*{{ گـلـب الـربـاب }}*

برد گلب الرباب وشب گلبها بـ نار
ودمعها ايشيّب الليل ابكثر ما حار

١/برد حضن الرباب وفارگته الروح
عگب عطر الرضيع الگبل چان ايفوح
إنوخذ من عدها ضامي ورجعوه مذبوح
طفه عمره وعليه راس السنه ما دار

٢/ليش بـ كربله ايموت اللي يطلب ماي
مات ابحضن أبوه واللوعه مو من هاي
جابه وإجه بباب الخيمه رايح جاي
شيگل لأمه؟! ظل امدوهن ومحتار

٣/ست شهور وعْيون امه ليه تربي
وحرام ايضيع تعب الأم الاتربّي 
بعد ما گال "يمه" وعالأرض يحبي
قربان لـ خواته وللمخيّم صار

٤/تمنت يكبر ويمشي ويه خوّانه
ومن اتصيح باسمه ايگلها هذا آنه
تانت هيه والنشّاب ما تانه
سبگها لمنحره وباسه ابسهم غدار

٥/"أم" يا ناس ما ممكن تهيد الأم
من تحن إذا ما تبچي دم تلطم
الـ يموت بـ هالعمر هم يفجع ويهضم
زغير وبالحرب ماكو سهام زْغار

*{{جروح: أحمد الهلباوي}}*
➖➖➖➖➖
لسماع قصيدة ((گلب الرباب)) :
https://youtu.be/vS5lhJvDJXk
https://www.tg-me.com/MajalesAlKhaqani/1372

https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani

*{{ الـمـاي غـاب }}*

الماي غاب…
ابيوم عاشر والعطاشى
ابكربله اتيمّم چبدهم بالسراب
انچان ما مقسوم يحضر بالطفوف
هسه يحضر.. عود ليش ؟..للثواب ؟
ياثواب؟!

ما اريده
وابقه متوضي ابدمع مجلس رقيه
الشالت الماي وچفته
وشربت الـ آه بنحر والدها موت
وغفت وياه عالتراب

الماي أكِرْهَه وبايدي اوزعه
لخاطر الدمعه الـ بچتها
اعيون "مولاتي الرباب"

الماي اوزعه لخاطر اعيون الخيام
الـ ما فزع يطفيها ماي
ولا إخت رد ليها اخوها
والأخو بالطف حجاب

الماي اوزعه لخاطر چْفوف ابو فاضل
مات ضامي والوفه سد باب عينه
وانفتح للعطش باب

والسراب
الماعرفته!! ماي؟! لو دخّان ماي؟!
احترگ من حس بابو اليمّه چبده ذاب
وشنهو نفعه
لايطفي ذيال طفله لا ولا ينفع شراب

*{{جروح: أحمد الهلباوي}}*
➖➖➖➖➖
لسماع قصيدة ((الماي غاب)) :
https://www.tg-me.com/MajalesAlKhaqani/679

قناة القصائد المكتوبة للملا محمد باقر الخاقاني
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani

*{{فـاطــــمـة الكون انخلق بٱسبابها}}*

فاطمه الكون انخلق باسبابهه
وسجد ناموس الله كله ابابهه

*{يافاطمة.. مولاتي يازهراء}*

١/
فاطمة اجمل ما خلق رب السماء
گبل لا يخلق ائمه وانبياء
خلق بارينه لجلها اهل الكساء
وفطم من نار العذاب احبابها

٢/
الزهره من شان المصور شانهه
يكفي يرضى ربك لرضوانهه
انطاهه من دون البشر قرآنهه
وحي عدهه اينزل الهه اخطابهه

٣/
ما اظن يكدر يخاطبهه الوحي
وهيه من تحچي ويه حيدر تستحي
لازم الحجي الحجيته ينمحي
واكتب الله ايطش سور باعتابها

٤/
لا فتى إلا علي سيد الولاة
إذَن لازم مثل فاطم لا فتاة
"فاطمة" جملة كبل خلق الحياة
جمله بس الله يعرف اعرابهه

٥/
فاطمه وحب فاطمه "خير العمل"
والتقبله الزهره عند الله انقبل
الزهره للذات الالهيه مثل
من خيوط النور صاغ احجابهه

٦/
الجنه عند الناس خمره وحور عين
واحنه عدنه الجنه حب ام الحسين
الجنه من نندل گبرهه المخفي وين
انزورهه ونشتم عبير اترابهه

٧/
إحنه والينه وخدمنه ام الحسن
لَن مثلهه ماكو أم أرأف واحن
مَيْتَه وامتدت اديهه من الجفن
وحضنت الحسنين بين اهدابهه

٨/
وين يحصل مثل گلب الطاهره
طگ ضلعهه ومحسن افراشه الثره
همهه بس ايكون سالم حيدره
اتغطي خدهه لا يشوف اصوابهه

٩/
قَسَم دمع حسين واخته ام الخدر
سال بالمجلس على خْدودك طهر
ابشر انته اطهرت طول العمر
ابرحمة الله الواسعه واسبابهه

*{{جروح: أحمد الهلباوي}}*
➖➖➖➖➖
لسماع قصيدة ((فاطمة الكون انخلق بأسبابها)):
https://www.tg-me.com/MajalesAlKhaqani/471

قناة القصائد المكتوبة للملا محمد باقر الخاقاني:
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani

*{{ دنـيـا الـآهـات }}*

بحسره وآه وون ونوح..گلبي وهمه
عفتيني بجرحي المفتوح..لا يا يمه
بدنيا الآهات
زينب بنتچ عفتيها
عينچ شو غمضتيها..لا يا يمه

١/
يا دم گلبي لا يا اغله من دمي
يا أمي اللي ما تشبهه بس أمي
بكثر ما اذكر بأسمچ نسيت اسمي
أمقت دنيتي البيها انتي مو يمي

مو راح اموت من الحزن
من الصبح لليل اون
ضيع حنانچ والعطف گبرچ عليه
حيل العمر كله انهدم
صارت حياتي بس ألم
موت بحزن يا گلبِ ٱلِمْضيع الزچيه

الأمه اتروح بغير وداع.. ينسى اسنينه
ما ندري اتروحين بساع.. واتخلينه
بدموع اتبات
خليتي الدللتيها
عينچ شو غمضتيها.. لا يا يمه

٢/
فتحت اعله الحزن عيني وشفت صبري
وشفت بالباب يايمه انعصر عمري
ورثت احزانچ وجمرچ صبح جمري
ألف حسره التروح وترجع بصدري

