tg-me.com/wuhob/3223
Last Update:
أجروحي النديه أتعاتب أغلالي
الطاموره ضلمه وعذبت حالي
والتلجمه أجروحه--حسراته مفضوحه
@@@@@@@@@@@@@@@@
اليمسح دمعته وينتجي-ومأيس أمن سنينه
واليوكف يصلي بسجن-كَوه يشيل إيدينه
سكَف السجن حد الجتف-والضلمه ترست عينه
من حكَه يوكَف منحني-وشلون ضهره يعينه
ما شافت النور بصبح عيني
حته الهوه يرفض يلاكَيني
الدمعاته مسفوحه-حسراته مفضوحه
@@@@@@@@@@@@@@@@
عرض السجن خطوه وقدم-لو أزيد شويه
واكَف أنام أمن التعب-ما أمدهه رجليه
أتأذيني حيل الجامعه-خشنه وتكص بيه
أكصيره حيل السنسله-وتعور إيديه
ثكَل الحديد أشكد يأذيني
وكَّف دمه أعروكي بشراييني
والمابطل نوحه--حسراته مفضوحه
@@@@@@@@@@@@@@@@
الضلمه ترست ناضري-وجروحي تشكيلي
وتساوه يومي وما عَرِف-أنهاري من ليلي
مخنوك ما صح الهوه-باد ونحل حيلي
بس آنه ومصلايتي-والتربه تبجيلي
والخاليه من الهوه أضلوعه
وناته ونه أبونه مسموعه
ويعالج ابروحه--حسراته مفضوحة
@@@@@@@@@@@@@@@@
أشتاكيت أشم نسمة هوه-هالحال أذاني
راسي أمن أرفعه آخذ نفس-يرفسني سجاني
أرفع أديه وأندعي-يالما ألك ثاني
ياربِ عجل بالفرج-حاشاك تنساني
يالخالق النور بنضر عيني
يارب أريدك تختم سنيني
والروحه مذبوحه--حسراته مفضوحه
@@@@@@@@@@@@@@@@
الموت أرحم للذي-عاش بسجن عمره
إيصير الاجل مثل الفرج-كل لحضه ينتضره
العايش غريب أبلا أهل-والمحد ينصره
تتحاوشه اجفوف الزمن-وتضلمه وتغدره
الماله معين أبغربته إيعينه
يتمنه تكَضي أيامه وسنينه
وعيونه مشبوحه--وحسراته مفضوحه
@@@@@@@@@@@@@@@@
حسين باهض الحلفي
BY الشاعر حسين باهض الحلفي
Warning: Undefined variable $i in /var/www/tg-me/post.php on line 280
Share with your friend now:
tg-me.com/wuhob/3223