tg-me.com/wuhob/3243
Last Update:
يا كلبي موت - موت بحسرتك
ياكلبي موت - وكطع نبضتك
……………
التحبهم تعبوك اهواي - ياكلبي خضارك مات
هالكد الهجر أذاك - ميرجعون الك هيهات
إنكسارك والحزن والأه - أهمومك والوجع دمعات
أشكد تانيت - حنين ومحد يفكدك
أشكد حنيت - وماضل كل امل عندك
خافنهم نسوك أبغربتك وحدك
اكبر عذاب - أتعيش أبغربتك
ياكلبي موت - وكطع نبضتك
……………..
صارت شوفة الأحباب - حسره وروحي مختنكه
يتحرك وصد للباب - الهوه جذاب ما اصدكه
كافي أمن الهجر مليت - أبروحي تاكل الفركه
إي مشتاك - كلبي وحالته حاله
كافي أفراك - الحنين الهجر كتاله
واليفكد أعزازه أتموت أماله
ياكلبي لا - أتبين كسرتك
ياكلبي موت - وكطع نبضتك
……………..
ليليه أنتضاري إيطول - وكعد ونكسر كلش
غير أدموعي والصفنات - ذكرى بخاطري مامش
أسولف همي للحيطان - أبكلبي حسرتي أتفلش
أشلون ارتاح - والدمعه أبطرف عيني
ماينزاح - همي ودمعي وونيني
أولا واحد بكه عندي ويسليني
أشكد عاتبت - ترجعلي ردتك
ياكلبي موت - وكطع نبضتك
……………….
أنه ادري الطريق أبعيد - آ يا كربله وهمهه
أمك باقيه أتانيك - هجرانك يألمهه
أحط اهدومك ابحضني - المهه الصدري وشتمهه
إي مليت - وملت روحي من عندي
أشكد أبجيت - حد ما طيحت خدي
ما أكدر أعيش أبغربتي الوحدي
أتهد الدليل - وتكسر فركتك
ياكلبي موت - وكطع نبضتك
…………….
إذا ما جان الك نيه - ترجع والوكت غادر
والدنيا أزدحام خيول - حافر يصفك أبحافر
أفراكك فتت أضلوعي - وحالي يكسر الخاطر
مو مليت - وملت روحي المتانه
أشكد تانيت - أخبرك روحي خلصانه
مو طبع الحنين إيحن عله أوطانه
لا ما تهون - وتخلص سفرتك
ياكلبي موت - وكطع نبضتك
………………
حسين باهض الحلفي
BY الشاعر حسين باهض الحلفي
Warning: Undefined variable $i in /var/www/tg-me/post.php on line 280
Share with your friend now:
tg-me.com/wuhob/3243