يا أم جروحي ومدمعي
لونيني يالزهره أسمعي
بنتچ ترى سيف الهجر عگبچ گضاها
يا يمه وشينفع صبر
عندي جمر يچوي الجمر
وهجرچ كسرلي ضلوعي لا مو بس چواها

داري بنورچ يم حسين.. چانت جنه
رحتي وغمض نور العين.. وتيتمنه
بهاي الحسرات
بنت عيونچ عفتيها
وعينچ شو غمضتيها.. لا يا يمه

٣/
بعد ماكو حضن يفگدني يوميه
وبعد ماكو بربوع الدنيه حنيّه
شحت من وكت حنيتچ اعليه
دلالچ راح والعفتيها مسبيه

بكل رمشه من عيني احن
يمه لچفوفچ والـ حضن
من رحتي بالروح انحچت چلمة "غريبه"
والينكسر گلبه اعله أم
لا ينجبر لا ينلئم
ما ينجبر إلا بوجودچ يالحبيبه

صرت بفگدچ مثل العود.. من عفتيني
ما گلچ رديلي اردود.. بس اخذيني
روحي بلوعات
ضلت من فارگتيها
عينچ شو غمضتيها.. لا يا يمه

٤/
بين اضلوعي الچ يا يمه چم عصره
وكسر ضلعي اعلى ضلعچ ما بعد يبره
الفگدت أمها ما تتعوض بأخرى
ييمه وروحي بيش تْعوض الزهره

شيسوه من اعيشه مألمه
عُمْري اللي ما بيه فاطمه
وعگبج بعد ما ضل حنان الدنيه بيها
يا يمه عوفيه الگبر
بس ردي لحظه لهالعمر
وسمعي حچي عيوني ويسولفلچ بچيها

لا منسمعه كلام العين.. بس انشوفه
واشگد تحچي عيون حسين.. أمه تعوفه
شوفي الدمعات
عين ابنچ بچيتيها
عينچ شو غمضتيها.. لا يا يمه

٥/
اغمض عيني وافتحها عْله دمعاتي
وتتنشّگ رماد الباب حسراتي
فگدچ أكبر من اوصاف چلماتي
مدري شمحترگ يا فاطمه بذاتي

مثل الجمر صار الهوى
ومدري شنو بـ روحي انْچوى
روحي إذا ماتت حزن بالونه حگها
ما ضل بعد عندي صبر
مهضومه للزهره اشكثر
وهالباب لمن شفته عالحايط طبگها

يمه بگلبي يضل نيشان.. جرح البسمار
بالباب اشتلعت نيران.. وبروحي النار
يمه وچويات
چفوفچ ما داويتيها
عينچ شو غمضتيها.. لا يا يمه

*{{جروح: كرار المحمداوي}}*
➖➖➖➖➖
لسماع قصيدة ((دنيا الآهات)) :
https://www.tg-me.com/MajalesAlKhaqani/1017

قناة القصائد المكتوبة للملا محمد باقر الخاقاني:
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani
قناة الشاعر: @kararalmohmdawy

{{ مـحـسـن يـيـمـه }}

بِالْوَن عليك من الحزن صب گلبي دمه
ما رحب بجيتك حضن محسن ييمه
يبني ٱشكي أمري لربي
عتبتنه هضمت گلبي.. محسن ييمه

1/مو ضلعي هدني وما گمت
شفتك على العتبه وطحت
وراح على حالك شوفي

يايمه چنت ٱتأملك
لمن تجي يستقبلك
يبني الحضن وچفوفي

آنه ٱعرف حساب الدهر
متخوفه چنت من القدر
من عتبتي كل خوفي

ستر الله لي ببابي إنهتك
وآنا التي يدور الفلك
كله بـ فضل معروفي

الرحمه كلها يا عجب محَّد رحمها
أمك يباهون الملأ يمه بإسمها
الراد الله يبدي بحبي
وعتبتنا هضمت گلبي.. محسن ييمه

2/ المو لله من ينعد عبد
هد ودفع باب الحمد
وبداري نار ٱضرمها

الما ينعرف ياهم هله
كسر ضلوع البسمله
وكل السور صب دمها

يالمحسن بأمري إعتنت
طير أبابيل وإجت
جند ٱبرهة تهدمها

وأگدر أصب نار الغضب
فوگ الإجه وجايب حطب
والدنيه بيه أعدمها

ماترضه يمه رحمتي أرفع إديه
حتى العدو هم شملته برحمه الزچيه
والرحمة كلها بجنبي
وعتبتنا هضمت گلبي.. محسن ييمه

3/ گبل البدايه والبدئ
گبل الخلق گبل النشئ
چان ٱسم ٱبوي الأول

إسمي البشر ماتعلمه
بس الله يعرف فاطمة
وجه الله بينا تمثل

مني بده وليه الأمر
وبفضلي إجه بليلة قدر
يمه الكتاب المنزل

لأمك خجل يامحسني
كل الفضائل تنحني
بالعرش إسمي ترتل

إحنه صنايع ربك لذاته صنعنا
وكل الخلق مننا طلع لمن طلعنا
يُرْجى الإله بقربي
عتبتنه هضمت گلبي.. محسن ييمه

4/ عندي إنتهه الفضل وكفى
يكفيني ابوي المصطفى
بس آنه كفء لحيدر

الحسنين ما إلهم مثل
إلهم أخو ثالث يهل
چنت لقدومه ٱتنطر

تشبه حسين ٱتصورك
يايمة چنت ٱتنطرك
حام عله هالعتبة الشر

ياصبح يالمالك صبح
أنظر جمالك ينذبح
حين الضلع يتكسر

آنا شكثر چنت ٱنتظر توصل يغالي
يا وسفة مهدك ينكسر يوليدي تالي
منتظرة اشوفك تحبي
وعتبتنه هضمت گلبي.. محسن ييمه

{{جروح: كرار المحمداوي}}
➖➖➖➖➖
لسماع قصيدة ((محسن ييمه)) :
https://www.tg-me.com/MajalesAlKhaqani/969

قناة القصائد المكتوبة للملا محمد باقر الخاقاني:
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani
قناة الشاعر: @kararalmohmdawy

{{ يــ حـبـل اديـه ــا }}

١/يا حبل اديه... الرحله طويله
بس ارد أگلك... آنه العقيله

من هسه احچيلك ألم جروح
گلبي ترى مفارگ أخو وينوح
هونك بالچفوف الصفت غريبه... غريبه

