتبع جرح


جرح الأشد انه انضرب گدام ابو تراب
مچتفينه حيدر ما گلتله ارفع الباب


منوليه بسياط وضرب… وعيوني متوچد الدرب… بس فضه لحگيلي صحت
عن جرحي ميليلي الملح


لو صايحه حيدر علي… يگلبها الله الدنيه الي… رحمة الباري وما صحت
من اجر انفاسي انوجع
……………………………… ..

حلاله ضلعي واستقر… وخلالي عِشره وي السهر… مگدر اجرنه بعد
خاف الضلع وياه يجي


خاف امن اجرنه اجر وياه عمري
ولو عفته ما اتحمله ياكل بصدري


ياذيني حيل بكل وگت… بالأخص لو اتنفست… والوجع بنفاسي صعد
خلاني بالموت ارتجي


حارمني حتى امن الحچي… يبزني وانه اغديلك بچي… هذا اني حالي ياخلگ
من اجر انفاسي انوجع
…………………………...

مسطوره عالعين وأنه… بالگاع ادور عالضنه… ما اشوفه صار بيا كتر
اوليدي محسن ياخلگ


السطره عمت عيني وبعد ما اشوف هيهات
گمت انه ادور محسني مثل الضريرات

ثاريه بسمار الفجع… لوليدي لايحله ضلع… ضلعه زغير ومنكسر
موته ضلعه لمَّه طگ

گبلي المنيه حضنته… خلتلي ذكره وگعته… وعالعتبه استاهد دمه من اجر انفاسي انوجع
…………………………… ..

من توفيقهم دخيلهم
محمد الجوراني

قصيدة رئيسيه لأستشهاد الزهراء فاطمة عليها االسلام
قصيدة (أنت وونت)


فاطمه أنت أونت
امن الچفن اديها طلعت
صوت اجاني امن السمه
شيلهم عن فاطمه
ياعلي ياعلي
…………
اجاني صوت جبرائيل حيدر استمع
وخرهم بچت حتى السماوات السبع
شسوي انه بهاي الحاله وآنه منفجع
ولدها ورادو يشبعون من امهم دمع

حرت - أوخرهم لمر جبريل اجه عليهم
حرت - يموتون اعله امهم من اخليهم
حرت - وهي امطلعه اديها وتحتضن بيهم -- حرت

حيدر وحيرني امري
انحنه عالزهره ظهري
كسر ودموع ودمه
شيلهم عن فاطمه
ياعلي ياعلي
…………
ماي وشتله چنه وهسه ذبلها الزمن
وآنه إنشفت من شفته يحركها الحسن
وشفت لحسين من طَلعت اديها امن الچفن
وشسولف عن يتيمه وميته من اتشابگن

إطلعت - بره لئن موقف ما احملنه
إطلعت - اركض لبني محسن ارد احضننه
إطلعت - بنعشها بس ولا اگدر أشيلنه -- إطلعت

آنه شايل باب خيبر
وللنعش ما گدر حيدر
النعش للحيل اعدمه
شيلهم عن فاطمه
ياعلي ياعلي
…………
ابن ادم لو مصيبه وبعزيز اعليه سدت
گول انكسر كسره ومنها رجليه ما مشت
علي انه وطيحتني فاطمه لمن حچت
رد للبيت حيدر تره ابنيتنه اگعدت

گمت - من الگبر اسمع فاطمه ونها
گمت - ارد للبيت بس ما بيَ اعوفنها
گمت - گمت بالمگبره كل طيحه اطيحنها -- گمت

اجدامي ابد ما وصلني
علي بس مو علي چني
ولا چن حامي الحمه
شيلهم عن فاطمه
ياعلي ياعلي
…………
يابيت الأردله وبي اگعد يا كتر
وشمعته بذني اديه وسدتها بالگبر
أدفنت حيلي واجيت اتمشه مشي المنكسر
بيّن بيه من المگبره لبيتي الكبر

قهر - اول تالي ظهري ايدي عوچيته
قهر - اجيت لبيتي بس البيت تيهيته
قهر - بس بعيوني اباوع گلبي دفنيته -- قهر

والدفن بتراب نفسه
حگه من ينگطع نفسه
وحگه لو صابه العمه
شيلهم عن فاطمه
ياعلي ياعلي
…………

أغسلها چنت واثناء ما بالماي اصب
مرت أيدي فوگ اضلوعها موقف صعب
أنت أنه أم حسين اتگطع الگلب
أذتني وبعد ما اوچد بعيني درب


متت - بذاك المغتسل من أنت الزهره
متت - بصدر ام الحسن من لامست حفره
متت - بيني وبين گبري ياخلگ شمره -- متت

و اليودع سر بقائه
تره بس موته دوائه
تشفيني بس الخاتمه
شيلهم عن فاطمه
ياعلي ياعلي
…………
بذنها اهمست گتلها يزهره انه علي
الولي امن اتموت ام بيته يضل ابلا ولي
صوتي ما رفعته بالبچي بس للعّلي
بس منا ورايح صوتي لجلچ يعتلّي

ألم - خلافچ شيبت بس من كثر نوحي
ألم - بالمرآة اباوع ما عرف روحي
ألم - وسط البير أون واشتكي جروحي -- ألم

عن علي اسألتي يزهره
عدل بس انطاچ عمره
وضعيتي بعدچ مؤلمه
شيلهم عن فاطمه
ياعلي ياعلي
…………

