#قصص_القرآن_للأطفال

🐄قصة بقرة بني إسرائيل🐄

🌸 كان ياما كان وما يحلى الكلام
إلا بذكر النبي .... محمد عليه الصلاة و السلام ..

🌸 اللهم صل علي سيدنا مُحَمَّد

🌸 كان في ناس عايشين مع بعض اسمهم بني إسرائيل

🌸 وكان عايش معاهم شاب فقير لكن المشكلة مش في فقره

🌸 المشكلة ان أخلاقه مكنتش حلوة وكان عمه عنده فلوس كتير و بنت عمه جميلة أوي

🌸 وكان الشاب ده عايز عمه يموت بسرعة علشان ياخد فلوسه ويتجوز بنت عمه الجميلة

🌸 لكن عمه عاش كتير وكانت صحته كويسة جدا

🌸 ففكر الشاب ده في خطة علشان يقتل بيها عمه

🌸 وفي ليلة من الليالي قتل فعلا عمه وعلشان الناس متعرفش إنه قتل عمه حطه قدام بيت حد من قرايبهم علشان الناس تفتكر إنهم هما اللي قتلوه

🌸 ومش بس عمل كده ده كمان قعد قدام الباب يعيط وعمل نفسه حزين على موت عمه

🌸 وقال للناس لما اتجمعوا إن أهل البيت ده هما اللي قتلوا عمي

🌸 فخرج أصحاب البيت وحلفوا إنهم معملوش كده

🌸 والناس مبقتش عارفة تعمل إيه ولا تصدق مين

🌸 فاتفقوا إنهم يروحوا لسيدنا موسى عليه السلام وحكولوا اللي حصل

🌸 حاول سيدنا موسى إنه يعرف مين القاتل فواحد من الناس قال لسيدنا موسى إسأل ربك علشان يقولك مين القاتل

🌸 فسأل سيدنا موسى الله عز وجل فأمره الله إنه يقولهم لازم تدبحوا بقرة علشان تعرفوا مين القاتل

🌸 فأستغرب الناس وقالوا لسيدنا موسى إنت بتتريق علينا وبتستهزأ بينا ؟!

🌸 فسيدنا موسى قال أنا مقدرش أقول حاجة ربنا مقالش عليها

🌸 وهما لو كانوا ناس بتعرف تفكر صح كانوا سمعوا الكلام ودبحوا البقرة اللي قال عليها لأن ربنا مطلبش أي حاجة غير إنهم يدبحوا بقرة

🌸 ولكن هما صعبوا الموضوع عليهم فسألوا سيدنا موسى عن عمر البقرة فقالهم لا هي كبيرة ولاصغيرة

🌸 وسألوه كمان عن لونها قالهم لونها أصفر فاقع أوي لما الواحد بيبصلها بيبقى مبسوط ومرتاح

🌸 فقالوا لسيدنا موسى بس في بقر كتير بالأوصاف دي إسأل ربنا عن أوصاف توضح لنا أكتر شكل البقرة

🌸 وأول ما نعرف شكل البقرة دي هنسمع كلام ربنا وندبحها

🌸 قالهم سيدنا موسى لونها أصفر سادة خالص من غير أي بقعة فيها

🌸 وكمان مش بتعرف تقلب الارض بالمحراث و تسقيها زي باقي البقر

🌸 فقعدوا يدوروا على بقرة بالشكل ده لحد ما لقوا بقرة واحدة بس فيها كل الأوصاف دي

🌸 وكان صاحبها ولد فقير باباه مات وهو عايش مع مامته

🌸 فراحوا علشان يشتروا البقرة منه فلما قالهم ثمن البقرة مكنوش عايزين يدفعوا له كل الفلوس دي

🌸 وكانوا بيقعدوا يتناقشوا مع بعضم على ثمنها ويرجعوا للولد تاني فيروح الولد مزود السعر