هاي آنه زينب اللي ما بقالي
يا حبل اديه والي... وبغربه هذا حالي
عاين على الرمح يا حبل ٱديه
أبن ٱمي عينه ٱليه... بعينه ٱكسرت دلالي

٢/النوگ الهزيله... تبچي عليه
مكسوره خاطِر... وتوصِّي بيه

مثل الهزل هم حِن على الإيدين
وصي ٱمتدادك يا حبلنه زين
بالك ترى چفوف الطفل زغيره... زغيره

يا حبلي بالك اعله چف رقيه
بهذا العمر سبيه... گلي شفت مثلها
چف المحنه يالخذت مكانه
اشتاگت على حنانه... وبيك ٱنذبح أملها

٣/بهاي المسيره... ويانه راحل
وهاي الضعينه... كلها ثواكل

كل وحده بينه عدها ٱبن صريع
وبينه مره فگدت طفل رضيع
وتون لأن فارغ بقه حضنها... حضنها

لمن تِهزَّك ٱرحم بإديها
إرحم حسره بيها... ومعلِّمه تلولي
ميت أگلها بس تگلي ٱريده
مشتاگه ٱشم وريده... ويصعب إله وصولي

٤/يا حبل ٱديه... مو هذا گدري
وياك ٱسولف... خلّاني دهري

آنه اليفزعون بچلمتي ٱخوتي
ماتت بعد ماتنسمع نخوتي
وبكربله ماكو بشر رحمني... رحمني

بلكي ٱنته رحمة تاخِذَك عليه
و ما تجرح ب ٱيديّه...وتخلي ٱثر عليها
شلون الي عالي عالبشر قدرها
والمنعرف خدرها... يبيّن جرح بإديها


{{جروح: السيد مرتضى الياسري}}

➖➖➖➖➖
لسماع قصيدة ((يا حبل ايديه)):
https://youtu.be/d_J7axd2MEA

قناة القصائد المكتوبة للملا محمد باقر الخاقاني:
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani

{{لا أحب الآفلين}}

١/ما علِّگت گلبي ابَّشّر... گلبي للحُبْ ما يِلين
هالدنيا خلصانه او أنا... لا أحِبُّ الآفِلين

كرَّمني الله اْو بالعَقِل تكريمي
يا روحي كافي و ابْصَفِنْـتِچ هِيمي
الـحُبِّ الأريده الحـُبِّ الإبراهيمي

خلّي حبُچ لليّ حُبَّه ما يزُولْ
او للّي شمسه البازغه ابلايه أفُولْ
كافي غفله اْو بالله فِهْمي اشأرْد اگول:
الدنيا عوفيها وراچ اْو سِدِّي إذنچ للعَذُول
او عطلي عقلچ للي ما تستوعب امصابه العُقولْ
او سحگي ذاتچ لجل ذاك السحگت اضلوعه الخُيولْ

كَسَّرْتُ أصنامَ هَوايْ... و رُحْتُ في سَحْقِ أنايْ
و جُلتُ في ملكوتِ الحُبِّ... فتلاشَى العَقْلُ وَتاهْ
فمنشأي منهُ إليْه... و دَمْعَتي مِنْهُ عليْه
أريدُ وجْهَ اللهِ تعالى... و حسينٌ وجْهُ اللهْ !

وجَّهْتُ وجهي للفطر... گلب الحجَر
ابغير الحزن ما أقتنِع
لا يدّعي ابطاري العشِگ... الما محترگ
و الما فهَم حزنك شَرِع
و الما بچه او گايل أحِب... أكبر چذِب
ما عدنه حُبِّ ابلا دمِع

جرَّبِت أنواع العشگ... و اكتشفت العاشِقِين
كلهم يروحون اْو أنه... لا أحبُّ الآفلين !

٢/طفْت ابخيالي او غَرْبَلِتْ تفكيري
عندي الحقيقة و الوَهَم عد غيري
لولا خدمته ما احصِّل خيري

اُنسي مو ويَّه الإنِس , ويَّه النّحيبْ
اشما أقرِّب منهم أشعُر مو قريب
خيِّبْوا ياما ظنوني الما تِخيب
الحُب قراري او إختياري لاهُو قِسمه اْو لا نصَيبْ
او قرّرت أبگه غريب ابْدِنْيِـتـي لَـجْل الغريبْ
لا حبيب إلّا الحُسين اْو غيره ما رايد حبيبْ

فسيِّدي خيرُ مَلِيكْ... أحبَبْتُهُ دونَ شَريكْ
بِهِ أنِسْتُ و دونَ دُموعي... لا أشعرُ باسْتِئناسْ
بعيشَتي أقصى طمُوحْ... عليْهِ أبكي و أنوحْ
وبعدَ هذا لستُ أبالي... ماذا سَيقولُ النَّاسْ

ما ينتهي الگال اْو گلِت... واشحصَّلِت
تاليها من كثْر الحچِي
و العنده ثار ابكربله... ما تشغله
هالدنيا عن طُول البچِي
هذا العمر يگظي تَره... اْو بس منبره
اتسنَّد اعليْه و انتچِي

عاين عله الوادم صِفوْا... خبَر ماضي اوْيه السَّنين
راحوْا و أنا بيَّه طبع... لا أحِبُّ الآفِلين

٣/معاشر ونيني او رافگت أحزاني
وٱهل المجالس واللطم خِلّاني
وغير النواعي ما حلت بلساني

ٱبن آدم بهالدنيا ما يدري شيريد
عايش ويه الوادم ويشعر وحيد
شما عِله بأهواءه يوگع من جديد
آنه مأنوس بحياتي وعايش ٱحساس العبيد
وياهم ٱصرخ جينه ننشد هم صدگ بالشام عيد
همنا الٱكبر يمته يلفي العاش كل عُمره طريد

همّي بأيّام الظهور... لثأر ربَّاتِ الخدور
أرتقب الصيحة وعيوني... ترقب خسق البيداء
مؤتزراً ثوب العزاء... وشاهراً سيف البكاء
مجرِّداً رمح مسيري... لضريح ٱبن الزهراء

ما تسوى أيّام العمر... لو ما تمر
بالخدمة والون واللطم
وشبيهن سنين المضن... واللّي بُقن
لو ما عله زينب أنهضم
هذا آنه او وضحت نيّتي... وبدنيتي
ما عندي سر ٱخفي وٱظم