محمد الجوراني

انتي قرآن الوفة بسملتة عباس
اليرتل موقفج متوضي بحساس
أنتي مدرسة العشگ
نبض گلبج من يدگ
بسم الحسين
---------------
علمتي كل عاشگ فرض من يبجي دمعة
بصدرة كون ايحس حرگ نار اعلة شمعة
خيط الشمع يصرخ لجن محد يسمعة
كون الحسيني اشما بجة ماعندة سمعة

وبمدينة حزن الحسين أو عذابة
الراد يوصل يبدي منج انتي بابة
أبنار خيمة محترگ
نبض گلبج من يدگ
بسم الحسين
----------------
ما ردتي واحد من يون سهواً إلضيمه
كون اليون إبروحه شايل لهب خيمه
وبچيه كون يشوف مضروبه يتيمه
الخادم اذا حس مثلج الخدمه سليمه

هيچ ردتي الخادم اجروحه إثگيله
كون غير حسين ما عنده وسيله
وردتي آهاته صدگ
نبض گلبچ من يدگ
بسم الحسين
--------------------
بعينچ فتح بحر الدمع طاري السبايه
ضل يحرگ ابشوفچ مثل نار اعله رايه
حزنچ گطع نحر الفرح خضر منايه
من گالو حسين الشمس باگت فيايه

عاري ضل اوهيه تاكل من حلاته
باليسر ما فارگت مشية خواته
اوياه ابد ما تفترگ
نبض گلبج من يدگ
بسم الحسين
-----------------
من گالو اننجرحت أذن والقرط رايح
ما هيسيتي اله الفضل عالگاع طايح
وانتي حنينچ إلرقيه بحر طافح
بساعتهه هاج بروحچ الهه الكلشي مالح

لگه بضلوعچ بِشْر للأه مدينه
لَمّه گلچ الحسين امگطعينه
السلم بي شي ينسحك
نبض گلبج من يدگ
بسم الحسين
---------------------
أنتي التدلي اعله البچي وللعشگ مفتاح
وباب الدموع الكربله وللرايد اجراح
كون اليحب لو فگد معشوگه ميرتاح
وذله الدمع إلغيره من العين لو طاح

وانتي ما طاحت دمعتج بس للحسين
وبالوفه دره لگيتچ والخلگ طين
بيچ ابو فاظل عثگ
نبض گلبج من يدگ
بسم الحسين
------------------

الاستاذ علي المنشداوي
محمد الجوراني

رئيسيه لمولاتي سيدة العفه والعفاف العقيله زينب (صلوات الله عليها). اسم القصيدة ( كلش تعباچ )


ارتاحي يم عون بالموت الأجاچ
سـوط المتـون كلش تعباج
ارتاحي زينب بالگبر
امن الخرابه واليسر
كلش تعباچ
"""""""""""""""""""""""""

ارتاحي من ركض الركضتيه وغمضي عيونچ
بعـد مـاكـو شـوك حـافي اعليه يرگضونچ
والگبر ما بيه سوط ويضرب امتونچ
ولا خـيـم بـيه وخـايـفـه منهن يطـلعـونـچ


ولا سبي بيه ولا صعده اعله نوگ
ارتاحي بالموت من طبت السوگ
حجار ماكو وينشمر
امن الخرابه واليسر
كلش تعباچ


""""""""""""""""""""""""""

بعد متركضين زينب وحدج بهيمه
وما يضلچ بال كل ساعه عله يتيمه
وما يحرگونه عليك الگبر كالخيمه
كبرج خمسين شيبه العاشر وضيمه


الگبر ما بيه ناس وتهد خيل
ولا أكو حسين ويدوسنه حيل
ولا ضلع بيه ينكسر
امن الخرابه واليسر
كلش تعباچ
""""""""""""""""""""""""""

العليل الشرح قصتچ بالحچي اليأتي
يگول حسره تبچي أجاهه وگالهه اسكتي
أجه وبيده الرمح وبچعبه ضرب عمتي
كربله الكتلتچ انتي ما أضَن متي

من تموتون لو سم لو طعن
وقاتلچ ذاك المجلس أضِن
ذابحچ يم الخدر
امن الخرابه واليسر
كلش تعباچ
"""""""""""""""""""""""""""

الگبر وترابه زينب امن اليسر راحه
انتي اول طير ردله إبموتته اجناحه
واليصيح إبگبره ياهو يسمع إصياحه
ومن يمنعچ لو يطگچ ابچعبة ارماحه

وعزه تسوين بكيفچ للحسين
وضلي ابچي لو للأربعين
ماكو شي اسمه جبر
امن الخرابه واليسر
كلش تعباچ
""""""""""""""""""""""""""

إلونهه خليهه ترجع عينچ الحمره
حومرت من السهر وعجاجة الصحره
امن اليسر للگبر ربچ بيچ من اسره
خاطر عيونچ تنام براحه لو مره

وما تشوفين خيمه وبيهه نار
وامن السطوح يشمروچ بحجار
ولا حبل بيدچ يجر
امن الخرابه واليسر
كلش تعباچ
""""""""""""""""""""""""""

كربله الغيرت لونچ زينب انسيهه
وبعد مو گعده صلاتچ وگفه صليها
بس ورد بالجنه مو جمره تدوسيها
عله اجتاف العرش مو نوگ التصعديهه

وما تضيعين بالهيمه بنات
ولا تركضين إلشاطي الفرات
وبعد ميضربچ شمر
امن الخرابه واليسر
كلش تعباچ
""""""""""""""""""""""""""

رزقهم آل محمد دخيلهم
✍/ محمد جوراني.

