2021年4月9日 愛丁堡公爵與世長辭

菲臘親王出生時為希臘及丹麥王子，係佢1歲個年，希臘發生軍事政變，皇室舉家逃離。當時佢地為左逃離軍政府追捕，要藏匿係生果籃之中，及後輾轉先流落到英國投靠當時係皇家海軍服役既舅父 蒙巴頓勳爵 (Lord Mountbatten)。

成長既過程大部份都係蘇格蘭既寄宿學校度過。係1939年，由於自細對行船既興趣，以及回饋英國對佢地接濟，係佢18歲個年加入皇家海軍，亦都因此結識到當年仲係13歲既英女皇。

隨住第二次世界大戰係1940年全面爆發，佢正式服役首先就係太平洋艦隊，其後再調派到地中海艦隊。係1944年佢又再次係太平洋艦隊服役，以及參與當年光復香港既儀式同安排。

戰爭結束後既1947年，菲臘王子同伊莉莎白公主成婚，宣布放棄所有外國皇室頭銜，正式入籍英國同改母姓蒙巴頓。

1952年伊莉莎白二世登基，身為王夫既佢亦都啱啱成為皇家海軍中校。但係無奈之下，佢必需停止係軍隊服役，以專注係以後既皇室義務。自此，一做就做左接近70年。係加冕儀式，佢堅持引入電視直播，開創左皇室既先河，亦都為後黎皇室改革建立左一個好開端。

1959年佢再次踏上香港既土地，帶黎一份禮物，由香港人設計，皇家紋章院修改，女王頒佈敕令批準使用，今日大家耳熟能詳既香港紋章。及後佢亦都隨女王分別兩次踏上香港。

係佢踏入中年既時候，親王仍然挑戰多項既運動，勇於挑戰既精神亦都表現係佢既公益活動上面。1956年由佢設立既愛丁堡公爵獎章，就係鼓勵世界各國既年輕人強身健體。時至今日已經超過140個國家參與計畫。包括香港。

係晚年，佢一貫既風趣幽默仍然為世人津津樂道。除左身份力行鼓勵年輕人強身健體之外，佢既勇氣，智慧同幽默感，作為一個父親丈夫，定係一個男人，毫無疑問都係無可挑剔既榜樣。

親王既蒙主寵召除左象徵一個偉大舊時代既結束，仲係一個考驗究竟新時代既人可唔可以繼承佢既精神，開創一個可以令我地引以為傲既新時代，見字飲水。

希望大家禮拜日禮拜一，如果得閒經過英領或者愛丁堡廣場，可以停落黎，買枝花，懷緬呢位對香港光復有重要影響既人。

#係最好既時代亦都最壞既時代
#身體就係革命既本錢

0706 銅鑼灣sogo