متفرغ الحب سيدي... او لا شفت غيره حنين
ما حب أبد غيره لأن... لا أحبُّ الآفلين

{{جروح: الميرزا عادل أشكناني}}

➖➖➖➖➖
لسماع قصيدة ((لا أحب الآفلين)):
استوديو:
https://www.tg-me.com/MajalesAlKhaqani/1937
حسينية:
https://youtu.be/Wypd8-MG_CQ

قناة القصائد المكتوبة للملا محمد باقر الخاقاني:
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani

{{ وعد الغضب}}

ويلٌ إذا بَرقَ الفِقارْ...و عجاجُ خيلِ اللهِ ثارْ
فلجدتي الزهراءِ ثارْ
ويلٌ لأصحابِ الجحودْ... أتباعِ عادٍ وثمودْ
قدْ حاربوا أمَّ الخلودْ

بده حزن السمه وبانت تعابير الحزن
اندفن محسنها واول فاطمي بدم يندفن
هوت فوگ الأرض فاطم وبده عمر الدمع
التجاسر عالامامة تشرّع بچلمة "وإِن"

والبدايه .. الباب لكل الرزايه
لبچي فاطم يا نهايه؟!... وعدها أيتام وسبايه
وبحزنها... تعيش ومنتظره ٱبنها
يجي ويطيبِ الضلع... يمسح دمع... مُحي الشَرع 
وينادي للبرايه

يا أهل العالم
إنَّ جدتي شهيدة
حقها إلها بيدي اعيده
ولضلعها كلشي ٱبيده
آنه لـ ذاك الدم
الـ جره منّ الزچيه
والجره بالغاضريه
موجره نيراني بيه
وللوعد متلهفه أديه

إنَّ في القلبِ لهيباً من لظى البابِ استعرْ
وبه قدْ حلَّ سهمٌ حرمليٌّ في الأثَرْ
ويلَهُمْ من غضبِ اللهِ إذا سيفي زأرْ
فأنا مُنْتظِرُ الثَّأرِ وإنِّي المنتَظَرْ !

{{الشعر الفصيح: علي عسيلي العاملي}}
{{الشعر الشعبي: السيد مرتضى الياسري}}

➖➖➖➖➖
لسماع قصيدة ((وعد الغضب)):
https://www.tg-me.com/MajalesAlKhaqani/1919

رابط المشاهدة على اليوتيوب:
https://youtu.be/0bpWWyx0uvg

قناة القصائد المكتوبة للملا محمد باقر الخاقاني:
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani

{{واسي الظعن}}


١/ضعن الهواشم...الليله بغربته
واسي الظعن باتك
دير لحبيبك... وٱبچي لخيامه
لا تلتفت للفاتك
هم لغربتك... وحسرة عياله
خليها ٱشد حسراتك

لايبعدك كلشي عن حزن الخيام
لچمه عيش ٱيامك ٱو غربه ٱو ونين
اتبره من قلبك اذا هوّن عليك
لو سمع بالغربه واعية الحسين

حسيني باچر وحيد ينده بكربلاء
لخدره ناصر يريد ونصرته بالبكاء

وبغربتك واسي اليظل ظامي بغربته
فوگ الترب ويصد على خدره بحسرته
من يمّه تمشي عله اليسر يا وسفه اخته

"على الغريب اويلاه... اويلاه...اويلاه"

٢/سكّت لسانك... خل يحچي قلبك
لو ذكروا ٱسم الخيمه
خلي انكسارك... يطغه اعله حيلك
ويكبر دليلك ضيمه
عـالطلعوهن... من فيّ خدرهن
لشمس الظهر والهيمه

انكسر واجب عليك الانكسار
للخيم واهل الخيم ولكلشي راح
وخلها بضلوعك تعيش الچلمه هاي
عمه فرّن بالبراري الحامي طاح

كل جرح بالطفوف عيشه آه وعويل
من النهر والچفوف للعطش والهزيل

ابچي لخدر فارگ علم عزّه ودلاله
ابچي لظعن بالهيمه ضل بلا كفاله
بين العطش والحيره راحت نص عياله

"على الغريب اويلاه... اويلاه...اويلاه"

٣/كون لعزائك... تكبر لهفتك
لهفت يتامه لجربه
حاذر يفوتك... موعد بكائك
عالضامي ريجه وگلبه
غاية وجودك... تبچي لحبيبك
واعله الظعن والغربه

ارسم التل بضميرك والضياع
وحيرت الحرمه الــ عله التل وتصيح
إن كنت حياً  فـ ادرك اختك ياحسين
بلايه حيل من الضمه تگوم وتطيح

بحيرتك دمعه ضيع حته تندل هواك
وگله يابو الرضيع قربه هاي لضماك

ضيع عله كل حسره خذت قلب العقيله
من طاح ٱخوها وما لگت لخيمها حيله
من خيمه للتل شابت وصارت نحيله

"على الغريب اويلاه... اويلاه...اويلاه"

{{جروح: عباس الشبلاوي}}

➖➖➖➖➖
لسماع قصيدة ((واسي الظعن)):
https://www.tg-me.com/MajalesAlKhaqani/1938

رابط المشاهدة على اليوتيوب:
https://youtu.be/_na7KequXH4

قناة القصائد المكتوبة للملا محمد باقر الخاقاني:
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani

{{شـريـك الـحـسـيـن}}


لا وحگ جروح امك فاطمة
يا شريك حسين بجروح وضمه
بكربله موجود مولاي الحسن
عوض عنك ابنك تحنه بدمه

يابيت الكرم.. لجروح الحرم
ارزقني دمع.. وجمرة عله الخيم
وغيرة عله الخدر.. من بيت الشيم
من جروحك اريد.. حسرات والم

من الطم عله عيوني
سيدي يلوموني
انته مالك روحي
ويه العبيد اخذوني

{مولاي يا حسن}

يا جريح لحال اختك بالطفوف
توسليتك سيدي بأعظم چفوف
مدد يا مولاي ولحد الجزع
عالرجع مكسور وما يشوف

الطمله جزع.. من جرح النهر
احسبها قليل.. لو امشي دهر
اتعنه الظعون.. الرجعت من سفر
يمضيف اليزور.. الضامي والگمر

كل يقيني بهايه
تعتني مشايه
تعتني ويه الزهره
تجي وشايل راية

{مولاي يا حسن}

من غرامي البيك ارسملك بقيع
حاضن جروح الاخو وجرح الرضيع
وبيه سوالف من جروح مدللات
من اتيهن من جروحك انه اضيع