قصيده رئيسيه (اسم القصيده طاريك نار ). لمولاي الامام موسى ابن جعفر عليه السلام
كأننا بلسان حاله يخاطب جده الحسين صلوات الله عليه وهو في طامورة الظلم والظلام وتحز في رقبته القيود والحبال وينكر ذاته من المصائب التي هو فيها مقابل مصائب جده الحسين. ويقول

شمعة ابليل .. روحي و طاريك نار
اتهد الحيل .. من اسمع بيك إشصار

وآنه اتروه بالماي
خير ونعمه وفياي

( علي المنشداوي )
،،،،،،،،،،،،،،،،،،،،،،،،،
حتى يرضة الليل الاظلم ياكل بروحة الشمع
وانة يحسين امن اذكرك هيج روحي تنشلع
لا شمس تندل مكاني اولا فرس يكسر ضلع
بالسجن ما عدي صاحب غير حزنك والدمع


صح مگيود .. بس ما مگطوع الراس
ما مكسور .. ضهري و فاگد عباس

والسوط اعلة مگفاي
خير ونعمه وفياي

( علي المنشداوي )
.....................

سنين بيه الظلمه تاكل منهه اگولن منعفي
ما أليه خيمه ثگبت وأطفي وما تنطفي
سگف لا مو خيل فوگي وعندي ما ومكتفي
والحوافر باعت اعله الگاع جسمك تشتفي



حالي هواي .. أهون من حالك ذاك
بذيچ الگاع .. وين الحافر وداك

ما داسوهن إعضاي
خير ونعمه وفياي

( محمد الجوراني )
………………… … ..

ابعيني سيف اليل يذبح بالدمع نحر الصبح
خله كل ايامي ظلمه وگلبي عاشر بس جرح
اشما يمر طاري الحوافر يغرس ابگلبي رمح
شرح ألف او تسعمية جرح مرشوش ابملح


چن ديوان .. صدرك ما رد الضيف
خيل ونار .. هدن من هد السيف

وانته أبلايه رواي
خير ونعمه وفياي

( علي المنشداوي )
...................……… …

لون اسمع صوت حافر تشتعل بيه شمس
چان جوعان وشبعته بصدر وضلوع ونفس
معزبه بوسادة رقيه ورد جميلك بالرفس
أخذ روح اضلاع صدرك وانه سالم منحبس



ما ضل بيك .. شي صاحي يذكرونه
حته الراس .. بالشام يفرونه

يطگه الرايح وجاي
خير ونعمه وفياي

( محمد الجوراني )
……………………… ..

آنه ما جربت اگوم وعالوجه مثلك طحت
صدري محد گعد فوگه وليه ما طلعت اخت
بنتي معصومه وي اخوهه ورايحتلك اعز بت
ما ضگت موتتك حين بصف علي امن اتمددت


هم لموك .. من طشر جسمك خيل
زينب خاف .. تتعثر بيك ابليل

انه مدلل هواي
خير ونعمه وفياي

( محمد الجوراني )
………………

كلمات .. الشاعر علي المنشداوي
وكلمات .. الشاعر محمد الجوراني
رزقهم ال محمد دخيلهم

أزرع اذنوب .. واحصد جروح بگلبك
ازرع اذنوب .. چم عثره تارس دربك
كلما تجيني ابرحمتك
ترجع يمهدي بدمعتك
چم عثره تارس دربك

****************************************

راميتك إشگد بسهامي .. واخطائي اليوميه اتصيبك
تجيني اتمناك ابگربي .. وذنوبي الما ترضه اتجيبك

تجي * واردك --- إمفشلك انه ومارد روحك
بذنب * ابعدك --- ومكبر يوميه اجروحك

تجيني ابرحمتك
وترد ابدمعتك …… عله اخدودك تجري دم

اتمد الي ايديك .. تفكني ردت من أسري
اتمد الي ايديك .. وانطيك انه ظهري

كلما تمدلي يمنتك
ترجع يمهدي بدمعتك
چم عثره تارس دربك

******************************************

امتانيك انه انته امحسبني .. وانه الما اذكرك بالخلوه
بس بيه امن اتضيگ الدنيه .. ولا اعرفك بأيامي الحلوه

قهر * اترسك --- وانته التترس بيه الفرحه
ولا * أهملك --- وبذنوبي كل يوم امصبحه


افوج ابغفلتي
واهم الدنيتي ….… وبحالك ما هميت

اغفلت عنك .. والغفله تسري بدمي
اغفلت عنك .. ما گتلك بأبي انته وامي

اعمالي هنه مأخرتك
ترجع يمهدي بدمعتك
چم عثره تارس دربك

****************************************

من تعثر يالمهدي ابدربك .. يعني انه چلبت ابذنبي
وانه ادري إشگد يتعبنك .. معصاتي وذنوبي وچذبي