🌸 وفضلوا كده لغاية ما طلب منهم إنهم يوزنوا البقرة ويعطوه قد وزنها ذهب

🌸 فوافقوا في الآخر لأنهم ملقوش بقرة غيرها ودفعوا للولد فلوسه

🌸 فبقى الولد ده اكتر واحد معاه فلوس فيهم كلهم

🌸 وده بسبب إنه بيسمع كلام مامته وبيساعدها دايما

🌸 وبعدين بني اسرائيل أخذوا البقرة وذبحوها واخدوا جزء منها وضربوا على الميت

🌸 فقام الميت وقالهم إن ابن أخي هو اللي قتله

🌸 وبكده اتعاقب القاتل وحرموه من فلوس عمه ومعرفش كمان يتجوز بنت عمه

🌸 ومن ساعتها وربنا حرًم على أي قاتل إن هو ياخد من فلوس اللي قتله

🌸 واتعلمنا من القصة دي إن المسلم مينفعش يكون طماع ولا ظالم ولا يقتل حد علشان ربنا ميزعلش منه ويعاقبه

🌸 وكمان المسلم مينفعش يكذب ويقول على حاجة حصلت وهي محصلتش

🌸 واتعلمنا إنه لازم ننفذ اللي ربنا أمرنا بيه من غير ما نسأل لأن ربنا عارف الصح من الغلط

🌸 ولأننا لما نسمع كلام ماما وبابا ربنا بيوسع في رزقنا زي الولد صاحب البقرة ما بقى أغنى واحد في المدينة كلها

🌸 وآخر حاجة ممكن نتعلمها من القصة إن زي ما ربنا خلى الميت يصحي هيخلي كل الناس اللي ماتت تصحي تاني يوم القيامة علشان يحاسبهم على أعمالهم

🌸 واللي بيعمل صح هيدخل الجنة واللي بيعمل غلط هيدخل النار

🌸 وبكده تكون خلصت قصة النهارده

🌸 ومعادنا بكرة إن شاء الله مع قصة جديدة من قصص القرآن الكريم

🌸 تصبحوا على خير يا حلوين

🌸 وصل اللهم وسلم على محمد
🌸🍃🌸🍃🌸🍃
✍🏻 للتواصل @ManarRiad
إقرأ 📚 وانشر 📬 تُؤْجَرْ
https://www.tg-me.com/سيرة وقصص للأطفال/com.seerawqass

#سيرة_امهات_المؤمنين

🌴 السيدة زينب بنت جحش رضي الله عنها(3)والأخيرة🌴

🌻كان ياما كان و مايحلي الكلام
إلا بذكر النبي .... محمد عليه الصلاة و السلام ..

🌼اللهم صل علي سيدنا مُحَمَّد

🌻كنّا بنحكي عن آيات القرآن اللي نزلت في بيت السيدة زينب

🌻الرسول عمل عزومة كبيرة لما تزوج السيدة زينب

🌻لكن الناس اللي كانت بتاكل فضلت قاعدة تتكلم وتضحك بعد الأكل والرسول كان تعبان ومكسوف يقول لهم الفرح خلص

🌻فربنا نزل آية٥٣ سورة الأحزاب واللي بتتكلم عن إنهم لما يبقوا معزومين عند النبي ياكلوا ويمشوا على طول وإحنا كمان لازم نعمل كده لما نبقى معزومين عند حد لأنهم أكيد تعبوا في تحضير الأكل وعايزين يرتاحوا

🌻وبتتكلم كمان عن الحجاب إنه بقى فرض

🌻وبتتكلم عن زوجات الرسول إنهم أمهاتنا وطبعا مينفعش حد يتجوز أمه فربنا قال في الآية دي إنه مينفعش حد يتجوز زوجات الرسول بعده

