اللهم عجّل لوليك الفرج

(انته اسير وانه اسيره)

احبال هجرك فوگ گلبي..عدمن احلامي الزغيره
انته اسير وانه اسيره
يالتسيّر الماي هونك..عني وجهك لا تديره
دامنه بت وابوها..انضرلي بوية نضره أخيره
حته لو تذبحني بيهه
المهم انضرلي يبوية نضره اخيره
بس تعتب باب بيتك
انته اسير وانه اسيره
لكلشي اعطش من تسافر..عطش خوه..وعطش ماي
وعطش حيره
وأعطش لريشات لعمي..ويكتل اليعطشله غيره
انته اسير وانه اسيره
بوية يا كسران ضهرك..ابيتي قبل العاشر انه جربيته
ثاري سگف البيت عمنه وسگفي طاح أودعيته
يعينك الله..يعينك الله
باجر بجفك تطيح سكف بيته
باجر الغربه الجبيره..انته اسير وانه اسيره
كلشي عشته وياك بوية
وانذبحلك...
وبله دم ذبح المشاعر
ساعه اعيشك يم عليلة
وساعه اعيشك من تسافر
وخوفي باجر
ساعه اعيشك جوه خيمه
وساعه اعيشك جوه حافر
وينثر صدرك عبيره..انته اسير وانه اسيره
انته مو بس يتمتني..من مشيت بهالضعن
قبر جدك..قبر امك..والجرح قبر الحسن
بوية كلهن..اويه العليلة اتيتمن
اوية العليلة اتيتمن
ياهو يمهن يبجي باجر
ياهو يمن يلفي زاير..وانته نوگك حملن
الفاتحه اقراها عليهن
وارجع اقراها عليه
الما يفك ريجه بحنانك
عيشته نفسه المنيه
من أاشرلك واودعك..تذبح بگلبي اديه
وهسه وجهي وين اديره
انعدمت احلامي الاخيره
انته اسير وانه اسيره

#خروج_الضعن

ذكر الطفوف ويوم عاشوراء...منعا جفوني لذة الاغفاء
لم انسهُ لما سرى من يثرب..بعصابة من رهطه النجباء

طلع من المدينه الضعن جيدوم
وجبير العايلة المتصدر الگوم
رشدت نيه حسين وبده يسوم
وحط انياط گلبه اعللمحامل

بمكه ونوخ اضعونه ويحج رايد
جمر وادع جمر ماضل گلب بارد
وضل يتشكر المعبود للعابد
__
لله كم قطعوا هنالك مهمهاً..تكبو الرياح به من الاعياء
حتوا اتوا ارض الطفوف بنينوى..ارض الكروب وارض كل بلاء

المناية تسير وي نوك المجبلين
بجثير اهموم وانصاره الجثيرين
بصدر عالي وجلاله ونور بجبين
اسموم البر كطعها وحط الارچاب

بلجي بهايه كاعه ايخضر اشتاله
اجه وبضعونه جاب حسين جتاله
الاقدم والرسايل تارسه ارحاله
___
حطو الرحال فذا محط خيامنا..وهنا تكون مصارع الشهداء
وبهذه يغدو جوادي صاهلاً..مرخى العنان يجول في البيداء

هنا مهري ايتلخط ضهره بدماي
هنانه اخسر الواي وحامل الواي
هنا زرگه الاشفاف ويجتل الماي
هنا حج البواتر فوك النحور

غربَل للمنايا وحط رگب خشنه
شما لله رفع جفه جثر حزنه
هذن جفوفه باجر مذبح لابنه
____
أمجدل الأبطال في يوم الوغى..ومنكس الرايات في الهيجاء
هذا حبيبك في الطفوف مجدل..عار تكفنه يد النكباء

اجبل يا علي ولم شمل الاعيال
خلت هاشم مضاربها امن الابطال
اجبل يبو حسين حسين خيّال
ما ترهم ابين الخيل مطروح