جرح * أزيدك --- لجروحك من ملح اذنوبي
چذب * گلتلك --- يالمهدي چلمة محبوبي

الخيّر يندبك
وانه امتعبك …… مو خيّر انه وياك

ذنبي كل يوم .. يصير ابدليلك نبله
ذنبي كل يوم .. بيه عايش انه بغفله

كلما تگرب جُمعتك
ترجع يمهدي بدمعتك
چم عثره تارس دربك

****************************************

چم مره گتلك ما أذنب .. وأذنب وچني ما گتلك
ما عندي وياك حچايه .. وانته الماكو واحد مثلك

وعلي * بحنانك --- تقربني عليك وانه أشرد
واذا * أطيحن --- بشده ليش بغيرك أنجد

رايدني انصلح
وارميك برمح …… كلما اصبح بذنوبي

تريد الي الخير .. تدعيلي بنهار وليل
تريد الي الخير .. وانه الك حافر خيل

تجي وذنوبي طردتك
ترجع يمهدي بدمعتك
چم عثره تارس دربك

********************************************
أزرع بدروبك عاگولي .. وانته بدربي تزرع وردك
وتحصد ليه الرحمه وگربك .. يالمهدي وانه احصد بُعدك

رغم * عذابك --- متحملني هواي وصابر
أنه * يمهدي --- امسببلك چم كسرة خاطر

نار انه بسهم
ومرمي اعله الخيم …… صاير هيج انه وياك

صرت أنه سوط .. ويوميه ياكل متنك
صرت أنه سوط .. ذنوبي بدرب يسبنك

قسوة شمر وي عمتك
ترجع يمهدي بدمعتك
چم عثره تارس دربك
************************************************

رزقهم ال محمد دخيلهم
محمد الجوراني

قصيدة للمولى علي الحق ( عليه السلام ) نزله او مقدمة عزاء
اسم القصيدة ( علي يمحير العقل )


علي .. يمحير العقل
علي .. يالچنك مثل
علي.. ياصعب وسهل

"""""""""""""""""
يمحير بعلمك علي إشگد عقول
انته شفت شمس الله طير امن اتزول
متولي دائرة الارض والفردوس
بحيث الله خلاك الأمل والمأمول

علي .. مدرسة العلم
علي .. ستر انته وسلم
علي .. يالبيك انقبل

""""""""""""
صانع عجائب بين ادم ونوح
انته مع اللوحُ علي وقبل اللوح
يالشايف الله ورحمته شوف العين
يمَّوت الروح انته يامُحيي الروح

علي .. يالكاشف ألك
علي .. الله شما ملك
علي .. يا بعد وقبل

"""""""""""""""
عرضت عليك الدنيه ظهرك انطيت
ما خفت من النار لمَّن صليت
يا صاحب الأسرار والمكنونات
ولا طامع بجنة عدن رب البيت

علي .. ولذلك گلت
علي .. بس الله أعبدت
علي .. وعيونك تهل

""""""""""""""
سالفتي ظلمه وبطواريك اتنور
يمسخر الله الريح الك والطيور
بسلافهم يمخبر الوادم وين
خايف عليهم چا كشفت المستور

علي .. فتاح الفرج
علي .. يالبسمك لهج
علي .. الميت والعدل

"""""""""""""""
يالتعلم ابكل عُجبه في خلق الله
بطرق الأرض تعلم علي وطرق اسماه
عله يمين العرش مُكان حسين
يعني مُكانك ياعلي انته فوگاه

علي .. علام الوقت
علي .. غيرك ما شفت
علي .. يضحك للقتل

""""""""""""""

لو كاشف العندك علي لهاي الناس
يا صاحب الطوفان چا شاب الراس
ما سولفت سر غيرتك من اتفور
خلَّيته بالغيره يسولف عباس

علي .. يمسخر الهوه
علي .. سر القُل هو
علي .. بس ضيك يطل

""""""""""""

رزقهم آل محمد دخيلهم

محمد الجوراني

قصيده نزله لسيدي ومولاي الامام الحسين عليه السلام اسم القصيده ( انه الخادم)


حسين العافك مو زلمه
حسين رازقني الخدمه
حسين معيشني بنعمه

فوگ الوادم

أنا انته سالفتي
أنا حظي انت وبختي
أنا گاضيلك وكتي

انه الخادم
………………
اليعوفك من تضيج يزعل امك
واليزعلهه بجروحك يلچمك
ولا يستاهلك نسمه ويشمك
اليحبك بالرفاهه يعيشه همك

يضيع العافك بدروبه
يضيع بگصته مكتوبه
يضيع بطوفان ذنوبه

ويرجع نادم

انا ماعندي غيرك
انا صاير من خيرك
انا بنعمة تدبيرك

انه الخادم

………………………

بدونك سنبله صفره انه ذابل
بخدمتك خضرت كل السنابل
يتارس كل شليلي بلا مقابل
يصاعد بالنفس ما مره نازل

عشگ صاعد بأنفاسي
عشگ* * يفتر بحساسي
عشگ يمشيب راسي

بعشگك هايم

انا ولهان بحسنك
انا ما ابعد عنك
انا معيشني ابمنك

انه الخادم

……………………… ..

