tg-me.com/ProblemsOfMedicine/195
Last Update:
من كام يوم كنت بعمل عملية ترقيع شرايين تاجية لمريض عنده قصور في الشرايين التاجية ..
بعد ما نام المريض و تم تخديره و احنا بنفتح الجلد توقف قلبه ..
اه قلبه وقف ..
تماما ..
شيء بيحصل عندنا ، اه مش معتاد ، لكنه بيحصل ..
فتحنا بسرعة شديدة عظمة القص و غشاء التامور المحيط بالقلب و عملنا انعاش قلب داخلي ..
و ادينا ادوية تساعد القلب و الدورة الدموية ..
المريض دخل في حاجة قاتلة تانية اسمها ارتجاف بطيني ، صعقنا قلبه كهربائيا ٣ مرات ..
و بعدين ربنا كرم و استعاد نبضه بضغط منخفض و بعدين اتحسن مع الاجراءات الطبية اللي عملناها ..
كملنا الجراحة و خرج الرعاية ..
اول معلومة ان حدوث هذا الموقف في دولة زي امريكا يجعل من نسب الوفاة اعلي كثيرا من المعتاد ..
ده في امريكا ..
ثانيا .. المخ بيتحمل توقف القلب او الضغوط القليلة من ٣ الي ٥ دقائق قبل ان يتضرر ضررا فادحا لا يمكن اصلاحه ..
ثالثا .. في فترات توقف القلب اعضاء الجسم مش بيصل لها دماء فممكن تنتهي و تفشل حتي مع عودة الضغط الطبيعي لاحقا ، ده ممكن يحصل في الكلية و الكبد و غيره ، فشل الاعضاء دي يزيد جدا فرص الوفاة مهما عملت ..
السؤال ..
هل حضرتك متخيل مقدار التوتر الرهيب اللي عايشته انا و كل الفريق الطبي في الفترة دي ..
هل حضرتك متخيل ضغوطنا احنا و نبضنا وصل كام في الفترة دي ..
متخيل شعور انك تعمل جراحة لمريض انت مدرك انه ممكن ميطلعش من العملية او ميفقش من الجراحة عشان مخه انتهي او يموت لان اعضاءه تضررت ..
متخيل توتر الناس حتي استفاقة المريض المعتادة بعد ساعات ..
الحدث ده بيحصل في اي مكان في العالم ..
مضاعفة معروفة في مرضي قصور الشرايين التاجية اللي بيتعرضوا لتدخلات جراحية او بالقسطرة ..
مضاعفة مش بتحصل كتير لكنها واردة و قاتلة ..
تفتكر احنا ذنبنا ايه انها حصلت ..
ده امر قدري لا دخل لأحد به و لا يمكن التنبؤ به او تجنبه في افضل مراكز طبية في العالم ..
و معدل وفاته عالي في افضل مراكز طبية في العالم ..
هل احنا كأطباء نضمن الحياة او الموت ؟
نضمن ان مريض بيعمل اي تدخل مهما كان سهل ميحصلوش مضاعفات ؟
مفيش كده في اي مكان في العالم ..
انت بتعمل اللي عليك ، بتحاول تقدم العلم و الطب للمريض و الشفاء من عدمه بيد الله ..
حالات الاهمال معروفة و عقابها معروف في كل العالم ..
احنا مش عجبة ..
لكن الموت وارد لاي مريض حتي لو داخل يفتح خراج بسيط ..
ده الطب ..
هو ده حقيقة المرض و العلاج و الموت و الحياة ..
طبيب بيخدر سيدة بتولد ، تدخل يبدو سهل ، لكن فيه نسبة وفاة مسجلة حتي في امريكا ..
معدل وفيات السيدات الحوامل بنهاية الحمل في امريكا ٢٢ كل مائة ألف ..
معدل معروف و مسجل ..
في نظام طبي قوي و عميق و مكلف جدا ..
ممكن للاسف تكون بتخدر شابة بتولد فتموت بأسباب لا دخل لأحد بها ، و ليست خطأ طبي او اهمال ..
يكون عندها حساسية مفرطة لعقار مخدر و ده لا يمكن توقعه قبل التدخل ، يكون عندها مشكلة في كهربية القلب كامنة و غير مشخصة و ده لا يمكن توقعه ، يكون عندها تضخم جدار ما بين البطينين الجيني و غير مشخص و لا يمكن توقعه ، يحصل ان تسرب السائل الأمنيوسي من حول الطفل لأمه فيحصل رد فعل حساسية مفرطة قاتل لا يمكن توقعه او علاجه مهما فعلت ..
ده بيحصل في امريكا و اوروبا ..
لا اظن ان حد هناك طعن طبيب تخدير في حالة مثل تلك بهدف قتله ..
لا تذهب تلك القضايا للمحاكم من الأساس ..
الناس تتقبل الاقدار و تتفهم ان هذا وارد مهما قدم النظام الطبي ..
نحن كأطباء لا نحيي و لا نميت ..
تلك قدرة إلهية ..
نحن نلتزم بتدخلات تعلمناها و اخدنا بها اجازة علمية و تصريح بممارسة تلك المهنة و حصلنا لاحقا علي ماجستير و دكتوراة لمزيد من الاجادة و الاستعداد ..
المريض بتاعي فاق بأمر الله و عاش و بقي كويس الحمد لله ..
فضلت للساعة ٣ الفجر تاني يوم منتظر يفوق ..
لا كلت و لا شربت و لا نمت ..
صدقني و انا مروح كان عندي احساس انه هيموت رغم كل ما فعلناه ..
لكنه عاش لان ربنا كاتبله انه يعيش ..
احنا تعبنا و الله يا اهل مصر ..
فعلا تعبنا ..
لله الأمر ..
اللهم رحمة ..
د.علاء عمر
BY Problems
Warning: Undefined variable $i in /var/www/tg-me/post.php on line 283
Share with your friend now:
tg-me.com/ProblemsOfMedicine/195