ها يالحاضر اسليمان ما تحضر
ما بين الشمس وابين رمل البر
جثثكم يا علي بتراب تتعفر

الشعر الفصيح
الشيخ محمد الاعسم
الشعر الشعبي

يبوفاضل دخيلك..يا عين الزجية
بسم الزهره اريدك..تحط عينك عليه

ردت منك يبو روحي
تصب ملحك على جروحي
طفل ضايع لكاه كافل
الكاني يبوفاضل

يا شهم يالماكو يمك مستحيلة
اعطي مسكينك عطاياك الجميلة
غيّر بصدره الهوى وبدّل دِليلة
دخيلك..دخيلك

قمر هاشم سيدي وكافل نعمتي
ارد اقر بالرق الك وأذبح عثرتي
رايد اتذلل واناجيك بدمعتي
ذليلك..ذليلك

يا ابوفاضل يا ابوفاضل
_______
بعز الحب اخافك..لا لجروحي انسه
وكل خوف اليمسني..منك ابقه اقدسه

خفت لا اخسر دموعي
خفت مو انته موضوعي
بمحبتك خوفي سواني
يبوفاضل شخص ثاني

يذكرك الصادق دخيلة شمحله ذكره
عميّ العباس محد وصل گدرة
يسوي الف سلمان لو ينضرله نضره
طلبتك..طلبتك

يعني برموشك معسكر للهواشم
وساحل عيونك مخيم للفواطم
ياهو التباوعله صار وياك خادم
نضرتك..نضرتك
__________
من نحجي بمراجل..لازم انته تعرض
ولوصارت فراضه..غيرك ياهو يفرض

غيّر بالگلب غيّر
دخيل بجفك اليستر
عليه أفرض برايك
ومشيني على مايك

النخوه خرسه تصير اذا مو انته بيهه
بلا اسمك ناسنه ماصخ حجيهه
سيدي اجفوف الخلگ ليش ارتجيهه
شتاني..شتاني

شوگي مابذرة وتضل انته اشتياقي
ايد غيرك ليش اتاني وانته ساقي
خير غيرك زايل وخيرك الباقي
أماني..أماني
________
..
شما هبت هواشم..عطرك لازم يهب
لو نكتب عقيلة...جفك يبقه يكتب

عطر غيره يهب صدرك
ويحير الرايد يشكرك
الخير البينه والخدمه
منك يا ولي النعمه

كل شرف مصيون بين ايديك صنته
شكو ايد انمدت التارسهه انته
بأمرك يرف شكو شارب راف لاخته
بحميتك..بحميتك

شكو رجفة غيرة من عرجك يحامي
يصب علينه الماي من جودك يضامي
ارتجي منك يضل دمعي اهتمامي
ارتجيتك..ارتجيتك
_________
هنياله اليعاشر..هالنضره الكريمة
اليوكع من عيونك..ما تبقاله قيمة

البقه بعيونك اتدلل
اليفارگ نضرتك ينذل
وردت منك ثباتي وياك
يبوفاضل صحت بحماك

روحي من نفسي المسيئة تشتكيلك
شما انهز غربيلك اصرخلك دخيلك
مغريات الوكت اعبرها و اجيلك
يحامي..يحامي

عالثبات بعالمك تدعيلي امي
لا تخيبهه وتزيد اعليه همي
من تعّد الخدم صيح اوياهم اسمي
يضامي..يضامي