يواحد انته بس ماكو مثيلك
يمنطينه كثيرك مو قليلك
اذا وزعنه ارواح بسبيلك
وحگك ما نرد نص من جميلك

عجيب ها يابو سكينه
عجيب وشزارع بينه
عجيب بيك أتآخينه

وبيك انسالم

انا گلبي اشگد صله
انا عارف بيك الله
انا وبيك امن اوصله

انه الخادم

………………………
تضل بشفاهي چلمه وبيهه واهس
يالموزع نظرتك عالمجالس
الغراب يطب يصير امن النوارس
عزيتك مدرسه فوگ المدارس

اليطب تعزيتك نورس
اليطب يضل يحچي الاخرس
اليطب منك ما يفلس

وروح القاسم

انا احسبني جونك
انا من فدوه لونك
انا وذايب بعيونك

انه الخادم

………………………

مثل ما بالخدامه انته ارزقتني
صديق ارزقني بس لجلك يحثني
وموش بتهلكه ابمجلس يذبني
اريده بيك احبه انه ويحبني

صديق انته سالفته
صديق اتشرف معرفته
صديق زينب لاچمته

وياكم دائم

انا كل ليلي وصبحي
انا تعزيتك ملحي
انا ** فاتحلك جرحي

انه الخادم


رزقهم ال محمد دخيلهم
محمد الجوراني

قصيدة نزله لمولاي ابا الفضل العباس عليه السلام
اسم القصيدة (محد ادناله )



الكل احتار / ماكو شرده بجاله
والعباس / محد ادناله

****

حاصر بوحده الجيش … هنا وضع قانونه
الشرد من سيفه يطيح … بخزره من عيونه
السيف اليزنجر كون … بعد ميجربونه
العبر سمعة عزريل … هذا ميعبرونه

عزرائيل / ما وصل لفعاله
والعباس / محد ادناله

******

مِلك بچفوفه الگاع … وكلشي ضاگ اعليهم
الخوف غير الوجوه … ما يدرون بتاليهم
صفو بيد العباس … يجيب ويودي بيهم
اختار وين الينهاب … واليسموه نشميهم

حد السيف / برگبة الخياله
والعباس / محد ادناله

******

يشرد وين أليخاف … والموت تارس دربه
اليشرد منه كون يروح … للعباس وهاي الصعبه
يتمنه الشاف العباس … ما خالقه اصلا ربه
بس يوگف گدامه گول … جواه واگع گلبه

وگفه المات / يا الف هنياله
والعباس / محد ادناله

*****

الحومه صارت كلها … سبحه بيده يفرهه
شلون ميريد يفر … امن أولهه من آخرهه
هاي گطع الانفاس … مسأله عابرهه
منه صاحت الغوث … الگاع كد ما جرهه

جر الگاع / ما بقت لوشاله
والعباس / محد ادناله

******

شيخ والطف ديوان … دارهه بتدباره
الراي بس للعباس … والحچي الفقاره
لو أله الزلمه ثار … شيكضه بخذت ثاره
چان من گد ما حار … تنچوي بيه ناره

اليچوي النار / يا هو حطه اباله
والعباس / محد ادناله

*****

الگاع يترسهه افطور … من ثگل خطواته
ما تنچهب من عباس … ذيچ كل شمراته
يمولح الدنيه اتراب … لو تهب صولاته
الحرب الشيخه الماي … كل هذن مالاته

كلشي هناك / صار بالطف ماله
والعباس / محد ادناله


*****

رزقهم ال محمد دخيلهم
محمد الجوراني

قصيدة رئيسيه لسيدي ومولاي الامام الحسين (عليه السهام)
اسم القصيدة ( اتيه بدونك)


المهم خادم عندك شماردت سجلني
اللطم ابچي اكنس كون متيهني
عليه دير عيونك ثق اتيه بدونك
كون متيهني
*******
لمني بين عيون عطفك -- لا يطشرني الدهر
انسان سويني بخدمتك -- ما ردت ابقه بشر
حسين غيرني اتجاهك -- كون للاحسن بعد
حسين حط براسي خيرك -- حطلي غيره امن الگمر

والتحط براسه خيرك يحسدونه
وخادمك من الله الناس يحترمونه
خلني حِسن ظنونك ثق اتيه بدونك
كون متيهني
******
من خيالي حسين اشيلك -- تره مرات بنفع
وترد مثل الشيب بيه -- يكثر اشما ينشلع
عيوني بس بيك انه اريدن -- حسين تترسهن ترس
الروحك انته طلب مترد -- بيك اعرفنه طبع

عيونك لو طلبت گرب بيني وبينك
وانته تدري ما ارد حسين طلبة عينك
يلي مدري شلونك ثق اتيه بدونك
كون متيهني
*******
يا اول واحد انته -- تحبني من لب العشگ
ما اجمل ان احصل -- واحد يحبني صدگ
ما ردت مني مقابل -- ولا اي شي بس سوى
ان اكون بخير وانته -- لجلي بالطف منسحگ

بيش اجازي گلبك هيبتي وعگالي
كون كلما التفت تصير انته گبالي
دنيني دنوة جونك ثق اتيه بدونك
كون متيهني
*******
أحمد الله ما اشوفن -- وانه راضي بحالتي
الشوف مو للعين گالو -- للگلب يامهجتي
الله سواني اعله مودك -- خاف افشلك ويه الله
ما اريد عيوني تصحه -- خاف ازل بنظرتي

الله اخذ من عندي الشوف تدري نعمه
بس تره عوضني ابمنبرك والخدمه
وهالصرت مجنونك ثق اتيه بدونك
كون متيهني
******
عندي بس انته وخدمتك -- ما ينفعوني البقيه
والله من دونك اضيعن -- سيدي عينك عليه
وين ما رايدني اخدمك -- حتى لو دوري كنس
المهم تقبلني اصيرن -- ماسح انعولة رقيه

