tg-me.com/swingandbangclub_hk/306
Last Update:
社令生涯
160小時社會服務令，要一年內完成，如果每日要做八個鐘，就要做廿日，話多唔多，話少唔少，因為唔想影響人正常工作，每星期至少出席一次以上就可以，當然想要多日，儘快完成都可以。
第一次工作地點係柴灣某社區中心，我響地圖搵過，已經唔肯定係邊間。當日負責砌磁磚，有位導師教識我撈水泥，點樣貼磚上牆，點樣將磚𠝹開去填細位，亦比自由度我發揮，我就利用唔同色既磚砌出特式花樣，當時有影相，因為係社令既第一日，人生第一次學做泥水砌磚，好應該留個記念，可惜我響電腦搵左幾晚都係搵唔到。
社令工作主要係建設勞動類，未有聽聞會派去做冷氣房既文職工作，就算我犯既係「發放淫褻性物品」，屬於科技罪行，都唔會比我用我既專長黎回饋，幫政府發放宣傳資訊，教小朋友老人家上網搵資料等等…一樣將我同其他犯打交、店鋪阻街、賣老翻、欠交罰款既響一齊，要痞低起身、身水身汗咁做粗活，連白花油王子都要響大潭油護土牆，不過由於佢係名人，加上犯非禮的士司機，出名加上出「色」，郊遊經過既人都對佢指指點點，帶騷擾性，後來就安排佢去比較人少同埋靜既地區工作。
除左砌磚牆，之後同樣有試過去赤柱大潭童軍總會用油漆翻新會內設施。我算係做得比較認真既學員（有聽過帶住我地既社工，用「學員」呢個稱呼黎介紹比單位負責人）對被派既任務都會認真完成，儘力做到最好，我唔當自己係受緊罰，我當自己係學緊野，體驗緊生活，所以都輕鬆愉快。反觀其他人，唔少都係冤口冤臉，得過且過咁捱時間。
唔知係唔係因為咁原因，中後期大部份時間都係被派去近南昌街既聖公會李嘉誠安老院，照顧老人家，比較舒適同埋無咁悶。
初期獲派既工作，差不多次次都唔同地方，遇到既學員都唔同，而工作大多數係獨自執行，我唔食煙，唔需要「透氣」，因此同其他人無乜交流，一聲hi，一聲bye就算，而響安老院，由於進駐時數長，次次都主要係果班學員，加上好多時需要合力完成任務，因此就好快混熟。
當大家見左幾次面，覺得都係玩得講得笑，就開始夠膽問「你衰乜野？」，當然明知唔會有械刧、殺人、綁票呢類大茶飯，大家講出黎既都係比較「溫和」或「勇猛」既罪行，即如上邊提過既類別，從未聽話自己衰高買（唔明偷野點解叫"高買"，上網查一查，原來…舊時人們對竊賊的委婉稱呼，指“買”東西不用付錢，手段高明。此語曾流行於20世紀初或更久遠的時代，後來不再流行，但香港仍保留，如商店裏的警示招貼：“嚴拿高買，送官必究”。）、偷窺、偷拍、欺詐、非禮、醉駕等人格陰險失德類罪行，我坦白講我係犯「發放淫褻性物品」算係當中最樣衰既罪名，事後諗下都覺得自己傻，話會員犯會規比我打到腦震蕩咪好囉。
橫掂又唔會好似電影咁有阿sir爆我地犯乜野既，講乜都得啦…
BY HK Wonderland 🇭🇰
Share with your friend now:
tg-me.com/swingandbangclub_hk/306