#ياعلي_الاكبر
دخيل مروتك❤️

علي جاي بيا علي من يا حسين
ويا حسين بيا علي عاش العمر

همس بأذن ابنه علي باليا علي
ويا علي باليا علي ضل مبتشر

يا محط ارحال تعب اهلك اجيت
وعمك العباس كسّر كل عطر

الليلة هاشم بيك تتعطر تريد
ياذخرهه وللشدايد منذخر

امبرگيعك امك وابوك امن الجمال
جا شطالع بالعمامه وبالخضر

غصن فوك الخيل ما هزاك ريح
وليلى تتشيم هلا بأبني البچر

ثلج نازل بالحرب من البياض
ثلج بس اتكطر جفوفك جمر

الملوك اتصيد ارانب من تصيد
وانت تتصيد رگب وين الجسر

علي اشتقوا من علي اسمه ولگوه
جن محمد وي عليهم منشطر

ويا علي هم جن محمد بالنزال
علي جان بيا علي من ينتصر

علي الاكبر عاش ابوك وياك غير
مو قصص حب لا علي قصة أسر

دام ترمش يعني دك گلب الحسين
وبس تغمض گلب ابوك الينخسر

حسين يمشي لخيمتك لو مره ضيم
فوك حضنك  خده يبقه ويستقر

ليش ما خليتله بحضنك مكان
وتدري بحسينك غريب ومنخطر

فوك خدك خله خده اعللتراب
ومنهه كام يبان بحسين الكبر

علي الاكبر يا ترافة گلب ابوك
ارمش وخل يدگ كلبه المنكسر

حرك ايدك احجي كلمه بأسمي صيح
يا حسين بيا علي عاش العمر
وبس تغمض گلب ابوك الينخسر

ما اريد ما اريد
كلشي من هالدنيا احلف ما اريد
لا ردت جاه ووجاهه
ولا ردت البس جديد
بس ردت اكتب جراحك
وامك الزهره تون وتكلي عيد

اللهم عجّل لوليك الفرج
#كي_لاننسى
#بقيعنا_مطلبنا

#ياعلي
#اللهم_عجل_لوليك_الفرج


الرحمه تجبرني اطيعك..وبرحمتك جبر راضي
بعد ماريدن اعارض
ليش اعارض..؟
وانتم المكتوب يتغير بديكم
ما يغيره اعتراضي
الدنيا تهمتني واجيت اعليك ساكت
جاي دافع..؟ عيب ادافع!!
والتحسابني رحمتك وانته قاضي
بمحكمة حب وابجي سكته
وجنت مؤمن
حته المسويهن اتطيحهن انته
وين مثلك الگه راحم يرجع ايغير الماضي
ما يبقي حسين ماضي
وماريدن ماضي ما بي ذكرياتك
وهب محد يذكر شعاش بصليبه
بيا طفوله..؟؟ شلون قصته..؟؟
بس دريناه بيك حاضي
واحنه نعشگ شكو واحد بيك حاضي
وانته حج اگلوب حجك
لون جون الحجر الاسود
وبسوادي احرملك ويرجع بياضي
وهذا حجك ما يخيب
بينه ارحم يا غريب..وخل نجرب حب حبيب
براحة مات اعليك مره..وماتلك نص اللهيب
فوك سطح الدار والمنضر عجيب
لمح حسنك..شاف طولك..سمع صوت
سمع صوتك گال اموت
شلون من يسمع نخوتك
وماكو ناصر لا مجيب..وبس صداك يرد عليك شهالسكوت
من فتت داره كتلته..شلون بالعاشر بگلبه من تفوت
حب حبيب ايميز الحب
ياهو گلبه وياك مملي وياهو گلبه وياك فاضي
والبقيع يحدد النه
ياهو ياخذ جمل ليلك..وياهو حبه انتفاضي
ياهو ينطي الرگبه ساكت
وياهو شارد وامتعاضي
شما تمر ذكرى هدم ذيج المقابر..يعني مر علينه عاشر
وذاك من ذاك البقه الغرقدك ناصر
حب حبيب البضماير
والحليب الوفي الطاهر
ونصرة المهدي بغربته
ورضا جبار الخواطر
ذني كلهن بيهن احضه..لو بنصرة غرقدك مولاي حاضي
وخلي كل الدنيا تحجي
وانه ساكت..عيب ادافع وانته قاضي

جبيرة هاشم وهاشم خدر مبخوت
وهذا الشام يكره كل عفاف ابيوت
عزيزه ام عون ما ترهم غريبة تموت

بالشام الاگشر غمضت بجنازه جانت مايلة
___________
مره لوغمضت عادتنا يا هالناس
بلا بيرغ فواتحنه وعكس هالساس
تستاهل بيارغ زينب العباس

كون البيارغ كل شبر أم عون هاي الشايلة
___________
كفيلة وكافله ومعصومه بت معصوم
جبيرة خدر راحت من ادينه اليوم
دار اهل الشرف منه ركن مهدوم

وهاي أم خدركم غمضت ياكافل اغبش ليها
___________
ميته وما مغمضه وبيها ونار افراگ
يموت وفاك عينه بموتته المشتاگ
بلجي يغير اخوها حسين من لعراگ

ويحسين اخيتك ناطرت جفك يغمض عيونها
____________

#ياعلي_الأكبر دخيلك
مناجاة قلبي القبيح البذيء
لرب الجمال والوسامه والطهاره
راجياً أن يتصدق علي برحمته