بجاه ام الگمر.. توسلتك مدد
بدموع الرباب.. والعاف المهد
تحسبني عبد.. عندك للأبد
كل جرح وسهر.. احلى من الشهد

الكرم يگصد بابك
شويه من ترابك
و وي تراب الضامي
يزيد جرح احبابك

{مولاي يا حسن}

على ترابك شفت جرح من الحبل
وجرح ليل وسفر ورچاب الهزل
رسم دمع اختك خرابه ودرب شام
من اجتك من سبي الما ينحمل

يم گبرك اجت.. تشكي ما جرى
يا دمع النزل.. دمع مخدره
الطلعت بالخدر.. ترد ميسره
جابتلك تراب.. بيه دم منحره

حچايه بس چبيره
والاميره يسيرة
لو سمعها العاشگ
يموت حسرة وحيرة

{مولاي يا حسن}

{{جروح: ابو أحمد الخيگاني}}

➖➖➖➖➖
لسماع قصيدة ((شريك الحسين)):
https://www.tg-me.com/MajalesAlKhaqani/1205

رابط المشاهدة على اليوتيوب:
https://youtu.be/FAlG9feXFMU

قناة القصائد المكتوبة للملا محمد باقر الخاقاني:
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani

{{دخـيـلك يــ قمر بني هاشم ـا}}

دمعاتي بحروفك.. هايمه
يالتحچي بمعروفك..فاطمه
دخيلك يا قمر بني هاشم

الدخان الـ بمتونك.. مرجله
إزقني من عيونك.. كربله
دخيلك يا قمر بني هاشم

ياغالي انته الحب والهوه
بدلالي انته "داي" و"دوه"
بوجداني ازرع حب نينوى

ياراعي الحنيّة ويا أعذب نهر
ياشريان الخوّه ويا أجمل گمر
ويه الليل البعيونك يا محلا السهر
يالبيك تجسد نور الأربع عشر

{دخيلك.. يا بو فاضل دخيلك}

٢/إجلاي وتعظيمي.. لـ وگفتك
إقراري وتسليمي.. لرادتك
دخيلك.. يا قمر بني هاشم

يا شارب يا رهبة.. حيدره
يالگاطع چم رتبة.. گنطره
دخيلك.. يا قمر بني هاشم

يا نور الزهراء الجلي
يا ناموس العالي علي
الـ فات يم حدودك يبتلي

جازيت اربات اختك كل هزّة مهد
تلوليك من چانت "أبو فاضل مدد"
أوصافك واسمائك ما يلزمها احد
مخلصها انته "اخو زينب" شنسولف بعد

{دخيلك.. يا بو فاضل دخيلك}

٣/يم بابك تتزاحم.. أنبياء
يالصاير قبل آدم.. بالسماء
دخيلك.. يا قمر بني هاشم

عالفطرة وحب عذري.. اتنفسك
كل همي وفي ستري.. مجلسك
دخيلك.. ياقمر بني هاشم

يا وجداني وروح الگلب
جود احسانك يندّي حب
وما تتعذر من تنطلب

مولاي اتعنيتك جايي من العدم
بأي لون تحب انته ارسمني بأي قلم
مر "عابس" من يمك شم "عطر العلم"
صار اكبر مجنون بحب اهل الخيم

{دخيلك.. يا بو فاضل دخيلك}

٤/من خوفه الطف صلّى.. چم فرض
يمنزل غيظ الله.. عله الأرض
دخيلك.. يا قمر بني هاشم

من تزعل تتراعد.. چم سمه
الكل ينزل يتصاعد.. بس دمه
دخيلك.. يا قمر بني هاشم

يا چف غيرة الـ ما ينحمل
الميله بنظراتك تنعدل
دخيلك مروتك يا ابا الفضل

يا واحد بالغيره وكشّاف الكرب
لوما الحب لعيونك ما يتسمى حب
مولاي بـ تسيارك يا خذنه الدرب
حد ما نوصل بابك گلب يعت گلب

{دخيلك.. يا بو فاضل دخيلك}

٥/ميزان الحب انته.. تبينه
بدم گلبي وسالفته.. وموطنه
دخيلك.. يا قمر بني هاشم

يا ساقي ومتكفّل.. زينبك
وجداني وإحساسي.. يندبك
دخيلك.. يا قمر بني هاشم

يا ثاني اثنين الـ بالعشگ
يا مقياس الحب والصدگ
الما شم أعتابك يختنگ

مو بس سجدة تعظيم اسجدلك عبد
كل معدوم اتنفس حبّك ينوجد
يا "أصدق ماقيل وأعظم من قصد"
يعيون الزهرة انته وتسبيح وورد

{دخيلك.. يا بو فاضل دخيلك}


{{جروح أحمد الهلباوي}}

➖➖➖➖➖
لسماع قصيدة ((دخيلك يا قمر بني هاشم)):
https://www.tg-me.com/MajalesAlKhaqani/1291

رابط المشاهدة على اليوتيوب:
https://youtu.be/Q7-pBtwB4JQ

قناة القصائد المكتوبة للملا محمد باقر الخاقاني:
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani

*{{زيارة كربلاء}}*

١/يا من جعل في تربته... الباري الشفاء
يا من ذكر اسمه دوه... من كل داء
يا كاشف الهم يا معين الضعفاء
أرزق محبينك زيارة كربلاء

اشتياقي لحضرتك... ومناير گبتك
جعلني ابلا صبر
احرمني من الهوه... بس لا نينوه
دخيل من الهجر

حنين البيّه يندهني
يصاحب فطرتي ارحمني
لباب القبله وصلني واسجد على اعتابك

بشباچك اشد روحي
واصيح ادخيل مذبوحي
لحد ما تنچوي جروحي انحب على مصابك

*(صلى الله عليك يا ثار الله)*

٢/يامن حدر گبته يُجِيب... الله الدعاء
والسبب المتصل بين... ارض وسماء
يا صاحبي في الشدةِ وفي الرخاء
هجرك عله العاشگ يبو الاكبر بلاء

يمحراب المحب... يالذكرك عذب
تگتل فرگتك
البُعد وياك مُر... يا كل العمر
ارزقني زيارتك

