tg-me.com/alshaeraqeelalkadhmi/12463
Last Update:
❇️ قصائد استشهاد مولاتنا الزهراء عليها السلام
صاحت املاك السمه فاطمه يا فاطمه
-------------
سيد الأكوان ودّع دنيِته
وعگب عينه اعليه انقلبت امته
وانتي أول جرح دامي بمهجته
من هِجَم طاغوت الامه وزمرته
مَقدَم الشر مَقدَمَه فاطمه يا فاطمه
--------------
اتقدّم الطاغوت واعوانه بغضب
والاملاك البالسمه تشوفه بعجب
لَملَم احقاده وشعل بيهه الحطب
اوعلى الباب تصاعد لسان اللهب
وناره ظلت مضرمه فاطمه يا فاطمه
-------------
دِفع باب الدار واشتـدّ الأنيـن
من كَسِرْ ضلعچ على سگط الجنين
والملايك ناحت بصوتٍ حزيــن
واعتلت آهات جبريـل الأميــن
وناده والمدمع همه فاطمه يا فاطمه
-----------------
انرِسَم جرح مصابچ بوجه الزمان
اوشجرة التفاح ناحت بالجنان
المنهه كوّن معدنچ رب الاكوان
يوم أسرى بوالِـدچ لاقدس مكان
و بل معارج كرّمه فاطمه يا فاطمه
----------------
شجرة التفاح تنعاچ بدمع
غصن من عدهه انكسر ويّه الضلع
والحـزن عمّ السماوات السبِـع
بس جنان الخلد فرحانه وتشع
لجيّتچ متبسّمه فاطمه يا فاطمه
------------
انعصر گلب الدين وي عصرة الباب
وزلزل اركان العرش هذا المصاب
ناحت بهل يـوم آيات الكتاب
وگلب سيد الكون بالآهـات ذاب
ونصب باسمچ مأتمه فاطمه يا فاطمه
--------------
ناح لمصابـچ اميـر المؤمنيـن
وللحسن لاحت سهـام الظالمين
وعلى المحسن هلّت دموع الحسين
وعرف نار الباب تاخذهه السنين
وتنتقل لمخيّمه فاطمه يا فاطمه
---------------
عقيل الكاظمي / بغداد
BY الشاعر عقيل الكاظمي
Warning: Undefined variable $i in /var/www/tg-me/post.php on line 280
Share with your friend now:
tg-me.com/alshaeraqeelalkadhmi/12463