يم شبابك اشكي واطلب
تغيّر بشبابي
لو علي تمد جفوفك
لو يحل عذابي

الدنيا بگلبي تطلبني..وخدي بدمعي ناكع
واگل للدنيا يا دنيا..بعد ما اعيش ضايع
علي الاكبر اخذ بيدي..وربيت اعللمواجع

گلبي بحسنك كون تذبحه
من هاي الدنيا وخل يصحه
ليش يربي لغيرك جرحه
وانته مصابك حدر الروح

كطّر من ضي وجهك بيه
اشعل جمراتي المطفية
ياهي العدكم ما مسبيه
وياهو العدكم ما مذبوح


أرد احزنلك اكثر واكثر
ادخيل ابابك ياعلي الاكبر
________
ماكو وصفك بقصيدة
ولا يوصفه شاعر
بس توصفك المدامع
التغلب المشاعر

علي الاكبر علي الاكبر..روحي استنجدت بيك
طفل عاثر رفع جفه..انقذه وخل يواسيك
وي عيون ابوك حسين..عيوني تريد تبجيك

حچي الناس يغر امروتك
كون بأذني تسمّي بصوتك
ابختني واجرح مبخوتك
وغذيني الألام

كون اسمع اذانك باجر
بضهرية العاشر يا عاشر
صح مو كدري ولاني الطاهر
بس كدرك أكرام

علميني ابجيلك حته اطهر
ادخيل ابابك يا علي الاكبر
___________
ما اريدن اشكي گلبي
گلبي ما تغيّير
گلبي اريده يشكي مني
وحلها بيد الاكبر

دخيلك يا علي الاكبر..الغلط من عندي مو منه
گلب ابيض رزقتوني..ابيض معدنه وحزنه
بشبابك ارحم البيه..اسود فشله اردنه

مّن يا منان بأحسانك
گلبي اسود لونه بألوانك
ويوسف جرحي ابير احزانك
ارمي يا مولاي

خل جرحي لمجروحك نازف
وابقه بحبك اعمه وخايف
رحت وطف بخيامك عايف
كون ابجيك لهاي

بركض اطفالك كون اتأسر
ادخيل بابك يا علي الاكبر
________

غربة حبيبي رسول الله صلى الله عليه واله
بعد فقدة كافله مولاي ابو طالب صلوات الله عليه
وحبيبته مولاتي خديجة صلوات الله عليه

يا رسول الله حبيبي..يا غريب شهالجروح
ام زهرتك يا محمد..الليلة من ايدك تروح

وخمس اعوام سنين الزهره
وتتيم من أمها بحسرة
أنا اعطيناك الكوثر
والكوثر ضلت متحيره

الدين اتيتم ووي فاطمة انصاب
واويلي خديجة امصابها امصاب
هاي اول علامه لدفعة الباب

لولاها ولولا الكرار
ما قام الدين وما صار
____
لا أموال اعليك عزت..ولا تجارة ولا دلال
بت قصر عافت قصرها..وسكنت وياك الجبال

أبتر عنك گالوا امتك
وردتّهم جابتلك بتك
مثل المي عاشت بجفوفك
وضحتلك ياما ضحتلك

قريش ترامي جانت طولك احجار
وخديجة تحط جفوف الزهره الاصغار
فوك جروحك وبلسمها يندار

لو ما هذا الملگه الحار
ما قام الدين وما صار
____
العام الميتم زهرتك..جان عام شكد أليم
ابو طالب راح منك..وعلي هم امسه يتيم

بمكة ومنفي وعايش غربه
موت بموت وصعبه بصعبه
هم متغرب هم أم بيتك
وهم كفالك يوگف گلبه

خديجة وأبوطالب عام الاحزان
الجروح منين ما تندار عنوان
متغربة بغربتك كل الاديان

ولو ما صبرك يالمختار
ما قام الدين وما صار
____
دور ابو طالب يكمله..وي محمدنا علينه
وفاطمة وي حب خديجه..ترعه واتداري نبينه

شهالرحمه الموجوده هنانه
شهالبيت الما تكضي احزانه
شهالحنية اللازم تنزف
ويا هالذرية العطشانة