الشوك بگلبي وينادي
يا سبط النبي الهادي
الزياره سيدي مرادي طلبتك يبن فاطم

مولاي العمر صحره
ويِخَضْر ابشوفة الحضره
حرز من الهجر نظره منك عله الخادم

*(صلى الله عليك يا ثار الله)*

٣/لاخير بالدنيا اللي ما... بيها حسين
ولاخير بالعايش وما... عنده اربعين
الدين دون زياره ما ينحسب دين
والعين دون الدمعه ما تتسمه عين

يروح ام البنين... يسلطان الحنين
يجرحي والمصاب
محرم واربعين... حياتي يا حسين
وبليّاهن عذاب

صعبه اعليه ما جيلك
وما الطم وابچيلك
دخيل الزهره و ادخيلك من هاي المصيبه

بعدني بأول الخدمه
ابرگبتي دين الك ذمه
بچي وممشه يبو اليمه ابكثر نوح الغريبه

*(صلى الله عليك يا ثار الله)*

٤/العنده والما عنده... والعايش عليه
مجلس عزائك گلبي بيه... لا تبتليه
فك گلبي وامن الشام حسره ازرعلي بيه
وجمره وأدب لذكر الخدر واحبال اديه

خذوهن عالـ هزل... بنات الماله ظل
وينامن عالتراب
يموت احسله كون... النسه مصاب الظعون
وجرح سكنه ورباب

ديره اتسولف لديره
جابَو بت علي ايسيره
ابگلبها موگد الحيره يسعر من حزنها

ظعن لون الترب لونه
وأثر للسوط بمتونه
الناس ابحقد يحدونه المو طاهر حليبه

*(صلى الله عليك يا ثار الله)*

*{{جروح: حيدر الرويمي}}*

➖➖➖➖➖
لسماع قصيدة ((زيارة كربلاء)):
https://www.tg-me.com/MajalesAlKhaqani/1799

رابط المشاهدة على اليوتيوب:
https://youtu.be/NtoRx80cDjk

قناة القصائد المكتوبة للملا محمد باقر الخاقاني:
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani

{{جرحي المسموم}}

جرحي المسموم
رخّص دمع حامي الحميه
اليوم وكل يوم
ينزف ضلع من الزچيه

من سم الغدر يتچوّه گلبه
ريحانة نبي ايشيعونه غربه

١/
سولف يادمع خدّي
عن اجروح ابو المهدي.. الثجيله
مات ايعالج ابسمه
ومحّد من هله يمّه.. يشيله
ومحّد يبچي عد راسه
ضم حسراته وانفاسه.. ابدليله
بس الزهره اجت تنعه
ابصوت المحّد ايسمعه.. ونحيله

يوليدي انعاك
واتوسدت عالگاع احضنك
روح الله اوياك
يل ماردت واحد يچفنك

مثل احسين ابوك فراشه تربه
ريحانة نبي ايشيعونه غربه

٢/
هنيالچ يسامره
إتنعمتي ابدفو عطره.. وعبيره
من نوره الورد فتّح
بديارچ بشر ماصح.. نظيره
ابگاعچ چم فرض صلى
وصام وهاي عند الله.. چبيره
ليش اهلچ يغدرونه
ايموت ومايحضرونه.. العشيره

مات المغدور
مو يم هله ابديره غريبه
مثل المنحور
ظل بالفله.. هاي المصيبه

الماي ايقدِّموله وما يشربه
ريحانة نبي ايشيعونه غربه

٣/
يالـ تسمع بواچينه
دمعتنه وتعازينه. لحضرتك
لٱبوك اتهل مدامعنا
التمّينه وتجمّعنا.. ابرحمتك
هاليوم الدمع يسوى
كلنه انروح اله فدوه.. لدمعتك
من إنذكرك يبو الشيمه
نذكر طيحة الخيمه.. اعله عمتك

نصرخ وانعيد
آه يالعطش آه يالخرابه
صرخات ايريد
ليل اهدعش من گد عذابه

من عين الگلب دمع النصبّه
ريحانة نبي ايشيعونه غربه

٤/
غربة والدك تگطع
أسألك يالولي واسمع.. عويلي
من شالوه چنت حاضر
ماكو ابصدره أثر حافر.. أويلي
وماگطعو إله منحر
وما صاح "العطش فطّر.. دليلي"
اخت ماعنده يسبوها
وتصرخ من يهضموها.. كفيلي

ماعنده اخيام
بيهن إخت محروگه اديها
وادروب الشام
انته العشت تنحب عليها

النوح لعمتك يامهدي اطلبه
ريحانة نبي ايشيعونه غربه
٥/
علامات الفرج وضحت
وساعات القصاص اضحت.. جريبه
الثار ايبرده بس الدم
باب وخيمه چف وچم.. مصيبه
الگايل عن علي رابع
اذا ببرج السمه السابع.. نجيبه
نحرگ نسلب ونذبح
الخلو بت علي تصبح.. غريبه

ماننسه الباب
لا والحسن وماننسه ثاره
ينزف ماطاب
جرح الضعن وماتطفه ناره

ونبني لفاطمه ابيت الله گبّه
ريحانة نبي ايشيعونه غربه

{{جروح: أحـمـد الـهـلباوي}}

➖➖➖➖➖
رابط قصيدة ((جرحي المسموم)):
https://youtu.be/CANmq2E-ln0

قناة القصائد المكتوبة للملا محمد باقر الخاقاني:
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani

⬆️ جرحي المسموم
🎤 ملا محمد باقر الخاقاني
✍ أحمد الهلباوي
🏴 للامام العسكري

اللهم عجل لوليك الفرج
@MajalesAlKhaqani
@latmiyyatalkhakani

*{{ سـر دمـعـتـي }}*

١/علم ما عندي بٱسباب
الخذت روحي اعله بابك
ومنو اللي شد الك گلبي
جمالك لو مصابك
ورسم رحلة دمع عيني
لظعن شايل عذابك

الدمعة الاولى اللي ترسم مسيره
تهل مثلها دمعته الاخيرة

لا چذب لا صدگ
يغلب ٱهل العشگ
ويخفي دمعة عذاب الذبيح بغرب

من وگع صارمه
وحرگو مخيمه
بچّه حتى الحجر وانولد بي گلب

بچيتك وكلشي بده
وغرامك بگلبي حده
علامة اليهوى دمع
عله اسمك يصب وَحَدَه

٢/بلا موعد تلاگينه
انه وساعي دمعتي
رحمتك ليّه جابتها
وبدت منها خدمتي
وصرت ما اگدر بدونك
اعيشه ويگضي وگتي