🌻وهي دي الآية اللي بتتكلم عن كل المواضيع دي⬇️

{يَا أَيُّهَا الَّذِينَ آمَنُوا لاَ تَدْخُلُوا بُيُوتَ النَّبِيِّ إِلاَّ أَنْ يُؤْذَنَ لَكُمْ إِلَى طَعَامٍ غَيْرَ نَاظِرِينَ إِنَاهُ وَلَكِنْ إِذَا دُعِيتُمْ فَادْخُلُوا فَإِذَا طَعِمْتُمْ فَانْتَشِرُوا وَلاَ مُسْتَأْنِسِينَ لِحَدِيثٍ إِنَّ ذَلِكُمْ كَانَ يُؤْذِي النَّبِيَّ فَيَسْتَحْيِي مِنْكُمْ وَاللَّهُ لاَ يَسْتَحْيِي مِنَ الْحَقِّ
وَإِذَا سَأَلْتُمُوهُنَّ مَتَاعًا فَاسْأَلُوهُنَّ مِنْ وَرَاءِ حِجَابٍ ذَلِكُمْ أَطْهَرُ لِقُلُوبِكُمْ وَقُلُوبِهِنَّ وَمَا كَانَ لَكُمْ أَنْ تُؤْذُوا رَسُولَ اللَّهِ وَلاَ أَنْ تَنْكِحُوا أَزْوَاجَهُ مِنْ بَعْدِهِ أَبَدًا إِنَّ ذَلِكُمْ كَانَ عِنْدَ اللَّهِ عَظِيمًا}
[الأحزاب: 53].

🌻كانت -رضي الله عنها ليها مكانة كبيرة عند رسول الله

🌻وكمان عند أمنا عائشة كان ليها مكانة كبيرة

🌻فالسيدة عائشة بتقول كانت زينب هي التي تساميني من أزواج النبي يعني بتنافسني

🌻وبتقول ولم أرَ امرأة قطُّ خيرًا في الدين من زينب، وأتقى لله، وأصدق حديثًا، وأوصل للرحم، وأعظم صدقة، وأشدَّ ابتذالاً لنفسها في العمل الذي يُتصدَّق به، ويُتقرب به إلى الله

🌻 يعني السيدة عائشة بتشكر وبتمدح في السيدة زينب

🌻وبتقول عليها إنها بتتقرب لربنا على طول وصادقة دايما تقول الحقيقة وبتهتم بأهلها وبتتصدق كتير على الفقرا

🌻وخصوصا بعد حادثة الإفك اللي حصلت للسيدة عائشة

🌻 لما الرسول سأل السيدة زينب عن رأيها في اللي بيحصل

🌻قالت للرسول أحمي سمعي وبصري ما علمت إلا خيرا

🌻يعني وقفت جنب السيدة عائشة مع إنهم قبل الحادثة دي كانوا بيغيروا من بعض

🌻لكن غيرة السيدة زينب مأثرتش عليها وقالت الحق علشان كده السيدة عائشة قعدت تقول على السيدة زينب الكلام الحلو ده

🌻والسيدة عائشة رضي الله عنها
بتحكي وبتقول

🌻أن زوجات الرسول اجتمعوا عند الرسول وهو تعبان في مرض الموت وقالوا له

🌻مين فينا اللي هتموت بعدك يا رسول الله وهتكون أول واحدة تقابلك

🌻فالرسول قال أطولكن يداً

🌻فقعدت كل واحدة تقيس إيدها فكانت السيدة سودة أطولهن يدًا،

🌻وبتحكي السيدة عائشة وبتقول فعرفنا بعد كده إن الرسول كان قصده أكتر واحدة كانت بتحبُّ الصدقة

🌻وطبعاً طلعت هي السيدة زينب بنت جحش أول زوجة للرسول ماتت بعده

🌻وفضلت السيدة زينب رضي الله عنها كريمة وبتصرف كل فلوسها على الفقرا

🌻فبعد ما الرسول مات سيدنا عمر بعث إلى أمِّ المؤمنين زينب بنت جحش رضي الله عنها بالمرتب بتاعها

🌻فقالت: "غفر الله لعمر! أنا هعمل إيه بكل الفلوس دي

🌻فقالت للخادمة بتاعتها برزة بنت رافع حطي فستان كبير يغطي الفلوس و اعملي كذا كيس فلوس من غير ما تعدي وروحي وزعي الأكياس على أقربائي الفقرا وحددت لها كذا بيت للأيتام

🌻فقالت لها برزة: غفر الله لكِ! والله لقد كان لنا في هذا حظ يعني كان من حقنا على الأقل ناخد مصاريفنا