هذا البيت ما مقسوم يرتاح
عطش وسموم اه وحزن واجراح
وارثتهم الغربه ودمعه وانياح

ولو ما نازف دم هالدار
ما قام الدين وما صار

#ياعلي #ياعلي #ياعلي

اتگلب اويه الدنيا ما مره صفيت
اتگلب الحفاي من تسحگ جمر
گلبي يا صايغ يصدله يشمره غاد
احجار ما عدوه مره اويه الشذر
ومره صحت بياعلي وحيل انتشيت
وگلبي وي در النجف حسبوه در
ومنها صارت يا علي سلوه وسبيل
امهاجر وعالياعلي كمت استقر
وبقه بس هذا الاسم بيه حلال
وكلشي بالدنيا حرام وكلشي مر
افك ريجي بيا علي ويومي يهون
وابدي مر الناس اجرعه وابتشر
يا علي بوكت الحرايب سيف حاد
وياعلي بوكت الضجر جرعة صبر
الكلفه والهينه التصير وما تصير
والنفاهه والهداوه والزجر
الراحه والحب والكره والمغريات
والسماحه والتعصب والعذر
الماي والضي والهوه وليلي وسماي
وكل مساي وصبحي واشموس الظهر
ضحكتي وهمي وهضمتي ومستحاي
ودعوة أمي الراوية بوكت الفجر
بيا علي استطعمهن والتذ واعيش
ويا علي بالسهله والصعبه ذخر
ماكو شي يسوه اعيشله واهيم
غير كلمة ياعلي وهذا الذكر
وكل وكت ما بي علي هذا فراغ
عيب هذا الوكت ينعد عالعمر
تيبس اوراق المشاعر والدموع
ويا علي تخلي المدامع تنهمر
بيض الانياب اليبرزن بالنزال
وقبضة السيف البالجفوف السمر
والعيون الحومرن بالملگه غيض
والسيوف الردن وكلهن حمر
والصدور العاليه الما همهه ضيم
والدروع العالصدور وتنكسر
والمناية الرجفت طول الرعيع
والمنايه البيد ضيغم تنعگر
بكل شجاعه ليا علي تلگه اساس
وكل جبن مرجوع لشيوخ العهر
وتبقه هاي الياعلي مشعل ضواي
ودام دگ گلبي بعلي ما ينشمر

رجاء قلبي المُتعب
لرحمة الحُسين صلوات الله عليه

رحمتك بالصور مولاي
امبينه بعينك وتجذب
رحمتك وسعت الكلشي
ما توسع گلب مذنب..؟؟

گلبي علمه
ابجديه حبك احلى ابجديه
نضره وحده
تكفي وتعمر خرابي الصار بيه
ضگت قربك
وضگت بعدك والفرق بين عليه

رجعني.. دخيل بدورة عيونك
رجعني.. بحرگه الطم على ضعونك
أمن اليبجوك مو من اليبجونّك
.............................................
احب ابجيك بالضلمة
اخاف الدنيا تاخذني
وابجليك حيه امن الناس
وما صب دمعي من حزني

مستحه ابجي
وما ابجيلك سيدي والله هضيمه
راح اسلمه
كلبي بيدك سيدي وبجروحه ديمه
وفدوة علمه
النضره من غير ام حسن ما الها قيمه

اشطبني..من راس البشر مولاي
اشطبني..بكل لحضه انته مو وياي
وسجلني بسجل امك اهم شي هاي
....................................................
ما ريد الدرب يخلص
اكصّر خطوتي بمسراك
وحرام احسب وكت يحسين
اشمر ساعتي امن انعاك

كون وكتي
يوگف ويگضي بمصايب ذاك صبحك
عشت ميت
وانحييت بشهگه الزهره اعلذبحك
ووي ناسي
مو بزاد اتمالحت بدموع جرحك

كل عشره..امعاشرهه بخيم واهات
كل عشره..اتدووم بطيحه الدمعات
الناس الما تنوح اعليك ماضي ومات
....................................................
عشنه اجروح للزهره
ما عشنه الجرح للناس
من سنة السنة بخوفه
وقلقنه الليلة العباس