وسر دمعتي خبر عنها يحچي
يَخلقُ الله له شيعة تبچي

يخلق الله خدم
تحترگ عالخيم
يا حسين وكلام النبي لفاطمة

يعني لام الحسن
يبچي وبحسرة ون
چي على التعزية ام الحسن قائمة

بيديها دمعة التنمسح
من وجنة اليبچي بجرح
لمُصابك وگلبه انكسر
من يسمع بنحر ورمح

٣/يمرني هاجس الموت
وامر حالة ندامة
عله ايامي اللي جافيتك
وقصوري ويه الخدامة
اموت وآنه ما شابع
بچي لجرحه وخيامه

بهالشعور وأجدّ بقراري
ليلي اخلصه بدمعتي ونهاري

يا خسارة العمر
ماشي صوب الكُبر
وآنه خلصته عمري جفاء بندم

سيدي اتندمت
عن حياتي العشت
كل نفس مرني بي ما بچيت الخيم
..
شبابي الك ردته نذر
لمشيبي وبروحي جمر
اموتن وجفني يصب
وخيالك بذهني يمر

٤/اضيع وابچي وارجعلك
تدليني دمعتي
لان تغسل شكو بروحي
وترد تحيا فطرتي
يبو السجاد انه بدربك
شفت غاية خلقتي

وكل عزه ام البنين ارتجيها
تخلي عيني تفيض ابچيها

تخلي عيني تصب
وابچي الك من گلب
رق الك سيدي وانچوت مهجته

عاللي ضحت ولد
فطمته من المهد
ودم لگت مو عطر فايح برگبته

*{{جروح: السيد أنور الموسوي}}*

➖➖➖➖➖
لسماع قصيدة ((سر دمعتي)):
https://www.tg-me.com/MajalesAlKhaqani/1861
رابط المشاهدة على اليوتيوب:
https://youtu.be/B9THmKBdrGI

قناة القصائد المكتوبة للملا محمد باقر الخاقاني:
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani

*{{شــُــكْـ حبيبي يا حسين ــرًا}}*

١/لنعمتك شكري قاصر
يا فضل ماله آخر
يـ الي رزقك مشاعر .. حسين
بيه بثها ودادك
وأرتوت من سوادك
الغايته بس حدادك .. حسين

هاي المشاعر من تستقر
فطريه وبلا حب تندثر
وبخدمتك تنتعش

حجم المشاعر بس تقترن
بحجم الدموع بمجرى الجفن
بخد المحب تنفرش

شكرا حبيبي كبرت بخيمتك
كبرت مشاعر گلبي بخدمتك
سمحتلي أخدم هالسنه رحمتك
ليومك دموعي تصب

شكرًا ألك گد الدمع
الـ وي صوت ناعيتك يصب
شكرا ألك ياسيدي
گد المشي من أبعد درب
ماتت أحاسيس البشر
وشفنه العزاء أطيب گلب
مفتوحه بيبانك بعد
وهواي ما رادت تطب

{شكراً حبيبي ياحسين}

٢/بيدك أمري وقراري
يل سلبت اختياري
دمْعتي وْإنكساري .. حسين
بادرتني بعطائك
وجذبتني لعزائك
لحب ألم كربلائك .. حسين

نعمة عزائي جروح الخيم
بشكر البواچي تدوم النعم
وبوصلي ما تنگطع

لا سامح الله وانسى الفضل
وأتمنى أعود للهفة قبل
من أذكرك وأنفجع

من ذاقَ منك الحب بمأتمك
يصبح أسيرك عبدك مُغرمك
حاشى لحنانك يبعد خادمك
إلا بجفاء الطبع

ما تگطع أسباب القرب
حتى اليروح ويبتعد
اترزقه دمعه وينكسر
ومدنگ إحساسه يرد
العايش مناجاتك أُنس
وحروفك لحاله وِرِد
ما يگدر يعيش بجفه
المتعود الحب والوجِد

{شكراً حبيبي ياحسين}

٣/يا سفينة هُدانه
لساحل الحب خذانه
ولم شملنه بأمانه .. حسين

منها حبلك تمده
لكل غريق وتنجده
واليفارگ ترده .. حسين

صبح الهداية وشمس الگلب
لا ما يعيش الما عاشه حب
وبآدميته خلل

هو الحقيقة وكلشي وهم
وحب اللي مو آخرته ندم
بل حبه خير العمل

حب الحسين الطاهر منبعه
باب لنوال الرحمة الواسعة
والشاله گلبه طاهر مرضعه
ومصفّى من الأزل

لا سائلت لا ناشدت
عن الحقيقة بيا كِتر
لجرحك تجارت دمعتي
وتبين لگلبي الأمر
خالقني رب الحب الك
ولگيته عِند المنكسِر
گلبه لمصاب اقدس گلب
متلوع بذاك الظهر

{شكراً حبيبي ياحسين}

٤/أنت والباقي  أرفضه
گلبي أي جو يمرضه
وجو خدمتك يحفظه .. حسين

كلمن وعنده رايه
وسولفت عن درايه
دمعي اعظم وقايه ..حسين

كلشي سكت من هل مدمعي
من كلشي اخذني صوت النعي
جرحك اخذني الك

شغلتني عن الدنيا الخيم
بالخدمه احچي بس والخدم
وتقبلني اتوسلك

أبقى على حالي السنة والمقبله
لأخر حياتي دمعتي هامله
ويوم أربعينك أطوف بكربله
وأنعى مآسي هلك

أنعى الغريبات الإجن
بجروحهن لمّن إجن
جبت الظعن بيدك عُمُر
وطشّوهن سنين الظعن
بين المدينة وكربله
أتحيرن وين الوطن
سولفن يمكم كل هضم
وگبوركم ماسولفن

{شكراً حبيبي ياحسين}

*{{جروح : السيد انور الموسوي - والسيد مرتضى الياسري}}*
➖➖➖➖➖
لسماع قصيدة ((شكرا حبيبي يا حسين)) :
https://www.tg-me.com/MajalesAlKhaqani/1807

قناة القصائد المكتوبة للملا محمد باقر الخاقاني:
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani

{{وهـل الـديـن .. إلا الحـب؟!}}

لـغيرك دمْعتي ما تصُب ..
غيرك گلبي ما يطلُب
حبّيتك مُروءَة و دِين ..
{وَ هَلِ الدِّينُ إلّا الحُب}

كلشي انوجد من حرفين ..
و الدنيا خالقها الرَّبْ
بأول حرف من (حـ)ـسين ..
و آخر حرف من زينـ(ب)

فلسفة وُجودي من البداية ..
من چنِت عَدم
من اختبرني الله بالوِلاية ..
و جاوبت : نَعَم
و هسَّه جيت أكمّل الحِكاية ..
بحرگة الخيَم

الناس عبيدُ الدنيا
و الحبُّ ادّعاءٌ بالكلامْ..
فإذا مُحِصّوا بالغرام..
قلَّ المُحبُّون !