مو توني متمنيها اخدم الركضت حافي
امسح انعولتها شرف ما متعافي
لحمي من ماعونك ثق اتيه بدونك
كون متيهني
******

رزقهم آل محمد دخيلهم
محمد الجوراني

لو ما كو مصدر رزق …… ألمن أنه منخلق
هب لي الجد امروتك .. في خدمتك .. يا ابو علي

******

انه صاير .. لعيونك
تدري اضيعن .. بدونك
رزق تره خدمتك
وانه برزقك عشت

عايش انه .. اعله مودك
سر وجودي .. وجودك
شرف الي عرفتك
يحزني بكل وكت

تره المو بيك سالفته .. وحقك ينكره وكته
الما شالك بالعيون
ناكر كل فضل ربه .. الما عاشك جرح گلبه
عايش ما ادري شلون

والخدمه حلوة طعم …… وسعت كل هاي النعم
قوي حيلي لطاعتك .. في خدمتك .. يا ابو علي

******

غرگاني .. عطائك
يا عزه الل .. عزائك
بكَ الگلب متيم
يسالوفة عشگ

استجب لي .. دعائي
مني اقبل .. بكائي
طبر لطم محرم
يجرحي انت الصدگ

الما قدر جرح طفك .. ابد ما يستحق لطفك
گلبه عليك ما چان
حرام اعله الذي عافك .. ولي ابگلبه ما شافك
ما ينحسب انسان

والهد درب خدمتك …… بردت صدگ جمرتك
بگلبي وجر جمرتك .. في خدمتك .. يا ابو علي

******

الزمني لجلك .. بيمنتك
مِن عليه .. ابمحبتك
ضعت اذا تهدني
دليل انته ألي

اترسني دمعه .. الجروحك
بكل تواضع .. انوحك
جرح نحر لچمني
ألك يا ابو علي

أخذني الموطن ادموعك .. واعيشن كسرت اضلوعك
اليعيشك لا ميموت
اسافرلك دمع عالخد .. واذا ما يچوي ما ينعد
ألك أسرع امن الصوت

بيه تعدل الحچي …… واجعل سلاحي البچي
واكفيني شر زعلتك .. في خدمتك .. يا ابو علي

******

گلبي بيدك .. اسلمه
واليخدمك .. يحلمه
تضل ألك خدروحه
وقف روحه الك

يبقه دومه .. بعزاكم
ذبهه روحه .. وراكم
ربح كسب نعمته
يلي مشافي الملك

النيته بيضه و يودك .. تعتبره انته من ولدك
انته الخيمه العليه
اليعرف حگك وميقر .. بضعنك هذا چان يجر
اطباع الشمر بيه

ما صله فرض العرف …… الما قر خذاك النزف
صبت عليه دمعتك .. في خدمتك .. يا ابو علي

******

لا تبرد .. جمرتي
لا تنشف .. دمعتي
صبح مسه أصبهه
لرضه امك فاطمه

أشدد أعله .. الجوانح
وانته قوي .. الجوارح
وهِب ألي أطبهه
عزيتك دايمه

وباء گالولي لتخاطر .. وأگللهم اجه العاشر
واشوفك عالرمح راس
عن السلبوا أضعونه .. ما تمنعني كارونا
شعدهه وياك هالناس

العافك لحساب المرض …… تخلص اصابيعه عض
واضمن ألي نعمتك .. في خدمتك .. يا ابو علي

******
رزقهم آل محمد دخيلهم
محمد الجوراني

قصيده رئيسيه لمولاتي فاطمة الزهراء ع
لسان حال المنتظرين لمولاهم الحجه ص



يالمهدي اظهر واحنه انصار لزهره امك تاخذ ثار

من ذيچ الگوم الضلمتهه
لسه مانشفت دمعتهه
يامهدي يامهدي
__________

لزچيه * دمعه تجري * ونت گلب مجمور
دمعة امك * تشتكيلك * نار وضلع مكسور
جابت الدنيه المصايب كلهه من جاهه عُمٙر
مارحمهه * لو تنظره * خد امك المسطور

نور الله وما رحموهه يالمهدي من دفعوهه

وينك يبني أتون ونتهه
لسه مانشفت دمعتهه
يامهدي يامهدي
__________

ياولينه * دم ضلعهه * باقي اثر عالباب
مارعتهه * هالسقيفه * اسسهه ابن خطاب
والقدر للباب اجاهه وماسلم منه الطفل
والفجعهه * دم ابنهه * لجله الدمع سچاب

وحيدر عنهه من انگاد جرح الضلع نار ازداد

عوفو الكرار ابصرختهه
لسه مانشفت دمعتهه
يامهدي يامهدي
__________

والعقيله * يمه صاحت * منهو الينشف العين
والزچيه * ألونهه ونت * برض الطفوف البين
وزينب الضلع التهشم ناحت وناح الضلع
يمه زينب * لمي حزنچ * الاصعب ضلوع حسين