الدنيا ضلمه
والجرح والدمعه بيبان لسبيلك
هاي هضمه
نشم هوه وطايح عالشاطي كفيلك
بخوف عشنه
استوحدك من طاح عباسك جبيلك

تجرحني..عدوانك عليك اتطوف
تجرحني..بده أبخيمه رقية الخوف
عله جف العدو وعباس ماله جفوف
_____

#ثكيل

على الصادق دار حركوا..ودمعته تجّاره
وكام بدموعه يطفي..جمر بيته وناره
يطفّي بس يتذكر
نار خيمة وعسكر
يا غربته يا غربته
__
ها ينار شلون تكضي..شعدج اويه ال الهواشم
لا الزهره ولا بنتها..ولا الصادق داره سالم
يا جمر بس طفي روحك..لا تعاون ايد ظالم
كافي ثالث مره هايه ..تسحكك اجدام الفواطم

يا جمر مو كافي تجوي..بكلب هاي الساده
يا جمر بس من محمد..وكافي من اولادة
كافي بيهم تسعر
نار خيمة وعسكر
يا غربتة يا غربتة
__
يا رساله امن الله المن..تحترك دون الرسايل
ما قروكم والمجازه..بيوتكم يحركها عايل
انه اول مره ادري..تنورث نار المشاعل
ليش خلص كل عمركم..من ايد قاتل لايد قاتل

امن ايد قاتل لايد قاتل..والحرگ ما هدكم
املاوه وي الشر عمركم..راحه ابد ما عدكم
وذكرة عدكم بالبر
نار خيمة وعسكر
يا غربتة يا غربتة
__
شما تطفي الضوة بأديك..لو الك طلعت كريمة
يطيح دمعك طفله طفله..وزينب وعثرات هيمه
وقف عايش للمصيبة..منين ما تندار خيمة
ووين ما تسمع بطفلة..يفز طشت فوكاه يتيمه

مذهب اهل الدمعة منك..من بواجي عيونك
بحرملة تفز من منامك..وجيب اليسكتونك
ومنحر يصد منحر
نار خيمة وعسكر
يا غربتة يا غربتة
_____
حته لنتهلوا بعلمك..وكفو بكل شده ضدك
ماد ايدك خير الهم..ومدو السم اعلجبدك
وهانت وياك المصيبة..وياك بالتغسيل ولدك
ومو حصيرة ونعش شالك..وچفنك امن احرام جدك

وي كل موته لولدها..الزهره تنشغ يمه
الماتت وكسرة بضلعها..وين ابنها تضمه
تحضرلمن تكدر
نار خيمة وعسكر
يا غربتة يا غربتة
____
اليوصي بدار جده..غير عامر باقي داره
بصحن ابو الاكبر الصادق..يوصي ويحث عالزياره
الصدمة للحاول يزورة..لا قباب ولا مناره
اوي الترب ابن الزجية..اويه الترب صاير مزاره

العلك وين انشده كلي..لو كصدنه انزورك
المن انسلمهن المن..جايبين انذورك
يمته صحنك يكبر
نار خيمة وعسكر
يا غربتة يا غربتة

#ياعلي
لمولاتي فاطمة المعصومة صلوات الله عليها

دخيل الغيرت حالي..الدلتني على الحسره
وصحره گلبي كطعتها..بجمال اوردها الحمره

ام ومن صدك ام
لحد الرضا تكرم
زلم بس مثل الاطفال
يبجينه الهوه بقم

گلبي الذبل من دنياه
مولاتي تمسح فوگاه
وتتجدد بصدري الاه..معصومه

لحسين سوت عشاگ
ماي اللطف يمها انضاگ
رحمه تصب عالمشتاگ..معصومه

بالحس ندرك الرحمه..وبالحس ندرك الطاف
بس رحمتها معصومه..شوف العين تنشاف
_
الجداوه اكبال گبتها..يفتح من كرمها ابيوت
اليجدي اباب ياقوته..اكيد تكرمه بالياقوت

شكبرها الصار خادم
لياقوتت هواشم
طيور امجرحه نريد
نحط بعش فواطم

تغيّر بديها المقدور
الطبلها بجناحه اكسور
من عدها يطلع مجبور..معصومه

لأعذب مشاعر ينبوع
وكل التطلبه مسموع
عش فاطمي كله دموع..معصومه

دريت ابابها الدافي..حته الرحمه اصناف
وبس رحمتها معصومه..شوف العين تنشاف
____
عله گلبك اذا تمسح ..گلبك يصفه بس الهم
بقم من طبت وكعدت..حولها العطف قمهم

