tg-me.com/storykaligi/76696
Last Update:
🔮🍃🔮🍃🔮
🍃🔮🍃🔮
🔮🍃🔮
🍃🔮
🔮 123 ..
📚 😍 📃
📖 روايـــــــــــــة ✍🏼
{ أوصيك بقلبي عشقا }
📖🖌 @storykaligi 🔮🍃
مازحه "أدهم" بلطفٍ :
-زي ما انتوا. أنا ممكن أحط نفسي تحت الطلب. بدوام جزئي يومين في الأسبوع !
تضاحكوا بمرحٍ أمام الغرفة الخاصة لشقيقته ...
أما بالداخل فقد بقيّ "مراد" برفقتها، لم يتركها طرفة عينٍ، بينما ذهبت "أمينة" لتحضر "لمى" من المنزل و بعض الملابس من أجل ابنتها
تنعمت "إيمان" بأحضان زوجها الدافئة، خائفة، تائهة، ضربات قلبه المنتظمة تعيد إلى نفسها الأمان، يميل "مراد" برأسه على جبينها مغمغمًا :
-مش عايزة تقوليلي حاجة ؟
طال انتظاره لثوانٍ، ثم جاوبته بصوتٍ مهزوز :
-مش فاكرة حاجة. كل إللي جاي في بالي سيف.. صور من كوابيس قديمة كنت بشوفها. بس مش فاكرة أي حاجة. آخر حاجة فكراها أنا و انت كنت في البيت. كنت بتديني الدوا. و بعدها صحيت هنا !
و صمتت لبرهةٍ، لتسأله :
-و انت ؟
ندت عنه تنهيدة عميقة و هو يرد عليها برفقٍ :
-أنا كمان مش فاكر أي حاجة. كأني نمت عادي و شفت لمحات من أحلام أو مواقف قديمة.. مافيش حاجة محددة !
رفعت "إيمان" وجهها لتنظر إليه في عينيه مباشرةً، و استوضحته بفضول :
-قولي ليه عملت كده !؟
-إيه إللي عملته ؟
-ليه خاطرت بحياتك. شربت من إللي اتحطلي في العصير. إللي بنتي حطته ليا !
مراد بجدية : إيمان. احنا اتفقنا. لمى مالهاش ذنب. هي اتصرفت غريزيًا. كانت حاسة إنها خسرتك و عايزاكي ليها لوحدها. و هي اعترفت لي إني أنا إللي كنت مقصود مش انتي
-بردو ماتتوهش الموضوع. قولي ليه عملت كده !؟؟
احتفظ بالرد لدقيقةٍ.. ثم قال صراحةً :
-أنا مافكرتش لما خدته من الست الدجالة دي. افتكرت إنهم سمموكي. فكرة إني خسرتك للأبد مقدرتش أقبلها. قلت مش هاسيبك لوحدك. إللي يسير عليكي لازم يسير عليا.. أنا عمري ما اتحطيت في اختيار. بس إنهاردة حاسس إني اتخيّرت ما بينك و بين هالة. جت في بالي دلوقتي حالًا. لو وقفت جمبك دلوقتي منغير قيود تمنعني عنها. هاسيبها هي وهاختارك انتي. انا أصلًا اخترتك يا إيمان. اخترتك !
و فجأة رآى البريق العسلي لعينيّ المها خاصتها، امتلأت عيناها بدموع السعادة، و ارتفعت أناملها ملامسة وجهه و هي تقول بصوتٍ مثقل بالعاطفة :
-و أنا ماحبتش غيرك. و لا عمري اتخيّلت حياتي غير معاك.. انت حياتي يا مراد ...
كانت تلوح قبلة في الأفق خاتمة حديثهما الحميمي، لولا ظهور "أدهم" عند مدخل الغرفة متنحنحًا :
-مش قادر أصدق إني بتعامل مع اتنين متهورين و مضطر أستحملهم زي أخواتي طول عمري !
نظرا كلًا من "أدهم" و "إيمان" إليه، ابتسما له و قال "مراد" :
-قدرك إننا اخواتك فعلًا. لكن انت مش مضطر تستحمل تهوّرنا. أنا شخصيًا هاعفيك من ده قريب جدًا
عبس "أدهم" متسائلًا :
-اشرح من فضلك !
نظر "مراد" إلى وجه زوجته ذي التعبير المستغرب و أجاب :
-أنا قررت أخد إيمان و لمى و أرجع بيهم على لندن. هانعمل فريش ستارت كلنا.. إيه رأيك يا إيمي ؟
رفرفت "إيمان" بأهدابها قائلة :
-مش عارفة. أنا عمري ما فكرت إني أسيب هنا و أسافر !
-مش هاتكوني لوحدك. أنا و لمى معاكي. و ماما و بابا و تيتة نازلي.. هناك هانبدأ من جديد. هانأسس حياتنا و عيلتنا الكبيرة. و أكيد هانزور هنا كل فترة. صدقيني التغيير ده هاينفعك. هاينفع لمى كمان. هانبعد عن أي حاجة ممكن تضايقنا
صمتت "إيمان" بتفكيرٍ، ليقطع "أدهم" حبل أفكارها قائلًا :
-أنا شايف إن مراد عنده حق. سفرك هو الحل الوحيد لمشاكلك كلها يا إيمان.. بيقولوا الإنسان مش ممكن يبقى كويس في المكان إللي تعب فيه. انتي قدامك فرصة تغيّري حياتك. أنا بشجع قرار مراد !
ابتسمت "إيمان" دون أن تعطي موافقة نهائية ...
و في هذه اللحظة انضمت طفلتها برفقة "أمينة" إليهم، و ركضت "لمى" رأسًا إلى أحضان أمها باكية :
-مامـي !
حملها "مراد" من ذراعها ليجلسها على حضن "إيمان".. تقبلتها دون أيّ تعنّت أو غضب
بل ضمتها "إيمان" بحنانٍ و أخذت تمسح على شعرها، لتجهش الصغيرة بالبكاء أكثر مغمغمة في صدر أمها :
-مامي. أنا آسفة. أنا ماكنش قصدي. تيتة راجية ...
-خلاص يا لمى ! .. قاطعتها "إيمان" بحزمٍ لطيف
شددت ذراعيها من حولها مضيفة برفقٍ :
-أنا عارفة كل حاجة. و مش زعلانة منك.. مش زعلانة يا حبيبتي
ابتعدت "لمى" قليلًا لتنظر في وجه والدتها قائلة و دموعها تجري فوق خدّيها :
-أنا مش هعمل كده تاني. و هاسمع كلامك انتي و بابي مراد.. أنا بحبك يا مامي
أحاطت "إيمان" وجهها بكفّيها متمتمة بحبٍ جارف :
-و أنا بحبك يا روح أمك. بحبك أوي !
و عادت لتضمها مرةً أخرى أمام نظرات السعادة المحيطة بهما من العائلة
أخيرًا.. اكتملت العائلة !
🔮📚 @storykaligi 🔮📚🖋
🍃🔮
🔮🍃🔮
🍃🔮🍃🔮
🔮🍃🔮🍃🔮
BY ❤️📝 روايات وقصص مميزة 📝❤️
Share with your friend now:
tg-me.com/storykaligi/76696