صدره اترضه خيل اعداه وعينچ تنظر فيض أدماه

وتتعذب نسوه ابغربتهه
لسه مانشفت دمعتهه
يامهدي يامهدي
________

تدري عمتك * بطف حزنهه * ما ضلت الهه روح
هيبة امهه * گبعتهه * بلوعة سبيهه اتروح
لا حمه لعمتك يمهدي والشمر يحدي الضعن
وبضعنهه * ون يتامه * بشدة ضماهه اتنوح

وزينب تصرخ ياعباس گوم ورد عني الارجاس

مسبيه من بعد اخوتهه
لسه مانشفت دمعتهه
يامهدي يامهدي
________

من گبرهه * ونه تعله * بيهه دموع احساس
عاين اختك * رَد عليهه * شمر وهذيچ الناس
مو نظر عيني اصده گلبي يعاين ليك
جيش اميه * هم اجاني * ياخويه ياعباس

تشكيلك خويه إمتوني هم يردون يضربوني

مطبوعه اسياط ابحظرتهه
لسه مانشفت دمعتهه
يامهدي يامهدي
________

هناكه طفله * لوعاهه * يالمهدي سوط الشام
هسه تصرخ * عمي وينك * ردو علّي ضلام
والدمع خلص يعمي ويبسن اجفون النظر
عَود ألهم * يابو فاضل * وانعادت الايام

ترسم رقيه بهالنوح صوره لحسين المذبوح

ورسمت رايه من رسمتهه
لسه مانشفت دمعتهه
يامهدي يامهدي

محمد الجوراني

قصيده نزله او مقدمة عزاء لمولاتي الزهراء ع



لا تگول الزهره ما كسرو ضلعهه

___________________

هذا حدك ياهو انته من تجي وتحچيهه
شني قصة الزهره انته چنت حاظر بيهه
روح اعرف من مقلدكم منو امسويهه
وروح أقره كتاب عدكم هالقصص يرويهه
ذآكه ابن صهاكه هو الي دفعهه

لا تگول الزهره ما كسرو ضلعهه

___________________

خلي بيني وبينك التاريخ هو الشاهد
عله باب الزهره هجمو چم زنيم وحاقد
وانته ذآك اليوم اظنك چنت يمهم گاعد
غيره ما عندك يخايب ألهم انته اتساند
والضمير يگول انته الي صفعهه

لا تگول الزهره ما كسرو ضلعهه

_________________

واليدور ابالك انته شنو بس حاچيني
إتگلي ما كسرو ضلعهه اتريد أبطل اونيني
سوده لجل الضلع راح اصبغهه كل اسنيني
وانته ياهو وتجي تمنع دمعتي من عيني
رآيد ابچي لفاطمه المنعو دمعهه

لا تگول الزهره ما كسرو ضلعهه

___________________

الشاهد اعله الباب محسن لسه من ادمومه
لسه نسمع ونته من عصرو المظلومه
من ظلم اهل السقيفه أمن الدمع محرومه
والضلع لثار ينطر مهدي يوم ابيومه
وٙيدي الله فوق ايديكم رفعهه

لا تگول الزهره ما كسرو ضلعهه


دنت نفسه ابفدك فاطم شيخكم هم سامع
چن أله انطاهه الرسول وألهه جاي يدافع
خله حجته الگاع لاچن بالخلافه طامع
علي أوله بالخلافه وعدنه لا مو رابع
علي أول واحد العالم سمعهه

لا تگول الزهره ما كسرو ضلعهه

___________________

گال طه بضعتي أذآني من أذآهه
وكل مسامع صحبته سمعتهه من وصاهه
ليش من بعد النبي عد بابهه اتولاهه
مو نجيب الكسر ضلع الفاطمه أم طه
أمه ياهي اودرته منين الرضعهه

لا تگول الزهره ما كسرو ضلعهه

________________

آنه ما اريد احچي قصة فاطمه والصاير
خاف زينب تستمع مكسوره ادري الخاطر
لسه زعلان الگمر ما چان بيهه حاظر
گدهه ابو الحسنين لاچن بالوصيه حاير
هنانه اسم الغاضريه چا وضعهه

لا تگول الزهره ما كسرو ضلعهه
____________________



محمد الجوراني

قصيده رئيسيه لمولاتي الزهراء ص.

لسان حالها وهي تشكو لأبيها كل الجرئ عليها

اسم القصيده ( ما رحمني )



ما رحمني بدفعة الباب اعله ضلعي مارحمني
من سطرني__ بعيني يشكي ألك دمعي__ من سطرني
وبضلعي نبت بسمار ----- وبابي من شب النار
ما رحمني

،،،،،،،،،،

سمعت صوت القدر عالباب گاصدني بأثر خطوات جدمه گصده يهضمني
نسه اوصيتك عمر يابويه هاجمني رفس بابي عليه وللأرض ذبني

من دفعني بويه احس الموت اجاني من دفعني
سمع وني مارحم حالي اولاني سمع وني

وينك صحت يالمختار ----- وبابي من شب النار
ما رحمني

،،،،،،،،،،

دمعتي اتخبرك وتشرحلك الحاله گاصدني يبويه البابي برجاله
استغل اغياب شخصك عمر وتعاله يضربني ويشوف الدمعه هماله

كٙسر ضلعي نار تلهب هيستهه كٙسر ضلعي
هذا وضعي بعدك امصايب شفتهه هذا وضعي

وزينب توّن اعله الصار ----- وبابي من شب النار
ما رحمني

،،،،،،،،،،،،،


دم ضلعي جره وي دمعتي التجري احس من الألم ينزف جرح صبري
تملّكني الهضم والآه ملت صدري شيبني بمصابه وما رحم دهري