🌻فقالت السيدة زينب فلكم ما تحت الثوب يعني لِسَّه فاضل شوية فلوس تحت الفستان

🌻قالت فرفعنا الثوب فوجدنا خمسة وثمانين درهمًا

🌻وبعدين السيدة زينب رفعت إيديها تدعي وقالت: "اللهم لا يدركني عطاء لعمر بعد عامي هذا يعني يا رب قبل ما ييجي معاد المرتب اللي بعد كده أكون أنا قابلت الرسول لأني تعبت من الدنيا

🌻وفعلاً ربنا استجاب لدعائها وماتت أمنا زينب بنت جحش

🌻وقبل ما تموت اشترت الكفن بتاعها ووصت أختها لو سيدنا عمر بعت لها كفن بعد لما تموت تتبرع بواحد منهم للفقرا

🌻والكفن ده قماش بيلفوا فيه الميت

🌻وسيدنا عمر عمل للسيدة زينب صندوق علشان يحطوا السيدة زينب فيه ومحدش يشوف السيدة زينب وهما رايحين يدفنوها

🌻وفي سنة ٢٠هجرية ماتت السيدة زينب وكان س يدنا عمر هو الخليفة

🌻وكان عندها ٥٣سنة وادفنت في البقيع رضي الله عنها وأرضاها

🌻وبكرة إن شاء الله معادنا مع السيدة جويرية بنت الحارث

#قصص_القرآن_للأطفال

🔦 قصة الملكين هاروت وماروت

🌸 كان ياما كان وما يحلى الكلام
إلا بذكر النبي .... محمد عليه الصلاة و السلام ..

🌸 اللهم صل علي سيدنا مُحَمَّد

🌸 هنحكي النهردة قصة ملكين من الملائكة اسمهم هاروت و ماروت

🌸 وهما ليهم قصة مع سيدنا سليمان هنعرفها هي كمان

🌸 الشياطين الوحشين كانوا متعودين يطلعوا ويقعدوا في أماكن في السما علشان يسمعوا كلام الملائكة و يعرفوا ايه اللي هيحصل في الأرض

🌸 يعني مين اللي هيموت ومين اللي هيسيب شغله ويعرفوا أخبار الناس اللي متعرفهاش

🌸 وكان الناس بيروحوا للسحرة والكهنة ودول ناس وحشين بياخدوا فلوس من الناس علشان يضحكوا عليهم و يقنعوهم انهم بيعرفوا ايه اللي هيحصلهم مع إنهم كانوا بيخادوا الأخبار دي من الشياطين

🌸 فالناس بدأت تصدق السحرة والكهنة و بقوا يسمعوا الكلام اللي بيتقال و يزودوا عليه كلام من عندهم

🌸 ويكتبوا الكلام ده في كتب وانتشر في بني إسرائيل إن الجن بتعرف الغيب وتقدر تقول للناس إيه اللي هيحصلهم بكرة والشهر الجاي والسنة الجاية

🌸 و الغيب ده حاجات لسه محصلتش في الأرض

🌸 ولما ربنا بعت سيدنا سليمان عليه السلام وسمع الكلام ده زعل أوي لأن مفيش حد يعرف الغيب واللي هيحصل بكرة غير ربنا

🌸 فجمع سيدنا سليمان كل الكتب اللي الناس كتبتها وحطها في صندوق ودفنها تحت الارض تحت الكرسي اللي بيقعد عليه

🌸 وقال للناس مش عايز حد يقول الكلام ده تاني واللي هيقول كده هعاقبه عقاب شديد وهيموت بالسيف

🌸 ومكنش حد من الشياطين يقدر يقرب من كرسي سيدنا سليمان عليه السلام و اللي كان بيقرب منهم بيتحرق علطول

🌸 ولما مات سيدنا سليمان عليه السلام سافر العلماء اللي كانوا عارفين الكلام ده لأماكن بعيدة علشان يعلموا الناس التانية

🌸 وبقى الشيطان يظهر في صورة إنسان لبني إسرائيل ويقولهم أنا هدلكم على كنز كبير أوي علشان تبقوا أغنياء