عن دِيني لو راح الورَع
شلون اجزع بوكت الجزع
و كل خوفي حزني ينگلُب
من الصدِگ للمُصطنَع

و شينفع الدمْعة التِهِل
و زينب خذوها على الهِزل
لازم أموت من الحِزن
بس آنه لي هسَّه عِدل !

هالعشِگ سهَل لمّن أگوله ..
و بالفِعِل صعُب
و حُبّك برغم هاي السُّهولة ..
يشلع الگلُب !
و الوِصل لك يبيِّن وصُوله ..
بآخر الدُرب


من الدِّين الذي يگرُّب..
يشوفك انت لُبِّ الّلُب..
ديني محبِّتَك يحسين

{و هل الدينُ إلّا الحُب}

وكْت الحچي هواي نشوف
من يدّعون أشياعه ..
و الحُبّه صادق معروف
وكت الصِّدِگ بالطاعه ..

لو مرامي مو على مرامه ..
عنّه مبتِعِد
يعني ما عشت لذّة غَرامه ..
بهذه أعتقِد
و العبِد إذا خالَف إمامه ..
هذا مو عبِد !

فالحبُّ يموتُ و يَحيا
علىٰ قَدْرِ ما يُرضي الإمامْ..
و علىٰ قَدَرِ الإلتزامْ..
يدنوا المطيعون

هالطاعة منشأها العَقِل
و العقل بالحُب متصِّل
من يكتمل حبِّ الحُسين
معناها عقلي مكتمل

و عقلي يگلي إنفجِع
و لا تكتفي بصبِّ الدَّمِع
و باللّطم ضلعك إكْسِره
من تسمع بكسر الضلِع

مصيبة بُكرةً إِلها و عشيَّة ..
تبچي فاطمة
و بالدم لعظُم هاي الرزيّة ..
مطرَت السّما
و آنه ديني إسعاد الزچيّة ..
هيچي أفهَمه !

الرايد للهَوىٰ يجرُّب
يشرِّق خله و يغرُّب
الحُب دين الحسينيين

{و هل الدين الا الحًب}

{{للشاعر: الميرزا عادل الاشكناني}}

➖➖➖➖➖
لسماع قصيدة ((وهل الدين إلا الحب)):
رابط المشاهدة على اليوتيوب:
https://youtu.be/DufBef9mpA8USBlPtE6SHg

قناة القصائد المكتوبة للملا محمد باقر الخاقاني:
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani

{{حـب جـرحــك}}

١/العشگ .. حُب جرحك قريته
صدگ .. بس دربك لگيته
الدمع .. لمصابك جريبته.. حسين

شگد عشت بحياتي ومرّن ادروب
العاشرته وْيه گلبي ما توالم
مثلك ماشفت مولاي محبوب
ومثل "عالم خدمتك" ماكو عالم

دربك سيدي وحده
يدلّي الضايع برشده
الـ عنده كلشي ماعنده.. بدونك
لا بعده ولا قبله
ابد ما ينوجد مثله
رفعه ومنزله الذله.. لعيونك

{حبيبي حسين}

٢/
طحت .. وبس يمك سؤالي
صحت .. غيّر هذا حالي
عسى ..  اببابك بس وصالي.. حسين

الحب ما حده يا هالناس قانون
بس لو ينخسر صعبه إيتعوض
دخيل الغَيّر بلحضه وجه جون
سَوّي وياك گلبي سيدي ابيض

حبك يخْتلف لونه
كمال العقل بجنونه
قريته وقدوتي "جونه".. حبيبي
قليل بحبك المدمع
عسى بطاريك من أسمع
روحي من الجفن تطلع.. نصيبي

{حبيبي حسين}

٣/
أحب .. بس بيك المحاچي
ذنب .. يومي ابلا بواچي
منو .. عن حبك احاچي .. حسين

تفاسير الدمع ما الهن احدود
منها يدلن اعله الحب الامثل
الخب ابلا دمع ما چنه موجود
بس ويه الدمع مامنه أجمل

دمعتك كلها حنيه
مفتاح الگلب هيّه
اليحب بصادق النيّه.. دليله
دمعته بخده ماتنشف
واذا تبطي الها يتلهف
وسببها شما إله اتوصف.. يجيله

{حبيبي حسين}
٤/
وهم .. عمري ابلا نواعي
ندم .. وبدمعاتي ساعي
شفت .. ابلا دمعي ضياعي.. حسين

دمعات اعتذاري للزمن ذاك
الراح وما شفت بعيوني صبحك
ندمان اعْله عمري الما گضه وياك
شيرده بعد وابچي اعله جرحك

أغسل وجهي بدموعي
أنوح وانته موضوعي
واديّه تشابگ ضلوعي.. بعزائي
أريدن عيشتي هايه
زياره.. خدمه.. مشايه
نوح ودمعه وقرايه .. رجائي

{حبيبي حسين}
٥/
علم .. لطاريّه حسرتي
لخيم .. تتوجر جمرتي
أحس .. ياريت بغربتي .. حسين

أنوح وياكم شلون الزمن دار
وكل حزني حبيبي لـ هالمصيبه
أنحب للذي ما صاير وصار
علويه لبني هاشم غريبه

الجرح ما تبرد آهاته
تزيد بعيني دمعاته
الى الـ ما لا نهاياته .. وْ ونينه
يمحبوبي ودمع عيني
وصل مابينك وبيني
لمصابك دمعي وسنيني .. رهينه

{{جروح: السيد مرتضى الياسري}}

➖➖➖➖➖
لسماع قصيدة ((حب جرحك)):

رابط المشاهدة على اليوتيوب:
https://youtu.be/5Zvuu067cAU

قناة القصائد المكتوبة للملا محمد باقر الخاقاني:
https://www.tg-me.com/القصائد المكتوبة للملا محمد باقر الخاقاني/com.latmiyyatalkhakani