ما رعاني بس عجب شوفني وكتي ما رعاني
من زماني بالحزن ذابت مهجتي من زماني

بويه الدهر بيه اندار ----- وبابي من شب النار
ما رحمني

،،،،،،،،،،

احس صوت الضلع مدري الجنين الطاح بين الباب والحايط سمعت انياح
وگع حيلي واحسن بس لهيب اجراح بألم لوعات ضلعي وعمري مني الطاح

راح عمري طاح وي محسن سويه راح عمري
نار صدري ابكبر لوعات الرزيه نار صدري

وأخذته مني الاقدار ----- وبابي من شب النار
ما رحمني


،،،،،،،،،،

تعده عليه واتمرجل ابن خطاب ضعيفة حال وعليه دفعهه الباب
ثجيله الباب والباب الصبحلي احجاب واصيحن فضه لحگيلي دليلي انصاب

چن ذيابه من سقيفتهم اجوني چن ذيابه
هالصحابه بويه بعدك عذبوني هالصحابه

فجعو دليل الكرار ----- وبابي من شب النار
ما رحمني

،،،،،،،،،

مو همي كسر ضلعي وأثر بالعين كل حزني ونيني عله الحسن وحسين
بويه شلون لو باچر يمرهم بين سم چبده وگطع منحر سبي انساوين

عگب عيني عالهزل زينب سبيه عگب عيني
كل ونيني عالجثث فوگ الوطيه كل ونيني

لا خيمه عدهم لا دار ----- وبابي من شب النار
ما رحمني

،،،،،،،،،،،،

محمد الجوراني

قصيدة رئيسية لمولاتي زينب ابنة علي عليهم صلوات الله تعالى.اسم القصيدة ( أم الخير ).


فشله أجزع عله غيرچ ،،،،،، وآنه اشتم هوه خيرچ
فضلچ كون أردنه .. يمولاتي يمولاتي
موتچ خانگ النسمه ،،،،،، وشامچ ذابح البسمه
ام عون انتي مدري ام ونه .. يمولاتي يمولاتي
**********

إليقدم خيام لجلي ويسبوه
تابوتي كون گبله يشيلوه
يالمتنچ ذاك بسوط يضربوه
حته أنه اعيش هذا الرتوه

مضحيتلي الخدر بالنار
انتي بهيمه وانه بدار
اذكر فضلچ واحتار

اقبلتي اخيامچ التلهب ،،،،،، حته أنه أسلم يازينب
كرمكم ماكو ابد منه ..يمولاتي يمولاتي
موتچ خانگ النسمه ،،،،،، وشامچ ذابح البسمه
ام عون انتي مدري ام ونه .. يمولاتي يمولاتي

***********

من عندچ عيب بيه أنه أنفاس
يالحيلچ مات ويه العباس
تمشي اعله الگاع شبيهه هالناس
وانتي الشفتيه حسينچ ينداس

إمن ضلوعه فرغ صدره
واصبعه طايح إبكتره
واخذت طلعتچ عمره

گلبه طلعه الحافر ،،،،،، كون أنه أمن اول عاشر
نفسي ما أجرنه .. يمولاتي يمولاتي
موتچ خانگ النسمه ،،،،،، وشامچ ذابح البسمه
ام عون انتي مدري ام ونه .. يمولاتي يمولاتي

***********

انتي ام افضال عليه وهواي
شلون اتعطشين بالطف عالماي
توجعچ رجليچ شو انتي ادواي
شلون يمشوچ بضلمه يضواي

چان إبفي علم مشيچ
ما لچحت عين إلضلچ
حرمه مامش إتشبهچ

چفوفي انتي الحررتيهن ،،،،،، وچفوفچ حبل بيهن
اموتن بس افلنه .. يمولاتي يمولاتي
موتچ خانگ النسمه ،،،،،، وشامچ ذابح البسمه
ام عون انتي مدري ام ونه .. يمولاتي يمولاتي

**********

دمعاتي عليچ يترسن شجم بير
واليحچي بيچ ايحير ويحير
ليش وكل هاذ بيچ انتي يصير
وانتي ام العون وانتي ام الخير

حته اعله الشاطي افضالچ
عزبتيله بكفالچ
وتالي شو محد شالچ

البلصار عليچ اليحچي ،،،،،، كون يموت مو يبچي
جروحچ ما يخلنه .. يمولاتي يمولاتي
موتچ خانگ النسمه ،،،،،، وشامچ ذابح البسمه
ام عون انتي مدري ام ونه .. يمولاتي يمولاتي

***********

اعله طاري الجود والحگ ينگال
انطيتيهم بيد السجاد أموال
ومحد يم عون تابوتچ شال
وليش انه انلام لو دمعي سال

اجزعلچ زينب واجب
إمن الراحه ابموتچ تايب
اليحچي عين آنه الحاجب

نوحي إعليچ ما ابطله ،،،،،، أنتقل إلرحمة الله
الهاي الچلمه اتواعدنه .. يمولاتي يمولاتي
موتچ خانگ النسمه ،،،،،، وشامچ ذابح البسمه
ام عون انتي مدري ام ونه .. يمولاتي يمولاتي

*********

✍️/ محمد الجوراني