🌸 وقالهم يحفروا تحت الكرسي بتاع سيدنا سليمان وشاور لهم من بعيد علشان هو عارف إنه لو قرب هيتحرق

🌸 وفعلا حفر بني إسرائيل الأرض ولقوا الكتب مدفونة تحت الارض

🌸 والشيطان قال لهم إن سيدنا سليمان كان كاتب في الكتب دي سحر ومن خلاله بيقدر يتحكم في كل حاجة حواليه

🌸 و بدأت الناس تتكلم وتقول إن سيدنا سليمان كان ساحر وفضلت الناس فاكرة كده لحد ما ربنا بعت سيدنا محمد عليه الصلاة والسلام وأنزل في القرآن آيه في سورة البقرة (و ما كفر سليمان ولكن الشياطين كفروا)لأن السحر كفر

🌸 وكان في راجل اسمه آصف والراجل ده هو اللي كان بيكتب لسيدنا سليمان وكان عارف اسم الله الأعظم

🌸 وكان بيكتب كل حاجة سيدنا سليمان بيقولها وبعدين يدفنها تحت الكرسي بتاعه

🌸 فلما مات سيدنا سليمان أخدت الشياطين الكتب دي وكتبت بين كل سطرين سطر فيه سحر وكفر علشان الناس تصدقهم

🌸 وكان فيه مدينة في العراق اسمها بابل واليهود نشروا في المدينة دي السحر وبقوا الناس خايفين أوي

🌸 فربنا سبحانه وتعالى نزل في المدينة دي ملكين من السما اسمهم هاروت وماروت

🌸 وكانت اليهود بتقنع الناس إن الساحر يقدر يضرهم لو مسمعوش الكلام وينفعهم لو سمعوا الكلام

🌸 علشان كده ربنا أمر الملكين اللي بعتهم علشان يفهموا أهل بابل الحقيقة ويخلصوهم من اليهود الوحشين و من الخوف اللي كان عندهم بسبب السحر

🌸 فكانوا بيعلموا الناس في بابل السحر إزاي بيتعمل علشان الناس تعرف إزاي السحر ده بيتعمل وإيه حقيقته و تبطل تخاف منه

🌸 وفهموهم إن السحر ده ممكن أي إنسان يتعلمه زي أي علم من العلوم وإن الساحر لا يمكن أن يضر ولا ينفع شخص إلا بأمر ربنا

🌸 وكانوا بيقولوا للناس إحنا علمناكوا بس علشان متخافوش لكن مش المفروض تعملوا بيه حاجة وبعديها طلع الملكين السما تاني

🌸 ولكن أهل بابل مسمعوش كلام الملكين الكريمين واستخدموا السحر اللي اتعلموه في الشر والحاجات الوحشة

🌸 وطبعا ربنا زعل منهم و غضب عليهم علشان هما مسمعوش الكلام

🌸 واتعلمنا من القصة دي إن محدش يعرف الغيب غير ربنا سبحانه و تعالى

🌸 و ان بعد ما جه سيدنا محمد عليه الصلاة والسلام مبقتش الشياطين تعرف تسمع أي حاجة من السما لأن ربنا كان بيخلي حاجة اسمها الشهب تحرقهم والشهب دي نار طالعة من السما بتحرق أي شيطان يحاول يسمع

🌸 واتعلمنا إنه مينفعش نقول أي كلام على أي نبي من الأنبياء اللي بعتهم ربنا لأن السحر ده كفر بربنا والمفروض إن الساحر يتقتل

🌸 وإنه مينفعش أي مسلم يتعلم السحر أو يروح لواحد ساحر علشان لو عمل كده ربنا مش هيقبل صلاته لمده أربعين يوم ده لو مصدقوش ولو صدقه هيبقى كافر ومش هيدخل الجنة

🌸 ومعادنا بكرة إن شاء الله مع قصة طالوت وداوود وجالوت

🌸 تصبحوا على خير يا حلوين

🌸 وصل اللهم وسلم على محمد
🌸🍃🌸🍃🌸🍃
إقرأ 📚 وانشر 📬 تُؤْجَرْ
https://www.tg-me.com/سيرة وقصص للأطفال/com.seerawqass