قم ما قدسوها
لوما بت ابوها
ماتت فاتحة العين
مشتاگه لاخوها

بحنيته اخ وأب جان
مثل الفراش ابستان
جانت تطوف السلطان..معصومة

شوگ الاخت سن قانون
وخلت الناس اليبجون
لصحن الرضا يشتاگون..معصومة

عطر هالرحمة نشتمه..بعطر ممدوح الاسراف
وبس رحمتها معصومه..شوف العين تنشاف
___
الوكت وي كل اسم فاطم..يذب ضيمه ويحد سنه
لا معصومه مرتاحه..ولا جدتها تتهنه

بنات الزهره يا يوم
ينسن طاري الاهموم
الامها فاطمة تصير
المصاب اعليها مقسوم

اصل المصايب والصار
من باب مشعول بنار
لاجمهه ذاك البسمار..معصومه

اتحسست مولاتي احزان
بالزهره حاطت نيران
يخنكهه ذاك   الدخان..معصومه

رغم كل هالجرح تكرم..گلب بجروحه شفاف
وبس رحمتها معصومه..شوف العين تنشاف

اللهم عجّل لوليك الفرج

نسمه ترفه وغيره..قمر العشيره..بروحي
قاسي بس احنين..بدمعه حبه يبين..بروحي

شما اموّت كلبي يحيي من جديد
تارس ايدي وهوه باقي ابلايه ايد
________
تيبس شفتي لمن احجي بالغير
واسم عباس اليرطب السوالف
فرق بين الاحب وانه مرتاح
وفرق بين الاحب وانه خايف

انه الخايف يعباس..واحب خوفي بمحبتك
وعكس كل اليحبون..احب وما رسمتك
اخاف برسمي الكاك..مي ماكو بجربتك
كبرت بروحي سگاي..شلون افطرها شفتك

خوفي منك مفتاح..بي اطب لخدمتي
انا عبُد العباس..حلمي عبدك مُنيتي
هوه ريشتك مولاي..هوه عيّش ريتي

نسمه ترفه وغيره..قمر العشيره..بروحي
قاسي بس احنين..بدمعه حبه يبين..بروحي

شما اموت كلبي يحيي من جديد
تارس ايدي وهوه باقي ابلايه ايد
_______
يحاكم مملكة عين اليحبون
الدمع بيديك مو بعيوني محبوس
يالمالك حرس بحدود الاخيام
وكلمن حب خيم ضل بيك محروس

غصباً عن الايام..اعلبيبانك تردنه
شلنه بهوسة الناس..اذا عباس عدنه
عطاشى الحب اجيناك..دخيلك لا تهدنه
صب مايك يسكاي..عطاشاكم بعدنة

يابوفاضل بحماك..وستري منك يا قمر
يا قضاء العشاك..انته للخادم قدر
لا مفر للعاداك..ولا لليحبك مفر

نسمه ترفه وغيره..قمر العشيره..بروحي
قاسي بس احنين..بدمعه حبه يبين..بروحي

شما اموت كلبي يحيي من جديد
تارس ايدي وهوه باقي ابلايه ايد
_______
مروة تنكط وما تنشف بيوم
ونريد تصب اعلينه امروتك هاي
ضال الماي عدنه وخير الجفوف
ومو كل جف يصبه يصير سكاي

السگه امن عيونك يفيض..وعليك العطش مكتوب
العنه اتدير العيون..يضل مولاي منهوب
نضرتك محكمة شوك..تنهي وتأمر اكلوب
تقرر ياهو مبعود..تقرر ياهو مجذوب

بشاربك يا عباس..خلني لخيامك وفي
ذلتي وقوتي وياك..ولطفي كله ومرهفي
كلبي يشعر مولاي..انته تصبح متُلفي

نسمة ترفه وغيره..قمر العشيره..بروحي
قاسي بس احنين. بدمعه حبه يبين.بروحي

شما اموت كلبي يحيي من جديد
تارس ايدي وهوه باقي ابلايه ايد